Uf de letscht Drucker hani uschegget und bin mit de Metro, wo sich nachere Station zum Zug umgwandelt het, nach Niji-no-Matsubara gfahre. Det hets en füf Kilometer lange Kieferwald. Luut mine Info eine vo de füf schönschte vo Japan. DBäum sind würkli rächt cool gsi. Recht amüsanti verzwigige. Irgendwiä han ich mich nächli schwär tuä mit em Weg uswähle. DBäum sind jewils so eleige gsi, dass mer schwär en Weg het chönne usmache. Nur dSpinne hend mer wieder es paar Mal zeiget, dass det scho lang niämert me dure isch. Müähsam. De Wald isch schnäll langwilig worde, sobald mer sich de Bäum satt gseh het. Ken Vogel, keis Eichhörnli,..nüt ussert die Spinne. Villicht ischs ja en Häxäwald? En relativ nöie Schrein isch no a de Autostrass versteckt gsi. Mit Fridensduube nebetra. Dana hani mi bemüät möglichscht schnäll as andere Ändi zcho. Det bini nämli nur no en Rank vom Städtli Karatsu entfernt gsi. Das isch mis Ziil für hüt. Underwägs bini no zwei drüü Hüser verbi cho, wo ihre ganz Vorplatz mit Figure vollgstellt hend. En unglaubliche Mix vo Stil.
Nach es paar Föteli vo de Bucht ischs zur Burg ufe gange. Vo dobe hets e wunderschöne Sicht über Insle und de Kieferwald woni gsi bin.
Nach e churze Verschnufpause hani numol e Pause gmacht im liächte Rägä, da grad zwei Tourischtegruppe is Schloss sind. Muess mi ja nöd grad da inemurxe.
Irgend en Typ het mi dusse agsproche. Bin nächli verwirrt gsi, will er nöd Änglisch mit mir gredt het, sondern Spanisch-Portugiesischi Wörter iflüsse loo het. Er het die Sprache anschibend Mal glernt. Es sind es paar Bilder verusse ufghänkt gsi vom örtliche Hauptfestival: Kunchi, wo aber ersch im November stattfindet. Er het mir versuecht dazue öppis zerkläre. Dana hemmer öis verabschided (hani zumindersch gmeint) und ich bin i id Burg. Es sind Schwerter usgstellt gsi, Bilder vo ähnliche Burge in ganz Japan, alti Chleider, Gebruchsmittel vo damals, Schriftrollene und au Lanzene und Bilder vo ihrne Walfängerziite. Plötzli isch de ander Typ wieder uftaucht. bin huärä verschrocke. Er het mer jedefalls no es paar Sache versuächt zerchläre. Da es eher offesichtlichi Sache gsi sind, hät mer meh und meh gmärkt, dass er nöd grad so intelektuell gsi isch. Orientierig het er au nöd. ZOberscht wer er fasch nur nachere 3/4 Umrundig wieder abe und er het mer nöd wellä glaube, dass Norde Norde isch. DUssicht isch jedefalls wunderbar gsi. Dur de Räge ischs sicher nöd optimal gsi, aber glich e herzigi Bucht. Dana simmer abe und uf dStadt zuägstüret. Er het mer no unbedingt wellä eine vo dene Kunchi-Wäge zeige. Ich bin eigentlich scho total kaputt gsi und han langsam aber sicher gnuäg vo sinere Begleitig gha - so liäb si wohl au gmeint gsi isch. Aber es het ja nöd gschadet, das Konstrukt go azluägä. Vorallem isch en Souvenirlade abaut gsi mit handgmachte Produkt. Wunderschön, aber alles andere als praktisch für Rucksackreisendi. Nach dem Warehuus, han i äntli chönne eleige wiiters - sprich zrugg id Stadtmitti zum Hotel. Es isch scho halbi Füfi gsi und so hani gsputet und bin vorem Hotel no zum Schrein. De isch richtig gmüätlich gsi und de Verwalter au nett. Obwohl ich churz vor sim Fiirabig acho bin. Denn ischs is Hotel gange. Kaputt.

Trotzdem hani nöd chönne schlafe und mini Luune isch entsprechend em Wetter am nächschte Tag gsi. Rägä und Rägä. Eigentlich hets selle zume Wasserfall go hüt, aber bis jetzt isch Kombination Rege und Wasserfall nie guät usecho. Also hani ume Nacht verlängeret, mich is Bett gschmisse, gschlafe und e japanischi Soap gluägt. Die Ganz=) Muäss au mal si, han ja schliässlich Feriä.

ZFuäss: 19800, 15.6km, Zug: 38km