Liebi Fruende

huet chunnt mi Bricht vo Kangaroo Island. Mir hei ds Adelaide ueses noeie Huesli mit Outo gfasset u si de grad ganz abe ueber d Fleurieu Penninsula a ds Cape Jervis gfahre. Mit dr Faehre ischs de nach Penneshaw gange. Dasmal hets keni seechranke Passagier gaeh. Am Brown Beach hei mir de uebernachtet. Es Buechtli mit Strand, ae sooo schoen, so chli hooneymoon maessig!!!!!

Am Morge si mir bezite witer, hei aes grosses Programm gha. Dr erscht Halt hets bir Seal Bay gaeh. Dert hei mir ae Fuehrig zu de Seehuend gmacht. Amene wunderschoene Strand uf dr Suedsite vor Insle si die deheim. Kolosse vo Maendli, Wibli mit Junge, ae Muetter isch mit ihrem Junge chli ids Wasser nume chli am Strand nache ga schwuemme, so luschtig. Eini isch vom Fischfang heicho u het lut nach ihrem Baby grueft, si het ueber d Duene uf muesse, ds Chline hets si naemlich witer obe versteckt ghalte. Si hei sich natuerlich ad Moensche gwoehnt u mir si raecht nach drahaere cho.

Kaenguru si bis jetz immer no keini uszmache ???

Bire Koala Sanctuary hei mir de wider aghalte. Koala laebe da frei, zur Zit oeppe 48. Mitem bescheidene Itritt luege si aber zu de Eukalyptusboeim. Jede Koala frisst pro Tag oeppe es Kilo Bletter!! U de sueche mir die Boeim ab nach Koalas u tatsaechlich choei mir ide Aschtgable die schnuessige Tier gseh. Da choennte mir jetz stundelang beobachte. Geit leider nid, es git Aeckegstabi, has no lang naechhaer gspuert.

U de aendlich Kaenguru, o da vergisstme grad Zit.

Ganz im Weschte vom Park isch de dr Flinders NP, dert waerde mir uebernachte ufeme wunderschoene eifache Campground. Mir fahre de no i ungerscht Zipfu vor Insle. Dert si die idrueckliche Remarkable Rocks. Felse wo im Louf vor Zit vom Sand, Salzwasser u Wind si gformet worde. Da chunnsch dir als Moensch u...chli vor. Die orangi Farb wome gseht isch ae Flaechte. Mir hei gstunet was dert fuerne Vegetation isch, es het ues ae ruche Egge duecht. Ganz ir Nechi isch de no dr Admirals Arch, ae Felsboge wo gaege ds Meer use isch blibe stah. Dert isch ae Kolonie New Zealand Fur Seals ( Robbe) deheim.

Am Abe hei mir de no ae walk gmacht u ghoffet Tier zgseh. Jetz si d Kaenguru fasch nuemme ds zelle gsi. Ae Riesefamilie u si loe sich eigentlich nid la stoere. Da si mir voll uf d Raechnig cho. Das si ungloublich viel Idrueck gsi zum verarbeite.

Am Morge si mir de nomau zu de Koala. Si si viel aktiver gsi u mir hei sogar eine am Bode gseh.

Mir hei ues de wieder gaege Oschte fuere kaempft u hei ds vorderscht uf dr Insle uebernachtet. Am Abe si mir de no ufene Fuehrig fuer Pinguine zgseh. Das heisst Pinguinli, die si nume grad mau 20-30cm gross. Si tue dert ihri Junge ufzieh u suesch laebe si im Meer. Ihri Naeschter si oeppe 30Meter ueberem Wasser, alles grossi Steine u deret kaemfe si sich am Abe mit vollem Buch ufe. Das isch aen ungloublichi Leischtig. Es isch wiene Parade. Si warte ufenand, goeh mitenand witer, schoen eine umen ander, u ersch ir Nechi vo de Naeschter goeh si dr eiget Waeg.

Voll wunerbare starche Bilder hei mir de Kangaroo Island wider verla u mache ues ufe Waeg nach Melbourne - Sydney

Viu liebi Gruess vo down under