Hellau evryboedy!! (d.h. so quasi "hallo mitenandr" - haemmr do glehrt!! hihi..)

Mir maelde uns do us Airlie Beach, em Usgangspungt fuer unsere Sailing-Trip uf dWhitsundays. In zwei Stunde gohts los: denne simmer bis Maentig-Mittag ufeme glaine Katamoran (mit maximal 12 Schnauez) und schippere durch die schoeni Inslewaelt mitem Hoehepungt Whitehaeven Beach - Foeteli usem Paradies folge, sobald mer zrugg sin :)

Letschte Zischtig simmer ufem Great Barrier Reef go tauche - sisch e supr schoene Daag mit relativ wenig Waelle gsi, was au fuer dSicht unter Wasser raecht guet isch gsi. Mir sin insgesamt 22 Touris und ca. 10 Crew-Mitglieder uf daem Schiff gsi. Fuer dNici isches serschte Mol gsi, dass si isch go tauche und dr zweiti Tauchgang hetere glaubs au sehr guet gfalle - bim erschte isch si no soooo mit sich saelbr, em Schnuufe unter Wasser und em Luege uf dr Dive-Instructor beschaeftig gsi, dass si glaub gar kaini Fischli und Koralle gseh het - umso meh abr ebe bim zweite Dauchgang :) Als einzige "lizenzierte" Taucher an Bord, hani sPrivileg doerfe gniesse elai miteme Dive-Master go ztauche, was notuerlich ha miesse usnuetze in daem ich grad drei Tauchgaeng vo jewils ca. 40-45 Minute ha miesse unternaeh. Sisch widr e Traeumli gsi: kuum im Wasser haemmer grad e glaine Haifisch (ca. 2m) aadroffe... vo daene haemmer denne spoeter no zwei witeri gseh. Naebe Seegurge (das sin so 50cm langi Schlappschwaenz, womme in dFinger ka naeh), ganz vielne Korallene, riiise Muschle und und und... haemmer schlussaendlich au dr Nemo gfunde - guet, shet mehreri gha, abr jo, so genau naemme mers jo nid ;) Zum Abschluss sin mer denne no e bitzli go Schnochle, was ufem Great Barrier Reef eigentlich vollkomme laengt, do viel vo daem Reef kaini zwei Meter unter Wasser isch.

Am neggschte Morge bini durch dChampions League-Hymne ufgweggt worde. E Irr
(Irlaendr) usem Backbackers het am 06.40 am Morge miesse Fuessball luege und so hani mi halt zwunge gfuehlt mi zu ihm zgselle.... haen denne dr ganzi Match zwuesche Barca und Athen (5:1) zaemme gluegt... in dr Pause het sich denne au dNici zue uns
gsellt gha. Spoetr simmer nach Mareeba gfahre und vo doert zur Granit Gorge - doert simmer imene glaine Fluessli go Plantsche - dNici het doert e sehr tramatischs Erlaebnis gha - si het welle langsam ins Wasser goh und isch drbi ufem sehr rutschige Granitstei usgrutscht - ihrem Gsichtsusdrugg noch het ihres letschte Stuendli gschlage gha hihi... Das Granite Gorge isch us sehr vielne Granit-Felse bestande und isch supr cool gsi fuer e glaine Spaziergang... unterwaegs haemmer denne immer widr Wallabees gseh. Die haen eim sFuetter, womer kauft haen us dr Hand gfraesse - super siess die Fiecher :) Ufem Waeg zrugg nach Mareebaa (bekannt fuer dKaffi-Produktion) simmer no e Kaeffeli und je e Stueck Kueche inere Kaffi Plantage go dringe - herrlich gsi! Am Obe haen mer denne bim Lake Tinaroo campt. Die Gegend koennti au in Canada si - grossi See, viel Wald und Wiese, eifach wundrschoen und e herrlichi Abkiehlig drzue!

Am Donnschtig Morge haemmer zerscht dr Figg-Baum bsuecht. Also Fig-Tree Feigen-Baum). Das Teil isch e Monschtr. Urspruenglich isches ei Baum gsi, wo denne vomene "Wuerge-Baum" quasi erdrossled worde isch. Wo daem arme Keib denne dr Saft usgange isch, ischr uf sich Nochberbaum gsuerzt, sodass sich dr Wuerge-Baum au an daem zschaffe gmacht het - am beschte chegged Ihr dFoetelis (sobald mer die haen koenne uffelade...) - isch idruegglich :) Dr raeschtlichi Daag haen mer denne mit Baedele in diverse See vrbrocht und mit dr Besichtigung vo drei Wasserfaell um Millaa Millaa umme. Drnoch simmer zum wundrschoene Mission Beach gfahre, wo mer widrum campt han. Geschtert isch denne Autofahre aagseit gsi: mir sin via Townsville (wommer je e grosse Chicken-Cesar-Salad vrdruggt haen und kli baedelet), Azr, Bowen nach Airlie Beach gfahre... alles in allem sins denne doch zwuesche 500-600 km gsi. Z.T. miehsami Kilometer, wome langsam durch Staedtli gfahre isch und denne widr so miehsahm langsam-fahrendi Gartehuesli (Camper) vornedra gha het - und mit unserem Holden (Opel) und synere supr-Beschleunigung isch halt sUeberhole nid immer ganz so eifach... tja, so simmer nach Airlie Beach tuggered und erscht um die 5i zObe ako... haen no kurz fuer dSailing-Tour ichecked uns e baar Bierli imene Bottle Shop-Drive through (jap, das gits!! :) ) kauft und denne simmer ufeme Campingplatz gmietlich go Pasta koecherle... (bim zNachtaesse het uns no e Oppossum, wo vomene Vordaechli aabeklaettered isch, ueberrascht) Im uebrige: uf daene Camping Plaetz wimmlets nur so vo spezielle Fiechr... u.a. hets unmaengene an wundrschoene Papageye + Kakadus (au do folge Foetelis).

Sodeli, das waers fuer e Momaent - mir maelde uns vorlaeufig ab *we are sailing, we are sailing....* jehaaa... :)

Nici & ich =)