Soo, bevor alles isch losgange heimer üs natürlech no ä chli müesse vorbereite, mir hei am Tag vorher in Ollantaytambo üs ä chline Hike gä vo 1.5h uner heimer müesse packe für die nägschte 4 Täg. Jede het nur 6kg dörfe ipacke (inkl. Schlafsack u Mätteli) u das hei ner üser Sherpas für üs treit. - Tag 1 Start bim 82km vom Inka Trail, d' Sunne het gschunä ud Temperature si agnähm gsi. Mir si am erste Tag ca. 5-6h gwanderet u hei Total 11km gmacht. Es isch immer chle uf u ab gange u drum ischs nid all zu sträng gsi. Füre erst Tag ischs gad tiptop gsi, schüsch häts üs äuä de scho abglöscht =P. Verpflegt simer o geng super worde, vor Vorspies bis zum Dessert uz ässä isch o geng mega fein gsi! Üser Sherpas resp. Porteres si geng der ganz Wäg vorus gsektlet u hei ner geng alles für üs vorbereiet und ufgstellt. Top Service! Übernachtet heimer im Wayllabamba Camp u das i 2er Zelt, wie früecher, köstlech gsi. - Tag 2 Am 5:00 Uhr tagwach, ke Witz! Mir hei direkt az Zelt warme Coca Tee u warms Wasser für z Gsicht z wäsche serviert übercho. Dernah hets es deftigs z Morgä gä mit Pancakes u allem u när isch üsi Wanderig scho losgange. Diesmal isches uhuere asträngend gsi, mir hei insgesamt 12km gmacht aber mit 1000m Höheunterschied. Wättertechnisch hets der ganz Tag grägnet...Die erste 4-5h isches nume bärguf gange u das mit Stägetritte, gägä Schluss simer würk schier krepiert bismer bim höchste Punkt "Dead Woman's Pass 4200 M.ü.M." si acho. Zum Glück heimer derzue geng Cocabletter kätschet drum heimer d Höchi o nid so gmerkt ;-) Obe acho heisst bekanntlech no nüt, ner ischs 2h lang bärgab gange bis zum Camp Paq Aymayu uf 3800 M.ü.M. Dert acho simer alli kaputt und nass gsi. Ir Nacht heimer sogar alles agleit womer hei derbi ka, aber hei glich sehr sehr chalt ka u gar nid guet gschlafe. Sache gits :-) -Tag 3 Z gliche Morgeritual wie am zwöite Tag, abgseh dervo dases viel chelter isch gsi, d Motivation isch aber geng no da gsi, es het drum o nüme grägnet. ;-) Am dritte Tag simer 16km gwanderet u das uf und ab u am Schluss isches ca. 3h abwärts gange, hallo gueti Chnöi xD. Der Höheunterschied isch diesmal - 1000m gsi. Zum Mittag heimer es richtigs Buffet becho + sogar ä Turte mit üsem Gruppename :-) Während der Wanderig heimer hei scho einigi Inka Ruinene, Terassene u natürlech die wunderschöne Landschaftene gseh! Es isch ä länge aber schöne Tag gsi. - Tag 4 Tagwach isch scho am 03:00 Uhr gsi, early birds würdi da mal sägä, es isch natürlech no dunkel gsi. Nachem z morgä hei all ihrer Stirnlampe gsattlet uner isches losgange. Resp. afa Mal bis zum Checkpoint, z letschte Tor vorem Hike zum Machu Picchu. Dä Checkpoint het natürlech no zue ka u mir hei ca. 1.5h dert gwartet, mir si gwüss nid die einzigä gsi, äs het mega viel Gruppene ka wo o hei gwartet, ä richtigi Schlange u das scho am Morge früeh, wies öpis gratis würd gä =P haha nei jede wot natürlech der erst ufem Berg obe si ;-) Pünktlech am 06:30 Uhr heter uftah uner heimer ändlech chönne starte, mir si die 2 Gruppe gsi u dementsprechend wit vore gsi. Die letschte 4km zum Sungate (Sungate isch dä Punkt wome scho z erste Mal ufe Machu Picchu abegseht) simer sehr schnell gloffe dasmer gwüss iz schwizä si cho. Der letscht Biz isch ä brutal steili Stägge gsi u die het üs no der Räschte gäh :-) Obe acho, isches bewölkt gsi u mä het no nid gad viel gseh.. mir hei üs gmüetlech es Sandwich ineghoue uner plötzlech hets uf tah u mä het der Machu Picchu gseh, soo geil gsi!! Richtegi Glückgfüehl nach 4 Tag wandere :-) Topp Der letscht km bis abe isch zackig gange u ner heimers ändlech gschafft ka und üser Postcharteföteli chönne mache u das ersch no bi bombewätter! Mir hei när natürlech ono ä Füehrig ka u si iz bestens informiert. Weder Frage heit nume frage... hahaa Ende gut, alles gut!