Das isch dr Part 2 vo huet (vor Kangeroo Island)....

Am nexte Morge isches denn mit strahlendem Sunneshien vo Wellington (wo mr vor Kangeroo Island uebernachtet haend) an Faehr-Hafe vo Port Jervis gange. D Faehrueberfahrt nach Kangeroo Island het nur 45 Minute duurt, was mr mit YATZI spiele guet vertriebe haend... Kangeroo Island het sich vo ihrer beschte Site zeigt mit ebefalls wunderbar warmem Waetter. Haend natuerlich grad mol als erschts unseri Flip Flops montiert, ach herrlich gsi... he,he.
Denn sind mr eifach mol richtig Kingscote gfahre, das isch dr Hauptort vo dr Insle. Haend uns e haerzige Ort mit e paar Kaffis, Restaurants und e paar Laede vorgstellt, aber Kingscote het sich als raechts Kaff usegstellt... Unser Backpacker isch aber derfuer sehr gmietlich gsi und da mrs mit dr Faehri zaemme buecht haend isches sogar quasi gratis gsi... hi,hi.

Am erschte Daag haemer eifach mol bitz d Gegend erkundet und sind am 5i an kleine Hafe abe gange, um d Pelikan Fuetterig azluege. Das isch zwar raecht touristisch gsi, aber es het trotzdaem total Spass gmacht dene schoene Tier mitem riese Schnaabel bim Fraesse zuezluege. D Foeteli do derzue waerdet ihr denn spoter mol no gseh, leider laengt uns das nueme...

Am zweite Daag uf Kangeroo Island sind mr wieder bi strahlendem Sunneschyn ganz in Weschte gfahre, zum Flinders Chase Nationalpark. Dr Itritt het do 8 Dollar koschtet, aber das het sich uf alli Faell total gloohnt. Dae park isch eifach wunderschoen und s tolle dra isch au no gsi, dasses kuum Luet ume kha het. Als erschts sind mr grad emol zum Cape du Couedice gfahre, wo mr ganz viel Seeloewen gseh hand. Die sind sooo guet tarnt gsi, dass mr sie zerscht gar nit gseh haend. Aecht luschtigi Tierli.
Denn sind mr quasi zum Wohrzeiche vo Kangeroo Island gfahre (nei keini Kaengerus, vo dene haemmer leider no kei einzige gseh!!), d Remarcable Rocks. Das sind die riese Granit-Stei mit dr orange Farb. Eifach wunderschoen doerte, me haett no oebbe 100 Foeteli us allne verschiedene Blickrichtige choenne schiesse... Was mr natuerlich nit gmacht haend... :)

Witer sind mr zum Snake Trail gfahre, wo mr e 1.5 stuendigi Wanderig bi oebbe 30 Grad gmacht haend... isch phantastisch gsi, naebeme Fluss ueber stock und Stei sind mr gloffe mitem Meer wo tuerkisblau gschimmeret het als Ziel. Au doert hets wieder die orange Stei kha, eifach nit so gross wie die andere. Isch halt scho wieder e ideals Foti-Sujet worde.... (Foti folge au do spoeter).

Liecht ueberhitz sind mr denne zum Koala Walk gange, wo mr d Koalas in de Bauum sind go sueche. Isch natuerlich wieder super haerzig gsi und ich (Nici) bi wieder fascht nuem loos ko vo dene Viecher...

Bi Vivonne Bay haemmer denn e richtig klises Abentuer unternoh: sind go Kajake. Fuer mi isches s erscht Mol gsi und i ha bitz Schiss kha dassi wuerd ufd sitte umkippe, aber i has trotzdaem gwoogt und nach de erschte paar Sekunde Unsicherheit isches denn aber sehr guet gange. Binere tolle Oobestimmig sind mr also dr River duruff (kei starki Stroemig gsi natuerlich) paddlet und nach bitz mehr als 2 km wieder umtreit und Flussabwarts paddlet. Isch e unvergaesslichs Erlaebnis gsi und het aecht Spass gmacht.

Spoeter sind mr denn no zu dr Little Sahara gfahre. Die muess me unbedingt gseh ha wenn me uf Kangeroo Island goht! I ha mr die jo ebe logischerwies klei vorgstellt, aber es isch e raecht grossi Duene-Wueschti-Landschaft gsi mit wunderschoenem wisse Sand. Vonere Duene haend mr denn e schoeni Ussicht uf die grueni Umgaebig gnosse. Isch super gsi!

Als kroenende Abschluss vo daem ultimativ wunderbare Daag haemmer denn im Seafood Lade in Kingscote Fish & Chips und frittierti Prawns zum Znacht kauft. Mhhhh.... sooo fein gsi! :)
Dae Daag haemmer vollkomme usgnutzt und es isch eifach e herrliche Daag gsi!...

Am nexte Morge nachem lange Usschloofe sind mr zruck Richtig Faehr-Hafe gfahre und haend (nachdaems ufghoert het raegne...) beschlosse, dr Iron Walk entlang z laufe. Nach de erschte paar Schritt schreit dr Arno ploetzlich: Oh lueg emol doert.... S Kaengeru wo er gseh het isch natuerlich grad dervo ghuepft bi sinere licht luute Stimm... he,he. Zwei liesligi Schritt witers haemmer denn e paar Kangeruus gsichtet kha, jupie, aendlich! Haend scho Angscht kha, dass mr uf Kangeroo Island keini Kaengerus gseh warde... waer jo voll schraeg gsi irgendwie... hi,hi.

Witer unde haemmer denn ufeme Faeld oebbe 50 Kangeruus gsichtet kha, soooo cool! Und links im Meer sind no oebbe 10 Delphin gsi... Wow, dae Walk het sich total glohnt wuerdi sage :)

Bim Faehrhafe vo Penneshaw haemmer denn in unserer Art Gluecks-Euphorie no gmeint kha, dass mr sogar no Pinguin gseh haend... Aber die haend sich denn als normali Voegel usegstellt... he,he, me muess jo nit immer alles gseh ha gaell...

Also Kangeroo Island isch wunderbar gsi und het sich uf alli Faell glohnt (obwohl d Ueberfahrt so tuuer gsi isch!) Mir haend natuerlich au Glueck kha mitem Waetter, was natuerlich immer no viel usmacht.

Gluecklich und zfriede sind mr denn wenig spoeter mit dr Faehri wieder zur grosse Insle und witers bis nach Adelaide gfahre.

Adelaide haemmer am nexte Morge denn bitz erkundet kha, aber haend muesse feschtstelle, dasses usser paar schoene Huueser kei sehr sehenswaerti Stadt isch...

Zobe sind mr denn nach Sydney zruck gflooge, wo mr no 2 Naecht verbroocht haend. Sind nomol zum Darling Harbour gloffe (uebrigens bi unerwartetem Sunneschien, jupie), haend d Opera vo nochem agluegt (isch jo nit aaaallzu schoen vo nochem...), sind in wunderschoene Botanische Garte und haend Zobe nomol Sushis gnosse... Isch e tolle Abschluss gsi do in Sydney und jetzt freue mr uns uf Bangkok. Waerde jetzt no bitz in dr Stadt ume laufe und am 6i Zobe fliege mr nach Bangkok. Jupieeee!

Mir maelde uns an dere Stell mol fuer oebbe 3 Wuche ab, do mr am 17.10. nach Myanmar warde fliege und doert bitz mehr wie 2 Wuche waerde si.... Naehme nit a, dass mr zu Internet-Aschluss wie au Natel-Netz koemme.
Wuensche euch e tolli Zit und mir maelde uns denn eifach so rasch wie moeglich wieder...

Ganz viel liebi Griess (no us Australie) und adios...

PS: dr Arno het no e Blogg gschriebe wo vor daem vo Kangeroo Island kunnt... Nit dass ihr ihn ueberseh haend oder so...