Wiedermal bini nächli langsam hüt. DSunne isch scho wiit obe gsi, woni serscht mol usem Zält güggslet han. Es isch scho heiss gsi, wie nüt. Gmüätlich hani agfange zämäpacke und parat mache zum go. Für dä Herr Yamamoto hani no es Säckli Alge zum Choche us Wakinosawa vorbereitet. Als i mich denn uf id Stadt gmacht han, hanems schnäll no in Briäfchaschte tuä. Anschinend het ers gseh und het mer den vo wiitem no äs Guäts Mörgeli nachegrüäft. Also hämmer no nächli gschwätzt. Dana han mer Zmorge pöschtelet und mi anes ruhigs schattigs Plätzli an Fluss gsetzt. Da hani de Kormorän no chönne zuäluägä, wies sich wäschet und mit ufgspannte Flügel, si tröchne lönd. Uf em Baum da hets grad es Duzend gha und uf e gwüssi Entfernig gsends us wie Flädermüüs. Nacheme Brunchpäuseli bini numol drüü Kilometer zumene munzige Bahnhof gloffe und vo det de Zug nach Yokohama gno. Denn no drüü Kilometer zum Zeltplatz gloffe. Es isch eigentlich en offizielle Meerbadestrand, wo während zwei Mönet au zum Zelte brucht wärde dörf. Es isch rächt grosse und mer sind nur zweite. Es het sogar no so chlini Bänkli mit Balkon. Ganz härzig. Am Abig hani denn no en hammer Sunneuntergang gse. Leider het dKamera, das unglaubliche Rot vo de Sunne nöd chönne ifange. Mit em hellblaue rundume hets gnau isgseh, wied Flagge vo Japan. Richtig toll.

ZFuäss: 23300, 18.6km, Zug: 25km