Við hjónin erum komin á næsta áfangastað, Rio de Janeiro, við strendur Brasilíu. Flugum hingað frá Buenos Aires og dveljum hér í eina viku. Við erum staðsett við strönd sem kallast Ipanema, sem er við hliðina á frægu ströndinni Copacobana.

Strax á fyrsta degi drifum við okkur á ströndina en strendur Rio de Janeiro eru þekktar fyrir að vera með þeim fallegstu í heiminum. Og það er alls engin flökkusaga. Hreinar, hvítar strendur þar sem Atlantshafið leikur um og fólk alls staðar að nýtur lífsins undir sterkri sólinni.

Í gær fórum við í skoðunarferð um borgina þar sem við m.a. fórum upp á fjallið Corcovado (710 m) en til að komast þangað upp þarf að keyra í gegnum Tijuca regnskóginn sem er stærsti regnskógur sem finna má í stórborg. Það var mjög viðeigandi að fá smá rigningu inn í regnskóginum en stórt ský umkringdi Corcovado fjallið. Efst upp á fjallinu mátti síðan sjá Jesú eða styttuna Cristo Redentor sem gnæfir yfir Rio de Janeiro. Síðar keyrðum við um borgina og sáum m.a. mjög ólíkar hliðar á borginni, t.d. stór fátækrahverfi sem eru staðsett í fjallshlíðum borgarinnar og kallast favelas. Einnig sáum við hvar karnival fer hér fram á hverju ári en það eru ein stærstu hátíðarhöldin sem fara fram hér á bæ.

Á morgun förum við upp á fjall sem heitir Sykurfjallið og þá fáum við vonandi að sjá magnað útsýni yfir þessa fallegu borg.

Ætlum að njóta lífsins hér í Rio þá daga sem við eigum eftir, baða okkur í sólinni og borða mikið af ávöxtum sem nóg er til af hér.

Þangað til næst,

Hildur og Elías