Mir si wieder witers u si vo Chiang Mai nach Bangkok gfloge, ä gueti Stund hei mir da ka u hei je 60 Chf zahlt, chame also nüd sägä :-). Mir si ner vom Flughafe mitemne Taxi für 500 Bat (ca. 14 Chf) zum Hostel gfahre u hei öpe 45 min ka, die Stadt isch eifach riisig, 11 Mio Iwohner heigs. Eifach krass, da gseht mä also würklech alles vo arm bis rich u alls so nach ufenand und natürlech äs Verkehrschaos vom gröbschte, vo dä Abgas wöi mir da gar nid ersch afa rede.. mir verstöh ämu iz wesi albe ihri Mundschützli alege.

Usi Unterkunft het ä gueti Lag ka und isch günstig gsi (7 CHF p.P. / Nacht), aber der Platz war begrenzt, obwohl mir dr Room mit äxtra space buechet hei, hets gad glängt zum chrüzbigele hahhaha, z Bild seit de alles ;-)
Ja was sölle mir da no sägä, Bangkok het üs gfrässä, nei seich, dr Bankomat het nur Triz ihri Travelcashcard gfrässä, aber sonst hei mirs überlebt. D'Hitz (36 Grad) het üs da chli meh z schaffe gmacht, wüll mir ke Pool u nüd hei ka unds eifach abartig tüpig u heiss isch gsi. Bim umeloufe het mä scho tropfet, herrlech nid? Aber mir wei nid chlage, äs git schlimmers ;-)

Mir hei hie oso einiges unternoh, aber müesse sägä, hei oscho meh gmacht haha, hie meh derzue:

- Train & Floating - Market
Mir hei ä Tagesusflug a die beide Märite gmacht (für 17 Chf) u das isch mega kuul gsi, zersch si mir zum Trainmarket (Maeklong); ds isch ä Märit uf de Gleis u dert geit öpe all Stund ä Zug derdür u all Lüt packe ner ihres Züg zämä u we der Zug verbi isch, steit alles innert 10 Sekunde wieder. Schön hei mir zwöi das Spektakel fasch verpasst, wüll mir no ufd Wc hei müesse, aber es het üs no knapp glängt...wieder Mal typisch :-). (mir wieder haha)
Ner si mir ab a Flussmärit Damnoen Saduak u si da miteme Holzböötli derdür u die verchoufe alles dertä, vom Ässä bis zu de Hüet, würklech fräch gsi! Der nah simer no miteme Speedboat dürd Fluss Village u das isch o idrücklech gsi, wie die Lüt ufem Fluss läbä.
Das muess mä also würklech Mal gseh ha, die Bilder sprechen für sich ;-)

- MBK Shoppingcenter
Shop till you drop, Bangkok het alls, mir si iz MBK Center gange u das isch riisig gsi (8 Stöckig), mir si sogar 2x gsi u hei nid alles gseh. Mir hei dert günstig üser Handys la flicke u iz funktioniere si wieder wunderbar, d'Asiate hei das halt scho im griff :-)

- Tuk-Tuk-Fahrt
Das isch es absolut Muss in Bangkok, u mir hei das natürli gmacht, sehr äs luschtigs Erlebnis gsi!

- Khaosan Road
Am Tag isches ä gmüetichi Strass mit Märitständ u da si mir chli ga lädele u hei üs Landes-Flaggene für a üser Ruckseck kouft, iz fählt somit nume no eine wos üs de no anäiht ;-). Am Abe geit dört ner d' Poscht ab vom gröbschte u feschte chöi si also, das müesse mir sägä.

Gässe hei mir hie natürlech o wieder super, üse Favorit isch z Panag Curry, eifach lecker! Üse next Stop isch Koh Samui u mit freue üs das mir iz de wieder az Meer chöi, mir si halt scho kener Stadtmönsche ;-).