Circa am Vieri bini igschlafe und churz nach de Sibni per Füüralarm us em Tüüfschlaf grisse. Fehlalarm. Glaub i de Zmorgechuchi hends nächli zfescht gwerchet. Aber en rechte Adrenalinschub hets gä. Vor luuter Herzchlopfe ischs no nächli gange bis i wieder ipfuset bin. Nachem uschecke bini no is Kafi ghöcklet. Es het es alts öffentlichs Telefon gha, was sogar no funktioniert. Hammer. Mit em 11i-Zug zrugg as Meer nach Masuda. Dasmal hani dStrecki bi Tag gseh. Richtig schön. DHerbschtwälder und de Fluss erinneret mich nächli ad Albularoute. Vo Masuda us bini zwei Stund mit em Aqualiner entlang vo Meeresbuchtene kurvt. Schöni Eggä hets underwägs gha. Sogar no es Aquarium, dass anschinend Belugawal het. Ich bin ja nöd so en Fan vo Wal und Delfin i Zoohaltig, aber dass isch serschtmol dass i vo Belugawal i Aquarium ghöre. Au e Silbermine hets.
In Izumi acho, hani mi zerschmal mit mim Internet versuecht. In Masuda hani nämli dasmal irgendwelchi technischi Störige gha. Irgendwo wirds wohl scho es Hotel i de nöchi ha. Die Stadt isch nämli sooooo berüehmt für sin Schrein. Villicht hetti defür müesse nächli meh üebe 20gerle a Oschtere. Aber wird mis Glück glich probiere.
Nachem Absueche bi vier Buechigsportal und füf Hotelhomepages bini no i eis go luege wo perfekt gsi wer. Jedes Zimmer het en eigene Compi. Naja leider alles komplett usbuechet. Alles isch entweder wiit ewäg, tüür und/oder nöd i de nöchi vomene Bahnhof. Au die i de Tourischtinfo het mer eifach en Zettel id Händ druckt, so ala dene chasch alüte. Da ihre au dIdee usgange sind. Da ich so gern telefoniere und vo dere Infos nöd weiss, wie guet gläge die sind, hanmi numol im Internet informiert. Ich han mich irrsinnigerwiis imene Ryokan loo unterbringe, wo 50km wiiters ewäg liit. Aber defür en grächtfertigte Priis - wänn au a minere Obergrenze.
No es bizzeli hani gwartet und bin denn per Bummler churz vor de Sechsi in Yasugi acho.
Im Dunkle hani sRyokan fasch nöd gfunde. Aber sisch wohl eher dra gläge, dass uf de Charte sRyokan uf de falsche Strassesite izeichnet gsi isch. Jedefalls bini vo de Dame des Hauses willkomme gheisse worde. Blöd nur, dass si nüt vo minere Reservation gwüsst het. Will si wohl amigs am Obig devor is Mail luegt und ich ja erscht zwei Stund devor buecht han. Si het mich aber glich inelo und mir grad de Tee ufs Zimmer bracht. Denn no De Futon. Es isch mer irgendwie nöd ganz so recht gsi. Es git vill Ryokan, wo nur sZimmer mit Halbpension uusschriibet. Ebeso hend es gar nöd gärn, wämmer churzfrischtig uftaucht. Will si dönd ja amigs vo morge früeh a szNacht vorbereite und muend drum scho denn wüsse für wie vil Persone. Das Ryokan da het sZimmer mit Früestück usgschribe, somit hanichs au chönne churzfrischtig bueche, ohni vill Unannehmlichkeite zverursache. Und trotz mine Überlegige, hani gschafft, dass dDame sGsicht fasch verlüürt, da ich si unvorbereitet ertappt han. Aber ich chans ja nüm ändere und schlussendlich chunnt alles guet. Leider hani da so schwachs Internet, aber süsch ischs perfekt. Es isch sogar richtig es alts Huus, wo zwei Schiebefenschter het. Dezwüschet en Trocheruum fürd Wösch. Da es mal wieder windet, ziehts dur dRitzene dure. Aber ich han ja e warmi Decki.

ZFuess: 4700, 3km, Zug 210km