Das isch e schwirgi Ufgab hüt, so wenig wie mögli zlaufe. Aber es chämmt glaub nöd guät, wänni würd hüt planlos go laufe. Trotzdem müäss irgendwie ja au no was zum Schabuliärä ha und da isch kein Lade i de nöchi. Also gohts mit em Bus id Innestadt und det wird gInternerlet wiä nüt.
Um de Zeltplatz ume isch ä Art Vitaparkour und somit füährt äs härzigs Waldwägli zur Hauptstrass. En Teil devo nännt sich sogar Traumpfad. Ich fänd Alptraumpfad oder Spinnepfad passender. Ich han nöd emol im Zoo scho so vill Spinne gse. Wennd stoh blibsch und 360Grad dreisch chunnsch löcker uf 40 Spinne und de Wäg isch fasch 2Kilometer lang. Es sind alli vo de gliche Sorte mit hell-dunkel gstreifte Bei. Da hets inklusiv Bei bis zu 8cm grossi. Schöni Netz hends au. Aber me positivs chani dene böshexisch, kanibalischi, achtbeinige Dinger nöd anerchänne. Da einigi Jogger wohl de Wäg flissig gönd, laufi wenigstens i kei Netz ine. De wenige chrüzende Netz chani guät uswiche.
Äntli bim Bus acho isch mer ä Stund stadtiwärts gfahre. I de Büs in Japan hets übrigens drin immer ä Azeig, wo mer gseht wänn de Busfahrer de Blinker stellt oder uf dBrämsi stoht. Au git de Busfahrer per Luutsprächer Bscheid, wenn är losfahrt, somit weiss jede immer, wenns holbrig chönnt werde und mer sich muäss hebe. Am Bahnhof bini denn id Tourischtinfo und han jeglichi Informatione zur Sado Insle becho und Präfekturcharte. Au uf de Insle hend praktisch all Zeltplätz scho gschlosse. En Autopark und en Zeltplatz im Norde häts. Da de Autopark grad so 20km vom Fährehafe entfernt isch hani dä gwählt. Si isch sisch au sicher gsi, dass Zelt ohni Auto au goht. Dana ischs is Kafi gange. Han mini morgig Reis plant, da ich ja uf dFähre agwise bin nöd eifach chan loslaufe. Natürli set mer denn no überall nächli up-to-date si. Am Mittag ischs is nächschte Curry Huus gange und dana wieder in äs Kafi. Es het zwar schöni Schrein und Pärk gha, aber alli nöd im Laufradius vo hüt.
Im zweite Kafi ischs dänn wiiters gange mit plane und Mail beantworte. Dana hani i de nöchi no än Schribwarelade gsuächt, um no ä Hochziitscharte und Briäfpapier zkaufe. Da ich wiedermal nöd fündig worde bin, isch halt zur Poscht gange. Zu Ehre de Bruut hani au no e Serie Hello Kitty Marke poschtet. Denn ischs mit en Bus retour. Es isch scho wieder halbi Sächsi gsi. Zum Glück het de Zeltplatz no äs gäbigs Tischli und Stuähl gha, woni denn de Briäf han chönne schriibe. Han mer zwar Müäh gä, aber wär wohl schönner worde mit em Compi. Nach äs paar Stund isch au das Kunschtwärk volländet gsi und ich parat für is Zält.

ZFuäss: 10400 Schritt, 8.5km, Bus 30km

Jetzt bini scho zwei Mönet am Reise. Ziit wieder für es Resumé:

Auguscht 2.-31.
Reis in Tohoku mit 590km zFuäss (766000 Schritt) und 897km öffentlichi Verchehrsmittel.

Juli - Auguscht
Reis vo Wakkanai nach Niigata mit 1006km zFuäss (1313000 Schritt) und 2067km öffentliche Verchehrsmittel.