Weiter geht's, mir si öpe 1.5h vo Bangkok nach Koh Samui gfloge u si ner dert gad vom Fahrer abgholt worde für is Röstiland. Mir hei üs gad ä Wuche bi Vero & Franz Seewer iquartiert, die zwöi si vor 4 Jahr usgwanderet u hei da ihres eigete Paradies erschaffe. D Vero het vorher o ir HGC gschaffet u drum si mir sä o ga bsueche. :-)

Mir chöi z Röstiland nume witerempfähle, die zwöi maches würk super uz Ässe isch eifach yummmy! Mir hei üs sooo ufd Schwizerchuchi gfröit u hei üs gad alles inne ghoue, vo Spätzli, Rösti bis zum Raclette, einfach alles..Nyam Nyam. Z Bungalow wo mir hei ka, isch o gad ä mega Luxus gsi für üs, gägä z Chämmerli vo vorher in Bangkok u das für je nur 5 Chf, eifach top!

Es empfiehlt sech in Koh Samui ä Roller z miete, aber mir hei das gad lasyy, wüll mir üs nümme hei wölle bräche haha, die fahre nämlech zum Teil schono gäi. Mir hei z Glück ka das d' Vero u Fränä üs mit ihrne Roller hei umegfahre u schüsch wäri z Taxi also o nid all zu tür ;-)

Üser Aktivitäte uf däm Inseli:

- Lamai Beach
Am erste Tag si mir natürlech gad a Strand, so nachem Stadtläbe het das o gad müesse si. Dr Lamai Beach isch gwüss schön u es het mega viel Strandbeizli, wo me sech sehr guet cha vertööörle ;-) u ja drum si mir dert o gad mehrmals häre haha.

- Safari Tour
Mir hei ä Touri-Tagesusflug umd Insle gmacht inkl. Mittagesse u das mitemne Safarijeep für 44 Chf p.P., mir hei gwüss viel Sehenswürdigkeite gseh: Grandfather & Grandmother rocks, Mummified Monk, irgend ä Zoo, ä Wasserfall, View Point, Magic Garden und dr Big Buddha. Dr Vormittag het üs iz nid so passt, wüll mä vom einte Ort zum andere Ort ghetzt isch u vou z Touriding düre zoge het und i däm Zoo hei üs d' Tier (d' Elefante, Tiegere ud Affe) mega leid ta, wüll mir halt in Chiang Mai gseh hei, wie glücklech das sie chöi si. Dernah hei mir ner ä 4x4 Mountaintour ka bis zum View Point u dert obe hei mir ner Thaifood gässä. D' Strasse si sehr holprig gsi u mir hei darum sehr viel müesse lache, ab und zue heimer aber gwüss o schiss ka, wüll mir gmeint hei dr Wage kippets... haha. Mir hei ner geng zunenand gseit: "Ke angst mir stärbe nid, dr Fahrer wot ja o nid stärbe". Amüsant gsi, sie si natürlech de o nid gad langsam gfahre - versteit sech ;-). Üsi Müettere wäre da älwä scho nach 5 min wieder usgtiege.. haha. Mir si ner eigentlech no der ganz Nami uf so Wägli unterwegs gsi u hei sogar no Wasserschlachte mit dä andere Safarijeeps gmacht, Fun Pur gsi!

- Insle Koh Mat Sum & Koh Taen
Mir hei mit Fränä u mitemne Schwizerpäärli ä Usflug uf die zwöi Inseli gmacht. Mir si vom Röstiland mit dem Roller (z dritte höch uf 1 Roller) ca. 20 min nach Thong Krut gfahre u hei dert ner ufnes Böötli gwächslet, zersch si mir nach Koh Mat Sum gfahre u si dört ga bädele. Das isch ä ganz ä chlini Insle u es het dört nume 1 Beizli, somit sehr guet zum relaxe. Ner wos hät sölle witers gah, hei mir ä 15 Minütige Unterbruch ka, wüll üs der Motor verreckt isch, d' Thais heis ner mehrmals probiert z überbrügge u bim 3 Alouf hei sis de doch no fertig bracht. Es Spektakel gsi du :-). Ner si mir ga schnorchle, äs grosses Riff isch das gsi mit sooo vielne Fische u sogar mehreri Roche hei mir gseh, das het wälts gfägt. Zu guter Letzt si mir no in Koh Taen ga z Mittagne u hei sehr guet gspiese. Alles i allem het das 17 Chf kostet (Fränä het da Gutpreis chönne ushandle) u mir chöis aso empfähle.

- Fisherman's Village & Märit
Mir si mitem Taxi für 500 Bat = 15 Chf öpe 30 min dert häre gfahre u si ner dert zersch ga bädele. Dr Strand dert isch iz nid so der Wahnsinn gsi, aber dr Märit uz Dörfli derfür um so meh. Jede Friti hei si dört ab dä 18:00 Uhr ä riise Märit u dä isch genial gsi! Ganz kuule Streetfood u Märitständli bis zum geht nicht mehr.

- Jungle Club & Fondue
Jede Sunnti het z Röstiland zue u drum di d'Vero u Fränä mit üs ine mega kuuli Chiller-Beiz gange. Jungle Club het das gheissä u dä isch rächt wit obe u vo dert us hetme ä wunderschöne Usblick ufd Chaweng. Perfekts Ambiente! Da müesster also ga, weder eis in Koh Samui sit. Dernah si mir no zu ihne hei ufd Terasse ga aperöööle u ner hei mir no äs Fondue gno, eifach herrlech gsi! Sunday fun day :-)

Koh Samui isch rächt touristisch u drum o türer wo Chiang Mai, aber glich geng no günstig ;-). Mir hei üs ämu o hie ä Massage gönnt u die isch wunderbar gsi.

Aja u mir hei hie ä Näier gfunde resp. d' Vero het da eine gwüsst u die hei üs d Landesflaggene ad Ruckseck gnäiht für je nur 15 Chf, suberi Büez u iz gseh die Backpacks fantastisch us.

Ende gut alles gut :-)