Dear friends

aes witers Highlight won i oeich no chli drueber schribe isch d "great ocean road". si fat bi Peterborough a u aendet ds Torquay, knapp zwe Outofahrstunde vor Melbourne. Es het ues chli a Highway Nr 1 zwuesche San Francisco u Los Angeles erinneret.
Ueberall gits bizarr gformeti Steilklippe mit markante Felsformatione. Maengs Schiff het die Klippe nid gschafft u es git unzaehligi Wrack uf daem Abschnitt, trotz de wunderschoene Luechttuerm wos ueberall het gha. Ds Meer isch ruch u d Natur waerchet hie dr ganz Tag, ds ganze Jahr u witeri Jahrhundert. All 14 Sekunde trifft ae Waelle a die Felse u i gloube , das wird immer noei gformet. Bi dr London Bridge ( dir gseht die uf de Foeteli) isch ae zwoeite Boge mit em Feschtland verbunde gsi. 1990 isch dae Boge zaemegheit u zwe Tourischte si uf dr falsche Site gstande. Dr Heli hetse grettet. Huet chame niene meh wit use, es isch als izunet u mit Plattforme erschlosse. Bi gspannt ob du Anita no hesch nach zueche choenne. Dr bekanntischt Ort si die zwoelf Aposchtle. Die gigantische Gsteinsnadle si bis 65m hoech. Zwe vo dene Kolosse si im 1995 zaemegheit u i daenke es wird no witere das Schicksal widerfahre.
Mir hei dert o no ds Glueck gha mitts ueber Tag aen Ameiseigel z beobachte. Ae putzige Kaerli wo mit sire laenge Nase dr Bode umgrabt u nach Ameisi u Termite suecht. Die si suesch eigentlich eher nachtaktiv, aber fuer ues isch aer gaern fuerecho. Dae het fuere Momaent sogar die Felsgigante la naebesaechlich waerde.
Hie u da chunnt de no aes Doerfli, die si aber ender verschlafe. Obwohl si saege ide Summerferie wo jetz de afoeh, findme chum es freis Bett oder ae Campground??!!
Torquay isch de ds letschte Dorf/Stedtli, das isch die Metropole fuer Surfer. Da gits nume Laede, wie Reef, Billabong, Quiksilver, Rip Curl u wie die Marke alli no heisse. I gloube da waersch du Chris mit dine Giele am richtige Ort, aber bitte d Kreditcharte nid vergaesse!!!
So de si mir am Aend vo dere Strass u mir lade ds Huesli mit Outo id Faehre u loeh ues la fahre vo Queenscliff nach Sorrento u naechere ues vo Oschte Melbourne zue. Mir sueche ae Campground usserhalb, wo mir de mit OeV id Stadt inechoeme.

ganz liebi Gruessli vo down under