Ja, u das het itz wieder mau chli duuret bis zum nächste Mau. Mittlerwile hei mr scho fasch 4 Wuche ds Kambodscha verbracht u si vor paar Täg z Vietnam acho. Es fäut auso no ziemlech e Biz u i muess mau wieder chli zämefasse.

Auso, ds Ao Nang si mr verblibe u zwar no ganz am Afang. Natürlech hets dert no es paar Festli gä we mr mau wieder au die Lüt um üs ume he gha. Grad a däm Tag nach dr Immigration het Job to do im Center Point gspiut. Dr Center Point isch itz mittlerwile e grosse Platz mit eme mehrstöckige Gebäude u zu dere Bar wo ds Konzert isch gsi geit sogar e Routräppe ufe. Ja me erkennts jedes Jahr chli weniger das Ao Nang. So oder so, ds Konzert isch so ziemlech für gar nüt gsi, dinne hets nämlech ke Platz gha u drfür heiss wie ne Aff u uf dr Terasse usse het me nüt ghört. Mir hei üs glich amüsiert, hei no d Gung troffe (sie wohnt itz mittlerwile z Lungere) u si när id Amy's Bar, wieder mau ar Mary ga sälü säge...

Süsch si mr mau no zum Rippon is Restaurant ga indisch ässe, hei aui zäme es Speedboatusflug gmacht, uf Koh Hong u die Inseli dert ume, hei e wiudi Poolparty gha bim Scheidi sine neue Hüsli (nach dere hani dr Räschte Bounty Rum verschänkt...), si bi Ivan u Wee vrbi, ga Kanufahre bi de Höhline mit de uraute Wandmalereie u natürlech o no mau zum Jo u zur Amy. Isch ömu lustig gsi, aber nid sehr erhousam.

Am 11.1. hei mr när äbe müesse ga, wüu ja ds Visum nume bis em 12. isch gültig gsi. Zersch hätt mr vorghä mit em Nachtzug um Bänki u när ufem Landwäg uf Siem Reap, ungerwäx vilech no bi Schubis vrbi. So si mr haut vo Bangkok us gfloge, u zwar uf Phnom Penh, wüu das günstiger isch gsi. Da mr dr Nachtzug vo Surathani hei gno, hei mr ersch am Nami vo Ao Nang wäg müesse, hei üs auso no chli am Pool vom Abschiedsfestli chönne erhole. När mau wieder lustigreisen.th, mit em Minibus mau ändlos dür Ao Nang u när Richtig Krabi fahre, dert irgenwo ir Pampa usglade wärde u mau warte, zäme mit jenschte angere Lüt... Mir natürlech geng i de Startlöcher zum üs e guete Sitzplatz erkämpfe, wüu si üs ja hei gseit es gäb ke grosse Bus uf Surat, nume Minibus. U es het würklech viu Lüt gha. Es isch aber när glich e grosse Bus cho, mau e chli Platz gha auso. Da aui Schlafwäge scho fasch vou si gsi wo mr zwe Tag vorher si ga bueche, hei mr e spätere Zug müesse nä u drum no ziemlech lang am Bahnhof warte. Mir hei o nüm zwöi Bett überenang übercho, nume no zwöi oberi aber ömu nid wyt vo nang wäg. Dert wo i zersch ha häre wöue het dr Kondi gfunge müess dr Role schlafe, es ligi e Mönch im ungere Bett, da chönn nid ig obe dra. Leider hei mr o nume no e Platz im Aircon Wage übercho, isch no so e chauti Nacht worde. Aber mir rächt uf dr Schnure u glich nid schlächt gschlafe.

Ds Bänki när mau mit U-Bahn u Airport Express zum Flughafe, dert no chli Zyt totschlah, bim Zou no em Zöllner müesse zeige, dass mr ke Overstay müesse zahle, d Verlängerig vom Visum nume ufere ganz angere Site isch, u churz drufabe si mr scho ds Kambodscha gsi. Isch no e lustigi Sach dert mit dene Visum, chunsch grad zum Flugi us u muesch dr Pass, 20 Dollar u es Föteli ga bringe, er macht irgend e Chribu, git dr Pass witer u när steisch mit aune angere Touris blöd ume bis eine am angere Ändi vom Schauter mau mit em Pass umewädlet u me ne wieder cha ga hole.

U wo das aus erledigt isch gsi u mr usem Flughafe si cho warte scho zwe Taxifahrer mit em Namensschiudli uf üs. Ja wele nämer itz? Dr eint isch när mit em Gepäck drvo, auso nämer dä, u hinger dri het sich usegsteut, dass si üs es Tuktuk gschickt hei, dä het am Hotel gmäudet er heig es Problem u sig vielech nid rächtzytig, die hei üs no es Taxi gschickt u am Schluss si äbe när glich beid dert gsi. U dr Tuktukfahre wo für nüt isch gfahre het üs när di ganzi Zyt belageret u umbedingt e Tour wöue mache, dass er wenigstens öppis verdienet.

Das si so die erste Iidrück gsi vo Phnom Penh, dr nächst u äuä iidrücklescht isch när dr Verchehr gsi. Läck hei die es Chaos! U vo lutter hin u här hei mr sogar ersch öppe nachere Viurtustung fahre gmerkt, dass mr ja mau wieder uf dr rächte Site fahre. No komisch so nach über 4 Monet Linksverchehr. Süsch het üs Kambodscha aber grad vo Afang a guet gfaue u das isch o die ganzi Zyt so blibe. Scho d Lüt im Hotel si scho fasch überfründlech gsi u am Abe bim Znacht hei mrs u lustig gha mit dr Serviererin. Die meiste Khmer hei geng es hübsches Lächle u öfters mau es dumms Sprüchli für eim übrig.

Z Phnom Penh si mr aber nume 2 Nächt gsi, hei ja mit Brünu ds Siem Reap abgmacht. Auso hei mr eifach ei Tag für chli Sight Seeing gha, si chli dür Stadt gspaziert, usegfunge wie me am beschte so ne chaotischi Strass cha überquere (eifach am ne Mönch hinger nache loufe), si dr Chönigspalast ga aluege u när gäge Abe ir Restaurant-Meile am Flussufer acho, wo mr o grad si blibe hange. U hei gmerkt, dass es nid nume schön u nätt, sondern o biuig isch. Dr Rächnig für ne Pizza u e megafeini Rüeblisuppe zum Znacht inkl. diversi Ankors het üs grad mau 17 Dollar koschtet. Isch übrigens o no lustig hie, zum Bankomat chöme nume US Dollars use, die offizielli Währig wär aber Riel. Itz chasch überau mit däm zahle was grad hesch, 1 Dollar oder 4000 Riel, dr fix aber inoffiziell Umrächnigskurs wo überau giut.

Da mr am nächste Tag ufe Bus für uf Siem Reap hei müesse, hei mr üs när mau es Tuktuk gsuecht u si nachemne Abstächer i so ne lustigi Röcknröll-Bar mau ga liege. Tuktuk si übrigens o lustig ds Kambodscha, eifach e Ahänger hinger am ne Lady Bike. Aber fägt no mit dene.

Aber äbe, aus nächschts isch Busfahre agseit gsi. Hei üs scho uf lustigreisen.kh igsteut. U wo üs am Morge dr Minibus ersch isch cho hole, wo eigentlech dr Bus scho fasch hät söue abfahre, u när ersch no fasch usenang keit isch, hei mr scho dänkt das cha lustig wärde. Aber eigentlech si Bösse gar nid so übu, no bequem u Schlacht ume Sitzplatz gits o nid, steit nämlech es Platznummero uf em Billet. U so si mr nach paar Stung mau ds Siem Reap acho. Zum Glück isch üs o hie eine vom Guesthouse cho hole, git süsch geng chli e Sach mit au dene Tuktukfahrer wo eim scho erwarte. Dasmau isch es nume eine gsi u het es Tuktuk gha. Ds Hotel isch nid wyt gsi, ds Zimmer het zwar chli gmiefet aber e fasch privati Dachterasse vor dran gha u dert isch churz drufabe o scho dr Brünu uftoucht.

Er het o scho es Tuktuk organisiert gha, wo üs grad am nächste Tag dür Ankor het söue fahre, da schiins das dr letscht Tag sig, wo no nid so schlächti Wätterprognose heig. Jaja... Ömu hei mr dämfau a däm Tag nüm auzuviu gmacht, chli füre wo die meischte Beizli si ga Znacht ässe und üs la übers Ohr houe vom ne chline Meiteli, wo bättlet für „no money, food!", när mit em Role i Lade geit u mit ere Büchse Miuchpulver für 7 Dollar wieder usechunt. Öppis angers z Ässe het si nid wöue. Auso dr Brünu grad mau ga google u Brichtli gfunge, dass si das Miuchpulver när wieder am Lade zrügg bringe u dass es wieder u wieder verschouft wird. Auso o zletscht mau gsi. Wo mr mau hei probiert, ihne früschi Miuch z choufe, heis sis ömu nid wöue.

U am nächste Morge isch äbe när mau ds Tuktuk cho u het üs aus erschts grad zum Ankor Wat bracht. Isch auso scho iidrücklech, trotz de Tourihorde. Wo mr när zum Bayon si, zur nächste Ruine hets aber promt afa schiffe. U no viu meh hets abegla bir übernächste, i Ströme! So viu zur Wätterprognose (die nächste Täg hei mr übrigens nie meh Räge gseh...)! Drum si mr nach däm Tämpu mau ga ässe, u tatsächlech, wo mr am Nami när dr Tomb Raider Tämpu si ga aluege isch sogar d Sunne füre cho. U dä isch no fasch krasser aus die angere, wüu überau riesegrossi Böim us de Mure usewachse. Zum Sunneungergang si mr nomau zum Ankor Wat, o schön gsi. U dr Brünu het no es fescht gha mit zwöi chline Modis, wonim zersch öppis hei wöue abchoufe u när umbedingt mit sim Naddel Angry Birds spiele. Er het zwar fasch ke Moscht meh gha u ne gseit, Battery sig emty. Het se nid gstört, hei si gfunge „ok, give me empty!"

Zrügg bim Hotel het dr Brünu när gfunge, mir wou vorem ässe no chli vorglüehe uf üsem Terässli, schliesslech hei mr wöue i si Geburi inefiire u är si Vodka wöue teste. Nachem ässe si mr ine Bar ufem ne Dach, bis dr Brünu plötzlech nüm so het möge nach au däm Vodka. Auso mau zrugg zum Hotel, no mau chli ufs Terässli, u plötzlech isch ds Geburiching när glich wieder wach worde. Und wie, het die ganze Nachbare ufgweckt... U wüus grad so lustig isch gsi u scho bau gäge Morge, hani mau d Idee gha, mr chönnt üs ja es Tuktuk schnappe u zu de Tämple ga dr Sunneufgang luege. Gesagt, getan. Dä het üs när zum ne Tämpu uf em ne Hügu überem Dschungu bracht und herrlech ischs gsi, mir zersch ganz allei, nume d Grüsch vom Dschungu (we dr Brünu u dr Role mau stiu si gsi). Nume d Sunne isch leider nid würklech fürecho. Het sich trotzdem glohnt.

Natürlech hei mr süsch a däm Tag när nüm dr Hufe gmacht. U am nächste het dr Brünu abgmacht gha zum so ne Schuel vom ne Hiufswärch ga azluege, wo er äuä de a Pateschaft für nes Meitschi wott übernäh. Und dr Nami druf hani gloub drmit verbracht, dr letscht Blogitrag z schribe. Am Abe no chli dr Brünu verabschiede, isch si letscht Tag gsi in Siem Reap u när isch o scho das Tägli wieder umegsi. U fasch genau so schnäu o ds nächste. Usser chli dürd Stadt u übere Märit z loufe hei mr nämlech o nid würklech öppis gmacht.

Am übernächste ischs witergange nach Battambang. Isch es härzigs Käffli ire schöne Gägend, fasch chli schad gsi hei mr nume zwe Nächt dert iplanet. Aber viu mache chasch ja eh nid, ussert Tuktuktoure zum Bamboo Train u es paar Tämple, was mr am nächste Tag o hei gmacht. Dr Bamboo Train isch lustig gsi, eifach zwe Achse mit Bahnrädli u ne abnähmbari Plattform us Bambus mit em ne Motor druffe. U so fahrt das Ding - oder houperets vorauem - über die aute Bahnschine us Franzosezyte, wo im Moment ke Züg meh chöi fahre. U we eine entgäge chunt muess eifach dä mit weniger Lüt druf oder mit weniger angere „Züglis" hinger sich uswiche. Auso d Plattform ablüpfe, dr Rädli ab de Schine nä u di angere dürelah.

Nach däm si mr no uf ne Hügu mit em ne Tämpu und ere Höhli, wo di rote Khmer aui drin hei verlochet wo ne nid hei passt. Fahrt no i dert näb dene Chnoche z stah. U mir hei es Motorbike Taxi für ufe gnoh u dr eint Fahrer het üs aues zeigt u dert inne verzeut u verzeut u i hätt eigentlech gärn mau wieder use wöue. Vorauem wüu i eh nid ha verstange was er da aus brichtet...

Witer obe ufem Hoger hei mr när dr äuä rötischt Sunneungergang gseh u wo mr wieder si abe cho si grad d Flädermüs usgfloge. Das het dert es paar Millione vo dene Viechli wo ire Höhli wohne u die gö jede Abe uf Frässtour. U schiins göng das aube ei bis zwe Stung, bis die au usgfloge si. Gseht krass us, wie e Rieseschlange übere Himu würd schlängle.

Am nächste Tag simer wieder zrugg uf Phnom Penh. Ds Ziu isch eigentlech Sihanoukville gsi, e Ort am Meer, aber dass mr nid auzu lang uf einisch müesse fahre, hei mr no mau zwe Nächt z Phnom Penh buechet u üs dert mau wöue ga ds Nachtläbe aluege, isch schliesslech Wuchenend gsi. U das hei mr när o gmacht. Die Bar wo so tolli Live Bands hätt söue ha isch auerdings nid ganz so toll gsi, drfür tür. Mir hei aber no es gmüetlechs Pub gfunge u so isches glich gnue spät worde, dass mr am nächste Tag keh Lust meh uf Abentür hei gha. Hotel für Sihanoukville sueche u meh isch nüm ufem Plan gstange. U zum Glück hei mr das no buechet, o we mr nüt hei gfunge wo üs würklech het gfaue. Aber es isch chinesisches Neujahr gsi u aues vou!

O scho mit em Bus hei mr äuä Schwein gha. Dä wo mr zersch hei wöue isch ömu nüm frei gsi u dä wo mr am Schluss hei gha äuä no mau e angere, aus dr Typ ar Rezeption zersch het gseit. Ömu angeri Abfahrtszyt u dasmau ohni Transfer zur Busstation. Macht ja o nüt, isch nid wyt wäg gsi vom Hotel u z Phnom Penh muesch nie es Tuktuk sueche, die sueche di. U dr Bus isch eigentlech o nid übler gsi aus die angere. Ussert dass es ungerwäx plötzlech gräblet het und er churz druf abe het müesse ahaute. Anschiinend het sich irgend öppis bim Radchaschte säubständig gmacht. Het ömu e Bitz gfäut. Auso hei sie da mau es paar Minute dran umebaschtlet. U wo mr si wytergfahre heis doch tatsächlech zwöi so verwirrti Hippiemeitschi gschafft dass sis nid hei gmerkt. Nach em ne Zytli fahre het plötzlech eine vo hinger grüeft, es fähli no öpper. Hei mr haut uf die när o no müesse warte. U bim Stopp bir nächste Beiz isch dr Bus du när plötzlech drvo, weiss nid ob ers het wöue ga flicke. Wo ner isch umecho het dä Bitz ömu geng no gfäut.

Aber o mit däm Bus si mr när mau am Ziu acho. U ds Zimmer isch ziemlech gnau so gsi wie mr üs das hei vorgsteut, miefig u nid eso schön. Aber itz, hei scho schlimmers gha, um am Schluss hei mr üs dra gwöhnt u si sogar no länger dert blibe aus planet.

Am Abe si mr mau d Gägend ga uskundschafte. Bi däm Strand wo mir si gsi isch e Megasach, so was zwüsche Ballermann u Phuket. We me aber d Beach Road ufegeit hets zwar geng no viu Züg, aber e chli weniger wiud. Nach em ne feine italiensche Ässe bim Franzos si mr no chli witer d Strass ufe zum Big Easy, e Bar wo no eine uf dr Bühni uf sire Gitarre het umeklimperet. U plötzlech hei si wöue 4-gewinnt spiele mit üs. Is has gli mau ufgäh, si hei zweni Steine gha u am Schluss hesch geng d Finger müesse dert häre tue wo dr Stei hätsch wöue. Hani gar nüm düre gseh. Aber dr Role het es Talent für das Spiu. Nach däm er aui mau gschlage het si sie ihre Spezialist ga hole, u dä isch de doch chli besser gsi - Switzerland 4, Cambodia 9 oder so. Aber er het Fröid gha, dass ne mau eine chli het chönne fordere. Ufem Heiwäg si mr no bire angere Bar zuche wo eine klimperet het u am Schluss glich dert am wiude Beach no schnäu zuchegha. Isch würklech so gsi wie mr üs das vorgsteut hei, auso si mr doch de gli mau hei.

U am nächste Tag hei mr agfange Hotel sueche. Im Internet und direkt bi de Hotel ga frage, aber hei eifach nüt gfunge. Mir hei ja fang nume zwe Nächt buechet gha u no chli länger wöue blibe, aber wo???

Am übernäschte hei mr geng no nid meh gwüsst, auso ischs üs verleidet u hei eifach der verlängeret wo mr si gsi. Usserdäm hei mr no es Vietnamvisum müesse bsorge. Hei gläse, dass sig ds Sihanoukville am eifachste. U würklech ganz easy. Geisch eifach häre, füllsch e Zedu us, gibsch Pass, Gäud u Föteli ab u zwe Minute später hesch dr Pass mit em Visum wieder. Angerne Orte bechämsch es schiins nid mau am gliiche Tag.

U wüus so schnäu isch gange si mr scho vorem Mittag wieder zrugg gsi u hei gar nid rächt gwüsst was mache. Auso hei mr mau d Jasscharte päcklet, si ines Strandbeizli am ruhigere Egge vom Beach u si dert blibe hange. Isch grad so gmüetlech gsi, dr Snack am Namitag o fein, auso blibe mr doch o grad no zum Znacht. U wo d Serviererin no het ihre Dütsch-Bröckli füregno u het afa Gschichtli verzeue ischs richtig lustig worde. Genau so wie mit em bayrische Consultant u sire Frou, wo när no näbe üs a Tisch si ghocket. Plötzlech hei si Fürabe gmacht u mir geng no dert. Dr Role hät no gärn mau wöue im 4-gewinnt gwinne, auso si mr no mau ufe zum Big Easy, die hei aber när o grad zue ta u eigentlech hets ja o glängt.

Tag danach hei mr üs wieder mau müesse Gedanke mache was witer geit. U tatsächlech hani plötzlech es freis Bungi am chli ruhigere Beach gfunge, yeah. Auso hei mr am nomau nächste Tag chönne zügle, u ändlech mau wieder es Bungi fasch am Strand gha. Isch würklech viu gmüetlecher dert am Otres Beach, nume es paar Beizli am Strand u die meischte mites paar Strohhüttli. Üses Bungi isch aber sogar es gmuurets gsi, mit em ne herrleche Terässli u feinem Zmorge, wo si üs sogar dert häre hei serviert. U am Role sini x Cappucinos am Tag... u vor dran im Sang het dr Bebehung mit em Buddy gspiut u mir hei ömu nid lang überleit, ob mr no e Nacht länger wei blibe. Hei när dert o nid viu meh gmacht aus es eifach gniesse, u mau einisch id Stadt ga Gäud hole. Ah ja, u bim ne Geburifestli si mr mau zucheglatscht am ne Abe, wo si kambodschanischi Hitparade hei gspiut u gjohlet drzue u au Minute hei wöue mit üs astosse. Aber was Proscht heisst uf Khmer hei mr üs trotzdäm nid chönne merke.

Nach drü Täg isches wieder mau Zyt worde für die nächsti Station, Kampot. Das isch e Ort chli meh im Süde, hübsch am ne Fluss gläge u nid ganz am Meer. U am Ufer entlang hets o überau härzegi Beizli u Bars, gmüetlechs Käffli. Nume ds härecho isch o wieder mau lustig gsi. Das Mau hets nume Minibus gä. Zersch het üs es Tuktuk vom Otres Beach ad Beach Street füre bracht, wo mr mau si useglade worde u hei gwartet. Irgendwenn isch e Minibus cho, mir mau igstige, es paar angerne hei si gseit, sie müessi uf nes angere Büsli warte. Mir ds Ticket zeigt u er „Sorry Sir, I don't know". Aber mit üs dervo gfahre isch er trotzdem. Natürlech wieder chrüz u quer ga Lüt uflade, u irgendwie hei sogar aui inemöge. Mir hei ja aus erschts ine chönne u eh nid sone schlächte Platz gha. Aber isch ja o nid so wyt gange.

Ds Kampot acho het er üs eifach mau bim ne Guesthouse usegla. Tuktukfahrer natürlech scho wieder gwartet. Es wär zwar nid so wyt gsi u mir hei eigentlech wöue loufe. Aber da's nume e Dollar het kostet, heiss isch gsi u mir nid ganz sicher wo düre, hei mr üs doch eis gleischtet. Drfür hei mr mit ihm när o scho abgmacht für nes Tüürli id Umgäbig, u da hei mrs gloub nid schlächt troffe.

Vorher hei mr mau no chli wöue ds Städtli uskundschafte. Si chli am Fluss entlang, mau e Lade gfunge u e Laundry, am Abe chli i Usgang u när mau ids edle Hotel zrügg. Am nächste Tag i di angeri Richtig vom Fluss u mau no bir Post vrbi, Charte abschicke für ne Margge wo 1 Dollar chostet, auso äuä öppe 10 mau meh aus in Thailand. Bi mr nid sicher ob die Charte de würklech mau achunnt oder ob das Grosi dert am Schauter nume die tüürschti Margge het verchouft, damit si se cha abchratze u nomau verchoufe. Gäbs schiins aus, lö mr üs la überrasche... U da mr äbe scho chli nes tüürs Hotel hei gha, drfür mit DVD u Züg u Gschichte, hei mr das natürlech o no chli müesse usnütze u hei nis e fule Abe gmacht.

Drfür si mr när fit gsi fürs Tuktuktüürli. Coca wie Coca Cola het üse Fahrer gheisse u geng gseit „I show you...", när hets zwar nüt gä zum luege aber ömu verzeut het ers üs. Hät mi wunger gno, was er genau meint was das heisst.

Zeigt het er üs aber scho o öppis. Zersch mau d Sauzfäuder. Leider hets i de Tage vorher grägnet gha, das heisst, die ganze Becki si mit Rägewasser gfüllt gsi u es isch äuä no lang gange, bis das mau verdunschtet u ds Sauz füre cho isch. När ischs witer über Fäuder u Wiese, dür Burehöfli mit Hüng u Chüe u Söu u Hühner, Güggle, Änte... u überau chlini Göflis am Winke u wie wiud Hello rüefe. Lustig gsi.

Ds nächste Ziu isch e Feuse gsi, dr Phnom Chnork (oder so), mit ere Höhli u dert drin e uraute chline Tämpu us Bachsteine. Öppe 6. Jahrhundert u geng no ziemlech ganz, wüu ihm ir Höhli nid viu het chönne passiere u per Zuefau o di Rote Kmehr ne nid kaputt gmacht hei. Dr Tämpu im Feuse näbedran heig schiins nid so viu Glück gha, dä hei si im Chrieg usenang gnoh. Chum si mr id Nächi vom Phnom Chnork cho, si e Horde chlini Giele cho ds seckle, dr eint isch sogar scho mit em Velo am Tuktuk nachegfahre u hett mi ungerwäx scho usgfragt: woher chunsch, wie heissisch, gfauts dr hie, was gfaut dr de hie...

Die Jungs hei üs när o zum Tämpu gfüehrt u feiechli Gschichtli verzeut. Über sich u über e Tämpu u d Höhli. U dass mr itz bi dere Hitz mau 300öppis Stufe ufe müesse. Zum Glück hets ir Mitti so ne Art Ussichtspunkt gä, wo mr hei chönne ahaute u die herrlechi Umgäbig studiere. Schad isch ds Riis scho überau gänrtet gsi, in grüen hätts äuä no schöner usgseh. O ir Höhli inne hei sie üs aui Feuse u Tropfsteine erklärt, dä gseht vo dere Site us wie ne Sou u vor angere wie ne Elefant, dr anger isch dr Hingerteu vom ne Krokodiu, hie e Schiudchrott usw. Auso ömu o lustig gsi.

Wyter ischs gange, mit em ne Zwüschestop bim ne Fischerdörfli („I show you the fishermen here are Muslim and sleeping now"...), es paar Böötli u es paar Hüsli ga aluege. U när zur Pfäfferfarm. Dr Kampot Pfäffer sig schiins eine vo de wäutbeschte u mir hei ne o scho probiert gha am Tag vorher, würklech lecker, auso hei mr grad es Kilo kouft u müesse das itz mit üs umeschleipfe. Aber itz wüsse mr ömu, wie u wo dr Pfäffer wachst. U hei dr läng u houprig Heiwäg dürd Fäuder mit de Chüe u so chönne aträtte. Mir hei no grad mit ihm chönne organisiere, dass mr em übernächste Tag es Tuktuk hei für uf Kep, üsi nächsti Station, wieder am Meer, u när mau öppis ga spachtle. Bi üsem Hotel hets Härdöpfusalat gä, herrlech! U am Abe no grad einisch herrlech, i som ne Beizli wos schiins Sri Lanki Food gäb. Mis Massala het zwar meh gschmöckt wie Saftblätzli, aber da gits ja würklech nüt drgäge izwände. Nach däm hei mr no d Wunderbar entdeckt u em Schluss no müesse dr Räscht vom Fium ga luege, woni am vordere Abe verpennet ha.

Üse letscht Tag ds Kampot hei mr nid so früeh agfange. Ds schöne i däm Hotel isch ja gsi, dass du eifach pro Tag eis Zmorge zguet hesch, u das chasch so lang d Chuchi offe het, auso Abe spät. U deses leckers Zmorge! Auso grad Abe isch no nid gsi. Es het no guet glängt, zum nächhär no mau es Tüürli dürd Stadt zmache, bis zum Märit u zum Bankomat. Auso das heisst, zersch mau x Kreisli ume Bankomat ume, bis mr ne de ändlech gfunge hei. Aber zum Glück hei mr ne gfunge, üses Hotel hei mr müesse bar zahle u a üsere nächste Station, z Kep, gits gar ke Bankomate, auso no mau tüchtig Vorrat müesse uselah. Gäge Abe hei mr no es Bootstüürli gmacht, dr Fluss zdüruf u im Sunneungergang wieder abe. Hübsch isch das gsi. U ufem Boot no e Schwyzer troffe, wo mr när promt mit ihm ir Wunderbar si blibe hange...

Aber mir hei ja am nächste Tag ersch am Mittag mit em Tuktukfahrer abgmacht, dr Coca isch zwar nid säuber cho, aber sini Verträttig hett scho meh aus pünktlech uf üs gwartet. Isch auso scho chli gäbiger mit em Tuktuk dürd Landschaft zdüse aus im ne Minibus iquetscht. O wenn mr dr letscht Bitz dr Hoger ufe bis zum Hotel no hei müesse loufe, das het das Töffli mit üs im Ahänger när doch nid gschafft. U drfür hei mr dert e herrlechi Ussicht übers Meer gseh, am angere Tag, bi klarerem Wätter het me sogar Phu Quoq gseh, die Insle wo mr itze si. Nume dir versprochnigi Hängematte ufem Baukon hets nid gha. Gmüetlech ischs trotzdem gsi u mir si für dä Tag grad dobe blibe.

Am nächste Tag hei mr mau wieder müesse plane: hüt isch Samsti, auso gö mr chli i Usgang. Morn isch Sunti, da bruche mr nid viu ds mache. Am Mänti gö mr uf Rabbit Island u am Dsiischti geits scho witer uf Vietnam. Die zwöi Sache hei mr no müesse bueche u när mau abe is Dörfli. Kep isch früecher de Franzose ihres Strandferiedorf gsi. Aber würklech schöne Strand gits dert nid. Trotzdäm isch es hübsch gläge, am ne waudige Hügu mit em Nationalpark obe druf. U üses Rundgängli isch auso ganz interessant gsi. Grad gnue wyt, dass me zersch bim Crab Market e Imbis het chönne nä, bis zum Beach scho wieder Hunger uf nes früehs Znacht het gha, zrügg bim Crab Market füre Sunneungergang u nes Füreabebierli ir Kep Rock Bar. Würklech grocket hets dert zwar ni, chum Lüt gha u nid immer gueti Musig, aber zfride gsi. Wo mr hei wöue ga chunt no d Serviererin mit zwöi Bier u seit, die göng uf ds Huus. Ar Rächnig hets üs zwar dünkt, di müesse äuä glich fasch druf gschtange si, aber itz.

När isch äbe Sunnti cho u mir hei chli ds Bauköndli gnosse. Wos ändlech chli chüehler isch worde hei mr üs ufe Wäg i Nationalpark gmacht. Het dert e Wäg rund ume Hügu, aber dä isch leider chli wyt, auso si mr nume bis zum erschte Ussichtspunkt u zum Wasserfau, wo aber nume paar Tag pro Jahr Wasser het. Am Schluss si mr aber glich fasch zwe Stung ungerwäx gsi, inkl. aune Stops, wo mr hei müesse d Ussicht bewundere. Ir nächste Beiz ga Znacht ässe u mau bezyte is Bett, schliesslech isch ja när scho Mänti gsi u mir hei früeh uf müesse für üsis Insutüürli.

Das isch o no schön gsi, ömu wo mr du ändlech mau im Boot si ghocket, bis si sech hei chönne entscheide i weles mr müesse stige u mr när dr kriminell Istiig überstange hei. D Insle het zwar nid ganz ghaute was sie het vrsproche, so ganz wysse Strand hets nid gä u einsam isches scho gar nid gsi, so zmitts ir Hochsaison. Aber es het sich nid schlächt verteut dert am Strand u für jede isch no e Ligistueu oder e Hängematte übrig gsi, u o geng gnue Platz zwüsch drinne. U mir si haut e chli verwöhnt vo Fiji... Ömu hei mrs gnosse, mau wieder chli bädele u sünnele, es churzes Spaziergängli düre Busch, mau eis ga zieh i eim vo dene Strandbeizli, was wosch meh. U schliesslech isches ja üse letscht Tag ds Kambodscha gsi, dä hei mr scho no müesse gniesse! Am Schluss si mr no grad rächtzytig wieder bim Hotel gsi, dass mr no mau i Pool si ghüpft u vo dert us dr Sunneungergang überem Meer hei chönne studiere, wow! Viu meh aus chli öppis i Mage hei mr a däm Abe när würklech nüm brucht.

U schliesslech hei mr müesse Chraft tanke füre nächst Tag. Wyt isches zwar nid so vo Kep (Kambodscha) uf Ha Tien (Vietnam), aber äbe, es liegt no e Gränze drzwüsche, Hotel hei mr o no kes gha u hie weisch ja würklech nie, was di erwartet we so nes Reisli buechisch. U würklech isches wieder mau völlig angers cho. Eigentlech hets gheisse es chäm de e Minibus, u evtl. fahri mr sogar drmit zum ne grosse Bus. När isch afa mau es Tuktuk cho. Mir fahri itz mit däm zum Bus. Ok. U Billet bruchi mr übrigens o kes, dr Fahrer wüss ja dass mr zaut hei. Ookeeeiii? U unger bim Peer hei no zwöi ufe Minibus gwartet. So aber äbe mir mit üsem Tuktuk cho. U wo ner het gmerkt, dass es chli äng isch für vier mit em ganze Gepäck isch plötzlech e Opi mit chlimne grössere Tuktuk cho u statt i Minibus si mir dert dri umgstige. He nu, mir hei üs eh scho überleit gha es Tuktuk znäh zur Gränze, fägt meh mit dene aus im Bus.

Bir Gränze het scho eine uf üs gwartet. Het wöue üses Billet gseh. Aber es het tatsächlech nüt gmacht, dass mr kes hei gha. Mir söue ihm nache het er gmeint u isch scho drvo gschuenet. Mau zu somne Houzhüttli füre Usreisestämpu us Kambodscha. Wo mr genau sig gsi u wie lang dass mr ds Kambodscha sige gsi, het dr Zöuner gfragt, aus ob er üs nid wett uselah. Het er aber när glich, eigentlech no bau schad. När i eim Tempo ere stoubige Strass entlang schuehne, bis irgendwenn ds nächste Hüttli isch cho. Dert mau zum erste Fänschter, wo mr e Zedu hei müesse usfülle u er mit somne komische Grätli über usne Häng umegfummlet het zum üsi Temperatur mässe. När zum nächste Fänschter, wo scho e ganzi Busladig Touris isch vordranne gstange wo uf ihri Päss hei gwartet. Eine drvo isch e Bärner gsi u het üs verzeut, er sig itz vo Sihanoukville cho u heig scho x-mau müesse umstige, wüus ändlos überfüllt sig gsi. Drum isch dä Bus äuä nüm ds Kep vrbi cho...

Wo die ganzi Horde när mau bedient isch gsi, si mir dra cho. Churze Chutt gsi u mir scho über d Gränze dörfe, zum ne chline Beizli wo üse „Führer" het gwartet. U mir när o, u zwar es Zytli. U ihr Zwüschezyt het üs natürlech scho eine es Taxi, es Hotel u was weiss i aues wöue verchoufe. Irgendwenn isch e Minibus vou Lüt vo Vietnam här cho. D Lüt au usglade u üs i. Mit em ganze Gepäck vo de angere Lüt (Don't worry, I come back...) si mr när ändlech los gfahre bis id Stadt. U dr anger fahrt üs tatsächlech mit sim Töffli hingernache. Dert het er scho e Kolleg uftriebe u gmeint, er fahri üs jetz zu däm Hotel, u zwar gratis. Warum o nid, anstatt no lang ga umesueche. U ds Hotel isch würklech no guet u biuig gsi, nigunaguneu u grad bim Märit. Auso, d Provision vom Hotel het er ömu scho chönne kassiere u itz no schnäu mit em Role zum Büro vor Fähri uf Phu Quoc ga nes Billet choufe, dasmau natürlech nüm gratis. U no grad abmache für e Transport zur Fähri am nächste Tag. He ja, gschadet hets üs nüt u drfür hei mr scho aus organisiert gha u no chli ds Städtli chönne ga aluege.

Isch no gmüetlech das Ha Tien. Hättes äuä o no chli länger dert usghaute. Obschons fasch nüt für Touris het u die meischte o ke Änglisch chöu. Hei am Nami mau es Hüngerli becho u si zu so zwöi aute Müetis wo Brötli hei uf ihrem Charre gha. Aber obschon si chum es Wort hei verstange, hets no fei es guets Sandwich drus gä. Es Wort Änglisch hei si ömu chönne: wo die einti uf Chillies het zeigt u dr Role het gfunge so eis chönn sie scho dri tue, meint die angeri „Poweeer" u beidi grinse ne fräch a u zwinkere mir zue. Lustigi Grosis.

U när hets no es Hochzytsfescht gä vor üsem Hotel, si chum meh ine cho nachem Sandwich. Die ganzi Strass isch vou mit Stüu u Tische gsi u überau si Lüt ghocket am Ässe u Bierli trinke, wo näb de Tische ide Harasse gstaplet si gsi. U e riese Alag wo si när für Karaoke hei brucht, schlimm hets tönt, bis zu üs is Hotelzimmer. Aber isch zum Glück e churze Chutt gsi u wo mir wieder use si für Znacht ischs scho fasch düre gsi. Viu meh her mr när o nüm gmacht, hei ja früech ufs Boot müesse am nächste Morge.

U wo mir ziemlech unusgschlafe si zur Reception abe cho, isch üse Töfflichauffeur o scho dert gstange. Isch ja no lustig mit em ganze Gepäck ufem Töffli dürd Stadt. Zum Glück hets dr Fahrer bi sich vore zwüsche d Bei gno u wyt isches ja o nid gsi. Ihn hets anschiinend nid gstört, het ömu o no gäbig chönne telefoniere bim Fahre. U när mau wieder Böötli fahre, no chli Minibus u ändlech si mr bi üsem Hotel am Long Beach vo Phu Quoc acho. U hei gmeint, mir heige de es Bungi mit Gardenview, aber wo sis üs isch cho zeige, louft si tatsächlech bis zum auer vorderschte mit riese Terasse, Stüehli, Tischli u zwo Hängematte u vor dran nüt aus es paar Paume zwüsche üs u am Meer. Herrlech! U o we ds Bungi säuber nid grad dr Hammer isch, mir hei üs entschiede, da blibe mr e Wuche u grad am nächste Tag verlängeret.

U isch würklech zfride uf dere Insle. Hie am Strand hets rächt viu Resorts u Beizli aber zum Glück nid so riese Alage, hautet sich auso no i Gränze mit de Lüt. U dr Stand isch herrlech! U wüu üsi Terasse ja äbe so bündig gläge isch, hei mr o sehr viu nume d Terasse gnosse.

A eim Tag hei mr e Bootsusflug zu de südleche Inseli gmacht. Isch so haubwäx guet gsi. Grundsätzlech no schön aber er het üs eigentlech versproche, mir fahri zur ganz ungerste Insle u dert heigs de e herrleche einsame Strand. Statt desse si mr nume dr ganz Tag vor de mittlere Inseli umedümplet u o nie a Land, nume Schnorchle, Fische, u einisch so ne chlini schwümmendi Fischfarm ga aluege. Drfür hets es leckers Zmittag gä u bequemi Ligistüu ufem obere Deck gha, auso glich no gmüetlech gsi. O dr Sao Beach uf dr Ostsite vo Phu Quoc laht sich la gseh, wär aber äuä chli schöner, we me düre Tag gäng, wüu nämlech sämtlechi Tourigruppe nach ihrne Bootsusflüg no der häre gö.

Gester hei mr när ändlech mau es Töffli gmietet. Puuuuh isch das asträngend gsi! Vorauem wüu mr eifach mau gäg Norde si gfahre, eigentlech de nöime gäg Weste a die obere Sträng hätte wöue abbiege u die eländi Abzweigig verpasst hei. Plötzlech si mr ganz zoberscht gsi u d Strass geit dert nume ar Ostküste wieder abe. He nu, hei mr dänkt, gö mr haut dert düre mau ga luege. Aber plötzlech isch d Strass dermasse schlächt worde, u es het gheisse es göng no 23km bis zum nächste Ort, de hei mr gfunge chere mr gschider um. Si dert e chli witer obe vorher am ne Beizli am Strand verbi cho u när haut dert zuchegha bim zrügg cho. Wo si eim eifach unbsteut e Kokosnuss bringe, i ha gmeint gha dr Role heig die bsteut, isch aber nüt gsi, u zahle hei mr se natürlech trotzdäm müesse. Ömu dr Strand isch no schön gsi.

Aber äbe haut no dr ganz Wäg wieder zrügg när. Die Strass wo mr si ufecho isch äuä d Houptstrass, am Afang theoretisch sogar vierspurig mit em ne breite Mittustreife. Aber es wird immer nume uf eire Site vo däm Mittustreife gfahre, wüu dr anger irgendwo no nid fertig oder scho wieder kaputt isch. Das heisst, me het im Prinzip eifach zwe Strasse näbe nang, u uf beidne chönnt mit i beidi Richtige fahre. Aber me cha äbe nume eini bruche u muess de geng no hin u här wächsle. Aber drfür isch e grosse Teil teeret, nume ab und zue würklech i schlächtem Zuestang, aber i ha am Schluss glich fasch nüme chönne hocke.

Ja u när hei mr gester natürlech i Roles Geburi müesse inefiire. Gö ja morn scho wieder früeh ufs Boot u wei hüt mau ungere. Mir hei mit em ne dütsche Päärli abgmacht wo mr ufem Minibus dahäre hei kenneglehrt u o scho zwe Äbe vorher mit ihne hei vrbracht, Bibsi und Pauli. Sie si no bi ihrem Bungi gsi u hei gfunge, mir söue doch zuchehocke u wo mr när mau hei wöue ga ässe isch tatsächlech scho 10i gsi u d Chuchi zue! Pommes frites hätte mr no chönne ha, schöns Geburiässe! Aber zum Glück hei mr nö öppis gfunge wo het offe gha u o ganz lecker isch gsi. Dert si mr blibe hange bis si üs hei usegschosse u mr no grad churz vor Fürabe wieder zrügg bir angere Bar si acho. Es het no grad öppis ztrinke gä, aber nüm lang. Trotzdäm si mr bis bau am 5i dert blibe hocke u hei üs köschtlech amüsiert, ersch rächt wo üs dr Pauli no dr Bembers uf Youtube hett zeigt. Fasch id Hose gmacht wäg däm Löu!

He ja, u itz si mr hie, viu zlang gschlafe, ds Tägli viu zschnäu düre u mir heis nid mau meh es letschts mau is Meer gschafft. Immerhin aber dr Blog chönne fertig schribe u doch no es paar Stündli üsi Terasse chönne gniesse. Morn geits is Mekongdelta, när mau uf Saigon, vo dert uf Laos u de isch scho gli Zyt, üs nach Bangkok ufzmache. Tja, mau luege was üs da no erwartet.