03.03.2013 Los Angeles / Hollywood

NBA - Dasch hüt uf em Programm gstande. Aber zersch beni weder früeh uf und nochli dur Hollywood Hills gloffe, jedoch han mi chli am falsche Ort gfühlt, well Sunntig am Morge frühe gsi esch und öbberall Schilder und Überwachigskameras gah hed wääg de Ibrecher. Med de Kamera uf de Siite hed das velecht chli es verdächtigs Beld geh, drum beni den gli mol weder weg gsi. Wedermol es feins Brot gässe vomne Farmersmarket woni gfunde han bem zurglaufe is Hostel. Denn hani no en spontane Skype gah wonmi mega gfreut han. Wiiter beni ufbrache und med de Metro zum Staples Center. Für 55$ hani mer es Basketball Game i dem riise Stadium gönnt. 19`000 Lüüt send ded gsi. Min Sitzplatz esch ganz i de oberst Reihe gsi aber ich han e super Sicht uf alles gah. Gspellt händ Los Angeles Clippers vs. Oklahoma City Thunder (s`Team med em Schwiizer Thabo Sefolosha). E unglaublichi Entertaiment Show s ganze Spiel dure esch bote worde. Und extrem heftig hani Spelervorstellig am Afang gfunde, Music, Laser, Liechter, Flammene, Führwerk, Speaker,…. Shows zwüsche de Pausene esch au cool gsi vom Clippers Dunk Team. Und kein Kommentar zum amerikanische Publikum die send eifach ned normal. S`Spel selber esch en Spitzekamof und bes zum Schluss spanned gsi: LA: 104 OKC: 108 Nach dem bombe Game beni den nochli dur Downtown LA gloffe und den langsam weder zrugg is Hostel.