Ich han mer es paar Sehenswürdigkeite vo Nagasaki usegschribe, wo ich plane hüt azluägä. Zwar hani zwei volli Täg i dere weltgschichtsträchtige Stadt, aber de zweit Tag isch andersch plant. Nagasaki heisst übrigens langes Kap und die ganz Präfektur Nagasaki isch fasch wie e Halbinsle vo Kyushu abtrennt. Oder ebe es langs Kap. Wemmer grad bi de Näme sind. Au Kyushu isch ganz logisch. Es heisst nüün Präfekture und es het nüün Präfekture. Ich nimm mal a, dass die sich au nöd so schnäll zämäschlüsset. Süsch müsstmer dInslename ändere und dWältchartene nöi drucke.
Mich häts zersch ines Kafi zoge und dana richtig Hafe. Es isch Traumwätter für vill, für mich eher gränzwärtig. Es sind heissi 26 Grad. De Hafe isch relativ äng gsi, da riise Schiff adockt hend. DHenna mit knapp 2000 Passagierkapazität isch chinesisch, aber in Valetta registriert. Komischi Wält. Au zwei Transportriise hets. Ich vermuätä, dass si Erdgas transportiere. Obwohl i gmeint ha, die seget uf de Site agschribe. Nach de Hafepromenade bini is Tourischtegetümmel cho. Glover Strass isch mit Souvenirläde pflaschteret gsi. Me europäisch, als japanisch. Sogar so en Steiautomat 'Bocca di Verita' hets gha. Am Ändi vo de Strass isch die berüämtisch Chile vo Japan gstande. Miteme stattliche Entgelt isch eim de Iitritt gewährt worde. Defür hets e sehr interessanti Informationsbroschüre über dChrischteverfolgig und de Errichtig vo dere Chile gä. Dasmal het würkli id Chile dörfe, sogar uf dBänk sitze. Per Luutsprecher isch ebefalls dGschicht vo de Oita Chile verzellt worde. Nur sWiiwasser hani vergebens gsuecht. Im Souvenirlade nebetra het mer für 2.50Fr. en Dezi chöne chaufe. Nächli speziell. Danach ischs in Glover Garte nebetra gange. Glover isch en schottische Teehändler wo sich Mitti 19 Jahrhundert in Nagasaki niderglo hete historischi Person vo Nagasaki. Me seit sini japanisch Frau isch sVorbild gsi für e tragisch-romantischi Gschicht, wo vom Puccini veropert worde isch. Wär chemmt au bi dem Name Madame Butterfly uf dIdee, dass es sich uf e Gschicht in Japan handelt. Aber anschinend het de Puccini das ganze basierend uf de Gschicht vo Madame Chrysanthème ufbaut, wo scho eher e Verbindig zu Japan erahne loht.
Jedefalls het de Glover e furchbar romantischi Villa erbaut. Was hüt wohl vorallem dJapaner selber verehret. Es isch wunderschön au ihrne vorliäbe nöd zvill müässä zlaufe apasst. Richtig schöni Rollbänder überdacht mit türkisfarbende Holzverzierige. Alti Wasserfallbrünne, Koi-Teich, Bäum, Palme und Bluämä sowie e Liäbeslegende nebscht de Butterfly-Gschicht. Es sind nämli im Park zwei Kopfsteipflaschter in Herzform versteckt, also nöd würkli versteckt. Si sind sogar uf em Garteplan izeichnet. Wemmer bedi gfindet und berüährt, heisst das entweder ewigi Liäbi mit em jetztige Partner oder, dasmal au e Version für Singles, me gfind sini ewigi Liäbi nöchschtens. Die meischte Girlies hend verzwiflet nach dene Herze gsuächt. So verzwiflet, dass ichs es paarne zeigt han. Die hend wohl vo luuter Stei, dHerze nüm gseh. Denn chammer da no Nostalgieföteli mache mit europäische Chleider vom letschte Jahrhundert und sogar no en Film, wies dur en Gang vom Huus laufet. Nächli zuviel des Guten für mich, aber dJapaner liäbets. Es isch trotzdem schön gsi, zum wieder europäischi Luft schnuppere und nächli de Hafe zbeobachte.
Nachem Garte bini zum Chinamuseum. Das isch glichziitig en Konfuziusschrein, de ältischt chinesisch Schrein usserhalb vo China. Es isch rächt volle gsi, da grad zwei Cargruppe drin gsi sind. Anschinend hend au für die e chinesische Tanzuffüährig organisiert. I de Gnuss bini drum grad au cho. SMuseum isch au interessant gsi, aber da ich mich ja grad weniger de chinesische Kultur widme. Ich muäss ufpasse, dass i mich nöd zfescht für die Kulture vo da interessiere. Will es isch es Paradis für interkulturelli Fans. Aber ich muäss mich ja au no chönne wegrisse. Aber trotzdem ischs denn no is ehemalige Chinesequartier gange, wos no es paar Tempel gha het. Denn ischs zume Schrein gange im Quartier näbetra. Vo det us zum Maruyamapark, wos es härzigs alts Polizeihüüsli het. I de nöchi fangt den e Strass a, wo sich Tempel a Tempel reiht. Aber au no en grosse Schrein het. Das isch eine vo de Schrein, wo smorgige Festival stattfindet. E riisigi Arena sinds am ufbaue gsi. Trotz de gschäftige Lüüt hani glich no es Goshuin becho. Drufabe bini nächli dur sStädtli gschländeret, bis i bi de ältischte Steibrugg vo de Stadt acho bin. Es isch en Doppelbogebrugg und heisst somit Brüllebruug. Det hets no es örtlichs Spezialitäte-Glacé ghä. Das mer uf so öppis nöd i de Schwiiz cho isch... Die dönd sGlacé als Rose ufschüfele. So schön und guet isches au gsi. Naja isch bin au nüm so aspruchsvoll da...
Am Fluss wiiters entlang bini bim zweite Schrein acho. De wichtigscht vo de Stadt, wo au als eine vo de wenige Usnahmw meh für es Goshuin verlangt. Dummerwiis hani nöd demit grächnet und gnau no 50 Yen zwenig im Portemonnai gha. Somit bini die riise Stäge wieder abe gsputet, zum go Gäld uselo und sGanze wieder ufe. Bin knapp wieder vor Fiirabig det atanzt. Au a dem Schrein isch e riise Arena ufgstellt worde und verschidenschti Medielüüt händ sich igrichtet. Mä het sogar da glich no Tickets für dArena becho. Bin churz devor gsi zum es Ticket poschte. Es het zwar en rechte Batze koschtet, aber ich han ja gad Geld gholt=) Han mi den glich dagege entschide, da ich zwenig Ziit no han zum mich druf vorbereite.
Nachem Schrein bini zrugg zum Hostel. Am Sibni hani miteme Schuälkolleg vo Kyoto in Chinatown abgmacht. Mer hend bede nächli es läbhafters Chinatown am Obig erwartet. Aber da het scho 80 Prozent gschlosse gha. Mer hend denn glich no es Reschtaurant gfunde. Das het üs denn am Achti au fründlich druf higwise, dass si am 9ni schlüsset. Ganz ungeduldig hend amigs us de Chuchi gluägt, öb mer immer no det sitzet. Aber sÄsse isch guät gsi. Mer het sogar no Hai-Gricht chönne vom Menu usläseäse. Das isch mer nächli zgföhrlich gsi. De Obig isch denn au bald gloffe gsi und ich bin zrugg is Hostel.
Falls er gmerkt hend, min Schrittzähler lauft nüm so guet. Also hani dAgabe vom Armschrittzähler gno. De isch aber nächli geizig was Kilometeragabe betrifft. Weiss nöd gnau wie es die Zahl usrechnet, will dSchrittlängi nimmt er uf all Fäll nöd. 30km wirds somit nüm so schnäll gä...

ZFuäss: 29700, 20km