Mit em erschte Bus ischs hüt morge zumene Kranichzenter gange. DTouristiker vo Kushiro hend mir das empfohle und mer chas au im Rege go aluägä. Es söttet det so e Arz Zuchtstation vo 15 Tiär si. Tja, denn mach mer doch das Busfährtli. Ich märke im Bus, dass i mi nüm dra gwöhnt bi. Mir wirds nämli liächt schlächt. Aber villicht liits au Fahrstiil vo dem Busfahrer. Er fahrt nämli unruhiger als gwüssi Fraue über de Ricke=) Bin glich heil acho.
Es isch e chlini Station, wo ganz luschtig gmacht worde isch. Han öppe 8 vo dene 'roschtig-rot-chöpfig Kranich' gseh, davo än viär Mönet alts und es monatigs.
Si sind anmuätig, wien i denkt ha. Schön, aber ohni Jöö-Effekt. Mir gfallets. Ha luschtigi Sache glernt über die Japanische Kranich. Also sind hend ja so es rots Chöpfli - das sind interessanterwiis kei Fädere sondern Kopfhuut. Und wenn si wüätig sind chönns en liächt ufblauschtere.
Si gältet in Japan ja als Tiär vo tuusig Jahr. Es wird im gschützte Rahme nur so Mitti 30. Was i ganz cool find a dem Ort, die Kranich sind nöd in Gfangeschaft. Sie chönnd jederziit useflüge. Allerdings gsend si sIighaagete als ihres Territorium a und chehret dementsprächend zrugg. Mer het die Kranich gjagt und tötet bis zumene Stand vo 90 Tiär abe. Drum het mer i de 50er Jahr Statione wie die errichtet. Hüt sinds ungefähr tuusig. Vo de Uriwohner vo Hokkaido, dä Ainu, werdets Gott vom Läbe im Sumpf gnännt.
Mir isch vo dem Raubvogel woni so vill gseh in Hokkaido no en Schnappschuss glunge im Park. Die hoffet dette, dass en Kranich sin Fisch unachtsam isst. Aber numol zu dem Raubvogel. Er isch chliner als en Bussard, aber dSchwanzform au nöd wie en Milan. De Schwanz isch nämli ab de Mitti spreizt. Komisch. Aber villicht sind die Milan da eifach eso. I de nöchi wär no en Zoo. Aber ich würd ja nur vill zvill Tiärposchtcharte poschte...De Halbtag isch ja au scho dure und es fahret nur no zwei Büs retour.
Also zrugg nach Kushiro und afange diä Must-sees zämätröge vom Süd-Weschte. Imene kunstvolle Park gad nebem Hotel hät den au mis Internetgrätli funktionaglet. 11. Stock isch wohl zhöch für so es Grätli=)

ZFuäss 9000, 7.2km; Bus 36km