Next Stop BALI

Mir si wieder witers u si vo Koh Samui via Singapur nach Bali greist, mir hei ca. 5,5h ka bis mir in Denpasar si acho. We mä so churz bis nach Bali het, ischme also würklech witer wäg vo Daheime =P.

Was ganz fräch isch gsi in Koh Samui vorem Abflug hets bim Gate Gratisgebäck und Kaffi gä, das hei mir bis iz also ono nie erläbt, würklech super gsi!

Bir Ireis in Bali hets viel Lüt ka, nid gad so viel wie den in Costa Rica, aber de doch de no so es paari ;-). Nach dr Gepäckusgab hei si üs schier überrumplet mit Taxi Taxi u hei üs richtig vollgstusst, das mir mit ihne fahre. Wie mir si, si mir gmüetlech zersch Mal eis ga rouke u hei online gluegt was es Taxi nach Canggu so choschtet u hei när dämensprechend gmärtet ;-). Mir hei när ä agnähme, fründleche Fahrer ka u si ca. so ä Stund gfahre (für 18 Chf).

Üses Hostel wo mir buechet hei (4 Pers pro Ruum) isch irgendwie überbuechet gsi u drum hei si üs ner ines anders Hostel ta u da si mir ner halt 8 Persone i eim Zimmer gsi. Mir hei somit chli meh Lärme ka...respektiv ab und zue isch halt eine hackedicht hei cho u isch über alles drüber gstogglet, aber sonst läuft bei uns :-). Hie in Bali isches wieder chle türer, aber o geng ono günstig - jede zahlt iz da 7 Chf pro Nacht.

Dr Ort Canggu (Tschangu usgsproche) het üs vo Afang a mega passt, äs isch sones Hippster Dörfli wo viel Sufer si, eis Restaurant kuuler wo z andere isch u es het hönne viel Strandbeizli, da weissme fasch nid wo härä ga. Ä würklech enstspannte Lifestyle isch da ume, d Stränd si eher nid so zum bade, drfür ischs ä Hotspot fürd Surfer. Mir heis meistens am Echo Beach oder
Batu Balong Beach chillet u dene Surfers zue gluegt, die heis rächt im Griff ka! Eigentlech hei mir da o wölle ga surfe aber d Wälle si geng so Gross gsi u es hetsech halt när immer öpis anders bi üs ergäh hahaha.

D Stränd si da schwarz oder dunkel grau u mir müesse sägä das het o si Scharm. Uja d' Sunneuntergäng si o hie mega schön :-).

Z kuule a Canggu isch, es het no so si eiget Zouber, es isch no nid so überboue wie Kuta oder Seminyak u mä gseht sogar no Chüeh. Äs schön ländlechs Läbe da, i paar Jahr gsehts de das sicher o anders us.

Z Nightlife isch o da sehr guet verträtte u es empfiehlt sech am Mittwuch oder am Sunnti id Old Man's z gah, das isch rächt kuul und äs isch üs vor cho wie amene Festival, vorusse u mit ganz viel Lüt.

Hie hei mir so gseit 4 Täg lang nachem Motto: Eat, sleep, beach & repeat gläbt u so läbtsechs gwüss guet ;-).

Was chöi mir da no verzelle.. D' Balinese si sehr fründlechi u agnähmi Lüt u dr Food isch o sehr fein. Nasi oder Mie Goreng isch üs also no nid verleidet.