Ja, u itz simer tatsächlech scho wieder deheim u mit em Blog no zmitts in Laos bliebe stah! Genau hüt vor 6 Mönät si mr abgreiset u hei itz scho wieder zwe Nächt im eigete Bett verbracht. U irgendwie chani mi äuä nüm ganz so 100%ig zrügg versetze, dass i hie aues richtig cha verzeue. Aber versueche mirs glich mau...

Auso, hei mr dert äbe när üses Bungi mit em gmüetleche Baukönli gha u das o gnosse. Sooo viu hei mr nämlech gar nid gmacht, si ab und zue mau id Stadt zum ga ichere u schöpperle ufem Nachtmärit. Het je würklech no hübschi Sache dert. U när hei mr würklech mau chli Gepäck müesse loswärde u wieder mau es Päckli schicke. Zum Glück het z Luang Prabang d Post sogar am Sunnti u bis am Abe am 10i offe, auso hei mr das uf üse letscht Tag dert chönne verschiebe, wo mr es Töffli hei gha u mit däm hei chönne ga. Bi ja när scho froh gsi, dass i das elände Kilo Pfäffer nümme ha müesse mitschleppe, aber we mr zum hätte nachem Pris gfragt bevor si üs scho aus ipackt het gha, de hätte mrs äuä glich no bis uf Bangkok treit - 70$ het das koschtet! U dr tüür Pfäffer hei mr no promt vergässe uf dä Zedu z schribe, wo muesch uflischte was aus drin isch u was es Wärt het. Wo mr das nachem zahle hei gmerkt, hei mrs ihre no wöue erkläre, aber die isch hinger u vore nid drus cho was mr da no wei. Wahrschiinlech spiuts ja eh ke Roue aber mir hei dänkt, es chönnte vielech d Chance no chli verbessere, dass das ganze Züg de o ganz deheime achunnt. He nu, lö mr üs la überrasche...

Natürlech hei mr ds Töffli aber nid nume für ufd Poscht gmietet. Mir si a däm Morge mau id Stadt u dert ga es paar Reisebüro abtschegge, wüu mr no i sones Elefantecamp hei wöue. Das wo üs lieber isch gsi het aber d Übernachtig nume mit somne Mahut Kurs verchouft. Mä hätt auso no sozsäge e Elefantefüehrerschiin müesse mache, u das isch üs eifach düttlech ztür gsi. Drum simer is nächste Büro, hei dert e Übernachtig u e stündige Ritt im angere Camp buechet u o no grad ds Busbillet für uf Vang Vieng chönne choufe. U sogar Töfflis hei si vermietet, aber natürlech hei sie üs das nume wöue gä, we mr e Pass dert lö u mir, no natürlecher, kene drbi gha... Auso haut nomau es Tuktuk näh für zum Bungi u wieder zrügg. Aber wüus när de scho Mittag isch gsi hei mr wenigstens nume no e haube Tag Töfflimieti müesse zahle.

Dä hett aber o guet glängt. Mir hei nämlech zum ne Wasserfau wöue, nume öppe 30km vo Luang Prabang u die auerbeschti Strass ir Umgäbig, da si warschiinlech die neusti isch. Vo Afang bis Ändi teeret u nume ganz säute mau es chlises Loch, tiptop! Vorauem für laotischi Verhäutnis. Wie das normalerwys usgseht hei mr nämlech de o no gmerkt, aber das später.

Aber o we mr die schlimmste Strasse hätte gha, dr Wäg zu däm Wasserfau het sich uf au Fäu glohnt. Zwar hei mr natürlech wieder mau e Sunnti für so ne Usflug usegläse, auso hets zu de normale Tourihorde o no die iheimische Sunntigsusflügler gha. Isch aber no gange, dr Wasserfau het so mängi Stufe u fasch jedi mit emne herrlech häublau lüchtende Schwümmbecki ungerdran, da hei o es paar Lüt Platz u chasch trotzdem no ane verbi fötele. Aber irgendwenn het me das o gseh u mr hei ja äbe no uf Poscht wöue. Auso zrugg zum Bungi, Päckli packe, uf Poscht bringe, ds Töffli umegä u no chli ga umeluege, wo dass es da süsch no gmüetlechi Beizli het.

När aber mau bezyte wieder zrugg, erstens hei mr am nächste Tag ja wöue ga Elefanterite u zwöitens isch dr 26. Februar gsi, auso hei alüte u am Papa zum Geburi gratuliere. U da si mr när de o es Zytli drmit beschäftigt gsi, zum Glück gits Skype, süsch hätte mr äuä no grad mau zwe Wuche früecher wieder müesse afa bügle dass mr Telefonrächnig hät chönne zahle. Aber luschtig gsi, aues chönne abmache u erfahre wo nötig isch gsi u näbe bi no grad dr Härdöpfustock bsteue für üses erschte Ässe ir Schwyz. Und usserdäm isch no grad uscho, dass das Ässe äuä scho am 24.3. muess si, da mini Eutere am 25. i d Ferie wei. Auso schribi itz äbe dr Blog scho vom Sofa z Wabere us...

Aber itz si mr ja no z Luang Prabang u scho fasch ufem Wäg is Elefantecamp. Das isch auerdings nid ganz so toll usecho. Am Morge vor dr Abreis hets mr plötzlech feiechli dr Mage verrüeblet, zum Glück num ganz so schlimm gsi wo mr ufem Elefant si ghocket aber bi scho fasch e chli seechrank worde dert obe. So oder so hets aber mau wieder glängt mit Elefanterite. Isch zwar dasmau dütlech agnämer gsi aus denn vor fasch 10 Jahr z Thailand, wo dr anger di ganzi Zyt mit sim Metaupicku uf Elefants Chopf umegchlopfet het. Aber schlussändlech haut glich nid so speziell wie me sich das vorsteut u ds Gäud nume knapp wärt - het ja de o veiechli gchoschtet für das Stündli wo mr für die paar Meter zum Fluss abe u wieder zrügg hei brucht.

He ja, d Gägend isch uf jede Fau wieder sehr schön gsi, u ds Bungi zmitts im Waud obe am Hoger mit Ussicht ufe Fluss u riese Terasse ou hübsch. U nachem Elefanteritt het me dert ja o nid würklech öppis chönne mache u mi Mage het gäbig Zyt gha sich z erhole.

Ganz glängt hets zwar nid, ha no es paar Täg e chli glitte, aber da mr am nächschte Tag ja dr Bus uf Vang Vieng hei vor üs gha, bini scho froh gsi hets ömu chli besseret gha. Mir si ja ziemlech gspannt gsi, wie das Busfahre z Laos so geit. U hei aus erschts eigentlech e rächt gueti Erfahrig gmacht. Dr Bus isch zwar wieder mau bumsvou gsi u i ha aus erschts es paar Lüt vo üsem Platz müesse verschüüche. Das hani när fasch chli bereut, wo doch usgrächnet dä komisch Franzos vor üs isch häre ghocket, wo ni scho vorem Bus gschmöckt ha. Wär aube scho no nätt we me es Düscheli würd nä bevor me i so ne änge Bus stigt...

Aber itz, für die Fäu hani ja geng mi Tiger Balm im Täschli. U dr Bus isch fasch rächtzytig losgfahre u gar nid so viu z spät in Vang Vieng acho. Eifach houperig isches gsi, u je wyter mr vo Luang Prabang si wäg cho, desto meh hei mr se äbe kenneglehrt, die laotische Strasse. Mir hei bis itz no nid usegfunge wieso, aber irgendwie fähle bi dene eifach immer es paar Stück. Da chunnt mau es paar 100 Meter gar nid so schlächte Belag u plötzlech hört er eifach wieder uf für die nächschte paar. U mir si ja immerhin uf dr wichtigschte Houptstrass vom Norde uf Vientiane ungerwäx gsi. Süsch häts wahrschiinlech gar ke Belag gha.

Was usserdäm no chli unpraktisch isch bi däm laotische Bussystem, isch dass d Statione normalerwys irgendwo usserhaub vor Stadt si u när natürlech no dr Transport is Zäntrum muesch zahle. Aber o nid so ne Sach. Mir si auso mau i so nes Sammutaxi gschtige, grad zum ne äutere Päärli us Nidau oder so. U zum Glück nid wieder zum Franzos, dä isch scho völlig gschtresst ar Busstation umegirrt u när mau ke Ahnig wie abhande cho. Da mr no nid hei gwüsst wo häre ga wohne, si mr bim erschte Haut mau usgstige, direkt vor dr Bäckerei, auso mau eis ga zieh u luege wo mr si. Gar nid schlächt gläge gsi di Bäckerei u mir hei nid wyt müesse loufe, da het üs scho eine aquatscht u zu sim Guesthouse gfüehrt. Isch zwar verry basic gsi, aber neu u suber u fasch gar nüt gchoschtet. Tiptop für die erschte zwe Nächt u mit däm wo mr hei gschpart hei mr üs de derfür när no es hübsches gleischtet.

Das si mr am nächschte Tag ga sueche. U zwar unger au dene Hotels, wo Baukön mit Flussblick hei. Scho no gäi gsi, wie viu meh mr när hei zaut, aber die Ussicht allei isch auso jede Dollar wärt gsi. D Umgäbig vo Vang Vieng isch eifach dr Hammer. Luter Kauchfeusu, fasch wie z Krabi, nume no viu meh u viu grösseri u zmitts drin dr wunderschön Fluss Nam Song. Auerdings het dert vor 10 Jahr mau eine d Idee gha, dass me uf däm Fluss ja mit de ufblasne Schlüch us Laschtwagepneu cha abeschipperle. Tubing nenne sie das u das wär ja eigentlech o no nid z Problem, we nid di findige Gschäftlimacher dert mau hätte usgfunge, dass me Tuber o ganz gäbig cha abfülle. Auso hei si obe am Fluss, wo die meischte mit ihrne Ringe istige, ei mega Bar ar angere härebaschtlet u abem Mittag geit dert eifach Poscht ab. Rieseparty im Stil zwüsche Fullmoonparty Koh Phangan u Ballermann. Angers! Aber o das gäng eigentlech no, we die dert obe i dere „wild falang zone" würde blibe. Aber si schipperle ja äbe när abe, nach däm si dr ganz Nami hei gsoffe. Es het ja nid nume die Zone dert obe, sondern o ufem ganze Wäg abe no überau Tanksteue. U denn torkle die dr ganz Abe wie die bissne Affe im Bikini oder Badhose dürs Dorf. Isch auso nüt schöns u grad im ne Land wie Laos passts überhoupt nid. Mä merkts haut o de Iheimische ah, di sie sicher o scho fründlecher gsi. Aber trotzdäm isch Vang Vieng uf jede Fau e lohnenswärte Zwüschestop ufem Wäg vo Luang Prabang uf Vientiane.

Da mi Mage no immer nid so fit isch gsi, hei mr am erschte Tag in Vang Vieng usser Hotel sueche keini grosse Sprüng gmacht. Näb de wiude Backpackers hets o die typische Backpackerbeizli dert. Äbefaus im Stil wie z Koh Phangan, nume dass statt irgenwelche Fiume ununterbroche Friends, Simpsons u so Züg louft. Hei mr mau e chli Friends gluegt a däm Nami.

Drfür när am Tag druf nachem zügle mau gluegt für nes Töffli u die strube Strasse ga usteschte. Hei aus erschts mau zu däm Punkt wöue, wo äbe die Tuber is Wasser gö, ne auerdings zersch mau verpasst, ersch wyter obe abboge u dert irgendwie ire Sackgass glandet. Am Schluss isch nume so es chlises Wägli am ne Flüssli entlang, nid sehr praktisch zum fahre aber wunderschöni Landschaft.

Auso mau umgkehrt u de die richtige Abzweigig doch no gfunge Die si äuä au scho es zytli am umesüüfle gsi dert, isch ömu mächtig abgange u mir hei de doch lieber mau dr Rückzug aträtte. Chli wyter unger hei mr o no so es paar Beizli am Fluss gfunge, dert hets ke so Ballermannsound gha u die wiude Falangs si ja no obenache am feschte gsi, auso hei mr dert i auer Rueh mau es Pöiseli chönne mache u vo eim vo dene Houzhüsli direkt d Füess im Wasser bädelet. Hei o mächtig Stoub agsetzt gha...

Am Tag druf isches aber no stoubiger worde. Dasmau si mr mit em Töffli i die angeri Richtig zum dert es Rundfährtli dür d Hügle u zure blaue Lagune zmache. Natürlech hei mr aus erschts mau wieder d Abzweigig verpasst aber bim zrüggfahre doch no gfunge. Die het üs afa mau Kilometer um Kilometer über ne Strass vou riese Chempe gführt. Het scho chli ghouperet. Aber immerhin het d Charte einigermasse gstumme. Das Brüggli, wo me ar Familie näbedran chli Gäud het müesse gä zum drüberfahre, isch ömu när o cho. Und die blaui Lagune, es Flüssli wo dert usem Feus use chunnt, isch würklech sehr hübsch gsi. O we am Schluss üsi bsoffne australische Nachbare usem Hotel no si zuchetöfflet, au scho mitere Fläsche Bier i de Finger. Aber mir si ja eh scho am ga gsi.

Dr Rückwäg isch nid weniger houprig gsi, dasmau überne uströchneti Schlammpiste vou Riue wo eim geng chli us dr Bahn hei wöue wärfe. Aber d Gägend geng no mega schön. Trotzdäm si mr no froh gsi, wo mr wieder d Strasse vom Dorf unger de Rädli hei gha.

Am Abe hei mr üs no mau die Bare uf dr Insle am Afang vom Dorf wöue ga aluege. Hei se am Tag scho mau gseh, we aus chli schlottrig usgseht, im Fischtere machts e chli e gmüetlechere Idruck. Auserdings geits äuä ersch spät los dert, isch ömu no ganz usgstorbe gsi u mir mau wieder zrügg is Dörfli, wo mr no es Irish Pub hei gfunge. No gmüetlech gsi. U am nächste Tag hei mr ja eh vorgha, mau üses türe Zimmer mit dr schöne Ussicht no chli z gniesse.

Hei mr de o gmacht u när isches scho wieder Zyt gsi für e Wäg zur nächste Station, Vientiane. Da dr Bus aber ersch nachem Mittag het söue fahre, si mr am Morge no es Stündli dr Nam Song ufe u wieder abe böötlet. Vom Fluss us isch d Gägend no fasch mau schöner u vor auem o weniger stoubig. Het sich ömu glohnt. U we dr Pickup für zur Busstation rächtzytig wär cho, wär das mit em Timing o grad super ufgange. Aber de het mau wieder uf sich la warte. Het aber o überhoupt ke Roue gspiut, ar Busstation isch nämlech wyt u breit no keh Bus uf Vientiane ume gsi, drfür e riese Horde Lüt. Unger angerem o dr nid so fein schmöckig Franzos u das asiatische Päärli wo o scho vo Luang Prabang ufem gliche Bus isch gsi u mr sit denn jede Tag mindestens einisch oder zwöi mau gseh hei. U es si immer meh häre gcharet worde. Irgendwenn si de o mau e Bösse cho, auerdings mau uf Bangkok, mau uf Chiang Mai u wo o süsch immer häre. Im einte hätte mr sogar no chönne mit fahre, dä wär über Vientiane i Süde vo Laos abe. Isch aber so ne komische Liegebus gsi u scho fasch vou. U da üs eine het gseit, dr nächscht chöm de grad, u dä VIP Bus wo mr ds letsch mau hei gha ja ganz gmüetlech isch gsi, hei mr ne la abfahre ohni üs.

So ziemlech gnau zwe Stung nach dr planete Abfahrt hei mr du de tatsächlech no ine Bus chönne istige. Vo VIP auerdings nid viu z gseh, aber o nid sooo unbequem. Eifach lang het er gha. Bis mr bi üsem Hotel z Vientiane si gsi, natürlech no mau umstige ines Sammutaxi für id Stadt ine, si mr öppe 8 Stung ungerwäx gsi o we mr nid mau 5 drvo im Bus si ghocket. Aber glich, es si ja nid mau 160 km! Ömu hei mr keni grosse Sprüng meh gmacht, zum Glück grad bim Hotel es härzigs französischs Restaurant gfunge u dert o ganz leckeri Pasta u Pizza. U när ab is Bett!

U när u bezyte wieder uf, hei ja uf d Imigration wöue ga luege, ob mr no chli länger aus 15 in Laos chöi blibe, süsch hät me nämlech scho am nächschte use müesse. Da mr ja aber kes Visum hei gha, sondern nume e Stämpu, hei mr o kes Visum chönne verlängere. U we me länger blibt, zaut me 10$ pro Tag Overstay. Auso hei mr gfunge, leischte mr üs ei Tag u mache üs när ufe Wäg uf Bänki, blibe dert no e Nacht bevor mr zu Schabis uf Pattaya fahre, de chöi mr nämlech o no mau Bibsi u Pauli träffe.

Ok, das wär klärt gsi, dämfau mau die Stadt ga aluege. Bir Immigration si mr scho fasch bim vientianische Triumpfboge gsi, auso dert mau verbi. U me cha sogar ufe, isch no e guete Blick uf d Stadt, o we gar nid so höch. Aber Vientian isch itz grad bsunders mit höche Hüser übersäit, auso muesch o nid so wyt ufe zum drüber luege. Überhoupt isch das ganz es gmüetlechs Houptstädtli u het üs sehr guet gfaue, o wes nid sooo viu z gseh git. Nach däm Boge si mr uf em Märit glandet, das heisst zersch bi sore Art Ichoufszänter näbem Märit, wo aber öppe 99% vo aune Läde no läär si gsi. Ufem Märit säuber hets de scho chli angers usgseh. Jenschti Hüser vou mit Ständ wo weiss nid was aues verchoufe. Es hät sogar Chüeuschränk u Herde gä, aber irgendwie nid viu, wo mir hätte chönne bruche. A mou, dr Role het natürlech no mau es paar Chüssiazüg gchouft. U es Büsi für d Frou Schabi Junior hei mr o no gfunge. Leider nüt gschiids für d Eutere. U die Beer Lao wo mr mindestens hätte wöue mitbringe hei mr am Schluss no vergässe. Tja...

Gäge Abe si mr när mau zum Mekong füre, ine Bar ufem Dach, öppe im 4. Stock mit hübscher Ussicht übere Mekong und ne chline Nachtmärit. Dert hei mr när natürlech o no schnäu düre müesse aber o nid auzuviu gschiids gseh. Auso mau ga ässe. U ir einte Beiz si no drei ghocket, wo mit üs ufem Bus si gsi, auso si mr nachem Ässe mau zu dene zuche ghockt. Dr eint vom Bus isch scho gange gsi, drfür si itz näbem Dütsche und em Franzos vom Bus no e Spanier und e Portugies vo de Azore dert ghocket. Lustigi Rundi gsi. U irgendwenn hei si när gfunge, sie wöu itz no chli i Usgang. Auso mau es Tuktuk grüeft u gfragt, wo da no öppis louft. Er het gfunge, er wüss da öppis u fahrt üs zu somne grosse Hotel mit em ne lüchtige Igang näbedran. Hei zersch scho dänkt sig öppe e Stripschuppe. Aber gar nüt sörigs. Uf dr Bühni isch sone Art Band gstange, o wes fasch chli nach Karaoke het tönt. Mir 6 si die einzige Nidasiate u scho chli e Sensation gsi. Uf au Fäu hei mr när unbedingt bi ihrem komische Tänzli müesse mit hüpfe. Eis füre, zwöi links, Häng ufe oder irgendwie so. Dr Dütsch hets no vei schnäu guet im Griff gha, mir si da gloub weniger begabt...

Mit dr Zyt hei mrs aber doch mau gseh gha u heis no mau mit em ne Tuktuk versuecht. Dert wo dä üs het wöue härefahre isch aber anschiinend zue gsi, nume no es paar Lady Boys si vor dran umegstange. Auso wieder zrügg zum auer erschte Ort, no es Schlummertrünkli u när mau ufe Heiwäg. Sogar Begleitig hei mr no gha, vom ne schwule Laot wo unbedingt Gäud vo üs het wöue, wüu schiins sis Töffli kaput sig oder was. Aber immerhin isch er när mau gschobe u mir hei guet gschlafe.

U o lang, u nid so ganz Lust uf wyteri Erkundige vo Vientiane. Usserdäm hei mr dert mau es guets Internet gha u dringend mau müesse plane wie mr hei chöme, Hotel, Fähri, Zug etc. bueche. Auso wieder mau e Arbeitstag. Am nächste hei mr ja no chli Zyt gha für Sightseeing bevor mr am 4i si abghout worde für ufe Nachtzug Richtig Bangkok. Auerdings hets gar nüm so viu Sights gä, auso simer chli am Mekong entlang glüffe, hei i nes paar Beizli Zyt ztot gschlage u wieder mau wie wiud im letschte Moment e Briefchaste für Roles Postcharte gsuecht. U när no bau Stress, zum die letschte Riel los wärde. Ganz hei mrs nid gschafft, für nes paar Beer Lao aus Mitbringsu hätts auso no guet glängt. Aber äbe...

Dr Abhoudienst für ufe Zug het o wieder mau gäbig Verspätig gha. Woner när aber ändlech isch cho het dr Räscht ganz guet klappet. O we mr no lang uf ne verwirrte Japaner hei müesse warte, wo grad am aute Froueli no e Hängematte het abchouft u wo mr ändlech losgfahre si no het gmeint, er heig sis Portemonnaie vergässe. Hets aber när gfunge. Ds Tuktuk het üs zersch zur Friendshipbridge gfahre, wo vei es Ghetto isch gsi vo au dene Bösse u Chäre, wo über d Gränze hei wöue. Mir hei dert aber nume ds Zugbillet becho u si wyter zum gloubs einzige Bahnhof vo Laos. Vo dert gö so zwe, drei Kilometer Gleis zur Friendshipbridge, wo anschiinend für Outo gsperrt wird, we dr Zug chunnt. Das wär momentan ds laotische Zugsnetz, aber schiins sig e Usbou planet, mindestens no es paar Kilometer meh bis uf Vientiane ine...

Für üs isch das ömu tiptop gsi, bi däm Bahnhof hets nume weni Lüt gha, dr Zug het ja o nume zwe Wäge, u bim einzige Schauter zur Usreis hei mr gar nid müesse astah u ganz eifach üsi 20$ fürs Overstay chönne häre legä. U scho gli isches losgange, ca. 10 Minute, u scho si mr übere Mekong u z Thailand gsi. Das heisst, ganz z Thailand no nid. Schliesslech hei mr ja no ar Immigration vrbi müesse u hie isch das irgendwie bsunders kompliziert gsi. Äbe, sehr viu Lüt hets ja nid i däm Zug gha u sogar zwe Schauter hie, aber hei glich äuä bau e haub Stung gwartet. Egau, hei ja no Zyt gha bis dr Zug isch gfahre u irgenwenn hei si du o üs no inegla.

Im Zug hei mrs när sogar gschafft, üses Billet z tuusche, dass mr beidi Plätz binang hei gha u denn uf Bett hei chönne umsteue we mir hei wöue. Zersch hei mr mau no es Znachtmenu bsteut, isch auso no lecker gsi für im Zug. När no chli gjasset u de glich mau ungere, hätte ja scho so am 7ni mau z Bänki söue acho u meistens chasch da mindestens e Stung vorhär e nüm schlafe. Auerdings si mr när am 7ni no längstens nid z Bänki gsi u hätte guet no chli chönne liege. Erhousam isches glich nid würklech gsi, aber es git würklech ungmüetlecheri Arte z reise aus mit thailändische Nachtzüg.

We o mit guet 2 Stung Verspätig si mr auso mau wieder im Bahnhof Bangkok gstange u hei üs es Tuktuk id Khao San gsuecht. Natürlech eh mau wieder z viu zaut, aber itz, no ganz verpennet hei mr da nid gross möge diskutiere. Dert acho si mr mau id Strass näb dr Khao San u hei o nüm lang möge Hotel sueche, ds erschte wo mr hei gseh isch günstig gsi u het e subere Idruck gmacht, o wes het gheisse, es sigi de lut bis spät ir Nacht wüu direkt zwüsche de Bare. Egau, Houptsach nümme sueche.

Chum si mr im Zimmer gsi hei o scho Pauli u Bibsi nachegfragt, ob mr scho sig acho. Auso abgmacht am Eis, afa mau zäme öppis gspachtlet u när mau uf Entdeckigstour. Bibsi het wöue ga schöpperle u ufere Charte e Märit ir Nächi entdeckt. Auso mau ufe Wäg dert häre, het auerdings grad gar nüt gschiids gä dert.

Am Abe hei mr Znacht gsuecht u ungerwäx het mr doch tatsächlech no dr Mister Check It Out zuegrueft, woni denn ha kenneglehrt, woni mit Nici ungerwäx bi gsi. Chlatsche Cheib dä, auso geng no ar Khao San ungerwäx. Gseht aber o afa chli drna us... När si mr wieder mau zum Israeli ga Schnitzu ässe. Wie immer lecker gsi, auerdings hets nume no dinne Platz gha u die spinne dert ja würklech mit ihrer Aircon. Anschiinend isch das am Pauli när o zum Verhängnis worde, heigs ne doch promt am nächschte Tag is Näscht gleit. Sorry Pauli für unsere Idee mit dem Israeli! Aber vielech het er ja o no chli Kater gha, si nämlech no rächt lang ungerwäx gsi nachhär. Mittlerwile isch d Khao San no lärmiger aus aube u mir si schlussendlech ir Strass näbedran, dert wo üses Hotel isch gsi, ire Beiz glandet. Dert äne si sie überau chli am gittärele u so, isch no zfriede. Uf au Fäu isch mega luschtig gsi wieder mit üsne zwöi Franke. Role u Pauli hei sich mit Hilltribe Froue umegschlage u am Schluss no so e Tattoo-Strumpf gchouft. Zmingscht uf Roles Föteli, woner när is Facebook het ta, gseht das Ding sogar no fasch ächt us.

Aber alles hat ein Ende u so hei mr üs mau wieder müesse verabschiede, wär weiss für wie lang das mau. Vielech wärs gschider gsi, hätte das scho chli chli früecher gmacht, es isch ömu nid ganz eifach gsi am nächste Tag zum Bett use zcho u üs ufe Wäg uf Pattaya zmache. Da het scho zersch no mindestens es Nudusüppli häre müesse. Nach däm hei mr mau es Tuktuk zur Bushautsteu wöue näh u üs wieder mau so richtig la verarsche. Het doch eine gmeint, mir müesse zersch zu somne Büro ga es Ticket choufe. U sich o gar nid drvo la abbringe. Mir hei scho dänkt, blöd wie mr si, dass vielech ja vo dert när no e angere Bus fahrt. Jaja, klar! Dä het üs zu däm Büro gfahre u gseit mir söue mau ine, er wartet de. Mir ine, gseit mir wöu uf Pattaya, sie: „wenn de", mir: „itze" u si, ja de müesst dr zu dere Bushautsteu wo mr vo Afang a eigentlech hätte häre wöue. Auso si mr scho wieder usem Büro usecho wo üse Fahrer no grad sini Provisions-Benzin-Guetschiine het übercho. U dä fahrt üs natürlech eifach wieder dert häre wo mr si igstige.

Dert hei mr ihm natürlech gseit, mir müessi itz zu dere Busstation u er meint eifach, das sigi zwytt, da müess mr es Taxi näh. Ja merci schön! Si Kolleg het sich das Gschäfft aber de doch nid wöue la entgah u hätt üs für weiss nid was fürne Priis häre gfahre. Ja das choschti haut scho chli meh, sig haut wyt u viu Verchehr. Viu Verchehr hets ar Sukhumvit natürlech scho. Zum Glück isch üs när d Idee cho, dass mr ja nume zum Skytrain chöi fahre, d Busstation isch ja grad bire Hautsteu vom Skytrain. Auso si mr üs doch no einig worde mit em Priis u so wahrschiinlech schneuer dert gsi aus dr ganz Wäg uf dr Strass.

Trotzdäm si mr när ersch nach de Achte ds Pattaya acho. Isch üs scho nid so rächt gsi, schliesslech het d Larissa sogar äxtra Donuts für zum Zvieri ikouft gha u dr Marc früecher Fürabe gmacht - sorry! Zum Glück hei sie aber aube am Friti Abe Sushi, so isch ömu wenigstens Znacht nid chaut worde. Nach däm hei mrs üs no uf ihrem Terässli gmüetlech gmacht, die hei würklech es hübsches Hüsli dört. U mir hei im Gästezimmer dörfe izieh, wo dütlech besser het usgseh aus so mängs Zimmer wo mr im letschte haube Jahr hei gha.

Am nächschte Tag si mr a ne Strand im ne Militärgebiet südlech vo Pattaya gfahre. Hübsches Plätzli auso, u trotz de viele Russe hei mr dert gärn no üses letschte Bädli im Meer gno. Am Abe si när mit em Marc i Usgang, zersch e megaleckeri Pizza ga nä u när id die sogenannti Walking Street, dä Egge vo Pattaya wo sich ei Bar a di nächschti drängt. U o d Lüt dränge sich dert veiechli. Ha bau chli Platzangst becho dert i däm Gässli. Zum Glück hets o die einti oder angeri Bar, wo Livebands no gar nid so schlächti Musig spiele, we o ändlos lut. So nes Ding hei mr üs gsuecht u isch no ganz lustig gsi. Mit no emne Fürabebierli ufem Terässli isches o vei spät worde u wo mr hei gmerkt, dass mr nach dere lute Bar äuä när o nüm ganz lislig si gsi u d Larissa hei wach ghautet, si mr de schnäu mau ungere. Am Tag druf hei mr du när o nüm viu gmacht, no ds auerletschte Hotel z Malta gsuecht, am Abe mau ga ässe u no chli Föteli agluegt. Dasmau natürlech früeh is Bett, am nächschte Tag het ja d Ayleen i Chintschi müesse, dr Marc ga bügle u mir wieder ufe Bus zrügg uf Bangkok.

Dert si mr när o scho vorem Mittag acho u si mau düre Tesco u dr Big C zoge. So hei mr dr nächscht Tag no chli chönne ruhig näh nachem ne letschte usgibige Khao San Usgang. Ds Shopping im Prattunam u um d Khao San hei mr am letschte Tag no erledigt, sogar mau usegfunge wie das Bussystem i dere Stadt funktioniert, bevor mr am Abe när mau a Flughafe hei müesse. U so wär de wieder mau es Kapitu Asie z Änd gange...

Bevor mr aber ds Kapitu Malta hei chönne ufschlah, si mr zersch mau no es paar Stung ungerwäx gsi. Die 6 Stung vo Bänki uf Dubai kenne mr ja afa, o we mr se zerscht Mau im A380 hei hinger üs bracht. Scho no gross das Ding. U mi hets dünkt, e chli breiteri Sitze hets gha, aber wäg däm nid unbedingt bequemeri. Vor auem hei si ganz e komischi Logik gha mit em Ässe. Dr Flüger geit am 1 ir Nacht z Bangkok wäg, landet am 4i Dubai Zyt z Dubai u die serviere irgendeinisch zmitts drin mau zmorge. Söu begriife wär wott. Mir hei ja no chli Zyt gha z Dubai irgendöppis z Ässe, het aber nume für nes Kafi u ne Glace glängt, auso so zsäge ds zwöite Zmorge. U z dritte hetts natürelch när im nächschte Flüger gä. Dert drin si mr inklusiv Zwüschehaut uf Zypere fasch 9 Stung ghocket. Bis mr ändlech am Nami churz vor 2 in Malta si acho, dert dr Bus hei gno wo no fasch e Stung dürd Pampa kurvet isch u schlussändlech, öppe 25 Stung nach däm mr ir Khao San losgfahre si u no mau fasch 10 Stung meh nach däm mr am Morge zur Tür us si, hei mr doch de no ändlech üses Studiöli chönne bezieh. Für die 20 Fränkli am Tag isch das auso nid übu gsi, vorauem ds windgschützte Terässli wo sogar geng e chli Sunne het gha. U das het me chönne bruche dert, zwar isch z Wätter sehr schön gsi, aber das het geng gchutet wie wiud u isch so vor auem Abe när gäbig chaut worde.

Nach dere ganze Reis hei mr glich no es Spaziergängli dür das Kaff gmacht. Bugibba säuber isch itz nid grad e bsunderi Stadt, haut mit viele Hotelbunker u Wohnblöck, d Lag i dere Bucht wär aber no ganz schön. Nach däm mr ändlech e Lade hei gfunge wo mr ds Morge hei chönne choufe u no bire Bar die letschte Sunnestrahle hei gnosse, hets aber de definitiv glängt u mir hei üs mit em ne Süppli um ne maltesische Wyli uf dr Terasse igrichtet. Hei ja wieder mau e Chuchi gha, auso nid müesse ga Znacht ässe, o mau wieder schön.

När hei mr mau müesse überlege, was mir mit dene drü Täg Malta no wei afa. Zersch mau Valetta, när Gozo u am letschte Tag dr Räscht vo Malta mit em Outo. Auso los, uf e Bus uf Valetta. U das isch würklech no e idrücklechi Stadt mit au dene Steihüser u änge Gasse. Aber mau einisch dürespaziert, chli d Ussicht übere Hafe gstudiert, när mit dr Fähri übere uf Sliema het eigentlech glängt. Vo dert us si mr no ar ganze Küste vo dene drü zämegwachsne Touridörfer glüffe, bis mr scho fasch am Ändi drvo es gmüetlechs Pub hei gfunge. U we scho dr Bus direkt vor dr Türe hautet chasch ja när o ganz gmüetlech mau wieder hei.

Trotzdäm hei mr am nächschte Morge nid rächt ufmöge, hei gmüetlech zmörgelet, si no ga ichoufe u bis mrs üfe Bus zur Fähri uf Gozo hei gschafft, isch de glich scho wieder eis verbi gsi. Hei zwar nid dänkt dass das es Problem isch, hei ja o no nid gwüsst wie ewig lang mr wärde bruche für da chli umezcho.

Aus erschts isch natürlech o dä Bus nid grad sehr direkt zur Fähri gfahre u het scho rächt lang gha, bis er mau i däm Landzipfu dert obe isch acho. Aber uf d Fähri hei mr no lang nid chönne. Plötzlech si mr im Stou gstange u es isch gar nüm gange. Irgendwenn si paar Polizeichäre füredrückt u no später hei mr när usegfunge, dass e Expräsident isch gstorbe u anschiinend uf Gozo genau a däm Tag söu beärdigt wärde. U natürlech söu dr Sarg u sini Begleitkolonne genau uf die Fähri, wo mir hätte wöue. Irgendwenn hets üs glängt, mir si usgstige u zur Fähri glüffe. Drfür hei mr när eifach chönne istige, Billet het me niene chönne choufe u kontrolliert hets o kene. Auso los!

Die nächschti nid so schöni Überraschig isch aber o scho gli cho. Scho ufem Schiff hei mr gseh, dass anschiinend aui Bösse uf Gozo immer nume stündlech fahre. De wirds äuä nid grad für mängi Station länge. Auso hei mr üs mau für das berühmte blaue Fänschter ar Weschtküschte entschiede. Aber äbe, dä Bus geit nume au Stung u dr nächscht natürlech ersch i öppe 40 Minute. U we mr üs nid per Zuefau no grad im Richtige Moment hätte umkehrt, hätte mr no nid mau gseh, dass dr richtig Bus itz grad dert steit u o scho grad wott abfahre. Auso si mr doch de öppe am haubi 5i oder so a dere Küschte acho. Schööööön isch si würklech gsi. U wahrschiinlech wüu scho chli später isch gsi hets o gar nid so viu Lüt gha. Da mr aber hei gwüsst, wie ewig o dr Rückwäg cha ga, hei mr ufe Sunnerungergang a däm hübsche Plätzli verzichtet u si de scho e Stung später wieder ufe Bus.

U tatsächlech, es geit no ewig bis dr nächscht zum Hafe fahrt. Ok, Victoria isch o no es schöns Städtli, aber viu Lust uf Stadtbummu hei mr itz eigentlech nümme ga. Irgendwenn hei mr de doch mau chönne fahre u mit viu Glück sogar no e Sitzplatz erkämpft. Am Hafe hei mr o no usegfunge wieso dass mr hei chönne ohni Billet uf Gozo fahre. Dert hei mr nämlech eis müesse löse u es git dert nume Retourbillet. Auso doch nüt mit gratis. Irgendwenn hei mr o uf die Fähri chönne, natürlech hei mr o dasmau wieder dr ganz Beerdigungstross verwütscht, aber immerhin isch itz ke Polizeieskorte meh drbi gsi. U wo mr us dr Fähri si usecho hei mr o würklech grad i Bus chönne istige. Trotzdäm isch öppe scho 9i gsi bis mr si heicho u si ganz igfrohre gsi. Use hei mr aber nümme möge, auso glich no schnäu die Spaghetti ob ta, wo mr am Mittag hei kouft. Wieder mau mit Thonsauce. U super, nach 4 Monät Asia schaffe mrs doch tatsächlech bi üser erschte säuberkockete Sauce, süesses Tomatepüre dri ztue. Jetzt längts auso würklech, Zyt für Fürabe u ganz teuf unger dr Dechi chli ga Wärmi sueche!

Scho isch üses letschte Tägli z Malta abroche. Outomiete hei mr ja planet. Auso mau bir Reception nachefrage. Auso, es chöm de gli eine üs cho hole, u irgendwenn isch er de o mau cho u het üs chrüz u quer dür die ganzi Stadt gfahre, bis mr mau zu däm Büro si cho. Zum Glück hei mr när ds Chäri bim Hotel chönne la stah, das Büro hätte mr äuä nid so schnäu wieder gfunge.

Auso itz mau los! Da heigs schiins es hübsches Fischerdörfli im Südweschte, tönt nach gueter erschter Station. Aber chum si mr chli im Dörfli in chunt mr i Sinn, das muess das si, wo bekannt isch für si Märit am Sunnti! U mir, wei gewohnt, wieder am Sunnti uf usem Usflügli u natürlech nid die einzige. Die Malteser hei ja itz nid scho es haubs Jahr heisses u schöns Wätter, die hets a somene sunnige Sunnti no viu meh vor Türe zoge aus die asiatische Sunntigsusflügler. U mir aus erschts grad mau zmitts i däm Märit glandet. Het scho mau es Zytli duuret, bis mr us däm Märit si usecho u mindestens no mau so lang, bis mr no dr Usgang us däm Dörfli u sim Labyrinth us Einbahnstrasse hei gfunge.

Irgendwenn hets klappet, u gli simer im nächschte Dörfli acho, mit chli weniger Lüt, drfür am ne riesige u hässleche Containerhafe vordran. Sehr schad gsi, aber we me i die richtigi Richtig het gluegt, het mes gschafft, nume dr wunderprächtig wyss Strand mit em herrlech klare häublaue Wasser u dä härzige Hüsli hinger dran zgseh. Auso scho no es guets Plätzli für mau es Käfeli. Vor auem wüus o niene es öffentlechs WC ir Nächi het gha, auso hei mr scho fasch es Beizli müesse sueche...

Auso, parat für ds nächschte Abentüür, die 5000 jährige Tämple. Leider isch dr Iitritt für die Steihüüfe grad e chli gar tüür gsi, auso hei mr üs die nume düre Zun düre agluegt. Aber dr Spaziergang rund ume het sich uf au Fäu glohnt, die Tämple hocke nämlech fasch zforderscht uf de Klippe u die grüene Hügle vorem stahblaue Himu u hingerdran ds Meer - wow! Die Höhlebewohner hei öppe scho gwüsst, warum si ihre Chempe genau dert hei ufenang tischet.

Nachdäm si mr no wyter chli de Klippe entlang, ei herrleche Ussichtspunkt nachem angere u überau ändlos viu Lüt. Auso hei mr mau Mdina wöue ga aluege, die mittu- oder weiss-nid-wie-auterleche Stadt ir Mitti vor Insu. U dert simer umekurvet u umekurvet u hei eifach keh Parkplatz gfunge! Auso gö mr haut glich mau zersch dä Strand im Nordweschte ga aluege. U süsch no e hübschi Küschte. U da no es paar Klippe u auti Dörfli. U gaaanz, gaaanz vili Sunntigsusflügler... U itz hei mr Hunger u Durscht, drum hei mrs no mau mit Mdina versuecht o sogar würklech e Parkplatz gfunge! Das isch o no härzig das Städtli, mit so ei bis zwe Meter breite Gässli u au de aute Hüser u ab und zue mau em ne schöne Platz. U plötzlech poletsch wie weiss nid was u mir beidi öppe grad e Gump gno! Die si dert irgenwelchi Böller am abschiesse zum Sunnerungergang, öppe e haub Stung lang u megalut! Vor auem dert i dene Gässli ine. Dr Role het es Fiuli gmacht, jedes mau wes wieder polet gheit ihm fasch d Kamera us de Finger ;-)

Auso mau use us dene Gässli u no chli dür Rabat streife, die Stadt wo sie usserhaub de Stadtmure hei bout. Die ganzi Gass dert isch vou gsi vo komische Dekos u kidschige Heiligebiudli u lüter Lüt wo grad us irgendemne Gottesdienscht si cho. No luschtig gsi, dert mau vor nes Beizli höckle u dene chli zuegluege. Aber när hets glängt, isch chaut worde, dert hei mr niene öppis gfunge wo mr gärn hätte wöue ga Znacht ässe, auso dr Chare mau hei steue u z Bugibba öppis sueche.

Das het sich aber o definitv glohnt! Ha ja no mau öppis maltesisches wöue probiere u i däm Beizli wo mr si gsi, si Braggioli uf dr Spiischarte gstange. Si nenne das „Beef Olives". Zum Glück hani scho nöime gläse gha, dass das nüt mit Olive ztüe het. Es isch eher so ne Art Fleischvogu, eifach mit Ei u Züg drin Statt Brät. U drzue e Rotwysauce mit Ärbsli u Rüebli, Brathärdöpfeli u Gmüess. Ou i ha ja ewig nümme so Fröid gha am ässe!

Nach däm leckere Abschluss hei mr scho wieder einisch müesse packe. Am 11i spätestens müessi mr itschegge für uf d Fähri, hets gheisse. Und die Fähri warti de uf dr Valetta Site vom grosse Hafe, auso müesst me dert eigentlech vor Busändstation chönne häre loufe. Auso mau ab uf Valetta. Wahrschiinlech häts no e Bus gä id Nächi vom Hafe, aber dä hei mr nid so rächt gfunge, auso mau z Fuess abe. U wär das dumme Schiff dert gsi wo izeichnet, wär das o gar nid so wyt gsi. Zwöine Orte si mr zuche ga luege, u beidne Orte hei si nüt gwüsst vore Fähri uf Salerno. Aber die zwöiti het gmeint, mir söue mau die Type frage, wo da ds Tor bewache. Hei mr gfragt, die hei aber o nid viu gwüsst, drfür mau ds Telefon zückt. Ja äbe, sones Schiff fahri hie ni, dass stöngi uf dr angere Site vom Hafe. Auso doch das, wo mr scho vo Wytem mau hei gseh gha. U itze, schwümme oder was?

Wo mr grad so am diskutiere si fahrt no e Chare mit em ne französische Päärli zuche, die hei genau ds gliche Problem gha, nume dass sie wenigstens nid hei müesse loufe. Auerdings ke Plan wo düre, süsch hätte sie üs mitgno. Auso müesse mr doch es Taxi bsteue, es choschti ja nume 20 Euro. Immerhin het dä aber när würklech gwüsst wo düre, u gli drufabe si mr tatsächlech vorem richtige Schiff gstange, eifach zmitts im Güeterhafe. Auso mau über d Outorampi istige u dert mit em Chäri vo de Franzose u e Lift (ganz gross agschribe dass nid für Personetransport gedänkt...) u es Stock wyter obe mau warte wie bsteut u nid abghout. Bis üs ganz es nätts Meitschi chunt cho abhole, chrüz u quer dür Stäge u Gäng tribt bis mr mau bi dr Reception achöme. Am Eis gäbs Zmittag we mr wöu, hie dr Schlüssu u dert obe eues Zimmer.

Auso ändlech acho, u ds Zimmer isch de würklech hübsch gsi. Äbefaus d Ussicht übere Hafe u Valetta vo üsem „Sunnedeck". Es het sogar zwe Ligistüuh gha u so öppis ändlechs wie e lääre Pool. Nume eifach geng chli weni Info. Zum Zmittag si mr nämlech ni, drfür nachemne schönne Sunnerunergang mau abe ga luege, obs irgendwenn Znacht git. Gar nüt hets gä ussert es Eggeli mit chli Kafi u Saft zur Säubstbedienig. U o niene öpper ume zum Frage. Auso mau i „Salon" höckle u eis Jasse. Jass fertig, geng no niemer ume, auso mau e Burechrieg afah (gar nüm gswüsst, dass das so es blöds Spiu isch...) u no chli warte. Einisch het Du mau eine gmeint, äs wärdi äuä öppe 10i. Ok, mir hocke scho fasch 3 Stung hie, eini meh verbringe mr nümme hie, hei ja eigentlech e gmüetlechi Kabine. U tatsächlech hätte sie sogar düregä, wenn ds Znacht parat isch. Hätte üs die ganzi Warterei dert unger auso chönne spare. He nu!

Znacht het me teilwys chönne ässe, u chum isch aus wäg gsi o scho aui Lüt wäg, heis no grad knapp gschafft es Bettmümpfeli zsteue u när haut o mau ab is Bett u promt grad öppe 11 Stung dürechröset, herrlech gsi! Zmorge isch när chli weniger kompliziert gsi, dass hei si eifach die ganzi Zyt dert ufgsteut gha zum hole u no chli d Ussicht gniesse bis mr de mau ds Salerno achöme. U dert si mr sogar no fasch e chli zfrüeh gsi, auerdings o wieder zmitts im Güeterhafe u a däm Ändi wo am wittischte vor Stadt entfehrt gsi. Trotzdäm hei mr üs entschiede, zFuess dr Bahnhof ga z sueche. U nachemne länge, länge Marsch hei mr ne sogar gfunge. Mau Billet löse, ds letschte Mau em Meer eis ga zieh u ab Richtig Rom.

Natürlech si üsi reservierte Plätz scho bsetzt gsi u het grad chli es Gnusch gä bis mr au es Pätzli hei gha. Nid bsunders gmüetlech, aber ja nid emau 3 Stung, das geit ja no. U z Rom hei mr sogar die richtigi U-Bahn u die richtigi Station gfunge u sogar vor de 9i vor dr Tür vo üsem Bed & Breakfast gstange. U die isch zue gsi. U wo mr hei glütet isch niemer cho. Chum, mir gö wieder zrügg zum Bahnhof u nähme dr nächscht Zug Richtig Schwyz! Aber bim dritte Lüte het üs de doch no öpper bemerkt u mir hei üs chönne i üses gmüetleche Zimmerli iquatiere, yeah!

No schnäu bim nächschte chline Beizli mit de asiatische, gar nüt änglischsprächende Servierer verbi, tüchtig ga penne u itz isches sowyt, mir si ungerwäx richtig Kolosseum! Scho aus chline Gof hani das Ding ja immer mau wöue gseh. Drum hani mrs itz äxtra ganz hässlech vorgschteut, dass i de nid plötzlech enttüüscht bi. Aber i bis nid gsi, das Ding isch ja würklech riesig, u we me sich vorsteut, was dert inne aube isch abgange gits grad e chli Hüehnerhut. Trotz de vile Touris wo drin umechlätere. U Vreni u Housi si grad zu Gladiatore worde.

Üses Billet hät o no für ds Forum Romanum u ds Palatino goute, aber das hei mr üs füre nächscht Tag gspart. Derfür si mr mau no wyter am Touri-Pfad entlang, bis mr plötzlech si bim Fontana di Trevi acho u langsam würklech Durscht hei becho. Si hei ja gäbegi Priise dert z Rom, drum hei mr üs o äxtra es Beizli gsuecht, wo nid grad direkt am Touriplatz isch. Aber äuä haut glich nid gnue wyt wäg. Hei mr auso für zwöi 4dl-Bier, drü Schibe Schinke u drü Stück Melone grad hurti 20 Euro la liege. Gschider mau furt vo hie, a de spanische Träppe vrbi (hei nid grad interessant usgseh) ab uf d Metro u eis vor üsere Station use, zum no chli ga umeluege. Dert no bim ne Beizli zuche, wo ds Bier grad mau 1.50 het koschtet, u när si mr so uf dr Schnurre gsi, dass mr nümme Lust uf die Pizzeria dert hei gha. Stadt desse hei mr üs bim Take Away öppis ghout, im Gärtli vom Hotel verspiese u am 9 scho fasch am penne gsi. U wo mr am Morge zerschte Mau uf d Uhr luege isch tatsächlech scho 10i vrbi! Hei äuä scho chli Erholig nötig gha...

Dä Tag isch ja o nid grad erhousam verplanet gsi, auso hei mr üs entschiede, zersch no chli Siesta z mache bevor mr üs ds Forum gö ga aluege. Leider hei mr üs när chli verrächnet, hei zviu Zyt im nid so interessante Forum verbracht u ds Palatino no nid zur Häufti gseh, wo sie dert scho hei zue gmacht. Auso hei mr üs wieder uf Wanderschaft gmacht. Dasmau uf die angeri Site vom Tiber, zwüsch die härzige aute Hüsli, u wieder e sinnlos übertüüreti Beiz gfunge. Aber die drü Ravioli si no fein gsi...

Auso wyter spaziere wieder über d Brügg, a diverse hübsche Plätzli entlang, aber irgendwie isch das geng no die Gägend, wo mr scho am Tag vorher si gsi, Fontana di Trevi chunt scho bau wieder id Nächi u d Priise wärde definitiv nid chliner. Aber ds Pantheon wei mr doch no go luege, sig schiins schön ir Nacht. U würklech, dä Platz gseht ganz gmüetlech us u das einte Beizli dert het sogar mau nätti Bedienig u macht nid so ne bönzlige Iidruck. Nume leider hei mr nid zum Vorus nachem Priis gfragt, u es isch grad so gmüetlech gsi, u es hett o geng no feini Knaberlis gä, ha sogar mau grossi grüeni Olive probiert, u am Schluss hei mr fasch 50 Euro dert la liege. Tja...

Aber itz sötte mr äuä mau uf d U-Bahn. We da nume nid dä Bangladeshi wär, wo die gliche komische Lüchtflügerlis verchouft wie ar Khao San, no gärn chli brichtet u üses letschte Münz für 2 so Flügerlis bechunt. Di Metros fahre nämlech nume bis am haubi 12i, mir chöme ganz churz vorher bir Station a u chöi ohni Münz kes Billet löse u scho gspliesse si dr Wäg zur Bahn ab, yeah! Kes Problem, si ja nume öppe 3km vom Hotel entfernt, tanke mr haut no mit em auerletschte Gäud u mache üs uf zu üsere letschte Hotelnacht vo dere Reis. U näben Hotel gits sogar no so e riese Outomat, wo me o no z Nacht am zwöi öppis für d Nacht cha use la. Auso no es Bettmümpfeli, müesse ja ersch am 12i ustschegge.

Oder de o nid, scho am 10i chlopfets nämlech ar Türe, hei aber gmeint, die wöi eifach nume cho putze. Woni aber mau nach de 11i am dusche bi gsi, chlopfets dasmau würklech sträng u es steut sich use, dass mr scho lang wäg sötte si, Check Out Time am 10i u am 12i chöme die nächschte Gäscht. Immerhin dörfe mr no chli im Gärtli blibe hocke, wüsse ja gar nid rächt was mr itz no wei mache bis am Abe am 11i dr Zug fahrt.

No mau e Pizza vom Take Away für is Gärtli u früsch gstärcht hei mr üs mau ufe Wäg gmacht: i Bahnhof ga ds Gepäck Isteue (cheibe tür wieder mau!) u när dr letscht Spaziergang dürd Stadt bim Vatikan afa. Dert hei mr aber zersch no mau es o nid biuigs Restaurant ufgsuecht, Zyt gsi für nes Kafi u es Dessert (leckeri Panna Cotta u leider uftouets Tiramisu) u zum erste Mau sit mr z Italie si acho es Klo mit WC-Ring! Abgseh natürlech u zum Glück vo üsem Hotel...

So, itz aber los zum Papa sim Ländle, mau ga Schwyzer Garde luege u ufem Platz vom St. Peters Dom umehüschtere. No gross, ok, itz hei mr dä ömu o gseh. U üs no überleit ob mr äch mau no e Charte usem Vatikan söu schribe. Die Post dert isch äuä dr bescht Wäg wo sie hei, zum de asiatische Tourischte ds Gäud us dr Täsche z zieh. Weiss nid ob die so uf Papstbiudli stöh...

U itz, was mache mr? Eifach mau wyter loufe, bis mr irgendwenn mau wieder zure Metro Station chöme. U natürlech wieder bi au dene türe Plätz vrbi. Dasmau hei mr se aber links la liege u si mau zum Bahnhof zrügg. Dert ir Umgäbig hei mr o tatsächlech e Inder gfunge, wo me het chönne zahle. Drfür isch o ds Tikka Masala überhoupt nid fein u ds WC ds hässlechste sit langem gsi. Trotzdäm hei mrs dert no gmüetlech gha u interessanti Lüt chönne beobachte u si blibe bis es Zyt isch gsi, ds Gepäck ga z hole.

No di letschte Minute z tot schla bis dr Zug mau chunt, scho gäbig früecher aus er fahrt, mau ds Plätzli ga sueche, isch sogar no frei gsi u ändlech mau abliege, herrlech. Di angere zwe i üsem Abteil hei äuä o e stränge Tag gha, si ömu beid grad häregläge, dr eint sogar mitsamt de Schueh. Isch für mi e gäbegi Nacht gsi, we o nid so läng, aber scho mächtig weniger houprig u lärmig aus i de asiatische Züg. Dr Role het leider nid eso chönne penne, sis Bett sig z hert gsi, das isch süsch eigentlech aube mis Problem. So oder so si mr natürlech beidi nid bsunders usgschlafe gsi, wo Milano scho ganz nöch isch gsi u mr zwar e schöne Sunneufgang aber o ganz vernäbleti Landschaft hei gseh. Brrrr! U schwupps, hets scho gheisse „Milano Centrale", usstige u mau luege, wie mi hie no die paar Stung bis zum nächschte Zug hinger sich bringt.

Auso wieder die tüüri Gepäckufbewahrig ga sueche, ds Billet für uf Bärn ga hole (reserviert ischs ja scho gsi), eis käfele, chli ume Bahnhof umestriiche, u itz geits eifach geng no viu zlang. Aber wenigstens wirds langsam wärmer. Trotzdäm isch di Umgäbig vo däm Bahnhof itz nid grad bsunders interessant u vor de Nüni het öppe eh no nüt offe. Aber nachem ne chline Spaziergang richtig Zäntrum hei mr doch no es Kafi gfunge wo d Sunne het häre gschune u dert vor dran hei si sogar no e Fium dräiht. So ischs glich nid auzu längwilig gsi u bis mir wieder si zrüg gloffe, ds Gepäck hei ghout, es Zmittag organisert u no di letschte Euro verbrate isch doch scho üse Zug dert gstange.

U de simer igstige, mau los, langsam wirds högriger, z Domodossola müesse mr nomau fasch e Haubstung ufe Gägeverchehr warte (u am Role hets gfaue, Domodossola het so vili o...), wyter, no meh Höger, Schnee (!!!), mau düre Tunnu u scho si mr z Brig! Itz wärs auso so wyt, ds Schwyz het üs wieder... U dr Räscht vom Wäg isch bekannt, chli Wallis, chli Tunnu, Thunersee, u irgenwenn steit de dert „Nächster Halt Bern". No bevor mr si usgstige hani müesse feschtsteue, dass d Bärner o nid gschider si aus d Römer, die stige o scho mitsamt Gepäck, Ski u was weiss ig aus mau i, obschon si genau gseh, dass ig dert mit mim Gepäck no gärn möcht usstige. He nu...

Drfür isch üs när d Familie Zwahle cho abhole. Mit ihne eis ga zie, chunt eim gar nid vor aus hät me so lang nüm gseh. Denn mau uf Buchsi u bi mine Eutere uf dr Terasse höckle u scho fasch sich afa frage, ob mr überhoupt wäg si gsi. Oder äch nume es Wücheli z Italie? Wos aber dä fein Härdöpfustock mit däm herrleche Ragu u auem drum u dra het gä, da hani scho gmerkt, dass das scho chli länger här isch. Mmmmh, ässe cha so schöööön si!

Vo Buchsi hei isch eigentlech o nüt bsungrigs. Wabere gseht o gröschteteils no glich us. Aber ds ganz komische Gfüuh chunt ersch, we när d Wohnigstür ufgeit us dinne schmöckt wie ire Feriewohnig. U o fasch so usgseht, viu persönlechi Sache vo üs hets ja nüm umegha. Wohne mir hie? U überhoupt, wie geit das eigentlech, nöime wohne? Auso für meh aus es paar Täg? Aber zum Glück hei mr sehr liebi Ungermieter gha, die hei üs sogar no e Fläsche Prosecco i Chüeuschrank ta. Dä hei mr scho no chönne bruche, zum wieder chli azgwöhne u dass mr när zum erschte mau sit genau 6 Monät wieder i üsere eigete Wohnig hei chönne ischlafe. Damit mr de o fit si für am nächschte Tag a YB-Match...

Itz hei mr ja afa mau no chli Zyt zum üs wieder agwöhne. Bis mr mau au üsi Sache ir Wohnig binang hei wird scho vei e Büez si. Und denn no dr schöner Teu: au die Lütli wieder zgseh. Chli hei mr ja scho chönne afa. U usserdäm ganz viu Sofasurfe u feini Sache ässe. Mau luege wie viu schwärer dass i de bi, vom heicho bis zum afa schaffe. Ou ja schaffe, weiss i äch no wie das geit? Muess mr äuä de gli afa überlege, wenn u wo mr di nächschte Ferie chöi plane...