Nach emene gmüätliche Uusschlafe bini use id Sunne für en chline Stadtspaziergang. Natürli het er mich zu verschidene Schrein gfüährt. De Höhepunkt isch de gross Stadtpark gsi. Det hets au drüü Schrein gha, drü Weiher, e Statue vom ehemalige Herrscher vo da im 16. Jh und natürli sis Schloss. De Park isch liächt i de Höchi und so hets en wunderbare Blick über all die Hüüser vo Akita. Allerdings gfallt mer de Park fasch me. Bim erschte Teich hani zMörgelet. Es het wieder e Schildchrot drin gha, woni natürli nächli beobachtet han. Richtig schö sind allerdings die dunkelpinkige Seerose gsi.
Es bitzli im Parkinnere hets no so e grosso Shinto-Glogge. I de nöchi denn die erschte beide Schreins. Numol es bizzeli im Hogger obe isch de Wachturm und Schloss i einem. Im andere Egge vom Park denn de gross Weiher und de ander Schrein. Natürli hets no es Museum, Teezeremonie-Hüüsli und süsch no alti Hüüser.
Vo ich denn gnuäg Parkluft gschnupperet han bini richtig Hotel. Mir isch denn no e Statue ufgfalle vomene Sänger. Dezuä hends no sini Musik laufe lo. Voll cool. Hani no niä gseh. I de nöchi isch denn de gross Teich vo de Stadtmitti gsi. Isch nächli en luschtige, ad Strass anequetscht. I eim Teil isch alles voll gsi vo meterhöchi Seerosestude. Natürli au vill Seerose, vo über 15cm Durchmesser gha hend. Imposant. Dana bini denn ohni wiiter spektakulärs is Hotel zrugg. Eigentlich hani wellä mis Korea-Reisli buäche. Denn hani allerdings no e Bewerbig uselo. De Job würdi allerdings so Mitti Ändi September afange, dass heisst ich müsst flexibel blibe. Drum hani jetzt halt nüt buächet. Am Obig hani denn no es paar Stündli Jasscharte und Yatzy mit mim Gottemeitli per Skype gspillt bis mer fasch dAuge zuägheit sind...

ZFüäss: 13500, 9km