15-17.03.2013 Vancouver

Am Morge semmer geweckt worde dur luuti Autogrüsch vom Parkplatz vom Stadium nebetra. Ferarris, Lambos,…send am umeheize gsi und händ eri PS testet. Ufbrache und dur San Francisco gfahre, über die berüehmti Golden Gate Bridge rechtig Sacramento. I de Stadt en Parkplatz gfunde semmer nochli dur Old Sacramento duregschländeret bevor mer wiiter send nach Woodland. In Woodland wohnt ebe de wo für de Dino s`Motorhome kauft hed. Uf nes feins Amerikanisches Grillznacht semmer i glade gsi und händ den uf de Strass vor em Huus im Motorhome übernachtet. Am 16 März semmer wiiter in Norde. Us Kalifornie use über Grenze nach Oregon und do hed Polizei s erste mal eus aghalte. Ich bin den schön langsam uf ziite use gfahre wos Polizeiauto hindereus afo Blinke hed. De Officer Petersen hed eus aber nüd chöne ahänke und er esch medmneh schmuntzle weder weg gfahre, well er heds nüd ganz chöne fasse das s Motorhome im Dino ghört. Wiiter rechtig Norde und emmer höcher ufe semmer cho. Die Familie vo Woodland hed eus no en See vorgschlage zum aluege. De seg extrem schön, so semmer den au ab em Hwy und uf de Nebestrass zum Crater Lake gfahre. Es esch emmer chälter worde und de Schnee näb de Strasse hed sich immer höcher afo türme. Eigentlech hedmer chöne um de Lake umefahre aber es esch zurecht gsperrt gsi. Well es esch recht Näblig gsi und de Schnee hed au igsetzt. Also Strass esch wiis gsi. Es hed sich agfüllt wie so imnen chline Blizzard. Mer hed dementsprechend leider au nüd gseh vom See und so semmer schön langsam weder wiiter und zrugg zum Freeway rechtig Norde. Dur de ganz Trip hämmer recht Ziit verlore, so semmer abwechslend bes am Morge am 2 gfahre und churz vor Seattle ufere Raststätte usegfahre zum übernachte. Am 17 März wiiter medmneh chline Seattle zwüschehalt zu de Grenze zu Kanada. Au do zum Glück ohni Problem überecho. Nächst Stadt esch Vancouver. De Dino macht do e Sprochschuel und statt benere Gastfamilie heder halt s Motorhome als Wohnig. Das hämmer ca. 6km vo Downtown ufmne schöne RV Platz med Pool, Jacuzzi, Spellruum… abgstellt. So Ended au euse Roadtrip a de Westküste well de Dino ab em 18 März Schuel hed.