Heeeellllooo from Surfers Paradise!

Mir haend euch jo sooo viel z verzelle - sorry dass laenger kei Bricht me ko isch, aber jetzt hole mr alles noche...

Also, fange mr in Airlie Beach a bzw. bim Trip uf d Whitsundays. Mir sind ufeme tolle Katamaran, mitere agnaehme Gruppe und zwei super naette Crew Mitgleider zu de Whitsundays gfahre. Am erschte Daag haemmer scho e Wal gseh kha, natuerlich e ultimativs Erlaebnis gsi. Am nexte Morge sind mr zum beruehmt beruechtigte Whithaven Beach gfahre, wo natuerlich eifach geeenial gsi isch. Dae wissi Sand isch eifach phenomenal und mir haend doert sogar Stingrays gseh kha. Am Nomidaag haend mr denn d Chance packt und sind go tauche....was eifach waaahnsinn gsi isch! Mir sind umgaeh gsi vo de schoenschte Fisch-Schwaerm, haend e 1-Meter-Fisch choenne vo ganz nochem beobachte (e Maori Wrasse) und i ha sogar mol e Seegurke choenne alaenge... fuehlt sich ganz weich und kuschlig a... he,he. Au s Aesse isch uf unserem Schiff Adventurer super fein gsi. Wie kas au anderscht si gaell... Am nexte Morge hets leider afoh raegne und s Waetter sich nit so bombastisch gsi, aber das het uns nit dervo abghalte, trotzdaem no e Rundi go z schnorchle. Und es het sich glohnt: mr haend e Schildkrot gseh! Jupie, aendlich het d Nicole eini vo ganz nochem gseh, isch super gsi! E witere Hoehepunkt isch denn uf dr Rueckfahrt gsi: naemlich e paar Delphin wo vorem Schiff ume gumpt und gschwumme sind. Genial gsi!

Wo mr denn in Airlie Beach ako sind haemmer entschiede, no e Stueck witer z fahre, do s sowieso graegnet het. Unterwaegs haemmer denn AENDLICH die erschte Kaengerus gseh! In Marlborough haemmer schlussandlich uebernachtet und sind am nexte Daag via Rockhampton wo mr ufe Krokodil-Farm gange sind nach Miriam Valley gfahre. S Waetter immerno bewoelkt und raegnerisch - aber die Frisur haelt... nei seich, uns isches egal gsi, will mr sowieso viel haend muesse Auto fahre und d Strecki fuer sich nit wahnsinnig spannend gsi isch.

Dr next Hoehepunkt isch Harvey Bay gsi, dr Usgangspunkt fuer uf d Fraser Island. Am Fritig, 24.09. isches unsere 2-taegige Trip los gange. Unsere Guide, dr Steve het uns uf dr Insle naett willkomme gheisse und wenig spoeter sind mr scho uf de Duene gsi. Scho genial, uf dere Insle hets eigentlich nur Sand und See (100 Stueck, alli natuerlich!). Im Lake Wabby het me koenne e Schwuemmli risse, bevor mr denn witer zum wunderschoene Lake Mc Kennzy gfahre sind. Dae Strand isch scho fascht bitz mitem Strand vom Whithaven z vergliche gsi: wahnsinni wisse Sand und quasi unberuehrt. D Australier luege guet uf Ihri Natur-Schaetz. Am Nomidaag haemmer e tolli Wanderig durch dr Raegewald gmacht (dr schoenschti wo mr bishaer gmacht haend) und dr Obe haemer imene relativ grosse Resort verbrocht. Nuet speziells gsi au s Aesse nit, aber egal, d Insle sich derfuer umso schoener. Dr 2. Daag haemmer scho miteme Hoeheflug gstartet: haend e rundflug ueber d Insle gmacht. isch genial gsi! Denn sind mr zumene Art Fluss gfahre, wo me haett choenne drin schwimme, aber es isch nit so warm gsi, dorum sind die meischte eifach dure gloffe (isch nur oebbe knue-tief gsi aber herrlich!) Vomene Ussichtspunkt (Indian Head) haemmer denn Delphin, Haie und Stingrays gseh, isch e tolls Erlaebnis gsi. Am Nomidaag sind mr denn im Champagner go baade... :) Die kleine See haend Champagne Pools gheisse, will sie halt wie Champagner usgseh haend... Isch e tolle Trip gsi und mir wuerde Fraser Island jedem empfaehle!

Via Noosa (wow, mega schoene Ort mit ganz viel Villene und viel Wasser) sind mr denn nach Brisbane gfahre, wo mr dr ganz Nomidaag in dr Stadt ume daeppelet sind. Isch e agnaehmi Stadt, nit z gross und nit z klei und es het wahnsinnig viel Asiate doert, was irgendwie no sympatisch wirkt.

Dr nexti Daag wird ich denn also niiiie mehr vergaesse... mir sind ine Koala Park gange. Ooooooh isch das toll gsi, i bi natuerlich voellig usem Huesli gsi woni die viele Koalas gseh ha und haett am liebshte alli mit Heime gnoh, sooo haerzig sind die gsi. I ha denn fuer e Foeteli sogar e Koala doerfe hebe, joeeee, sooo siedig gsi. Jetzt hani e super genials Adaengge an dae Momaent, i hoff i cha euch das Fotli bald mol ufem Blogg zeige. Au Kangerus haet me dort choenne striichle, isch eifach super schoen gsi. Em Arno hets natuerlich au mega gfalle!

Nach daem Hohepunkt sind mr denn witer nach Surfers Paradise gfahre, wo mr bitz an Beach glaege sind und relaxt haend. Isch no e coole Ort do: Beach, cooli Laede und Luet us aller Waelt. Halt au viel Sprooch studaente. Zobe sind mr denn uf unsere Campingplatz gange wo mr uebernachtet haend.

Jetzt sind mr no bitz do und gniesse s Beach-Feeling, bevor mr denn am Nomidaag wieter nach Byron Bay fahre... doert gits denn au wieder Beach :) eifach cool do an dr Gold Coast... he,he.

Scho siteme Monet laufe mr usschliesslich nur mit Flip Flops ume und es fuehlt sich eifach herrlich a. Mittlerwiele sich s Waetter wieder super und mir gniesses total. Freue uns au sehr uf Sydney, wo mr oebbe am 1. Oktober warde ako. Dr Arno wird denn mi persoenliche Guide spiele, er kennt sich jo doert beschtens us.

Vieli liebi Griessli und messi fuer all euri Comments, wo mr uns immer sehr drueber freue!

Nici & Arno