Am Morge bini scho fasch fertig gsi, wo den de zweit usem Zelt chroche isch. En junge Töfffahrer. De het no unbedingt welle mit mir es Selfie mache. Wahrschinli geistere ich einmal meh im japanische Facebook ume. Am Sibni han mi den chlich no chönne los riisse und bin den dur dMilchstrass gloffe. Findi cooli Idee. Isch ä Strass vo öppe 3 km mit meischtens Burrehöf. Ich glaub si hend am Namittag au e Milchbar und me cha au go mälche. Aber so früä am Morge het mer nüt devo. Ich hets weisch wie gschätzt, wänn es statt dene Limonade und Kafiautomate so en Michomat ghä het. DMilch am Vortag hani leiderglich nöd chönne poschte, da das Glasfläschli wohl nöd voll bis zum Zältplatz cho wär.
DBurehöf sind erstundlich guät gpflegt - so wien ichs selte bis anhin gseh han. Nur en richtige Barry fählt. Zweimal isch mer so en Fäll-Balle bällend engäge gsprunge, denn de typisch japanisch Hund. Sind zwar härzig, aber so chlii für en Buurehof. Guät eine het irgend so e Pitbull Mischig gha. Bi de Chüä hani bis jetzt im ganz Japan nur Holstein gseh. Ich glaub dene Japser gfallt eifach das tschäggete.
Nach 6 Kilometer hani den mitere Bürin no nächli gsredt. Si isch grad am Garte mache gsi. Bevor i wiiters bin, isch si no schnäll öppis im Huus go hole. Hsn zersch nöd tschägget, was das isch. Si hets denn dechli ufgmacht und da isch de Yen abe. En igleite Knoblauch isch es gsi und die het mer en ganze mitgä. Isch zwar mega liäb, aber en Zeiä het au glanget. Ich reise ja schliesslich elei und hoffe doch, dass mir dB&B-Frau in Hakodate nöd de iitrit verweigeret. Ich ha den vordichtig en so en Zeiä aknaberet und uuuiiiii isch das fein gsi.
Churz dana isch es denn obsi gange. Bis jetzt bini ja immer verschont gsi vo dem oder besser gseit, ich has gekonnt vermiede. Ja jetzt isch es au klar, dass de Weg woni so stolz gfunde han e Passstrass isch. Wieder alles teert. Duruf isch es meischtens 10% gange. Immer schön Täfeli gha. Da all die Hügel bewaldet sind, hesch kein Ahaltspunkt gha, wie lang es no goht. Mit mim Gepäck, dere allzeit gägewertige füächte Hitz und Wulche wommer Sicht hetti, isch nöd so luschtig gsi. Ha defür ab und zuä es Eidächsli verschwinde gseh und zig Schmätterling und Libellene chönne beobachte. Uf de Strass ligget komischerwiis immer wieder emol so riise Insekte und Heugümpet uf Strass. Tot, aber nöd überfahre. Han denn überleit, öb ächt da dVögel die uf dStrass gleit hend. Damits grillierti Heuschrecke oder ebe Yaki-Gurasuhoppaa git. Nach vier Stund hani die 17 km und 530 Höhemeter sit em Zeltplatz gschafft gha. Dönt nöd nach vill ich weiss. Aber i de Schwiiz lauft mer au nöd i dem Klima und dem Gepäck ume.
Zu minere Begrischterig hets dobe so e Forschigsstation gha, wo als Usruäbstation dient. SBeschte: Sind hend die allerfeinscht Milch. Es sind zwei mega-fründlichi Herre det gsi. De eint isch grad mit Milch-Nachschub cho und het mi anschinend gseh ufelaufe. Er isch en Riise-Mammut-Fan und richtig niidisch uf min Tschäpper gsi. Anschinend gits die nöd zJapan. Ich hets em ja gä, aber de isch au nüm de nöischt.
Wännd sWätter guät wär würd mer de Hakodate-Berg super gseh. Leider chanen jetzt nur erahne.
Bim abelaufe sind die zwei extra no uf dVeranda use und hend mer vo det gewunke bis i nach zwei Ränk nümme zgsee bin.
Es het wunderschöni Tannene am Wägrand gha. Uf dere Siite hanis au chönne gnüsse. Isch nämli 7% abegange. Nur teils Töfffahrer hend dIdylle gstört. DPasstöfffahrer chönd anschinend nöd normal fahre. Ich ha mi so gfreut, dass ich hüt wird d30km knacke. Leider ischmer denn gnau ufem abeweg dBattrie usgstige. Aber zum Glück hani no en Schrittzähler als Armband, wommer jetzt het chönne ushelfe. Bine chline Trinkpause het sich no so es blöds 2cm-Chäferfich vom Baum falle lo und isch i mim Chrage glandet. Uuuiiii das hani gar nöd gääääärn.
DStadt nachem Pass het Nanae gheisse. Das isch 4-5 Zugstatione vor Hakodate. Wär zwar no e möglichi Laufdistanz gsi, aber für hüüt hani gnuäg. Vor Hakodate chömmet sowieso praktisch nur Industrie und Shoppingzenter. A dene verbi zlaufe isch so was vo langwilig. Drum gohts mit em Ein-Wage-Zug nach Hakodate und vo det no die 1.5 km zum Bed & Breakfast. Gschafft. Zielort erreicht.
Am Obig hani no skypet und ufgschribe, was i alles söt i de Stadt erledige. Die Lischte isch recht lang gsi, da ich vill uf die Ziit verschobe han. Also wieder Mal Prioritäte setze und engs Programm.

ZFuäss 40000; 32km, Zug: 14km