Dear friends

nacheme schoene Flug nach Cairns hei mir de tags druf ueses Huesli mit Outo gfasset. Puhh.. da isch ziemlich wenig Platz drin. Aber ds Australia soeu ja immer schoens Waetter si u de choei mir immer dusse aesse !?

Mir hei no aes paar gueti Tipps uebercho ir Vermietig u de hets choenne losgah. Nach paar Kilometer dr erscht Grossichouf ime Woolworth.Das isch immer wider es Erlaebnis besonderer Art.

In Port Douglas hei mir de uebernachtet, das isch am Meer. Natuerlich si mir dri, eifach ine ga ohni chalt zha, isch super gsi.
Da waerde mir zu Fruehufsteher,d Sunne u ds Vogelkonzaert het ues am haubi saechsi gweckt.Gmuetlich zmoergele d Hushaltig mache u de losfahre. Si grad chli ids Hinterland, das heisst ueber dividing range uebere ine fruchtbari Gaegend.Si de ufene Farm wo si Mangowi produziere. Hei ae Flaesche kouft, mhh.. fein gsi. Vo jetz a bis nach Brisbane isch Zuckerrohr staendige Waegbegleiter.
Ae Walk im Raegewald het o nid doerfe faehle, ueber Haengebruegge si mir uf Boumchronehoechi glofe.
Uebernachtet hei mir am Mission Beach. Schoens Kaeffli am Meer aber nach de 7i naehme si alles ine u es isch tote Hose. Nid mau es Kaffi chame meh ga ha.

Am Airlie Beach hei mir de ae Usflug mit Boot zu de Whitsunday Insle buechet. Dert soeu dr Kaepten Cook ame Pfingschtsunntig glandet si,drum dr Name.Nachere Stund Seefahrt hets de ae Halt gaeh zum schnorchle. Zersch no Vorsichtsmassnahme,Gsunheitscheck und und und... Alli hei de aen Azug mit Kapuze u Haendsche dran gfasset, waege dene Qualle wo choei im Wasser si. Es isch ungloublich schoen gsi die Unterwasserwaelt u die versch. Koralle

Nacheme heisse Tee isch d Fahrt witergange, mir si mit Gummiboot ads Land u hei de vo obe uf d Whitsunday abegseh. So stell i mir ds Paradies vor!!! Am Whitsunday Beach isch schneewisse Sand, dae isch soooo fin, dass es quietscht unger de Fuess. Si hei de es BBQ vom feinsten zwaeggmacht, alles vom Boot ids Gummiboot u de ads Land. Paar fraechi Goannas hei scho gwartet, oeb aech fuer si o oeppis uebrigblibt.

So de muesse mir wieder chli suedwaerts. Sueche ues dr Eungella NP zum uebernachte us. D Strass geit raecht ds Loch uf, si de oeppe 600 M.ue.Meer. Im Park soells Schnabeltier gäh. Hei mir aech ds Glueck, die schueche Tier zgseh?? Mir heis, das isch ganz es witzigs Vichli, gseht us wie ae Biber, het aber ae Schnabel. Dae Platypus toucht unermuedlich uf u ab. Wissi Kakadu hei mir o no gseh, ufeme tote Boum si sicher 50 Stueck gsi u hei ae Mordslaerme gmacht.

Nacheme Fahrtag hei mir de wider chli oeppis woeue ungernaeh. Hei beschlosse nomau ae Insle z bsueche u derfuer Fraser Iland usezlah.Will dert haetti mir muesse es anders Outo miete, wills ae Sandinsle isch u nume 4x4 Fahrzueg goeh. Ds Agnes Water soells schins meh Kaenguruh gaeh alls Iwohner u isch aebe dr Usgangspunkt fuer d Insle Lady Musgrave. Kaenguruh hei mir bis jetz aber o no kes einzigs gseh!!! Das isch nomau wunderschoen gsi, ussert dass dr Peter vom struebschte seechrank isch gsi!!!!

Mir si jetz churz vor Brisbane, gaebe em Maentig ds Outo ab u fluege de nach Adelaide

Liebi Gruess