11-13.03.2013 San Francisco

Pechstränne god wiiter. Am 11 März hämmer welle wiiterfahre aber leider hed eus en Platte drah ghenderet. Med hilf vo de RV Platzmitarbeiter hämmeren wenigstens mol no chöne voll pumpe und los fahre. Mer send ebe los well be de Garage (grad nebedrah) wo Pneu wechsled, für s`fliecket extrem lang heded müesse warte. So semmer eifach medmneh kaputte Rad los. Das esch eigentlech no guet gange und d Luft hed sozäge gebt. Ziel esch gsi weder as Meer. Dasch vo Las Vegas her schon no es rechts Stuck zum fahre. Dor sehr trochni Landschaft dure semmer im Barstow go tanke, pumpe und ichaufe. Wommer wiiter händ welle esch de Charre nüm agsprunge weller kei Saft meh gah hed vo de Batterie. Bemne Auto send eigentlech 4 Sache sehr wichtig zum fahre: Motor, Rad, Batterie und Fahrgestell. 3 vo 4 Teilis send eus scho kaputt gange und händ velli velli Nerve und Ziit kostet. Med vell Überbrükigsversuech semmer den doch no einisch wegscho. Zobig semmer den in Santa Barbara a cho, nachere fahrt med vellne Stopps a Tankstelle zum pumpe. In Santa Barbara hämmer e Nacht übernachtet und send am nächst Tag los zuner Garage wo eus s Ersatzrad druftah hed. Jetzt fahremer eifach med em Risiko dasmer keis Ersatzrad meh händ well s kaputte Rad hedmer ned chöne flicke. So semmer los gfahre de Westküste deruf rechtig Norde. Die ganz Strecki bis nach Big Sur uf de Highway 1. Das esch en mega schöne Streckeabschnitt gsi. Bis jetzt de zweit schönsti woni uf minere Reis gfahre bin nach de Westküste vo de Südinsle Neuseelands. Kurve um Kurve hämmer en super Ussblick gnosse. Leider es emmer weder Neblig gsi und mer hed ned emmer as Meer abegseh. Be höher glägni Streckepünkt hämmer defür en super Blick ufs Nebelmeer gha medmneh Sunneuntergang im Hintergrund. In Big Sur acho und ded de Platz bezoge hämmer eus es guets Füür gmacht und deräkt amne Fluss es Steak grilliert. Dasch en rächt schöne Campingplatz gsi zmitzt i de Redwood Bäum ene. Am nächste Morge los ohni Problem chöne wiiterfahre med em Motorhome, dasch au e Seltteheim gsi, semmer dur Santa Cruz dore rechtig San Francisco gfahre. Wederum uf em Hwy 1 med mega schöni Ussblick ad Küste und s Meer. Grad nebem riisige Footballstadium vo de San Francisco 49ers hämmer s Motorhome uf em RV Platz abgstellt und send den no San Francisco chli de Promenade abgloffe. Eigentlech hämmer med de ÖV zrugg zum Motorhome welle aber de Barkeeper i de Bar womer no am Schluss gsi send, hed gmeint mer sellet umbidingt s Taxi neh well schöst hedemer kei Chleider meh oder so wemmer a chömed. Anschinend wäremmer di eizige Wiise gsi wo ded durs Viertel gange wäred ;-) Also semmer hämmer s Taxi gno und send guet a cho.