So, u mittlerwile si mr z Laos aglangt. No ziemlech ungerwäx gsi die letschte Tage u itz hie mau chli es chilligs Plätzli gsuecht zum erhole. Aber vö mr mau vo vore a...

Zersch hei mr ja vo Phu Quoq müesse wägcho. A üsem letschte Abe dert hei mr no mau mit Bianca u Pauli zum Znacht abgmacht u es het sich usegsteut, dass si wahrschiinlech genau die glichi Reis buechet hei wie mir, vo Phu Quoq nach Can Tho, was e guete Usgangspunkt fürs Umeböötle im Mekongdelta isch. U tatsächlech, wo mr am Morge i Minibus si gstige wo üs bim Resort isch cho abhole, hei mir sie zwöi scho gseh winke chli witer obe ar Strass, bim Usgang vo ihrem Hotel. U dert isch när o üse erscht Stop gsi, zum sie ilade. Sogar ufem Boot si mr fasch bi nang ghocket. Isch no es rächt grosses u chli edlers gsi aus das wo mir si häre cho. U o ziemlech schnäu ungerwäx, si gloub sogar früecher acho aus nach Fahrplan.

Glandet isch das Schiffli z Rach Gia, u dert het üs scho es Frölein mit em ne Schiudli mit Roles Name erwartet u zum ne Minibus gfüehrt. Dä isch zum Bus uf Can Tho gfahre u wüu das nätte Frölein no öppis uf mis Ticket het gschribe gha, hei mr dert grad wieder ine Minibus chönne stige wo üs direkt zu üsem Hotel het gfahre. Auso so im Stil: konfortabelreisen.vn. U i aune Bösse si o geng no Pauli u Bianca drbi gsi. Auerdings hei si ihnes Bungiresort usserhaub vor Stadt wöue, drum hei mr ds Can Tho nümme abgmacht u när ou Böötlitour am nächschte Tag nid zäme buechet, wie mrs ursprünglech hätte vor gha.

Can Tho säuber isch so ne rächt grossi Provinzhouptstadt, isch trotz em viele wiude Verchehr eigentlech no gmüetlech, het aber usser de Flüss und em ne Hoh Chi Minh Dänkmau nid viu zbiete. Mir si ja aber äbe eh wägem Flussfährtli dert gsi, auso hei mr das o grad mau buechet. U zwar göngs am Morge am 6.30 los u söu 7 Stung ga! Uiuiui, müesse mr äch de äs Chüssi mitnäh? Isch ja nume so es Houzböötli für zwöi Persone.

Auso ömu mau bezyte ga liege, dr Wecker uf haubi Sächsi steue, schliesslech gäbs de am Sächsi Zmorge. U chli öppis i Mage cha äuä nid schade we so lang wosch ga böötle. U mir si würklech ziemlech pünktlech i däm Zmorgeruum ghocket, u ussert üs o no es angers Päärli wo äuä Hunger het gha, aber süsch irgendwie niemer... U wo sie du ändlech chunnt müesse mr zersch mau so es Zedeli usfüue, wo me anschiinend normalerwys am Abe vorhär müesst abgä, dass sie wüsse, wär wenn was wott. Hätte mr guet no e Viurtustung länger chönne schlafe we me das gwüsst hät u wär nid später dran gsi. Auso mau ds Kafi u ds Brot abestürze u när mau ga luege, wär da uf üs wartet. Es si ja äbe geng nume zwöi uf dene Böötli u so het üsi Fahrerin natürlech o nach em Haubi no gwartet. Zum Boot hei mr no öppe 5 Minute müesse loufe u scho dert het sech zeigt, dass das no luschtig chönnt wärde mit dere, o wenn sie chum Änglisch het chönne.

Wo mr bim Boot si acho winkt üs plötzlech öpper vom Fluss här zue: Pauli und Bianca am düreböötle! När mau istige u los geits, u zum Glück het däs Bänkli uf däm Böötli sogar es Chüssi, u nid mau es unbequems. Mau chli übere Fluss schipperle, hin u här u ab und zue es blöds Sprüchli vo Hinger vo üsere Fahrerin u irgendwenn chunnt mau die erschti Station, e schwümmende Markt, die gröschti Touriattraktion ihr Umgäbig u dämentsprächend vou Touriböötli, so chlini wie üses aber o ganz grossi, überfüuti Masseabfertigungsdinger, dä hei mirs doch scho chli gmüetlecher.

Aus erschts isch scho grad eine mit sim Böötli a üses adockt u het gfunge, mir müesse öppis z Trinke choufe. U wo dr Role het gseh, dass er Kafi het, isch er natürlech sofort drbi gsi. När no chli düre Märit kurve. Die meischte verchoufe aui Arte vo Gmües u Frücht, u sie hei immer e Stange vor am Boot agmacht, wo das wo sie verchoufe wiene Fahne dranhanget. U när fahrt es chliners Böötli häre, fingt es wöu itz zum Biuspiu 100 Chabischöpf, u dä ufem grosse Boot schlat aune 100 Chabischöpf die ussere Blätter ab u schiesst jede einzu übere ufs chline Böötli. Da hei mr när o gwüsst, warum uf däm Fluss überau Chabisblätter umeschwümme.

Nächschti Station isch e Riisnudlefabrik gsi, wo eine mit dr Sigi ir Schnure vor sore Art Press steit, so öppis wie grossi Riisomelette vor ine lat u hinger chöme när die dünne Nudle use u es Meitschi packt se büscheliwys ines Carton. So ne Art Haco uf vietnamesisch. U chli wyter hinger wärde die Riisomelette uf grosse Platte gchöcherlet u när uf ändlose gsteu im Hingerhof zum tröchne usgleit. U wär isch natürlech o no dert? Dr Pauli u d Bianca. Sie hei sich aber entschiede, nume e vierstündegi Tour zmache, wüu si scho a däm Tag wyter uf Saigon hei wöue. Drfür hei sie näbem Böötlifahrer no e änglischsprächende Füehrer gha (Zitat Pauli: wir sind ja Deutsche, wir brauchen einen Führer...). He ja, de gseht me sich de z Saigon oder? U dert hei mr übrigens när o erfahre, dass sie fasch dr Bus uf Saigon hätt verpasst, wüu am Böötlifahrer ungerwäx dr Moscht usgange isch u si fasch e Stung hei müesse warte, bis sini Frou mit ere Fläsche vou isch aböötlet cho. Am Schluss hets aber doch no glängt.

Mir si aber äbe no chli wyter, hei no paar Stung vor üs gha. Zersch no uf ne chli chlinere Märit mit chli weniger Touris, wo üsi Fahrerin sich mau mit em Gmüess fürs Znacht het ideckt. U es auts Grosi ohni Zäng u mit em ne Häxelache üs umbedingt het wöue Löösli verchoufe. Die isch ja viu zviu gsi.

Denn ischs wyter, ändlech mau i di Kanäli wo si üs versproche hei u würklech megaschön dert zwüsch de Buredörfli düre. Bis es het gheisse mir söu itz usstige, i die Richtig loufe u Bye Bye! Ja, ds Wasser isch haut nümme so tief gsi hie u irgendwo wird sie üs de scho wieder ufgable. Bis dert hei mr aber über ne Brügg müesse loufe, wo es Müeti Riis zum trochne het usgleit. Füuht sich no lustig a so Riis a de Füess. Denn näb aune Arte Fäuder u Züg düre u vor aume am Schluss no über ne Brügg, wo nüt angers isch gsi aus e Stange für d Füess u eini zum sich häbe. Sogar dr Role het chli gschlotteret wo nr drüber isch. U i hau auso när mi Bedarf a Adrenalin mau wieder für nes Zytli deckt gha!

Drfür isch churz druf abe ändlech es Beizli cho wo mr hei chönne Zmittag ässe. U wo mr mit em einte no aui hei müesse Riisliqueur probiere, si ja natürlech nid die einzige gsi wo dert si häre böttlet worde. Nach em Ässe hets no es Tüürli düre Garte gä, wos näbe Ananas und em ne vietnameese Style Klo o so ne Frucht het gä, wo öppis wie Miuch use chunnt we me drufdrückt. U es schmöckt sogar so ähnlech. U üsi Fahrerin hets natürlech nid chönne la si, am Role zwöi so Dinger vor d Bruscht zhäbe u zfinge, jetzt sig er e Frou.

Wos mau wieder los gange isch si mr zersch wieder dür u schöni Kanäli gfahre. Aber ziemlech gli si mr zrügg ufe gross Fluss cho u langsam isches de fasch e chli längwylig worde, o wenn d Fahrerin geng chli für Ungerhautig het gsorgt mit Sache baschtle, Grimasse schriise, dr Role vo hinger mit em Stäckli chutzele oder am Böötli umewaggele. Am Morge het si üs übrigens sogar wöue verhürate, het üs äxtra zwe Ringe baschtlet. Aber äbe, am Schluss simer trotzdem froh, hei mr wieder Bode unger de Füess gha, o we dä geng no gwaggelet het.

Eigentlech hei mr üs ja zersch überleit gha, no e wytere Stop vor Saigon izlege, zum Bispiu um d Mekonginsle ume ga zböötle, aber nach däm hei mr fasch chli gnue Böötli gha füre Moment u gfunge, gö mr am nächste Tag direkt nach Saigon. Für am 21. hei mr ja dr Flug uf Luang Prabang buechet gha u 4 Nächt hei mr gfunge, si sicher nid zviu für ne Stadt wie Saigon.

Auso wyter geits. O hie hets gheisse, mir wärde de bim Hotel abhout u o hie, äuä scho öppe zum füfte mau in Vietnam, isch dr Abhoudienst scho wieder vor dr Zyt dert gsi. Geng dä Stress! Auso mau ab zur Busstation u dert drfür e Überraschig, wo mr nid ine grosse Bus, sondern so ne Art überdimensonale Minibus hei müesse istige. He nu, vilech het dä ja drfür chli weniger lang u er isch würklech rächt gross u gar nid so unbequem gsi. Chli asträngend isches aber när trotzdäm worde, wo usgrächnet grad das gschwätzige Meitschi, wo dr Role scho bim Warte het aquatscht gha, genau hinger üs isch ghocket. Änglisch het si zwar chum es Wort chönne aber drfür isch si mau uf d Idee cho, si chönn dr Role itz aues la läse, wo irgedwo uf vietnamesisch isch agschribe gsi. U sich natürlech köschtlech ab sire Usprach amüsiert.

Tatsächlech si mr när früecher aus erwartet z Saigon acho u plötzlech isch aues ganz schnäu gange, die Chlini het irgendöppis gmeint vo wäge, si chöm mit üs id Stadt u scho si mr im ne Taxi ghocket u hei versuecht, mit däm übere Priis zverhandle. Si het geng öppis vo 3 gmeint, är 5, u mir keh Plan. Woner plötzlech seit fifty one hani gfunge, das geit scho i Ornig, 51'000 Dong passt öppe zu däm woni gläse ha, auso los. U sie äbe geng no drbi, bis zmitts id Stadt, obschon mir ja hei dänkt, sie stig de öppe ungerwäx us u heig eifach gratis wöue mitfahre.

Auso chöme mr dert a, wos ids chline Gässli zu üsem Hotel inegeit. U dr Role nimmt e Füfzger füre, u plötzlech heissts nenei, das choschti 500'000! Ja schliifts? 25 Stutz, das wär ja fasch e Priis wie ir Schwyz! Aber är het natürlech ke Änglisch me wöue chönne auso hani gmeint, mir gö mau zäme zum Hotel, die chöi üs dert sicher übersetze u säge, was öppe so dr Priis wär. Auso Gepäck gsattlet u au vier mau los, bis dr Taxifahrer ufs Mau eini aquatsch wo es paar Brocke Änglisch het chönne, mit ihrer „Übersetzig" nomau afaht liire u irgendwie plötzlech vo üs über 400'000 i de Finger het u ab drmit. Wieder mau schnäu gange. U e gueti Begrüessig in Saigon...

Aber ganz fertig isches ja no nid gsi das Gschichtli, schliesslech isch ja üsi Begleiterin geng no drbi gsi u marschiert munter mit eim vo üsne Rucksäckli richtig Hotel. Sie ar Reception het scho mau blöd gluegt u gfagt, ob mr de zdritt siege, es heig de nume Platz für zwöi. Mir so nenei, mir si o nume zwöit, si hei mr im Bus ufgläse. Auso het sie mau bi ihre nachegfragt, was sie de vorheig. U sie het gfunge, ja sie wöu itz afa mau mit üs ufs Zimmer cho. Hmmmm! Ja, irgendwie het kene gnau verstange was itz da los isch u am Schluss hei mr si eifach mau ir Lobby la hocke, o wenn sie anschiinend fasch es Trändli verdrückt het. Mir hei mau d Nase vou gha u nume no is Zimmer wöue.

Dr Role het am nächste Tag nomau ar Reception nachegfragt, aber die het anschiinend o nid ganz verstange, was das Meitschi het wöue. Wahrschiinlech nume no chli lustig ha mit üs, ob sie de o bi üs hät wöue übernachte oder was, oder sogar irgendwie het Gäud im Chopf gha, keh Ahnig. He nu, mir wärdes o nie erfahre.

Nach däm mr üs vo dere chaotische Akunft hei erhout, hei üs Hunger u Durscht glich mau wieder vor d Türe tribe. Und isch auso e wiudi Sach das Saigon, sone richtige asiatischi Grossstadt haut. Mir nüm gross abentüürlustig mau nöime zuche, so chli wines Pub hets usgseh, aber zum trinke isch es definitiv nid gmacht gsi, ömu nid für Lüt mit üsem Portemonnaie. Läck hei mir doch dert tatsächlech e Million la liege, obschon mir nid extrem viu hei trunke u o gar nid viu gässe. He nu, wenigstens hei mr nüm müesse witersueche u när hets de o würklech mau glängt u es isch Zyt gsi für das schöne grosse weiche Bett - ahhh!

Ah ja, u üses Gepäck hei sie üs mittlerwile i das Zimmer ta, wo mr eigentlech buechet hei, nämlech das mit em Baukon. Na ja, e Baukontüre hets ja scho gha, aber vor dran nümme meh aus es paar cm Vorsprung u es Gländer drum. He nu, wenigstens hets no es hübsches Dachterässli gha...

Üse erscht richtig Tag in Saigon hei mr zersch mau chli müesse usschlafe. Aber trotzdem hets no glängt für feiechli e Tour. Mir hei i däm Gebiet gwohnt, wo die meischte Backpackers u so unger chöme, sozsäge Kao San Road vo Saigon. Aber im Gägesatz zur Kao San z Bangkok chunnt me vo dert o zfuess zu es paar Touriattraktione, o wes vo dene eh nid auzu viu git. Die nächschti u für üs interessantischti isch dr Märit gsi am angere Ändi vo üsem Quartier. Scho fasch e Hitzschlag u diversi Verchehrsunfäu gha bis dert häre. In Saigon gits im wahrschte Sinn vom Wort Millione vo Töffli, u die töffle dert ume wie die wiude, ganz luschtegi Verchehrsreglä.

Aber mir heis ömu gschafft bis dert, wo dä berühmt Märit isch. U scho bi däm Kreisu vor dranne d Strass züberquere isch es Erläbniss, wo dr Fuessmarsch häre bau Wärt isch. Dr Märit säuber auerdings weniger u wüu mr o nid so in Shopping Laune si gsi, hei mrs o gli wieder ufgä. Nächschts Ziu: Saigon River. U für dert häre hei mr zersch wieder dert bi däm Kreisu düre müesse. Aber wie mr ja eigentlech scho ds Phnom Penh hei glehrt, grundsätzlech muesch eifach mau loufe. U das hei mr när o däm Touripäärli gseit, wo scho es Zytli dert am angere Strasserand isch gstange u üs, wo mr däne si acho, ganz verdutzt hei gfragt, wie mr itz das heige gmacht. Äbe, eifach mau loufe. Sie hei üs das aber nid rächt wöue gloube, u Role u i fragenis ab und zue mau, ob sie äch geng no derte stöh...

Mir si ömu no übernes paar angeri interessanti Strasse u irgendwenn o a däm Fluss acho. Viu zgshe gits dert auerdings ni, müesst me äuä scho wieder es Bootstüürli mache. Aber das wo üs dert eint het abotte het für ne Stung grad d Häufti koschtet, was mr z Can Tho für 7 Stung hei zaut. U so rächt Luscht uf scho wieder böötle hei mr eh nid gha. Auso mau dr Spaziergang wieder zrügg, dasmau sogar e chline interessantere Wäg gfunge aber glich froh gsi, hei mrs mau bis is Hotel gschafft.

Am Abe hei mr när no mau mit Bianca u Pauli abgmacht gha, us nach langem Hinuhär sogar gschafft, üs ara Chrützig zträffe, o wes nid die isch gsi, wo sie eigentlech hei gmeint gha. Uf au Fäu ischs o dasmau wieder ganz lustig gsi mit dene zwöine u no ganz e schöne Abschied, sie si nämlech am nächste Tag witer. Wär weiss wenn u wo me sich wieder gseht...

Ja u när ja, steit doch plötzlech dr Fäbu da! Mir hei zwar scho ghört gha dass er irgendwo z Asie isch, aber ke Ahnig wenn u wo genau. U scho gar nid dass er grad a däm Tag nach Saigon chunt wüu am nächste ds Nati früsch us dr Schwyz igfloge wird. Ja, Bianca u Pauli hei mau müesse ga liege u mir haut natürlech scho no mit Fäbu u sim kanadische „hei üs im Flüger kenneglehrt" ga astosse. Dasmau hei mr sogar chli ziemlech viu biuigers Biers gfunge, drfür haut o nume chlini Plastigstüehli. Aber die si anschiinend gar nid so unbequem, heis ömu vei lang usghaute. U am Fäbu müesse säge sorry, aber gloub nid das mr morn mitchöme dis Schatzi vom Flughafe ga abhole. Är hets ömu schiins de no gschafft, mir si ganz froh gsi um üses hübsche Zimmer mit em bequeme Bett.

Aber o we mr dr Tag chli verpennet hei, es het üs nid dünkt mir heig öppis verpasst i däm Saigon. Die Attraktione wo Pauli u Bianca uf ihrer Stadttour hei gseh, wär äuä abgseh vo Chinatown nid so üses Ding gsi. U drum hei mr üs o am nächste Tag zfuess dür d Umgäbig bewegt. Hätte gärn no chli Ichoufszänter unsicher gmacht, aber ds einzige wo mr hei gfunge isch nid so ganz üsi Priisklass gsi. Usserdäm hei mr no üsi Flugtickets müesse ga usdrucke u wo mr wieder i üsem Quartier zrügg si loufe mr doch scho am Nati u Fäbu übere Wäg, o we mr eigentlech hei dänkt mir gseh üs de ersch zum Znacht, wüu dr Fäbu üs am Nati aus Überraschig het versproche. Wahrschiinlech isch si aber so no fasch chli meh überrascht gsi, o wie sie scho so chli e Ahnig het gha.

U wüu mr haut grad aui süsch nüt vor hei gha, si mr no mau zu söm ne Plätzli mit so Plastigstüehli eis ga zieh u scho gli isch Zyt gsi, sich mau im Hotel für Znacht ga früsch zmache.

Usserdäm hani no mau wöue luege, was äch itz genau mit üsem Flug nach Hanoi los isch. Woni ha wöue online checkin mache (was bi Jetstar für dä Flug gar nid müglech isch) git das mir plötzlech a, mir flüge ersch am 12i. Drbi hani ja äxtra dr Flug am 10i buechet, damit mr uf au Fäu früeh gnue z Hanoi si, dass mr dr Aschlussflug uf Luang Prabang nid verpasse. Immerhin, am Abe hani du när gseh, dass die üs es Mail hei gschribe, dr 10i-Flug sig gstriche worde. Keni 24 Stung vorem Abflug u nume per Mail, obschon i eigentlech o es TelNr ha agäh gha... So hei mr aber wenigstens gwüsst, dass mr nid 2 Stung früecher a Flughafe müesse u sicher ersch am 12i chöi Flüge. Aber ganz schön Biber gha, dass das de nid längt z Hanoi!

Zersch hei mr ja aber no mau mit Nati u Fäbu abgmacht gha u üse Abschied vo ihne u vo Vietnam chli gfiiret, zersch wieder mau mit em ne herrleche indische Ässe u när natürlech no mau bi dene Plastigstüehli. Schön ischs gsi euch der so zuefäuig zträfffe. U ja, hätte mr wöue abmache hätt sichs sicher nie troffe, dass mr zur gliche Zyt am gliche Ort wär gsi.

Und denn isch er cho, dr Tag wo uschunnt, ob mirs bis nach Laos schaffe... Wenigstens hei mr no Zyt gha, i Rueh Zmorge zässe, hei ja itz ersch öppe am haubi 10i los müesse. U wüu mir no zviu Dong hei gha hei mr gfunge, leischte mr üs es Taxi, o wes mit em Bus viu biuiger wär. Chli Fäuplanig gsi, hei mr ds Taxi när über ds Hotel bsteut, so isches uf d Rächnig cho wo mr mit dr Charte hei zaut u di viu zvile Dongs hei mr geng no gha. He nu...

Ja u när isch usgrächnet a däm Tag wo mr ufe Flüger hei müesse üse Transport zum erste Mau nid vor üs dert gsi. Im Gägeteu, das Taxi het u het nid wöue cho. Faht ja scho guet a. Aber het no keh Roue gspiut, hei no fürig Zyt igrächnet ga u si o no meh aus früeh gnue dert gsi. Hei na no Dong wöue loswärde. U wo mr im Füehrer hei gläse, dass jede 500 Sigis uf Laos darf inenäh, hei mr dänkt de wüsse mr, wie mr die Dong investiere. Wär weiss, z Laos hei sie sicher o nume so gruusigs Chrutt wie z Thailand. Dummerwys isch üs das ersch i Sinn cho, wo mr scho ir Zoufreizone si gsi. U dert si d Sigis fasch dopplet so tüür wie normau ir Stadt. U hingerdri hei mr ersch no usegfunge, dass es üsi Liebligsmargge o hie z Laos gäb, u natürlech o viu biuiger. Aber itz, hätte mr die Dong gspart, hätte mr ja eh nüt drmit chönne afah. Wär weiss, wenn mr wieder mau uf Vietnam chöme u itz hei mr afa mau so schnäu wie müglech use wöue!

Aber i muess säge, ds vietnamesische Transportsystem het üs o dasmau nid enttüüscht (obschon Jetstar ja eigentlech australisch isch), mir si tatsächlech sogar zfrüeh z Hanoi glandet. U das mit ere Billigairline. Es isch sogar no so frühe gsi, dass mr wie die gstochne Wäschpi i däm Flughafe si umegwirrt, wüu mr üse Checkin Schauter nid hei gfunge - dä isch nämlech no gar nid offe gsi. Ömu isch üs e rächte Stei vom Härz gheit, wo mr ändlech hei itschegget gha u sogar no Zyt, zum i die nordvietnamesischi Chäuti usezstah. Isch no schräg gsi so 19 Grad zmitts am heiterhäue Tag. U so viu Näbu!

Aber zum Glück hei mr ja nid dert müesse blibe. Nachemne witere Stündli Flug hei mr ds Luang Prabang chönne usstiege, bi gäbige 31 Grädli u churz voremne wunderprächtige Sunneungergang. U wo mr hei wöue es Visum löse, wo immerhin für jede 35$ hätt koschtet, seit üs dert dr Typ, dass mr 15 Tag gratis bechöme, wüu mr Schwyzer si. O schön, o we mr eigentlech öppe 17 Täg hei planet aber irgendwie passt das de scho.

Aus nächschts mau Minibus id Stadt u när mau o nid schlächt, seit üs dä im Hotel wo mr hei buechet, er heig gar kes Zimmer frei - si schaffi drum ersch neu mit agoda zäme u das funktionieri mängisch no nid so. Cool! Aber vo dene Sayo Hotel gäbs drü u är chönni üs zum ne angere bringe. He nu, het zwar ke Riverview gha aber o gueti Lag u was söus, Houptsach ändlech mau acho!

U mir si üs auso beidi einig, dass es guete Plan isch gsi hie häre zcho. Luang Prabang isch ganz es härzigs Städtli, scho fasch z schön für Asie, mit au dene aute Hüser wo aber au so schön renoviert si. U d Gägend mit dene Höger isch ja o dr Hammer, o we mr vo dere no nid soo viu hei gseh. Si ja ersch vorgeschter am Abe acho u a däm Tag nume no dür die Strass mit de viel Beizli u em Nachtmärit gspaziert. U geschter hei mr när e Stadtbummu gmacht, am Fluss entlang, dürd Gässli u am Schluss ufe Phousi Hoger ga dr Sunneungergang luege. Gseht ja Hammer us, o we mr natürlech nid ganz die einzige si gsi, wo uf die Idee si cho.

U hüt hei mr Hotel gwächslet, hei itz ändlech mau wieder es Bungi mit Terässli u so. Zeinzige wo no fäut si d Hängematte. U da mr hie ziemlech usserhaub vor Stadt si, hei mr itz o mau grad e gueti Glägeheit, nume hie chli umezhange u die ganze Iidrück vo de letschte Täg ds verdoue. Zum Bispiu mit Blog schribe. U das wär ja itz dämfau o mau wieder erledigt, de chani mi dr Räscht vom Abe ganz am Fulänze widme, yeah!