Und da warens nur noch zwei...mir si vo Kingston (via Miami) nach Puerto Rico gfloge, Karibikflüg halt, die gö iz eifach nie direkt :-). Mir si in San Juan acho u hei üs gfragt wieso das mir ke Stämpel i Pass bechöme, gschwiege ä Kontrolle bir Ireis, das hetsäch du ner schnell erklärt. Puerto Rico isch ä Freistaat vo Amerika u drum heimer d Ireis so gseit in Miami gmacht, Sache gits. Mir hei üs im Hostel Santurce in San Juan (Houptstadt) iquartiert u hei festgstellt dases da mega kuul isch, gueti Lag, super Lüt u gueti vibes u hei entschiede das mir da gad 2 Wuche bliebe u ner vo hie us Sache unternäh, d Insle heigmä i 1 Tag mitem outo umfahre, vo däm här sicher machbar ;-) Was mir hie so gmacht hei: - Condado Beach Für dases ä Stadtbeach isch, ischer rächt schön, da simer natürlech mehrmals gsi. Mir hei üs dert o im Oceano Restaurant ä Sunntigsbrunch gönnt (je 30$) u das isch der absolut Wahnsinn gsi, äs richtigs Frässerparadies! Näbebi heimer ono äs neus Hobby vo üs entdeckt, eifach id Hotels chle ad Infinity Pools ga und sä teschte, hahaha herrlech - läuft bei uns :-) - Coiffeur D Haar si o mal wieder ar Reihe gsi u äs isch üs gad öper im Hostel cho d'Haar schnide u das für 10$, openair - sehr amüsant gsi. - Graffiti Viertel Gad ir nechi vom Hostel hets äs Viertel wo voller Streetart isch u es isch rächt idrücklech gsi, richtig guet gmacht, so öpis gits ir Schwiz eifach scho o nid. - San Juan vieja Ds isch äs must see! D' Altstadt isch wunderschön, es het üs gad sofort gfalle, wieder eini wo so im Kolonialstiel isch u überall hets kuuli Beizli. Am Meer entlang simer o gloffe udert hets es paar Sehenswürdigkeite u hie heimer o dr erst Friedhof gseh wo sech am Meer befindet. - La Placita Ds isch so gseit z Partyviertel vo San Juan u dert hets öpe 23 Bars mit Livemusig ud Lüt tanze uf de Strasse, eifach ganz kuuli Atmosphäre :-) Das muess mä uf jede Fall o gseh ha. - Piñones Mir hei ä Tagesusflug mitem Nachbarspäärli gmacht u si nach Piñones gange, Piñones isch rächt kuul, ganz anders wo San Juan, kener Blöck sondern chlini Hüsli, es isch dört sehr beliebt bi de Locals. Es het überall so Frässständ und ä schöne Strand wo mä guet cha chille. (ca. 20min vo Sanj Juan entfernt) - Condado Lagoon I derä Lagunä si mer ga Stand up paddle u das 2.5h lang für je 20$. Ufem Rückwäg si mer eifach schier abe wägem Gägäwind aber äs isch ganz fräch gsi. (öpe 5min vom Hostel entfernt) - El Yunque National Forest Der Rägäwald heimer üs am letschte Tag no gä, mir hei dänkt dä müesse mir also ono gseh. Mir si chle ga hike zu dä Wasserfäll u hei d Usicht gnosse, top. D'Lüt hie si eifach super u mega fründlech, mir hei da paar sehr gueti Bekanntschafte gmacht! So das wärs öpe so :-)