Am Füfi am morge het mich glich no de Räge gweckt. DLöcher zuä gmacht und wiiters pfuuset. Dummerwiis, hani ja am Vorabig dSöcke as Zelt klammeret zum Tröchne. Ja, das Ziel hani verpasst. Will am Morge am füfi denk ich doch nöd a so öppis.

Sobald de Rägä abgä het, bini au us mim Sideschlafsack gschloffe und losgloffe. Dasmal sölls um die ander Seesiite go. Es isch es schös Strössli mit Trottoir für Fuässgänger und Velo. Es paar Velofahrer simmer au churz vor Schluss begegnet. Au hani en Bussard gseh. Dä isch eifach so uf de Mittellinie vo de Strass stolziert. Villicht hetter ja de Alkoholtescht gmacht? Jedefalls het er mi rächt nöch anecho la und schlussendlich ischer ufeme Ascht gfloge, füf Meter vo mir entfernt. Leider ischs Liächt miserable gsi für es Föteli. Wiä de ganz Tag. Nach so 10 Kilometer, bini denn in Quasi-Nationalpark abboge. Det het so drü verschiedeni Rundgäng, woni aber erscht am Namittag ablaufe. Zersch gohts nämli is Dorf zumene Kafi. Eigentlich isch ja scho Mittag gsi und drum isch halt no es Japanischs Curry dezuä cho. Sooooo fein isch es gsi. Mit de Bsitzeri vo dem Kafi Sana hani den no nächli gschwaflet. En andere Gascht (Hobbyfotograph) het mer den stolz sis Fotialbum zeigt mit Naturufnahme dur ali Jahresziite. Es soooo schön isch es da in Onuma. Würd am liäbschte da es Jahr blibe, zum es au selber i all dene Facettene zgseh.

Nachher bini de Brunch no mit em Spaziergang dur die Insellandschaft go verbränne. Es hät wieder gregnet und ich bin die einzig gsi, wo dRundgäng nöd nur agloffe het. Aber sFotene mache, hets leider au iigschränkt. Es sind ganz vill chlini Inslene, wo mit so romantische Bogebrugge verbunde sind. DBrugge gseht gigantisch us. Aber me muäss guäti Schuäh ha. Susch rutscht mer de Hang abe. Si sind nämli erstuhnlich steil. Zwüschet de Inslene hets denn Weiher ghä, wo voll vo Seerose sind. So wunderschön sinds gsi. Ha au no sGlück gha, es wiili chönne amene sGrüänspecht zuäluägä.

DRundi färtig gmacht und so bini wieder im Tourischtebüro verbii go luägä. Dasmal no e feini Milch und es Bohnepaschtebrötli poschtet. Das hani grad numol für de Zmorge morn poschtet. Da bim Zeltplatz nüt schlaus het zum Iichaufe und ich morn nöd will Ziit verlüüüre. Es söll nämli wieder es Stückli zum Laufe ghä. SErschtmal uf em Plan gfindi en Wäg absits de Strass, wo nöd en Rundwäg isch, sondern würkli zumene andere Ort füährt. Bin ja gspannt. Mer hend bi de Infostell no es rächts Gaudi gha. Han einem welle sWort Specht biibringe. Bin nöd so erfolgrich gsi.

Bin den gäge Väschper wieder zum Zeltplatz und han uf em Weg no en grillierte Maischolbe poschtet. Mini Schultere hend riisig fescht weh tuä bi jedere Bewegig. So verspannt bini. Ich hoffe, dass leit sich bis morn.

Bimene Markstei vom 42. Breitegrad hani den no Föteli gmacht und realisiert, dass ich jetzt dur meh als en ganze Breitegrad greist bin. I mag mi nämli no an 43. erinnere nördlich vo Hamaonishibetsu. Irgendwie no cool. Aber ich entferne mich meh und me en Schwiizer Breitegrad, obwohl dNatur sich meh und meh glicht. Interessant.

DChräie hend grad e Gmeindsversammlig gha und dGrille zirpet au de Obig i. Es söl morn wolchig si - aber kei Rägä. Ich versuächs drum numol mitere Zelt-offe-Nacht.

ZFuäss: 30050, 24km