Am halbi Füfi bini uf und ha mis Lager abbroche. Also äs bizzeli hets sich sälber abbroche. DStangene häts a zwei Orte igrisse sogar no nächli wägtätscht. Aber drum kümmere ich mich nöd, da i no rächt müäd. Alli andere sind au no am pfuuse, woni am Sächsi wieder dur dä Spinnepfad zur Haltestell bin. Ich bi fasch ä Halbstund zfrüäh. Allerdings hets no Büs dezwüschet, aber die hend so ä Fuässnote. Spöter hani usegfunde, dass wohl die Büs no en churze Abstächer ind Industrie machet. I de Stadtmitti bini denn die zwei Kilometer zum Fährehafe gloffe. E knappi Stund vor de Abfahrt erreich i sGebäude und han fasch usversehe de Lieferanteigang gno. Han denn aber dAbfahrtshalle doch no gfunde und sBillet poschtet. Am Viertel ab Nüni hemmer denn dörfe uf dFähre. Si bringt mi i rund zweiehalb Stund zur nördliche Hafestadt vo de Sado Insle.
Ich bin as erschts am entsprächende Bodeabteil gsi, aber da es nöd so eifach isch us de Wanderschuä schlüpfe, hend die inzwüschet chömende Lüüt dFänschterplätz beschlagnamt. Ich bin also Gegenüber vom Fänschter ghocket, wo es paar Wiiber Platz gno händ. Het vo det guäti Wiitsicht gha, bis seinte Tüpfi de Vorhang zuä gmacht het. Toll, dä hett si au chönne anderswo ane. Si hend dänn gschlafe und zwüschetdure no ihri Haar gstreckt. Au wenni kein Unterschid zu vorher han chönne feschtstelle. Also hani mi andere Sache gwidmet wie dInformatione über dInsle. Mir gfallt de Ort immer meh. Es het so vill Sache woni gärn gseh hetti, aber dSaison falsch isch. Päch gha. Zu minere Überraschig chunnt 'Trommel' Gruppe Kodo, woni ich mal im KKL Luzern han dörfe go luägä, vo da. Au hends da de Ibis. Eigentlich nöd sonderlich schös Tiär, aber ich finds luschtig. Si heisset in Japan Toki. Es hät än Toki-Park und dä möchti gseh, also wird nöd gloffe, sondern Vögeli bsuächt. DFähre isch no chic und het uspolsteri Chinderrüm, Huustiärrüüm, Restaurant und Ussichtsterasse. De Hafä uf de Insle isch voll mit Souvenirläde. Eine verkauft voll cooli Tragtäsche: En Ma miteme Toki underem Arm und duregschriche. Obe stoht: Don't take toki home. Also nimm kein Toki mit hei. DBusfahrt het mi zersch nächli verwirrt, han gmeint ich fahr westwärts statt ostwärts. Denn hani gmärkt, dass das Wasser uf fahrtrichtig rächts nöd sMeer isch sondern än See. Also voll im richtige Bus, nur nächli müäd... Nache Viärtel Stund bini vorem Toki-Park gstande. Zersch ischs in Informationsruum gange. Mit Film, Skelets, Usgstopfti und so wiiters. De Toki heisst uf latinisch Nipponia Nippon also so was wie Japan Japan oder ächt de japanisch Japaner. I jedem Fall sehr japanisch. De Toki het früäner im ganze Land gläbt, bis vor äs paar Jahr nur no uf dere Sado Insle und no es paar Uuswanderer in China. Vo denä hends zrugg ghollt und da wieder agsiedlet. Denn verschidenii Massnahme igleitet wie sRiis nüm chemisch zdünge und afangs zuäsätzlich no dAasidlig vo Amphibie und Fischli i de Bäch. Jetzt läbet da au wieder frei es paar ume. Jedoch dä letscht ursprünglich iigeboreni Ibis isch im 2003 gstorbe. Dä isch halt no zimli berüähmt da. Imene Huus näbetra het mer denn ine grossi Volière dur Glasschibe gse. Es sind öppe sibe drin gsi. Eis sogar am brüäte. All diä andere Volière sind nöd für Bsuächer. Bin chlii enttosche gsi, will ich so öppis wie in Hokkaido mit de Kranich erwartet han oder gar wie dDschungelhalle im Papillorama. Wos übrigens au en Toki het, oder zumindescht Ibis.
Denn het aber mis Tourismushärz höcher gschlage, woni gseh han, dass us em Toki e Produktmarke gmacht hend und vom Sake über Marke bis zur Milch alles mit Toki versehe gsi isch. Us de Milch Tetra loot sich sogar e Toki-Schriiberbächer forme mit usgspannte Flügel. Aber au dWegsperrige sind Toki's gsi.
Nach dem Bsuäch bini zum nächschte Dörfli gloffe und has grad no rächtziitig wieder uf dä Bus gschafft. De hät mi denn is Städtli Sawata gfahre. Vo dett us bini Richtig Autocampingplatz gloffe. Er isch nöd grad würkli im Center. Und wien i denn ussegfunde han au no nächli i de höchi. Und grad liächt näbet ämä Damm. De Wäg hät und hät nöd wellä ände. Zwar isch är dur wunderschöni Landschaft vo Riisfälder, Tanne- und Bambuswälder gange, aber immer nächli ufwärts. DBefüürchtig isch meh und meh cho, dass es denn wieder en Autocampingplatz isch, wo reines Zälte nöd erlaubt. Aber muäss ja mine Bruäfskollege in Japan au vertraue. Also wird wiiters gloffe. Es sind so füf Strassekilometer gsi, aber händ sich definitiv länger agfühlt. Und nachem Iigangsschild ischs numol en Kilometer gange. Äntli acho isch niämert det gsi, aber ä Nummere zum wähle. Natürli hani kei Bürochlammere gha, zum zu minere Japanische Sim Charte zwächsle und au süsch nüt verglichbar dünnes. Schlussändlich hani halt mit em Schwiizer aglütet. Falls würkli nüt isch, chani denn sicher mit em Telefon vom Campingplatz de nächscht Schlafplatz usfindig mache. Also hani aglüütet und de Verwalter het versproche i 10 Minute zcho. Also bini uf de Stuähl ghocket und han mis vorher kauftä Turtestück als ZNacht gnosse. Chum fertig, het sich öppert vo hine agschliche. Han gmeint es seg de Verwalter aber isch nur de Gärtner gsi, wo uf em Campingplatz wohnt. Dä Verwalter het ihm aglüüte und so isch er füre cho und het sganz Administrative gmacht. Äs isch nächli ä tüüri Sach gsi, aber min Platz isch cool. Es het Steckdosene, äs eignigs WC Hüüsli und es Lavabo mit Ablag. Ich bin denn so frei gsi und han nacheme Hammer gfröget, um mis Dilemma vo hüt morge zflicke und zluägä, öb i allefalls ab jetzt muäss sZälte ganz abschriibe. Sie hend sogar zwei bracht und wos dStangene gseh händ, sinds mit Hammer, Kupferdraht und Isoliärband dehinder. Ich han rein gar nüt müässä mache. Si hend mär zwar die eintä Teilstangene zämäkläbt. Das chönnti no nächli unpraktisch si bim zämäpacke. Natürli hemmer nächli gredt und ich han es bizzeli verzellt, was i erläbt und wieso ich diä Reis mach. Per Zuäfall isch de Gärtner Aikidoka und het mi denn gfröget, öb i nöd Luscht het go zuäluägä. Natürli hani die allergröscht Fröid dra gha und zuägseit. Nachdem sZält gstande isch, bini churz go dusche und denn hemmer scho blitzartig müässä los. Mit em Auto simmer schnäll dune gsi. Im Obergschoss vonere Turnhalle isch denn en Holzruum gsi mit spezielle Trainingstatamis usgstattet. Au hets no fascht zwei Meter Iibuchtig gha. E würdigi Ehrdarbütig für de Aikidoobermeischter. De Gärtner het mi nächli komisch am Sensei vorgstellt. Wahrschinli het er nöd gseit, dass i Japanisch verstoh. Alli andere händ mi begrüässt nur dSensei nöd. Training zgseh isch Hammer gsi. Bim Ufwärme het mer scho gseh, dass die enorm beweglich gsind. Denn ischs zersch as Schwerttraining gange. Alli hend miteme Holzstab denn hundert Bewegige mit rechts, denn mit links und sGanze numol mit em andere Bei vore. Mir hend dÄrm scho weh tuä - nur vom Zuäluägä. Denn händs es paar Schnittreihefolge und Abwehr duregmacht. Nachere Stund ischs zum zweite Teil ohni Holzschwärt cho. Das wommer eigentlich kennt vom Aikido. De erscht Verteidigungsgriff wo si zeigt het, hani im Karate au scho mehrmals güäbt und deshalb kännt. Dana sind no Variante cho mit liächte Abwichigä. De nächscht isch nöi gsi für mi. En chline Schupf und de ander isch am Bode gläge. Nächli andersch und de het sogar ä Rolle gmacht. Jedi Üäbig hends sicher e Viärtelstund nonstop gmacht. Die sind im füf Sekundetackt am Bode gläge. Verruckt.
Interessant für mich isch gseh, dass vill Sache vom Jiujitsu und Sumo, sprich au vill Samuraitechnike. Was mich voll überrascht het isch sAgleg. Anschinen träget da nur dSchwarzgürt dä schwarz Hoserock. Diä andere alli - egal si scho praktizieret Wiisgurt und au en Gi wie im Karate. Natürli nächli apasst wie dÄrmel chürzer und so wiiter. De Gurt bindets au andersch. Au sinds nächli höflicher zum Gägner. Also vill höflicher. Zum Grüässä und verabschide vo jedere Üäbig wird chnüänd verbügt. Also eigentlich de höchscht Grad wommer süsch nur vor Kami, Buddha und wie die Götter und Erlüchter süsch no heisset. Susch hanis no niä gseh. Ich het wohl stundelang chönne zuäluägä. Aber isch nur zwei gange. Nach de eigentliche Stund hend diä junge Manne numol wellä wüsse und hend sich nonstop vo de Sensei am Bode rüäre lo. De eint het 36 gschafft, denn het si aber nüm möge. Am Schluss isch si glich no zu mir und eme andere Gascht cho. Ich bi au denn nonig ganz sicher gsi, öb si es toll findet, dass i det gsi bin. Oder villicht isch si eifach müäd gsi.
Ich bin total überrascht, was diä Insle alles bütet. Vorallem dFestivals sind teils einmalig und sehr vill typisch japanischi. Es überrascht mi nöd, wo dä Gärtner ( sorry chan mer sin Name nöd merke - aber er mine au nöd) gseit het: DSado-Insle seg s'chline Japan. Ähnlich viä Luzern-Vierwaldstättersee vo de Schwiiz. Drum fühli mi wahrschinli da scho fascht dehei.
Eigentlich möchti da vill länger bliibe...
Ach und ich bin no uf em Aikido Blog verewiget. Es bessers Gruppeföteli sött no folge.. hoffi..
http://aikidosado.blog.fc2.com/?no=160

ZFuäss: 25300, 20km, Fähre 67km, Bus 17km