Hallo mitenandr

Mir maeld uns vom Flughafe in Sydney - haues gly nach Melbourne, wo mir denne drei Mol uebernachte, bevors miteme glaine Mietauteli uf d'Great Ocean Road in Richtig Adelaide goht...

Sydney haen mer, trotz sehr maessigem Waetter, in volle Zueg gnosse. S'isch halt noch wie vor e supr-mega-affegaili Stadt hehe... und jo, s'isch herrlich gsi, widr uf Syd zruggzko. Am erschte Daag simmer in dr Region vom Bondi-Beach (bzw. -Junction) kli ummegheit. Ha dr Nici mit Lieblings-Japaner koenne zeige und mir haen doert herrlich zMittaggaesse, mhhhmmm... waehrend mym Sprochufenthalt bini doert mindischtens drei Mol in dr Wuche go zMittagaesse :) Denne simmer au no an Bondi-Beach (my damaligs Dehaim), woni eigentlich sHuesli woni gwohnt ha dr Nici ha welle zeige.... has jo no daengt gha - die alti Huette stoht nuemme, drfuer e zimlig modaerni Villa. Tja, shet sich au sunscht einigies veraendered in de letschte fuenf Joor. Am zweite Morge simmer denne nach Watsons Bay gange, vo wo me e wundrschoene Blick uf d'Stadt het, uf dr andere Sitte seht me au Manly (North Sydney) und denne notuerlich au no dr Pazifik. Am Nomidag simmer au no Manly go bsueche (zwangslaeufig, well mer doert unsere Wage, nach fascht 4000 km (!!), haen miesse zruggbringe. In Manly simmer denne grad mol zerscht in e Pub gange und haen uns zumene feine "Pint of XXXX" e bitzli dr Grand Final vo Aussi Rules (en Art Rukby) inezoge - e witzigi Sportart, wo jewils e riise Huffe vo Type (schmaechtiger als die im Rukby) staendig ummeseggle, das no ufeme runde Faeld und unwohrschinlich vieli Puenkt mache.... :)

Geschtrt simmer au no ufem Fish Marked vo Syd gsi. E herrlichi Sach. Die verkaufe vo Muschle, ueber Hummer bis zum ganze Thunfisch alles... soooo schoen und mir haen uns nid koenne verkneife uns e bitzli Sashimi zaemmezstelle und doert zverdrugge. Haen jewils e Haeppli rohe Thunfisch und Lachs (inkl. Wasabi und Soja) vrdruggt - mien wohrschinlich, wemmer zrugg sin vo dr Great Ocean Road, grad nomol doert anegoh hihi... Aber e Warnig an alli Nochahmer: bewaffnet Euch bis zu de Zeen, bevor Ihr Euri Koeschtlichkeite dusse waend verdrugge: d'Moewe sin aggressiv bis aeneuse - e Tisch naebedra haen die Sieche fascht leerpluenderet. Daene arme Keibe isch s'Sashimi fascht gaenzlich waegschnappt worde, s'sinnene nur no dAustere uebrigloh worde *g* Apropos Austere: shet e riiiiisigi Uswahl doert!! Papi, ha fescht an Di daengt :)

Naebem Bsuech vom Darling Harbour und mynere Lieblingsbar "Summit", simmer au no zweimol im Kino gsi (Salt und Inception) - s'Waetter het halt nid so mitgspielt, wie mer das aber au im Suede vo Australie erwartet haen - s'isch halt erscht Friehlig do. Zur Bar: die isch im 48. Stogg vomene runde Wolggekratzer, zmitzt in Sydney. Vo usse seht me nid, dass doert e Bar drin isch. Sisch super-elegant (mir sin kli underdressed gsi...) und si serviere sau gaili Haepplis und tolli Drinks *seufz* - und zu gueter Letscht tuet dBar inne no dreie (was me vo usse aber nid seht) - so haen mer Sydney bi Sunneuntergang und em Start vo de ganze "Liechtli-Show" erlaebt....

Ganz vergaesse: Bevor mer nach Sydney ko sin, haen mer e Halt im 70er-Joor-Kaff Nimbin gmacht, wo si uf de Strosse Space-Cakes, Cookies und Marihuana verkaufe, sisch sone Hippi-Komune, wo sich doert nidergloh het und me fuehlt sich wirglich sehr zruggversetzt. Leider, het aber au doert d'Zyt nid Halt gmacht und s'sisch sehr viel modaerner als no vor fuenf Joor... Notuerlich haen mer au no zByron Bay Halt gmacht und doert e Strand-Morge yzoge.

Vorem letschte Stop vo Sydney, in Forster, sin mer denne no in e Polizei-Kontrolle gho. Wonr mi gfrogt het, ob ich Alkohol gha heig, hani notuerlich verneint, aber hanen denne grad no gfrogt, wo denne dr neggschti Bottle-Shop isch, mir siege verzwieflet am Sueche - aer het uns denne, so hoeflich die Aussis do alli sin, ganz ruhig erklaert, wommer dae Shop finde - so sin mer denne, dank daem Schuggr, doch no zu unserem Bier ko ;)

Also, mir maelde uns bald widr und d'Foetelis folge no...

Ciaoooo