So, itz si mr auso z Koh Lanta i de Wiehnachtsferie, hei gmeint hie hei mr de Zyt für Blog schribe u so, aber irgendwie isch das geng chli ds asträngend gsi u morn geits scho witer. Auso muess i itz äuä no schnäu mau drhinger...

Äbe, ds Georgetown si mr verblibe. Het när usnahmswys mau ke Inder gä a däm Abe. Drfür si mr glich no mau im Monaliza glandet, heis aber gschafft nach drü Bier zrügg zum Hotel zgah. Drfür dert när haut wieder no chli ids Gärtli ghocket, mit em chinesische Chef pläuderlet u so... Aber würklech nüm zgäi, schliesslech isch där nächscht Tag üsi letschti Chance gsi für dä Penang Hill.

U tatsächlech hei mrs när o gschafft, nach langem warte isch sogar mau dr richtig Bus cho u nach no längerem Fahre si mr bir Taustation vom malayische Gurtebähnli acho. Zum Glück het ds Gäud no glängt, mir hätte ja eigentlech keni Ringgit meh wöue uselah, aber das Bähnli het doch grad chli meh kostet aus mr hei dänkt. Geit schliesslech o no rächt dr Hoger uf, bis uf 800 u öppis Meter schiins u när ersch no schwyzer Qualitätsbahn. U veiechli Lüt hets o ka, trotz em schlächte Wätter. Wo mr obe si acho hei mr uf au Fäu nid rächt gwüsst ob sich das aus utz glohnt het. Zum Glück hets nachem ne Spaziergängli zum Hindutämpu u dr Moschee wos dert zoberscht het när no chli ufta, hei mr wenigestens Georgetown ganz gseh u sogar e Bitz Festland. U när haut mau wieder nitzi u no e Rundi Bus fahre u ändlech mau no öppis ässe, hei nämlech ufem Hill ke Gäud meh ka für öppis gschiids für i Mage. Aber es Nudusüppli het müesse länge, schliesslech hei mr am Abe no mau zum feinste Inder müesse, mmmmmh, soooo fein u dasmau nid mau so Buchweh. När hei mr no es Tüürli müesse mache wüu dr Role no e Postcharte vo Malaysia het brucht, per Zuefau sogar eini gfunge, u mit em Räscht vom Gäud no i jedem Lade ungerwäx zwöi Päckli Kent ga choufe wüus die z Thailand nid git. U när isch glich scho bau gnue spät gsi, dass die im Red Garden näbedran ihres Gjammer hei abgsteut, u bis denn hani no mis blöde Buech müesse fertig läse, dass i das ändlech ha chönne dert la. Wecker uf 20 ab 4i steue u die letschte Stündli ds Malaysia schlafe...

U när het dä Wecker natürlech o glütet, läck isch das no früeh gsi. Auso mau ufraffe u tatsächlech isch ds Minibüsli churz nachem 5i vor dr Tüüre gstange. U natürlech scho pumsvou, für üs hets no grad zwöi Plätzli vo inne gha. Zersch hani dänkt isch ja nid schlächt, aber leider isch dr mittler Sitz nume haubwäx e Sitz gsi u vordran hets nume für eis Bei Platz gha. U när hei mr o nid nach dr Gränze uf ne grosse Bus gwächslet sondern hei no mau öppe angerhaub Stung dörfe mit däm fahre. D Imigration het drfür klappet wie immer, nume leider gits ja neuerdings nume no 15 Täg Visa we me über Land ine chunnt. U mir si natürlech no ds verpennet gsi zum usefinge, dass es hinger däm Schauter no es Büro hät gha wo me äuä hätt chönne es 30tägigs la mache. He nu, müesse mr haut de am 5.1. luege für ne Imigration oder wieder use.

Aber äbe, itz isch afa mau no chli Büslifahre agseit gsi. Irgendwenn het me nöime müesse usstige u d Lüt si je nach Ziu verteut worde. Gäg Koh Lanta isches mit em gliche Büsli witer gange, dasmau nume no zviert u mir hei üs natürlech scho gfreut. Isch aber churzi Freud gsi, dä het üs nume no zur Busstation bracht und wär mr vo dert us nid nach Trang, hätt me itz o würklech e grosse Bus gha. Uf Trang fahrt aber haut äbe o nume e Minibus, u dasmau de no e ziemlech leidere aus dr erscht. U mir pressiert zum istige für ne guet Platz ds becho u när jagt üs dr Chauffeur eifach ufds hingerste Bänkli wo mr üs zviert hei müesse zämequetsche. Auso no mau öppe angerhaub Stung Füdleweh u Platzangst, aber wenigstens isch när mau öpper usgstige u füre Räscht hani mau chönne ufne Einzusitz hocke.

Ds Trang hei si üs wieder bi somne Reisebüro usglade u dert hei mr erfahre, dass ds nächste Büsli de öppe i drüehaub Stung witer geit. Isch schlussendlech aber gar nid so schlimm gsi, dert bim Bahnhof Trang isch no e zfridnige Egge, git sogar feins Kafi u mir hei üs Zyt när mit Jasse vertöörlet.

Zum Glück si mr när chli früecher wieder zrügg zum Reisebüro, ds Büsli isch nämlech fasch e Haubstung früecher gfahre aus si hei gseit. Dasmau hätte mr ändlech e guete Platz gha, isch aber o när nüm so wyt gange. Irgendwo ir Pampa si mr uf nes Speedboat umglade worde. Hei eigentlech gmeint, das geit de uf d Fähri, isch aber o nid schlächt gsi so. Schön wieder mau dür d Feuse vor Provinz Krabi ds schipperele. Ussert eine het nid so Freud gha, het äuä o kes Speetboat erwartet u het sich gar nid wöue la überrede, mit sire schwangere Frou dert mitzfahre. Hei si ne haut wieder mit em Büsli mitgnoh...

Mir si när mau ds Lanta acho u zwar im Lanta Dorf, nid dert wo die angere Schiff achöme, auso o nid dert wo die ganze Taxis umestöh. U dert hets nume eis einzigs Sammutaxi gha wo mau mitere Horde Skandinavier isch abgfahre. Aber si hei üs scho nid la stah, isch de mau no e Pickup cho u het üs hinger druf gno. O nid grad wahnsinnig bequem, aber isch ja itz nüm lang gange. Abgseh drvo dass si geng wieder si aghautet u aui hei gfragt wo si de häre wei, anschiinend mache si das o no nid so lang, d Resorts hei si nämlech au nid kennt.

Aber mir si uf au Fäu när mau hie bir Lantas Lodge usglade worde, hei nach öppe 13 Stung ungerwäx ändlech wieder es deheim becho u es isch würklech es gäbigs Bungi hie. Trotzdäm hei mr nume grad ds Gepäck versorget u si när mau füre id Strandbar go es wouverdients Bierli nä, isch ha scho fasch Sunneungergangzyt gsi. U mit ere Ungerbrächig wo mr mau hei müesse ga Znacht ässe si de bis am Schluss o no so einegi drzue cho. Isch no gmüetlech die Gecko Bar, we nume di Gläser nid so würde stinke... U ne schlächtli Nachricht hei mr o no übercho, dä wo näb dr Bar ds Reisebüröli het isch zue nis cho brichte, luege ob er öppis cha verchoue u üs erklärt, vo hie uf Koh Tao müess me uf d Nachtfähri u schaffs auso nid i eim Tag. Nach sore Reis ds ghöre, das scho gli die no viu leideri bevorsteit isch o nid so schön, o we mrs no nid ganz hei gloubt. Sowieso isch afa mau Zyt gsi zum ga schlafe...

Natürlech hei mr am nächste Tag scho mau ds Zmorge verpasst, hei aber o nie vorgha rächtzytig ufzstah. Herrlech hie das Bett! U wo mr am zwöi afa mau füre si ga luege für ne Happe hei si üs chli usglacht... Aber itz hei üsi Wiehnachtsferie agfange u mir hei ja nid vorgha hie gross öppis zungernäh. Mau gane Lade sueche, Seven Eleven isch zum Glück nid au zu wyt wäg, u chli am Strand entlang ga luege was es so aus git (ganz vili härzegi Beizli u Bare), viu meh hei mr nid gmacht a däm Tag. U egentlech fasch aui Täg sider denn. Da ds Wasser um die Zyt scho rächt wyt wäg isch gsi u denn hie eher Feuse aus Sang fürechöme si mr nid mau meh ga bade. Drfür hei mr no hie ar Reception nachegfragt ob si üs e angeri Reis uf Koh Tao chöi bueche, gäbs aber nid hei si gmeint. U langsam hei mrs afa gloube.

Am Abe hätt no Job to do gspiut am ne angere Strand, e thailändischi Reggea Band wo mr eigentlech no hätte wöue ga lose, aber irgendwie hei mr nid rächt Lust gha die ga zsueche. Drfür hei mr när hie no e Bar gfunge mit ere Live Band. Het usgseh aus würd dert e Falangfrou singe aber tönt nach em ne Ma. Isch anschiinend o zmingst mau eine gsi, u zwar e lustige Vogu. Nach däm d Band isch fertig gsi hei mr no mit ihre afa brichte, chunt us de Staate, het hie ihri Heimat gfunge im magische Koh Lanta, singt überau mau chli, heisst Jennifer aber hie nenne si se aui Blueme. U vo lutter brichte hei mr gar nid gmerkt, dass die d Bar scho lang hei wöue zue tue. Auso mau hei zue u tatsächlech hets mau wieder afa rägele...

Am nächste Tag hei mrs zwar gschafft zum Zmorge u o ga z bädele (herrlech ischs gsi, auso zbade, Zmorge eher weniger...) aber viu meh hei mr o nid gmacht. Dr anger vor Gecko Bar isch scho bim Zmorge zucheghockt u het gfragt ob mr itz die Reis buechet heig. Är heig ghört, me chönt evtl. e private Chare nä u de chönnts me no uf ne Fähri schaffe wo am Nami geit. Aber keh Ahnig ob das stimmt u wie me das chönt bueche. Laaaaang hei mr üs überleit was mr wei mache u Fährifahrplan zämegsuecht u dänkt me chönt ja e Nacht no uf Phangan verbringe, aber schlussändlech si mr glich mau go Gäud hole u hei haut itz die Nachfähri buechet. Zwar müesse mr itz e Nacht für nüt es Hotel zahle, hei das hie u ds Koh Tao scho buechet gha, drfür chöi mr am Morge nachem acho aber de o grad idschegge u dr anger vom Hotel het üs no gmäudet, o we dr Fahrer normau so früeh am Morge no nid büglet, er tüeg is de glich e Transfer arangiere. Ja, auso haut mau luege...

Ah ja, das isch ja am 24. gsi, auso hei si überau Wiehnachtsmenüs gha. Bi üsem Resort hets es leckers Buffet gä. Irgend ire Bar wär när o no Party agseit gsi, hei aber eifach nume chli meh Tischli usegsteut aus süsch u dr komisch Sound vielech chli lüter aus süsch, auso hei mr üs e angeri Bar gsuecht. U irgendwie isches plötzlech glich wieder cheibe spät worde...

Uf au Fäu hets mau wieder nid glängt für Zmorge, o we mrs nume knapp verpasst hätte. U o süsch isch a däm Tag aus wie geng gsi, immerhin hei mr itz aus erledigt gha u definitiv Ferie. Am Abe hei mr üs wieder es angers Restaurant gsuecht u ha nid chönne wiederstah wo ni d Site mit em indische Food ha gseh. Ds Naan isch o no fein aber d Dahlsuppe soooo versautze, schad gsi aber muess haut nid ihre Thai Beiz indisch bsteue... Drfür het is dr Role no e Lachchrampf beschert. Es het wieder mau Horde vo Skandinavier gha rund ume u woner das ziemlech unschöne Wort mit de Rentier het gsuecht, wo teu Lüt vor Skandinavierhore bruche, isch plötzlech e Esubiisser drus worde. Ha fasch id Hose gmacht u isch sider üse Running Gag. Auso hei vo nun a Skandinavier e neue Name.

Nachem beste Kafi sit langem si mr när mau zum Bungi, hei nämlech gfunge mir müesse mau wieder deheim blibe u ne Jass chlopfe. So schlächti Charte hani äuä no nid gha. Auso isch ds Spiu ändlos worde u mir am Schluss später is Bett aus we mr i Usgang wäre.

Gester hei mrs aber trotzdäm zum Zmorge gschafft u när si mr mau wieder bündig ga bädele bis es wieder Hunger het gäh. Isch klar gsi däs mr bi däm feine Kafi vom letschte Abe öppis müesse drgäge ungernäh. Mmmmh! U nach däm i ändlech no ha usegfunge, wieni wieder Mails usem Outlook cha verschicke isch plötzlech scho bau wieder spät gsi. U ändlech mau schön Wätter füre Sunneungergang auso ab id Gecko Bar. Herrlech! Für Znacht si mr mau i di angeri richtig u mittlerwile scho so hungrig, dass mr nüm so wählerisch si gsi us promt hei bereut. Da het när auso es Schnäpsli häre müesse o wes nume Vodka Coke het gä. U wüu si i dere Bar plötzlech no hei Röck n Röll füre gno ischs nid bi eim blibe. Leider hei si när ohni Vorwarnig uf Schmudersound umgsteut auso si mr mau es Huus witer. U hei dört derfür bündige Goa gfunge. Zwar usser am ne chlatsche Dänepäärli fasch keni Gescht meh aber wo o die si gange hei mr üs no ganz gäbig mit em Barma ungerhaute. U när isch de würklech definitiv Zyt gsi zum mau ga liege.

O we mr hüt Morge eh nid hei wöue ga zmörgele us bis itz, irgendwenn am spätere Nami, no nid zum Hus us gschafft hei. Dr Role het zviu Angry Bird gspiut u muess grad e chli penne wüu er nüm het use gseh. U i überlege mr o grad ob i no söu e Nuck nä, chönt eigentlech o nid schade...