Neuer Tag, neue Stadt, neue Präfektur, neue Region. Ich starte am morge vo Okayama. Also eigentlich ersch am Mittag will i no en Kafi gnosse han und mitere Bänkeri gsproche han. Si isch zuminderscht öppert gsi wo mit Fremdwährige handiert.
Mit em Bummler bini inere guete Stund in Ako acho. Die Stadt isch am Südzipfel vo de Hyogo-Präfektur wo zur Kansairegion ghört. Eine E chlini Schlossstadt ohni Schloss. SGanze Städtli isch touristisch super gmacht worde. De Schlossparkschrein isch au sehr guet erhalte und het wohl no einigi Gschichte zverzelle gha.
Im eigentliche Schlosshof sind mit bsetzistei und Muure sind die verschidene Dienschthuser beschriftet und ihri Grössi gformt gsi. Am beschte isch jedoch sSchloss gsi. Eifach es Grüscht. Aber isch doch genial, wie mer glich e Gschicht mit nüt cha verzelle.
Nach einige Ziit no am Parkbank gnüsse und Agatha Christie lose, bini mit em Bummler nach Himeji. Die Tourischtestadt schlechthin, dank ere wunderschöne Burg. Erscht jetzt wird mir eigentlich bewusst, dass Kyoto gar nöd so wiit entfernt me isch. Trotzdem isch es min erschte Bsuevh da. En churze Bsuech i de Tourischtinfo woni ganz begeischtert vomene Plakat gsi bin, wommer en Punkt bi sinere Nationalität het chöne setzte. Recht vill Schwiizer sind im November da gsi. Uf em Weg zum Hostel, was glichziitig dHauptstrass zum Schloss gsi isch, hani sGfühl gha me usländischi Tourischte als Japaner zgseh. Nacheme Spaziergang dur en Park nebet de Schlossmuir bini zimli schnell im Gäschtehuus gsi. Es richtigs gmüätlichs Hostel imene traditionelle Huus. Verbindigswäg zu andere Teil vom Huus und de Iigangsbereich sind mit Chiis beleit gsi. Dezwüschet verschidenschti Murmle. Es het richtig bsundrig eifach usgseh. Am Abig bini denn no go zNacht poschte und bin uf em Weg fasch nächli übereifrig zumene Hundebsitzer gstürmt. Ich glaub er het glaubt ich spinne. Er het aber en Berner Sennehund gha und das het mich natürli grad as Dehei erinneret. Me gseht ja da relativ selte richtigi Hünd und de Berner Sennehund isch halt eifach min Liäbling.

ZFuess: 9km, 12800, Zug 85.4km