Nach zwei sunnige Täg in Akita wird i hüt de Schirm wieder bruche. Ich han dCheckout-Ziit vom Hotel usgnutzt und han no letschti Informatione im Internet gsuächt. Da i no schöööö Ziit gha han, hani no nächli gfuulänzet und es paar verpassti Japanischi Drama-Serie no nachegluägt. Die sind zum brüälä kitschig aber Suchtgefahr isch da.
Vom Hotel is direkt zum Bahnhof gange. De Zug isch ersch am elfi gfahre und het mi denn nach Ugo-Honjo bracht. Det hets en Autocamping und es sött au en Zeltplatz ufem Hoger ha. Da mini ernöiri Matratze-Flickete nonig de gwünschti Erfolg bracht het gohts zersch no zum Shopping-Gebiet. Natürli hend da dWeg durch Wohngebiet und Tempel nöd dörfe fähle. Die mögliche Campingmateriallade sind alli am gliche huufe gsi. Aber leider iscg keine so spezialisiert gsi, dass i öppis schlaud gfunde het. Defür hani im 100Yen-Shop no nöi Füächttüächli poschtet. Wennigstens ein Erfolg. Öppis hani no für de ZMittag iikauft und bin denn wiiters as Meer gloffe. Det wär au de Autocamper. Aber de will mi wahrschinli sowieso nöd. Zu dere Ziit hets grad grüüsig abeglärt. Imene ungmüätliche Unterstand hani denn gmampfet und versuächt sMeer gnüüse. Bin grad nebet em Windrad und bimene Badestrand. Dä gseht nächli verwahrlost us so ohni Lüüt und die ganze Wäg sind voll Sandverwehige. In Kombination mit em Räge nüt schös. Es halbstünli spöter bini vorem Hügel gstande. Richtig motivierend, stoht weder uf em Plan no uf emene Wägwiiser öppis vom Zältplatz. Falls denn halr nüt isch muäss halt en Plan B häre. Ich bi gloffe und gloffe und irgendwenn bi de letschte Chrüüzig acho. Luut Planproportione müsst öppe no 500 Meter si. Das hani mindeschtens müässä vervierfache. Im Park acho isch keine Menschenseele det. Es isch ja Samschtig und ich meine immer ame Samschtig voll mit andere Zältler umrundet gsi si egal welle Schiff au. Trotzdem gsehs nach Zeltplatz us. Es het die entsprechende Uusstattige für Füür und Wasser. Eis Geissli wohnt au no da. Han rächt Fröid gha. Sch lang keis Geissli me gseh. DUssicht isch super. An einte Parkändi de Blick übers Meer und uf de andere Siite Berglandachaft.
Bin gad so rächt abghocket chunnt en Spaziergänger wo mit de Chatz Gassi goht. Kein Witz. Das isch in Japan normal. Hunde, Chatze, Häsli und sogar en Pingu hets au no. Jedefalls het se Herr e füf Meter Schnur am Halsband agmacht und sChätzli het dörfe nöchli umetolle. Libelle jage, Baum ufechlättere und bi mine Sache nöigierig go schmöcke. Han em denn mit mim faltbare Bächer wunderbar no nächli Wasser chönne anestelle, was es gnüsslich bis uf de letscht Tropfe trunke het. Mit em Bsitzer hani denn no nächli gredt, aber de het huärä schwirige Dialekt gha. Bi drum nöd bös gsi, wos denn wieder gange sind. Isch nämli rächt ermüädend. Numol is Stadt abelaufe magi ächt nöd und so gits halt dMelone zum zNacht. Leider ischs si immernonig ganz riif und so gnüssi liäber no die cool Abigstimmig. De Räge het nacheloo und villicht gits ja morn wieder nächli en trochnere Tag.
SZält hani dasmal im Understand ufgstellt. So hanis morn troche und suber zum Zämelegge. Praktischerwiis ligget da no Wulledeckene ume, woni schö unders Zält cha leggä. Nacheme Extrem-Sudoku bini den äntgültig futsch gsi und bin go pfuuse. ZNacht hends denn dunne i de Bucht no es Füürwerch gha. Aber bin zfuul gsi zum go luägä...

ZFuäss: 22500, 18km, Zug 43km