Wiedermal nur sehr wenig gschlafe, obwohl i nüt cha sägä, wo mi dra ghinderet hetti. Has pudelwohl gha. Bin am halbi Sächsi uf und han bim Zämäpacke scho mit allne Morgespazierer es Schwätzli ghalte. De eint wo Gascht im Hotel isch het begeischteret vo sinere Reis im letschtä Juni nach Zermatt verzellt. Am Sibni hani mini siebe Sache packt gha und bin eigentlich uf em Sprung gsi. De Herr wo grad hinder mim Zelt wohnt, isch denn no uf es Bsuächli verbii cho. Im Juli seg de Zeltplatz jede Tag voll. Ja denn no dies und das und scho isch bini Abreis e Halbstund spöter gsi. Aber has ja glatt gha.
Da dWälle hüt wieder flach sind isch dä Wäg nüm so spektakulär wie am Vortag. Aber dStrass het es Trottoir und das fröit öis doch scho. Nach viär Kilometer bini denn vor em erschte Lade gstande und han nebscht em Zmorge no Vorratsproviant igsteckt.
Denn het dStrecki nöd würkli was Nennenswertes gha. Es paar Schrein und Tempel natürli.
Bin hüt bim Laufe nüm so uf Zack wie geschter. Scho nach säschs-sibe Kilometer hets mer irgendwie i de Wade grausam zoge. Isch immer schlimmer worde. Han zwar versuächt mit Dehnä, aber het nöd würkli vill bracht. Nach Füfzäh Kilometer laufe und füf Kilometer per Auto bini nöch bim Ort Atsumionsen gsi. Han es Traum-Pauseplätzli für mich ganz elei gfunde und han den grad no nächli müässä döse. DHitz isch hüt wieder fasch bim Unerträgliche.
Nacheme Stündli bini no viär Kilometer zum nächschte Bahnhof gloffe. No churz im Lade en Öpfel poschtet und uf de Zug. Die dritt Station wieder use und nacheme guätä Kilometer laufe bini bim Zältplatz gsi.
Glich wie geschter kein Mensch ume, aber wenigstens Wasser vo lauft. Damit bini eigentlich scho happy. Zu mine Begeischterig hani uf em Weg vom Bahnhof au no en Konbini gsichtet und es Onsen. Villicht beruhigt das mis Bei nächli und ich chan morn wieder fit wiiters.
Zersch hani no min Öpfel am Strand gnosse und dänn nächli irritiert feschgstellt, dass es wohl e Bire sii muäss. Es isch würkli e chugelrundi Bire gsi. Komischi Sache gits.
Am viäri bini den langsam zum Onsen gloffe. S'Onsen isch ähnlich wie snormale Japanische Bad - hät jedoch es Ussebad. Meischtens ischs bime Tempel oder i de Berge obe und natürli direkti Heisswasserquelle. Es sind no zwei Fraue drin gsi woni mi parat gmacht han. Nachher hani bedi Bäder über ä Halbstund für mich gha. Länger het ichs au nöd usghalte. SWasser isch 42Grad gsi. Ich hoffe aber, die vorher sind nöd wäg mir gange=)
Dana hani mi no mit Konbini-Fuätter verpflegt und die letschte Liächtstrahle vor mim Zält a de Beach gnosse. De Sand het sich so ufgheizt während em Tag, dass ich jetzt fasch ä Heizdecki han. Da chan mer ja nur guät schlafe.

ZFuäss: 30600, 25km, Zug: 10km