Am Zältplatz vo Goishi hets a dem Morge grägelet. Das hät natürli das ganze Zelt-Abbruch-Prozedere no verlängeret. Am Achti bini denn gmüätlich mit Sack und Pack zum Konbini gloffe und ha Zmorge wellä poschte. Leider hets gar nüt gschids gha und so han mi miteme Toaschtsandwich begnüägt. No es Ziitli hani miteme Inder hani gredt. Er wohnt i dem Dorf und handelt anschiinend mit Auto. Er het mer no sini Visitecharte ghä. Villicht het er ghofft, dass ichs sLaufe ufgib und gad bi im es Auto chaufe. Kei Ahnig. Jedefalls bini ohni Auto wiiters.
DSiicht het sich ehrlich gseit nöd gross gänderet sit en letschte Laufe, aber ich han mi ja au uf dStrass müässä konzentriere. Es isch nämli wieder so e Regionalstrass wo natürli kei Trottoir het und zimlich vill engi Ränk nachenand hät. Also nöd sehr berauschend. Uf em Wäg hani no en Biker us Taiwan troffe, wo grad e grossi Tour dur Japan macht. Nachdem Schwätzli bini no drü-viär Ränk wiiters, wo denn e Frau aghalte het. Es seg gföhrlich da zlaufe, ich sell doch iischtiige. Da es ja würkli nöd so erheiternd gsi isch und min chlii Zeihä wieder afange sich uf e sehr unhöflichi Art zmäldä, hani halt scho e Mitfahrglägeheit nach sächs Kilometer gha.
DFrau heisst Eiko und het anschinend es Hotel. Si het denn no churz müässä zunere ältere Dame, öb das OK seg. Natürlich hani damit keis Problem gha. Si isch denn e Siitestrass ine wo zmittzt dur de Wald gange isch. Teilwiis schon fasch serpetineartig. Usecho simmer wieder a de Nationalstrass 7, voni am Vortag relativ lang gnosse han. I de nöchi vo dettä isch denn en Schiort names Budou gsi. Grad näb de Poscht hemmer den aghalte und sind ines Huus ine.
Es isch nächli komisch gsi. So isch DEiko inegange und het gseit si heg no e Schwiizerin ufgläse. Aber si het die älter Dame nöd gfröget, öb das in Ornig seg. Nächli luschtig. Si het mi denn inebätte und im nächschte Moment simmer zdritte vomene Schreinartige (nöd Shinto) Ding gsässe mit Gebätschugle und Gsangsbüächli. Bin nächli überrännt worde mit dem. Si het mir devo vorher nüd gseit und si het det au nonig gwüsst gha, dass i mich fürd Japanisch Kultur interessiere. Also das het ja au chönne ganz gspässig usecho, oder? Jedefalls hemmer den fasch ä ganzi Mäss lang dure gmacht. A de Gebätschugle a, vermuäti es isch was Buddhistisches. Aber de Schrein het nur e Schriftrolle und zwei goldigi Chranich vornedra. Chum simmer färtig gsi hemmer öis au scho wieder verabschidet und hend wellä wiiters. Diä älter Frau het denn aber so Fröid gha, dass ich dLiäder uf Japanisch mitgsunge han, dass si mir so es Büächli und Gebätschugle gschänkt het. Bim go het denn minere Chauffeurin ihres Auto irgendwiä nüm hindersii wellä fahre. Ich bin natürli au kei grossi Hilf da gsi. Bevors denn in Bach gange wär het si no de Nachbar zur Hilf ghollt. De het denn nach es paar mal probiere irgenden Chnopf gfunde und alles isch wieder paletti gsi. Wieder dune vo de Berge am Meer simmer ines Kafi wo Salt&Coffee gheisse het. Wär genial gsi zum det ässe. Will die anschinend sSalz vom Meer gwünnet und öppe drü verschideni Salz am Tisch gha het. Für das, dass dä Japaner üses Ässe zsalzig isch rächt überraschend. Für üs isch ziitlich nur es Salzvanillecrèmeglacé dringläge. Scho wieder so öppis gspässigs, aber da ich Salz ja gäre han, no fein. Si het mich denn zu ihre is Hotel iglade. Ich han agno, aber druf bestande, dass ich de normal Priis zahle.
So sind mer churz vor de Zwölfi in Kuwagawa glandet. DEiko het es gmüätlichs, erstunlich chaotisches Ryokan. Also es typischs japanischs Hotel mit Futon, Tatamizimmer und chlinem Ofuro. Es het mindeschtens zäh Gäschtezimmer gha, vo 12qm bis zu 80qm. Nach ä churze Verschnufpause hani dWösch ob tuä und bin zum ZMittag gruäfä worde. Soba hets gä. Also zgliche wiä Udon eifach mit dünnere Pasta. Dezuä hetsi mir no Omeletterollle für dri vorgsetzt und Tempura. Woni einigermasse dNudle gässe gha han hät si mir so schnäll nahschöpft, dass i gar nüt rächtziitig han chönne sägä. Um de nächscht Nachschub zverhindere hanis halt grad denn gseit. Diä het denn glichziitig gässe und de zNacht vorbereitet. Unter anderen wieder so ä Kreiselschnägge. Si het mer denn immer wieder was wellä gä, aber ich han nüm möge. Am Schluss het so druf bestande, dass ich no so es Dessert isse. Isch e Roti Bohne Pudding gsi oder so. Ich has se uf all Fäll liäber im Mochi drin=). Dezuä hets no es Tee gä. En chalte Gerschtetee. No niä ghört, dass es so öppis git. Eigentlich hend mir i de Schwiiz ja au Gerschte...Es isch mega fein gsi. Denn het si mich gfröget, öb i Luscht het mit ihre am Abig no zu sonere grosse Mäss zga. Si segi süsch ganz eleige. Natürli hani zuägseit, wänn chunnt mer scho so tüüfi Iblick ine Kultur über?
Nach dem übermässige Mahl hani dWösch ufghänkt und mi riisig gfröit uf die Strassestation, wos zuäfälligerwiis grad i dem Dörfli het. Immerso wämmer meint mä heg sPrinzip verstande, gfindet mer ä Uusnahm. Die isch wohl da in Kuwagawa. De Lade het alles importierti War gha vo China. Sogar es paar Japaner sind riisig enttosche gsi, wos gseh händ, dass selbscht dä Fächer made in china isch. Drum bini nebetra is Kafi und has Wifi usgnützt. Lang hani nöd de Ziit gha, will ha ja am Vieri wieder zrugg bim Ryokan sött si. Drum hani nöd alls chönne mache woni dringend het selä wüsse.
Am Viäri simmer denn zämä im Auto gsässe. Es isch zu mine Überraschig richtig wiit gange. Zersch simmer mal de ganz Wäg nach Murakami abgfahre, wo ich am nächschte Tag zFuäss plant han. Denn numol 50 km bis nach Niigata-Stadt abe. Bin nächli verschrocke ab de Distanz und han scho min Plan abgschribe, wämmer retour sind numol churz zur Strassestation zgo. Am Sächsi simmer irgendwo i de Innestadt vo Niigata gsi. Mer sind inen luschtige Gmeinschaftsruum no es knapps Halbstündli gsässe, bis mer denn witers sind. Ich muäss ehrlich si. Ich han demit grächnet imene 'richtige' Tempel zlande. Dem war nicht so. Es isch en grosse Tatamisaal gsi miteme grössere Schrein vornedra und ufere Liinwand dLiveüberträgig vo Tokyo. Bin ab dem Zitpunkt nüm sicher, öb das e offizielli Buddhismusart isch oder ä Sekte. Nach em Treffe mit de Zeugen Jehovas würd mi nüt meh wundere...
De Ruum hets sich schnäll gfüllt mit über hundert Lüüt alli im perfekte Japanische Knüsitz und hend mich agstarret, als wär i ä Usserirdischi. Villicht hets mi nur so dunkt, will i scho nächli müäd gsi bin. Ich han mi jedefalls bemüäht alles so zmache wie am Vormittag und so lang wie mögli im korrekte Sitz zsi. Es het zersch wieder agfange mit emene Wort (oder mehrere) wo immer wieder wiederholt worde isch. Drufabe no zwei Gebätsliäder, no es Gebätliäd vo de Vorsteherin und numol e langi Rundi vo de Gebätswort. Ich han natürli dä Namittag vergässe, nachezluägä, was das Wort heisst. Ich her gärn wenigstens es bizzeli gwüsst, was ich da säge. Bis da ane isch die eigentlichi Mäss gange und das isch knappi drüviärtel-Stund gange. Ich han de Teil alles i de Chnüü gschafft und sogar es paar Japaner, wo vor mir ghocket sind, händ früäner glockeret. Bin huärä stolz gsi, aber ha scho kei Gfühl me i de Bei gha. Es isch also höchschti Iisebahn gsii. Aber has duregstande. Mer sind denn ufgstande und ich han gmeint mer gechet jetztä. Falsch gedacht=) Es isch nur drum gange, dass mer nöcher zämärucket und somit diä Nöiakömmling au no Platz hend. Es isch denn wiiters gange mit Lesige. Ich han kein Zämähang verstande, aber es müänd wohl Läbensgschichte gsi si vo denne. Teilwiis hend Familiemitglieder bime Taifun verlore. Es muänd rächt berüährendi Gschichte gsi si, will zwei Drittel vo de Teilnehmer im Saal sich Träne elegant wegputzt händ. Guät isch au en Frauehufe gsi. Zwei Manne hani gseh. Diä guät duzend Läsige sind je drü bis vier Siite gange. Eini het denn alles Prozentzahle abegläse und vill händ bestätigend gnickt. Nachher numol zwei normali Läsige. Denn hani mi sLache würkli müässä verkneife. Kei Ahnig was das gnau gsi isch. Also es isch es Liäd gloffe - so Hymne-artig. Denn isch vornedra im 'Chor' ä Frau anegstande. Ein Arm i de Hüfte gstützt. Die ander im Takt ine Art Schwärtbewegige nach vore grichtet. Es hät rächt komisch, unbekannt usgseh. Däzuä hend alli no gsunge. Nach dem isch numel e chlini Rundi Gebät cho, bevor mir öis zum Uusgang bewegt händ.
Für mich ischs ä Tortur gsi. Mer sind zweiehalbstund i dem Ruum am Bode gsässe. Trotz zig Sitz-Variatione hani es niä lang usghalte. Mer sind öis halt i de Schwiiz das eifach nöd gwöhnt. Alles het mer so richtig weh tuä. Rugge ganz schlimm. Denn simmer wieder zrugg nach Kuwagawa. Am elfi simmer dett gsi. Ich schnurstrags go dusche. Ich han dana zu minere Überraschig feschtgstellt, dass mini Gaschtgäberin scho wieder mit de Chuchischoss am en Mitternachts-ramen für die andere Gäscht am Choche isch. Ich bin totmüäd und verzichte liäbändgärn uf de zNacht. Ich ha vill Nöis hüt gseh und bin nächli überwältiget, willi nonig gnau weiss wo ich die Sache söll istufe. Aber bin zmüäd um jetzt no drumume studiere und go go schlafe.

ZFuäss: 13200, 9km, Auto: 180km