Drüüviärtelstund vor de 08.12h Zugabfahrt bini parat am Bahnsteig gstande. Ä ganzi Mängi a Lüüt möchtet au gäre nach Sapporo. Trotzdem hani die erscht Hälfti vo de 214-minütige Fahrt en Zweier für mich gha. DStrecki füährt vill am Meer entlang und all Halbstund spotte ich au Trainspotter. Scho guät, dass i keis Talent im Fotografiärä ha, süsch müssti au no stundelang am Gleis stoh i de Pampa um uf de perfekt Shot zhoffe. Am Mittag in Sapporo bin ich is snächschte Zügli stige, wo mich i wiitere 5.5 Stund zum nördlichschte Bahnhof vo Japan bracht het. Vo Kyoto ewä hani jetzt 2106.5 Zugkilometer hinder mir. Ich liäbs. =)
Am sechsi am Obig bini denn in Wakkanai acho. E Dame het mi no druf ufmerksam gmacht, dass min Rucksack kaputt isch. Zersch hani gmeint dSiitefächer wo scho ewigs kein Rissverschluss meh hend - aber nei es het uf de Siite en rächte Schranz a de Naht na. Also bini no gschäll in Konbini (Convenience Store - so ala Coop Pronto) und natürli gnau hüt hends keis Nähset meh. Also hani ghofft am morgige Tag anen passende Lade verbizlaufe und han de Rucksack behilfsmässig mit ere Schnur gstützt.
In Wakkanai isch grad es Summerfäschtli gsi und die chliine Meitli hend alli ganz Stolz ihre Kimono treit. Mit es paar meh pinkige, kitschige Accessoires, als ichs kenne. Leider hani kei Ziit gha zum bi de Marktstönd go güggsle - han ja nur no 1.5h bis zum Sunneuntergang gha und müsst ja no de Zeltplatz gfinde. De Zeltplatz isch grad nächli ufem Hoger obe gsi, defür aber isch de Wäg mit schöne Margrite ziert gsi und hät immerwieder e schöni Uussicht über de Hafe bote bis zum Kap Sōya - mis morgigä Ziil. Unterwegs isch mer es Füchsli no gfolget und es Reh het mir au no 5 Meter entfernt beobachtet. Wenn mis chline Glöggli an Rucksack nödemol die beide beiidruckt. Wie sölls denn en 2-Meter-Grizzly si? Ich hanmer denn igredt, dass solang ich Reh und Füchs gseh, kei Bäre i de nöchi sind. Ke Ahnig öbs stimmt, sberuigt aber chli... Am Zeltplatz hets öppe 5 Parteie gha - alli mit Auto agreist. Die hend scho nächli ab mim Gepäck gstuunet. De Platz büütet e schöni Wiise, Sternehimmel, Wasserhähn, WC's, Picknickunterständ und Güselablag - alles koschtelos. Miteme chline Internetempfang hani no es 'Alles Guät' chönne smsle und bin denn au scho bald go pfuuse im mim superviolette Zelt.