Hallo Zaemme!
Mir maelde uns aendlich zrugg vo unserem Trip durch Myanmar- es isch wunderschoen gsi, aber zerscht mol alles vo vorne...

Voller Vorfreud und Spannig (mir haend jo ueberhaupt kei Ahnig kha was uns erwartet) sind mr am 17.Oktober in Yangon glandet.Nach dr Immigration, was guet verloffe isch, het uns scho dr ersch Burmes agsproche. Vo wo mr koemme und was mr so mache in Myanmar... I ha ihm erklaert, dass mr das nonig wirklich wuesse uns spontan luege. Wenig spoeter het sich denn usegstellt, dass dae sympatisch Herr vomene Reisebuero isch und uns e Reis koennt zaemme
stelle...

Nach erschter Skepsis und Zit zum ueberlege haend mr uns denn entschlosse, am nexte Daag in sis Buero z goh und tatsaechlich d Flueg und d Hotels vor z reserviere. Schliesslich haemmer jo nur 16 Daag Zit kha fuer Myanmar und
mir haend schnaell gmerkt, dasses mr relativ viel Zyt wuerde verliere, wenn mr eifach so druf los wuerde reise.

No am glieche Daag sind mr nach Heho gflooge, wo mr 4 Naecht ufem Inle See verbrocht haend. Scho uf dr Hireis per Boot zu unserem Hotel haemmer d Fischer mit ihrer typische Rudertechnik koenne beobachte (die stoehn vorne uf ihrem Nussschale-Booetli und gaebe quasi mit eim Bei a, somit haend sie beidi Aerm frei zum glychzytig koenne z fische). Mir haend Glueck kha: Zu dere Zit isch grad no e Festival gsi und so haemmer s Spektakel wo nur eimol im Joohr vorkunnt, koenne live miterlaebe. Die duen naemlich ihri 4 Buddhas per Boot taeglich ine anders Dorf fahre, do derbi waerde sie vo oebbe 30 anderne Boot begleitet, vo vorem Hauptboot mit de Buddhas fahre und do derbi lut Musik spiele und tanze. Isch total toll dass mr das haend doerfe gseh.

Unseri Reis het uns denn witer per Flug nach Mandalay gfuehrt, wo mr 3 Naecht
verbrocht haend. Mandalay isch e wahnsinnig grossi Stadt, und fuer unseri Verhaeltnis laebe doert d Bewohner raecht aermlich, aber alli koenne irgendwie ueberlaebe und haend e Taetigkeit wo sie taeglich noche goehnd. D Luet allgemein sind extrem fruendlig und laechle immr zrugg und me kunnt sich doert wie s 8. Waeltwunder vor. Me merkt scho, dass nonig so viel Tourischte in das Land koemme... Leider, denn es isch ueberhaupt nit gfoehrlich oder unsicher, im
Gegeteil!

Die nexte Daag haemmer mit tolle Usflueg verbrocht. Mir sind zunere 2 km lange alte Teakholz-Brugg gfahre, haend Tausende vo Pagodene gseh (natuerlich nit alli vo nochem oder vo inne), dr Koenigspalascht (nit so spektakulaer) und sind vielne interessante Mensche begegnet. Natuerlich haemmer au alli Arte vo Transportmittel usteschtet: vom Pick-Up ueber Velo bis zum Schiff. A propos Schiff: will die jewiels immer naebenander an Land alege, haend mir muesse durch 5 Schiff dure klaettere, bis mr denn aendlich uf unserem Schiff gsi sind. Witzigs Erlaebnis gsi!

Was d Kleidig vo de Burmes abelangt: Fraue wie au d Maenner haend e Art Rock a, was am Afang bitz ungwohnt gsi isch zum aluege fuer uns, aber scho am zweite Daag isches normal gsi und mir haend au erkennt, dasses durchus Vorteil het, denn me het immer bitz Luft zwuesche de Bei, was bi dr Hitz nit schlaecht isch... Us Respaekt haemmer au immer langi Hoose a kha und d Schultere bedeckt (obwohl d Burmese dir natuerlich nie wuerde Kleidervorschrifte ufzwinge.)

Punkto Aesse haemmer uns nur uf Vegetarisch konzentriert, will mr am erschte Obe grad emol mit Ratteschwaenz, irgendwelchne komische Eier und sunschtigs gruuseligs Zuegs konfrontiert worde sind.... Do hets uns grad bitz abgloescht, au haemmer gseh wie dr Hygiene-Standart bi dene isch (miserabel im Verglich zu uns). S Aesse liegt bi dene zum Teil tagelang ume und Fleisch oder Fisch wird uf unsuubere Unterlage gschnitte. Mir glaube, es isch die richtigi Entscheidig gsi, denn mir haend bis jetzt no keini Schissereie kha :) S vegetarische Aesse isch jo au sehr fein gsi, vo daem haer isches uns au nit allzu schwer gfalle (sogar au nit em Arno alias Fleischfraesser). he,he. Aber vermisse dued me natuerlich nacheme Zytli scho s einte oder andere...

Per Flug isches witer nach Bagan gange, wo mr au wieder 3 Naecht uebernachtet haend. Fuer mi persoenlich isch das eins vo de Highlights gsi: doert befinde sich naemlich Tausende vo Pagode-Ruine, was eifach wahnsinnig idruecklich gsi isch - vorallem wenn me sie no bi Sunneufgang gseht! Es isch au toll gsi, dass mr uns
endlich mol haend choenne unabhaengig fortbewege, naemlich miteme Velo! Jupie, das isch so Fun gsi. An daem Daag sind mr denn au no vonere luschtige Burmesin mit ihrer Huutcreme (Tanaka) igschmiert worde und mit ihrne Roeck igkleidet. Tanaka isch e Rinde, wo sie vom Tanaka-Baum gwuenne und vermischt mit Wasser fuehlt sich das tatsaechlich sehr erfrueschend a uf dr Huut. Dorum seht me au alli Fraue (maenglisch au Maenner) mit dere Tanaka im Gsicht (fuer mi isch das au immer e tolls Foti-Sujet gsi, wills eifach so spannend usgseht.)

E witers Highlight isch denn no Mount Popa gsi, wo sich 1.5 h entfaernt vo Bagan befindet. Das isch e Tempelalag, wo sich hoch obe ufeme Baerg befindet - sehr idruecklich und zum Glueck nit allzu astraengend zum beklimme. Was au no speziell isch: me wird vo Tausende vo Affe begleitet, wo im und um dae Tempel laebe.... Naja, i ha mi Spend dorum au em Putzmaa geh, denn ohni ihn haett me nit allzu luscht die viele Stuefene ufe z laufe, barfuess verstoht sich... :)

Zmittst ufeme Tempel in Bagan haemmer uebrigens no e Russ kenneglernt (vo St.Petersburg), wo mr denn spoeter nomol atroffe haend und denn spontan zaemem sind neume go Znacht aesse. Isch e coole Siech, totale Gschaeftsmaa aber wahnsinnig haerzligg. Nach oebbe 10 Bier (zaemme natuerlich, aber
manno mann ka dae trinke...) het er uns zu sich Heime in St.Petersburg iglade und mir ihn natuerlich mol zu uns nach Basel. Mir freue uns jetzt scho druf... he,he.

Als Abschluss vo unserer tolle Myanmar-Reis sind mr no fuer 4 Naecht an
Beach gflooge. I mein, schliesslich haend mir uns vo unserne Ferie muesse erhole... he,he. Ngapali Beach het dr Traum gheisse und isch eifach genial schoen gsi. Haend uns au bitz e schoeners Hotel gleischtet (oebbe umgraechnet 50.00 pro Person und Nacht!) und sind doert fascht fuer uns elleige gsi. Die nexte paar Daaeg haemmer mit Fulaenze, viel laese, suennele, aesse (vorwiegend Seafood natuerlich, dr Arno het oebbe 50 Prawns total gaesse kha) und Massagene verbrocht. Ah und ich ha natuerlich taeglich mini Rundene am Strand gmacht und do derbi nach Muschle Usschau khalte (me findet doert au wuenderschoeni...) Isch eifach herrlich gsi.

Dr Abschied isch uns dorum au raecht schwer gfalle, aber do mr uns ufs nexte Abentuer (Vietnam) gfreut haend, isches au voellig o.k. gsi.

Zeammefassend choenne mr nur vo Myanmar schwaerme und empfaehle allne so schnaell wie moeglich das Land z bereise! Es isch wuerklich no sehr urspruenglich
(wills halt ebe nonig so fortschrittlich und ryych isch) und d Burmese sind alli extremscht haerzlichi Mensche. Leider wird das Land immerno vom Militaer unterdruckt und d Wahlene vom 07. November waerde an dr noche Zuekunft
wohrschinlich au nit viel aendere... Uns hets jo ueberrascht, wie wenig me im Land s Militaer im generelle gseh oder gspuehrt het. Aber wenn me mit de Burmes ins Gsproech kunnt, merkt me sofort wie sie daenke, aber nach usse lache sie
eifach und mache halt s Beschte drus. Was sehr beidruckend isch.

Unsere Reisebuero-Typ (er heisst uebrigens Mr. Zaw) koenne mr au jedem witer empfaehle- er het sich zweimol uf unserer Reis in de Hotels erkundigt wies uns goht und uns eimol sogar bim Umstiege in Yangon abgfange und rasch zuegwinkt. Au sind mr am Schluss wieder abgholt worde vo ihm wo mr die letscht Nacht vo Myanmar nomol in Yangon verbrocht haend. Tolle Service.

Jetzt sind mr in Hanoi, was e absolut geili Stadt isch und gniesse dr Luxus (wies uns vorkunnt nach 16 Daag Myanmar)... Zum Zmittag haemmer jewiels e Taeller
Pasta gnosse... ach isch das fein gsi, mir sind fascht waeg gschmolze so guet isch das gsi... :) Morn fahre mr zur Halong Bucht, wo mr 2 Naecht an Bord vomene alte und traditionelle Schiff warde verbringe. Freue uns natuerlich wahnsinnig! Aschliessend fahre mr mitem Nachtzug (das wird glaub e witers Abentuer) und witers miteme Bus nach Sapa in d Berge waerde fahre. Maelde uns vorussichtlich erscht nach daem Trip wieder...

Sorry, isch bitz e lange Bricht worde, aber i ka mi so schlaecht kurz fasse...

Liebi Griessli usem schoene Hanoi....

Arno & Nici