Dear friends

das isch sch dr letscht Bricht won i oeich vo down under schicke mir si oeppe 100km vor Sydney, zruegg ir Zivilisation. Ha huet ae Waetteralarm uebercho, dass es im Aaretal soeu schneie!!! Drum gniesse mir die letschte warme Summertage u i froeie mi, dass i mau im Summer darf Geburi ha.

Ueber Melbourne schribi nid viu, es isch ae laermigi Grossstadt, es het mir nid so gfalle dert.

Mir si de vo dert suedwaerts, ab id Natur, i Wilsons Promontory NP. Nachem Znacht si mir uf uese Abe-Pirsch-Spaziergang u promt hei mir ae Wombat choenne gseh. Muesst oeich aes ueberdimensionierts Meersoeili vorstelle. Si choenne bis 30kg schwaer waerde, ernaehre sich vo Gras. Am Tag druf simer de ga wandere, ufe Mt Bishop, immerhin 315 m.ue.Meer.!!! Am Abe nachere herrliche Duschi hei mirs ues de vorem Huesli gmuetlich gmacht fuere Apéro z`naeh. Chum hei mir ds erschte Chips im Muul gha si mir ueberfalle worde, vore Horde Crimson Rosellas (gsehts uf de Foeteli). Ha no grad schnaell choenne aes Taeller ueber d Chips tue, aber si si de hartnaeckig blibe. Im Kafi het eine verzellt, aer heig ae Hamburger verusse abgstellt, sig no schnaell ine u scho isch ds Fleisch waeg gsi, nume no ds Broetli ufem Tisch!!
Es isch aes luschtigs Erlaebnis gsi.

Hei beschlosse, dr Kueschte na uf Sydney ds fahre, wills ide Baerge no Schnee heigi. Ar Kueschte nache hets o immer wider Nationalparks u mir si fasch jede Tag ga loufe. Ae bsunders schoene NP isch dr Murramarang NP. Ae Campground amene Troumbeach u Kaenguru gumpe eim fasch uebere Tisch. Das gniesseni natuerlich bsunders u wott die Bilder mir ganz guet merke.
Ds Waetter meints mit ues wider ganz guet u drum schnalle mir dr Rucksack ud Wanderschueh. Fahre zersch ufere Gravelroad 25 km ine Park, da darfs de ja nid cho raegne, suesch hei mir de es groessers Problem. So, de geits baerguf, das Mal uf 720m ue. Meer ufe Mt. Pigeon House. Die letschte Hoehemeter ueber Leitere, dobe ae herrliche Blick ueber ds Tafelland u bis ads Meer.

Hei de wider im Murramarang NP uebernachtet, eifach troumhaft. Hei dert ae Kaengurusippe gseh, ha 46 ohni die ide Buetle ine zellt. Dr Fotoapparat isch scho bald heiss worde. I ha vo dert fasch nueme waeg choenne. Am Abe, wenn me no id Toilette uebere het muesse, ischme fasch ueber d Kaenguru gstoglet, am Morge, wenn mir d Vorhaeng ufzoge hei, si si o scho wider am grase gsi.

Tage goeh so schnaell verbi u mir muesse witer. Canberra hei mir ussegla u morn waerde mir ds Sydney ifahre. Uf die Stadt bini gspannt. am Mittwuch fluege mir de ab nach Dubai, wo mir no waerde ei Tag verbringe u am Fritig si mir zruegg im Winter??!!!
Es isch einisch meh ae wunderschoeni Reis gsi, bi froh han i de no chli Zit die vile Idrueck z verarbeite, bevor dr Alltag wider ichert.

Hoffe oiech de gli alli z gseh u de gits no viu z brichte

ganz liebi, sunnigi, warmi down under Gruessli