Hallo Ihr Liebe

E Momaentli isch vrgange sidaem mir uns zletscht bi Euch gmolde haen und jo, sisch widr viel gloffe :)

Abr kai Angscht, mir probiere uns kurz zfasse...: Nachem Sashimi-Traeumli am Fischmaert vo Sydney, haemmer nach Aakunft zMelbourne gfunde, dass mer uns widr mol e Stueggli Fleisch moechte goenne... Mir haen jewils e "Scotch-Fillet" bstellt (300g)... unseri Erwartige hets aber leidr, obwohls verhaeltnismaessig tuer gsi isch, nid koenne erfuelle, umso schoener isch abr dr erschti Rotwyy, sit mehr alsemen Monet gsi - e wundrvolls Troepfli Shiraz. Do mi dae so umghaue het, hani au in de vergangene Daeg ettlichi witeri Glaesli Shiraz gsuerpflet... :)

Melbourne het uns beidne sehr guet gfalle - isch viel "europaeischer" als Sydney, abr dInnestadt isch ueberraschend klei und uebersichtlich. Sgit sehr vieli glaini und stylischi Restaurants und Caffis und me het sGfuel, dass an jedem Egge e Sushi-Lade stoht. Mir haenis doert au kulturell sehr betaetigt und sin ins Immigration Museum gange. Sisch scho sehr ydruegglich wie sich das junge Multikulti-Land in daere kurze Zyt entwigglet het - ueberhaupt findis schoen seh, wie Luet vo allne Natione, Kulture und Religione im Alldag mitenandr zraecht koemme.

Ufem Victoria Marked haemmer zwei wundrschoeni, uf Liine druggti Fotis nid koenne widrstoh und haenys dae Luxus glaischtet - Mami, ha die per Seefracht an Di gschiggt.... (spoetischtens in 12 Wuche sotte si ako :) Ufem einte Foti, wo mer demnaeggscht uffelade waerde, sin die beide Bildr ersichtlich... Cool isch gsi, dass uns dr Kuenschtlr bzw Verkaeufer au verrote het, wo aer die Fotene gmacht het, so sinn mer denne notuerlich grad die Ort go bsueche.

Am glyche nObe simmr no go bowle (sin baidi katastrophal gsi - wohrschinlich isches am falsche Bierpegel glaege), go Autorenne (an so Computer) go fahre und sone Art Tischfuessball (mitere flache Schiibe) go spiele... isch supr witzig gsi - abr sin beidi kli ins Schwitze ko, wo uns die Maschine immer und immr widr dSchiibe zum witerspiele usgschpuggt het... :)

Am 7. Oggtober het denn e witers Traeumli aagfange. Mir haenys miteme neue Mietwage, emen glaine Hyundai (Getz), aka Schnaepperli, ufe Waeg zur Great Ocean Road gmacht. Bevors denne abr tatsaechlich uf die 300 km langi (vo rueckkehrende Soldate usem 2. Waeltkrieg erbauti) Kueschtestroos gange isch, haen mer in Queenscliff, emene glaine verschlofene Naesch diraeggt am Meer gmacht.

Nacheme wundrbare Spaziergang entlang dr Kueschte via emene glaine Fischrhafe, emene alte aenglische Fort und zwei Luechttuerm, haen mer uns e Aussi-Pizza goennt - e riise Teil, wo notuerlich e duenne Bode und wenig Belag kah het... hehe denkste... - mindischtens e 3.5 cm diggi Pizza isches gsi, wo abr trotzdaem irgendwie herrlich gsi isch... :)

Gstaergt miteme wundrbare English Breakfast haen mer uns am neggschte Morge ufe Waeg zu de 12 Apostels gmacht. Bevor mrs abr sowit gschafft haen, haemmer in freier Natur no duzzendi Koalas (z.T. mit Junge) uf de Baeum hoeggle gseh - richtig siessi Vichr - usserdaem haen mer uns zApollo Bay, e Fischerdorf (spezialisiert uf Lobster...), nomoll miesse staerge. Das Mol mit affegaile Tappas. Vo de 12 Apostels stoehn nur no oebbe 7 bis 8 - haen nid ganz genau gwuesst, welle vo daene usem Wasser ragende Felstuerm zuenene ghoert het und welle nid... uf all Faell hets e baar vonene putzt gha, do si halt scho Ewigkeite de Kraeft vom Meer usgsetzt sin - isch uf alli Faell e Bsuech waert gsi, do die ganzi Kueschte e atemberaubendi Kulisse bietet. Am Obe hets e Red Snapper uf fantastischem Pilav (jae, isch e bitzli griechisch aghucht gsi) gaeh - isch e einzige kulinarische Hoehepungt dae Daag gsi.

Au dr raeschtligi Waeg zwuesche dr Great Ocean Road bis zur Faehri nach Kangaroo Island (bi Cape Jervis) - vorhaer simmr im Staat Victoria gsi, drnoch im South Australia - isch traumhaft schoen und abwaegsligsrich gsi. DFahrt isch zerscht durch grieni Graslandschafte mit 100'000ge Schoef gange, denne isches in e kargeri Buschlandschaft uebergange (wo mer no Emus - oebbis zwuescheme Straus und eme Cassawary - gseh haen), denne het me sich ploetzlich in dr Toscana widrgfunde mit vielne Olivebaeum und Raebe... leidr hets uns aber zytlich nuemme glaengt e Wyyguet zbsueche....

Sisch e fantastischi Zyt gsi - dRegion koenne mer wirglich jedem empfaehle!!

E liebs Griessli und e schoens Wuchenaend,
Nici & Arno

PS: E Brichtli vo dr Nici uebr Kangaroo Island, Adelaide und Sydney folgt au grad no... :)