U wieder mau gar nid flissig gsi, isch doch sit em letschte Itrag scho tüchtig nächst Jahr worde, hoffe bringe glich no chli uf d Reihe was mr so hei gmacht...

Auso vo däm Tag vom letschte Itrag weiss is nüm so genau, isch aber sicher o nüm viu gsi, si ja am nächste Tag witer. Plan wär gloub gsi, dass mr öppis vor de 12i abghout wärde, när mau uf Krabi, denn Surat Thani, dert ganz lang warte u am 11.00 uf d Nachtfähri. Tönt nach lustigreisen.th part II u isch de o so use cho. Dr Minibus wo üs bim Hotel isch cho abhole het ömu scho tüchtig Thai-Zyt druf gha u wüu mr ungerwäx no x mau hei müesse Lüt iilade u uf teu no lang warte isch scho ziemlech Namitag gsi, bis mr ds Krabi si acho. Dert mau wieder e gäbige Ufenthaut, aber o hie hets ja zum Glück gnue Beizli u so hets ömu für Zmittag glängt. Wo mr ändlech mit em nächste Minibus hei chönne witerfahre, isch dä aber nume bis ines Ussequartier vo Krabi, öppe 10 Minute gfahre u dert hetzt zersch gheisse, es müesse au use ussert die wo uf Koh Tao wei. Mir scho Freud, chöi mrs üs mau bequem mache, aber scho gli hei o mir use müesse u sie dert ar Theke het üs erklärt, es sig sit paar Tag ke Nachtfähri meh gange wäge schlächte Wätter u mir müess de ds Surat übernachte u am nächschte Tag uf d Fähri. Süpi...

Nach grosser Verwirrig wüu teu nid dr Richtig Minibus hei verwütscht ischs när mau witer gange. Hinger im Minibus, i zum Glück mau wieder uf emne Einzusitz u dr Role uf em Bänkli mit emne Zürcherpäärli. Isch zersch no ganz lustig gsi, wo si aber zum xte mau i eire Lutstärchi hei verzeut, wie müehsam Kuta ds Bali sig, bini aber ganz froh gsi, dass sie üs mau immne Ussequartier vo Surat hei useglah, isch schliesslech mittlerwile o scho fischter gsi u mir scho chli uf dr Schnure. Die einzige Touris wos dert ussert üs no het gha si churz drufabe abghout worde u mir mau dert ghöcklet u nid gwüsst, ob itz no e Fähri geit oder ni. Sie hei üs geng nume gseit sie sig am telefoniere u es chäm de gli us. U plötzlech isch tatsächlech eine cho u het üs zum Pier gfahre. Dert hets no grad glängt für nes Nudusüppli u scho ischs losgange. Het no guet usgseh dä Kan, ganz neu, aber so es chlises Houzböötli mit nume zwe Stöck, unger ds Gepäck u obe eifach e Gang mit links u rächts ere Reihe Matratze mit Chüssi. Zum Glück nid au zu vou u so no rächt bequem u chum si mr agfahre hei mr beidi scho pennet.

Leider hani scho gli mau müesse ga bisle, nid so gäbig es Stehklo bi ziemlech ruchem Seegang. No weniger gäbig, dass i nach däm fasch nüm ha chönne schlafe, wüu ds Mätteli doch rächt dünn isch gsi u sich plötzlech no eine vor Crew het näb mi quetscht. He nu, o das geit verbi u irgendeinisch ischs tatsächlech häu worde u churz drufabe het me scho Land gseh. Immerhin d Fähri isch mau pünktlech gsi. U nach däm mr im Dörfli no hei zmörgelet isch de dr Fahrer vom Hotel o scho gli cho u mr hei ändlech üses Zimmer chönne bezieh. Hei nim zwar müesse alüte u die 100 Baht für ds Taxi wär üs äuä fasch biuiger cho aus ds Telefon aber itz...

Ds Hotel het üs chli enttüüscht, für über 2000 Baht hät mr chli meh erwartet, vor auem nach däm er üs het gseit, mir bechömi no es Gratisupgrade i ne besseri Kategorie (schliesslech hei mr ja o e Nacht für nüt zaut...). Aber abgseh vom Spaut im WC-Ring, wo geng klemmt het bis dr Role mau es Chläbi drüber het ta, het sichs nid schlächt la läbe u mr hei mau es paar Stung Rueh gnosse, bevor mr üs uf d Suechi nach Balz u Joelle hei gmacht.

U scho gli hei mr se o gfunge, ir Sackbirebar (ömu het dr Role gfunge die söu so heisse, wäg de Sitzsäck am Strand - oder wäg de Sitzbire? Oder Biresack? Oder so...). Mau wieder öppis angers, plötzlech Schwyzer zgseh wo me kennt! U no eini wo me no nid het kennt, nämlech ds Fränzi, Balzes Brüetschs Fründin, u später de o no dr Brüetsch säuber, dr Niels. Het sich sogar usegsteut, dass das scho chli Prominänz isch, wo mr da hei kenneglernt, ds Fränzi Schwyzermeisterin aus YB-Frou u dr Niels bekannt aus Funk und Fernsehen (oder ömu zmingst vom Radio) aus Musiker.

So oder so, isch ömu lustig gsi i dere Sackbirebar. Sie hei sich de när mau wöue ga früsch mache u mir hei später zum Ässe abgmacht. Si ire riese Beiz glandet wo überfüut isch gsi mit Fallangs, für üs grad chli ungwöhnt so keni Asiate meh z gseh. U dr Role het o gnue Zyt gha sich das z studiere, bis sis Znacht isch cho hei mr nämlech au scho gässe gha. Aber fein isches gsi! När no mau id Sackbirebar u de mau ungere, schliesslech faht am nächste Tag scho d Party a.

Drum hei mr a däm Tag när o nid bsungers viu gmacht, üs aber drfür scho am Nami mau ir Sachbirebar troffe u gli mau los Richtig Party, dass mr üs das mau no bi Liecht chöi betrachte. Auso ab üs mau e Pickup ga sueche u ds erschte wo mr gseh wo mr bir Party zuchefahre isch doch tatsächlech dr Böngli-Röfe!

Dobe acho hei mr mau es paar hübschi Dekos, freakegi Lüt, fei guete Sound u vor auem e hammer Ussicht gfunge. Cha me auso nüt säge, hei sich mächtig Müeh gä und das am ne süpidüpi Platz. U natürlech isch o lustig gsi mit de Lüt: Fräne isch zersch mau a sore Party gsi u het sich zersch mau chli müesse dra gwöhne, isch när aber 4 Stung lang am meiste im Züg umeghüpft (Niels isch übrigens nid cho, het am nächste Tag Touchkurs gha u eh ke Bock uf so Party). Balz u Joelle si eh geng lustig. Irgendwenn si o no Ivan, Wee, Brünu u Sändu uftoucht, no meh zum Sälü säge. U o mit Röfe hets sichs no ganz guet la brichte. Trotzdem hei mr när aber mau müesse Fürabe mache, Siuvester isch ja no bevor gstange u mir hei de denn ja wöue fester feste...

Trotzdäm hei mr dr nächst Tag wieder gmüetelch agfange, mau chli ga spachtle u de ersch am 11i mit de angere abgmacht, natürlech bir Sackbirebar. U dert isch d Höu los gsi! Da Fräne u Niels nid mit a Party hei wöue cho, hei mr bir dert am Strand is neue Jahr gfiiret. Us dr Bar si mr scho lang use wüus dert viuuu zviu Lüt het gha. Aber am 12i ischs när o näbedran mächtig wiud worde, wo si d Raggetli hei losgla u mr mau a Schärme hei müesse, dass mr nid vo de Teili vo dene erschlage wärde. Aber trotzdem lustig, ömu füre Moment, aber irgendwenn hets glängt (nachem dritte oder vierte mau dr glich Song ire haub Stung), auso mau wieder ab ad Party.

Die angere si natürlech scho au dert gsi, neu isch o no dr Löru derzue cho, u au hei o scho guet gfiiret. U das hei mir när o, trotz es paar Rägetröpfli ab und zue bis öppe am Mittag. Viu meh brucht me gloub da nid drzue z säge, wärs ke gueti Party gsi wär mr äuä früecher hei.

U vo denn a gits gar nüm so viu zverzeue über Koh Tao, zum einte wüu mr üs mau hei müesse erhole, aber o wüus vo denn a fasch di ganzi Zyt het grägnet. Auso isch üses erschte Znacht im 2012 es Mamasüppli im Bungi worde. U när e Nacht mit nid so guetem Schlaf, vorauem wo plötzlech eini im Resort näbe dran, nid wyt vo üsem Fänster, het afa schreie wie am Spiess! Ke Ahnig was isch gsi, het aber schrecklech tönt u gäbige Adrenalinschueb gä. U gschiffet hets dass mr zytewys hei gmeint, es schwemmt üs itz de öppe ds Bungi dr Hoger ab...

Auso si mr o am zwöite no nid megafit gsi, u ussert öppe mau i di nächsti Beiz ga ässe, nid zwyt zum nid znass wärde, u ds Boot für uf Krabi bueche hei mr üse Radius houptsächlech ufs Bungi beschränkt.

Am dritte hets üs aber de mau glängt, Räge hin oder här, schliesslech isch es üse letscht Tag uf dr Insle gsi. Eigentlech hätte mr ja (wieder einisch) wöue es Töffli miete, für das het üs ds Wätter aber de glich nid ganz glängt o wes am Morge mau es Zytli troche isch gsi. Auso si mr mau a Strand abe, gäbig zmörgele, u när mau chli wöue ga spaziere u Gäud hole, u chum si mr dert use hets wieder afa schütte wie blöd! Het aber lustig usgseh wie au Schärme hei gsuecht dert im Strandgässli. Zum Glück hets när aber mau chli nah gla u mir heis sogar bis ganz as angere Ändi vom Strand gschafft, ohni auzufescht nass zwärde. Wüu mr aber mehrmaus hei müesse ire Beiz Ungerschlupft sueche isch scho wieder Zyt für Znacht gsi bevor mr no zum Bungi zrügg si cho. Hei usegfunge, dass ir einte Beiz genau dä Fium chunt, wo dr Role im Flüger het afa luege, wo ihm so het gfaue u wo mr aber zKL si acho bevor er fertig isch gsi. Auso hei mr dert Znacht gno u Fium gluegt u när hets de o mau glängt, ab is Bett, müesse schliesslech morn uf die längi Reis mit em wiude Kathamaran.

Ja da hani mi scho nid so druf gfreut uf dä Kath, schliesslech hei mr scho mau mit däm es Reisli gmacht u fausch aui si ständig am chötzle gsi. Mir hei dasmau aber dopplet Schwein gha, erstens rächt ruhigs Meer u zwöitens es gäbigs Plätzli obe ufem Dach, mit wyt u breit kene Chötzlende. U lustigreisen.th het üs när o mächtig überrascht, wos am Festland acho so schnäu mit em ne Car uf Chuphon ine isch wytergange, dass es nid mau meh fürs Bisle het glängt. Drfür hei mr im Gang dörfe hocke, Sitzplatz hets kene meh gha. Isch aber zum Glück nume e Haubstung gange. U o ds Chumphon hei mr keni 20 Minute gwartet u e herrleche Platz im Minibus verwütscht - so herrlech wie so Minibüsse haut chöi si. Schön froh simer gsi, schliesslech hei Balz und Kompanie zwe Tag vorher di glichi Reis gmacht u hei am Schluss müesse z Chumphon übernachte wüu schiins aui Strasse überschwemmt sige gsi. U mir hei grad sofort chöne ga. Dr Fahrer isch zwar chli e lahme gsi, entweder zfuh zum schaute oder ke Ahnig was, uf au Fäu isch er geng so töuftuurig gfahre bis es grucklet het u het so natürlech geng ewig brucht, bis er mau chli Gschwindigkeit het gha. Si aber trotzdem mau z Krabi acho, hei dert no e chli sinnlose, aber o nid so lange Stop gmacht u si öppe am 8ti vor em Wannas gstange - sorry, vor em L-Resort...

Ja da hei mr nid schlächt gstuunet wie das dert itz usgseht! Wär nid dr Scheidi grad dert gstange, mir hätte äuä gmeint mir sige fausch. Aber ömu er geng wie geng, u o geng schön mau wieder zgseh, u het üs grad persönlech zu üsem Bungi gfüehrt. O das het ziemlech angers usgseh, ömu vo inne, aber statt lang verzeue lieber säuber ga luege wärs no nid kennt: thelresort.com

Het anschiinend o fei öppis brucht bis es so isch worde, ziemlech wiudi Gschicht u Scheidi u Wanna si ömu o mächtig kaputt gsi. Sie heig bis am Tag vorher no jede Abe ir Beiz müesse ushäufe u hei drum grad dr Moment gnützt zum mau id Stadt, wos itz mau nid so viu Lüt het gha. Mir si glich dert ga ässe, au anger si anschiinend scho ungerwäx gsi u i ha eigentlech lieber nüm gross wäg wöue, vor auem wüu mr ja am nächste Tag uf d Immigration hei müesse. Eigentlech...

Scho während am traditionelle Ao-Nang-Acho-Gurkesalat het ständig ds Naddel piepst u si hei wöue wüsse wo mr si. Näbe Joelle, Fräne, Balz u Niels isch o dr Röschu churz vor üs grad acho, dr Lüku, Kusi u no e neui Fräne si scho dert gsi u dr Mischu hei si anschiinend o no drbi gha. U wo si hei gmäudet si sig bim Jo hani genau gwüsst, da gö mr eh nid nume hurti vrbi. Auso hei mr mau es gäbigs Gstürm becho, si afa mau i dere hässleche Walking Street am angere Ändi vom Strand zuche, ds Naddel het geng no piepst u am Schluss het sogar dr Röschu no aglütet u bhouptet, er gäng am nächste Tag witer. Ja klar hani dänkt, aber irgendwenn haut glich eifach nüm chönne nei säge u kes Gstürm meh wöue, auso ab zum Jo.

U natürlech isch u lustig u gmüetlech gsi, ersch rächt wüu dr Jo, nach däm er ds letscht mau so schlächt druf isch gsi, herrlech grinset het u eifach di ganzi Horde dert versammlet isch gsi. U haut eifach wieder gäbig spät bis er üs när mau het heigfahre.

U natürlech hani am nächste Tag o gar ke Lust gha uf die Immigration zgah. U schiins sig si ja äbe o no züglet u me cha nüm eifach so gäbig mit em Sammutaxi vor dra fahre. Aber äbe, ds Visum wär a däm Tag abgloffe u jede Tag meh hätt üs 1000 Baht kostet. Auso hei mr mau es Tuktuk gno, u dä isch promt a die auti Adrässe gfahre. Zum Glück simer glich no gnue früeh dran gsi, er het nämlech ke Plan gha woner häre muess u het es paar Ründeli dräit bis mrs hei gfunge. Mir üs ir Zwüschezyt mau ds Sätzli zwägg gleit wo mr de wei stagle, schliesslech hei si üs vor fasch 10 Jahr, wo mr zersch mau dert si gsi, aus erschts mau usglachet u da hei mr nid so Lust gha druf. Aber statt die höche Herre het üs dert e Empfang mit ere junge Frou erwartet, die het gfragt was mr wei, mr nid meh aus Visa Extension müesse säge u si scho: „Passport please" u när „1900 Baht per Person for 7 days." „Not 10?" „7!!" - u das isch düttlech cho, lö mrs gschider bi däm la bewände. Mit em Taxi het üs dä Gspass auso 4500 Baht kostet. U mir hei ersch no üsi Plän müesse apasse, wüu mr itz ds Visum nume bis am 12.1. hei gha. D Idee wär gsi, über Land uf Siem Reap, dert hei mr mit em Brünu abgmacht am 16. si Geburi zfiire, u ungerwäx no bi Schubis verbi, wär ja ufem Wäg. So si mr haut itz mit em Zug uf Bänki u vo dert uf Phnom Penh gfloge, zwe Tag später mit em Bus uf Siem Reap u dert si mr itz u hei Hunger. Drum hie mau Fürabe, die wiude Gschichtli vo Ao Nang bis Siem Reap chöme haut de ds nächst mau...