So, i wotts nid zfrüeh säge, aber es gseht fasch us, aus chönnt me das Netz hie bruche. Auso chunnt itz haut grad aus, woni i de letschte Wuche ha wöue poste uf ei Brätsch, hui! Auso los geits:

25.10.11 - Savusavu

So, itz hät's zwar mau Internet, sogar chli WLAN bis uf üse Baukon (aber nume echli) u itz chani das Züg glich nid i Blog tue wüu i mis Login nüm weiss. U wenn i es Mail mit de Date bsteue chunts nie a. Mau luege wie das witer geit...

Auso hie wieder e churzi Offline-Zämefassig vo de letschte zwe Täg. Viu git's nid ds verzeue. Vorgester isch Rugby Final gsi, auso hei mir üs nachem Znacht es Plätzli ir Lobby vorem Fernseh u es Fiji Bitter (oder Biji Fitter) gsicheret. Chum si mr dert ghockt chunt e chline Giu derhär, wo is scho chli bekannt vorcho isch. U Prompt ischs dr Junior vo dere Schwyzer Family wo scho ds Suva im gliche Guesthouse isch gsi wi mir. Isch ömu e lustige u interessante Abe worde, o wenn i nid sooo viu vom Match ha mitbecho.

U am nächste Tag när vorauem mau nache schlafe u Zytumstellig ufhole. Viu meh aus Bankgschäftli erledige am Abe mau is Städtli zum Znacht hei mir nid gschaft.

Hüt hei mr dänkt, gö mau ga zmörgele. Het ja bis am 10i. Oder äch doch nume 9i? Promt hei si grad abgrumt gha wo mr si cho. U när aus no mau füre gno! När simer dert blibe hocke, het bessere Empfang vom WLAN so dass dr Role ändlech sini Fotis het chöne ufelade. U denn mau e Jass gschtartet, isch ja eh nid würklech schöns Wätter. Trotzdem hets mi irgendwenn dünkt, es wärd chli heiss vor einte Site. U tatsächlech hei mirs gschafft, üs schön eisitig azbrätle. Itz chöi mir üs mit em Vreni zämetue u i Fläckviehverband iträtte...

Dr Räscht vom Tag hei mr vorauem drmit verbracht usezfinge wie me hie wägchunt. Die Fährine fahre scho nid ganz denn, we me se würd bruche. U ihri Büros fingsch o fasch nid, vorauem wüus überhoupt ke Büros si. Die einti chönt me im somne Lade bueche, wo sie Fischereibedarf u was weiss i aus verchoufe, muesch o zersch mau unsefinge. Geit leider aber ersch am Sunnti di nächschti. Mau luege wies jetzt witer geit.

Morn hei mir üs ömu mau es Chäri organisiert. Trotz em Divali, am indische Liechterfest wo äuä nid gross öppis off het. Hüt hei si afa mau jede Menge Raggetli i d Luft gla. Oder ömu probiert. Die meiste gö öppe drü Meter ufe u pfupfe när es Liechtli use. Houptsach s macht Spass, wird sicher lustig morn...

30.10.11 - Nananu-i-ra

Mir heis auso de doch no gschafft e Fähri z bueche u si mittlerwile uf dr nächste Insle. U zwar äxtra i Norde vo Viti Levu, wüus dert schiins trochniger sig. Naja, Sunne hei mir hie o no chum gseh. Auso wieder mau chli Zyt zum schribe.

Äbe, am Divali hei mir üs es Chäri gmietet u mau ab id Pampa. Zmitts dür Vanua Levu hets e teereti Strass wo vor einte „Stadt" i di nächsti geit. Das isch ihre Highway. Dert si mr aber scho mit em Bus düre wo mr si acho, auso hei mr dänkt, näme mr die Strass wo er Ostküste entlang geit für ufe. Die isch zwar nid teeret, aber immerhin geit dert schiins e Bus düre, auso chas ja wou nid so schlimm si...

Mir hei so mit zwe bis drei Stung grächnet für ufe, bis dert wo die nächsti Major Road uf dr Charte isch gsi. U zersch si mr o no ganz guet vorwärts cho. Schöne Landschaft, ab und zue Ussicht ufs Meer u öppe au Viurtustung es hübsches Dörfli wo üs aui Dorfbewohner zuegwunke hei. D Landschaft u d Ussicht isch ou guet blibe u d Lüt hei mit dr Zyt no fasch meh gwunke. Geit äuä nid au Tag e Touri Chare dert düre. U immer wie meh hei mr o gmerkt warum. D Strass geng wie steiler, d Chempe geng wie grösser u d Zyt wo mr hei brucht vo eim Dörfli zum angere isch geng wie länger worde. U wo die drü Stung si düre gsi si mr no längstens nid obe ar Insle acho, geschwiege de ufere teerete Strass. Aber schön isches auso gsi!

Trotzdäm si mir auso no säute so froh gsi, wo mr plötzlech nach guet 6 Stung mau wieder Teer unger de Rädli hei gha. U e Tanksteu hei gseh... U irgendwenn hei mr sogar Labasa u trotz em Divali ou no öppis z Trinke u z Schnouse gfunge. U mit viu Glück sogar no dr Highway uf Savusavu.

Ja u itz mau los, scho gli wirds fister. U d Strasseverhäutnis si o ufem Highway nid die beste. Ha mau gläse, es gäbi ds Fiji Schlaglöcher, wo sech Elefante drin chön verstecke. Zum Glück si äuä die meiste Elefante grad i ihrem Loch ghocket, so nes töifs hei mr nämlech nid atroffe. Aber derfür plötzlech Näbu obe i de Höger. U zwar grad churz nach däms isch fister worde. U trotzdem no jede Menge Lüt wo am Strasserand spaziere u nid gsehsch. Irgendwenn isch dr Näbu zu Räge worde u nach öppe ere witere ändlose Stung heis mirs tatsächlech gschafft. Mir si ds Savusavu acho, grad is nächste Beizli ändlech öppis i Mage ga tue u när ab is Hotel. Eis trinke ufem Baukon hei mr grad no gschafft bevor mr si is Koma keit.

U am nächste Tag hei mir d Fähri vor am Pier gseh stah aber immer no nid gwüsst, wie me die cha bueche. Sie vor Rezeption hei nis aber zum Glück chönne Uskunft gä. Ömu so viu, dass mr ungfähr hei gwüsst, i welere Baragge dass mr nach däm Büro müesse sueche. Auso mau dr Chare ga umebringe u d Duume drücke, dass er ke Schade fingt. Dä het aber äuä eh no chli e Kater gha vom Divali u gar nid gluegt, yeah! U när mau füre zum Hafe u hinger irgend ere Schuttmuede tatsächlech so öppis wie nes Büro vo dene Blighwaters gfunge, no mau yeah!

Auso, am Abe am 8i sötts dämfau losga zrügg gäg Viti Levu. Nach däm mr das Büro hei gseh hei mir üs ja scho chli chönne dänke, was üs ufem Schiff erwartet. Ömu äuä chum e gueti Chuchi, drum no gäbig ga Wägzehrig ichoufe u uf nes paar Bierli u es feins Chickenschnitzel ga ichere, bevors los geit.

Ja äbe, rostig isches gsi das Ding. Aber zur Beruhigung hei mr vorem Istige no es Bächerli Kava übercho. Immerhin öppis, ds Schiff isch nämlech e Dryship gsi, auso nix mit Bier oder so. Aber zum Glück hei mr ja no es Fläschli Bounty Rum drbi gha. U Cola zums drin verstecke. Auso hei mr üs es gäbigs Plätzli uf Deck gsuecht, dert wos nid au zu viu Rost und Wind het gha, u um ds bessere Bett i üsere Kabine afa jasse. Leider isch ds bessere Bett o viu ds cheutere gsi u so hani am Schluss trotz em Guetnachttrünkli nid so toll gschlafe.

Bequem ischs aber gsi u am Morge hei mr öppe no Glück gha, dass si grad direkt vor üsem Fänster hei ds Rettigsboot abegla. Das hei si brucht zum d Seili a Land zieh. Für üs auso mau Zyt für uf.

Gli drufabe si mr scho im Bus ghocket u hie üs afa frage, was mr itz eigentlech vorhei. Angerhaub Stung später, wo mr ds Suva si acho, hei mr das immer no nid so genau gwüsst. Auso mau ds Gepäck päcklet u nis vor emene Lade platziert. U grad wo dr Role het wöue am Ressort uf Nananu-

i-ra alüte, het üs plötzlech eini aquatscht.

Das isch veiechli e Sach gsi när. Sie chöm vore Travelagency u sie wett üs zu ganz schöne Ferie in Fiji verhäufe. Wo mr de häre wette. Ja äbe, uf Nananu-i-ra. Auso, sie tüeg das grad für üs bueche, mir söue doch mit ihre is Büro cho u scho hett sie es Taxi aghautet. Mir hei aber i chli meh ausere Stung ufe Bus Richtig Norde wöue u sicher nid mit ines Büro, wo o immer das hätt söue si. Auso hett sie üs churzerhang dür nes paar Läde gschleipft u irgendwo im ne Beizli hinge im ne Shop absetzt u zwöi Cola ufe Tisch gsteut. So, mir söue ihre mau das Telefonnummero vo däm Ressort gä, si tüeg üs das itz organisiere. U das hett si när o gmacht. U nis o no grad die nächste Tage bis zum Abflug verplanet. Auso, denn bis denn dert, när dert, när 2 gratis Nächt in Nadi u no dr Trandfer für dert... macht 1600irgendöppis Dollar (auso öppe 800 Fräichli!). U natürlech hätte mr das o grad söue zahle. Mir loufe ja o immer mit söfu Gäud im Sack ume.

Auso hei mr gseit, sofü Chole hei mr nid u ihre Viurtustung fahrt dr Bus, mir müesse itz ga u si mau zämä Richtig Busstation. Irgendwie hett sie üs de doch d Chole für ds Resort hie abgläschelet u isch plötzlech im ne Shop verschwunde, mit irgendemne Zedu wieder cho, no mau verschwunde, i afa mau zum Bus, isch scho öppe 3vor gsi u schlussendlech mit emne Couver, emne Gutschiin fürs Resort u em ne Check füre Bsitzer dert im letschte Moment i Bus igstige.

D Fahrt isch när auso no schön gsi. D Gägend hie lat sich ja scho no gseh. Vorauem we ou ab und zue mau öpper usem Bus usstigt u me när nümme z drittehöch uf eim Bänkli muess hocke. Mit ganz viu Glück hei mr sogar die Richtigi Hautsteu gfunge zum usstige u si dert mau losgloffe Richtig Ellington Wharft (isch sogar mau agschribe gsi). U chum si mr chli glüffe gseh mir vor üs es Taxi bi ne Hus wägfahre i üsi Richtig. Er sig grad bim ässe gsi u heig üs gseh. Hei mr o nüt drgäge gha, bi dere Hitz nid mit em ganze Gepäck müesse loufe. U irgendwenn isch när sogar mau no es Böötli cho u när si mir tatsächlech nach öppe 24 Stung ungerwäx mau nöime acho.

Isch auso hübsch hie. Mir hei es nätts gäub-blaus Hüsli fasch em Strand mit Chuchi u Baukon u für nid bsunders viu Gäud. Ds Ässe isch o sehr lecker, hami scho zwöi mau überässe (kes Wunger, einisch hets es Curry mit auem drum u dra u s nächst mau Härdöpfusalat gä). Nume mit em Wätter hei mirs eifach geng no nid so. Drum hei mir gester o nid viu meh gmacht aus vorem Hüsli ghöcklet u ab u zue chli ga spaziere. Süsch isch nid dr Hufe los hie u am 10i isch eh Fürabe, denn steut dr Geni ab. U hüt hets no nid mau für ne Spaziergang glängt. Ah u d Houptbeschäftigung hie isch Mugge z tot schlah. Häts nid gloubt, aber nach däms hüt Nacht het grägnet hets gloub tatsächlich itz no meh aus gester.

Morn geits de scho wieder witer, mau uf Nadi wo mr de ire guete Wuche witerflüge Richtig Australie. De simer ömu mau um die ganzi Houptinsle ume u gö nö die berühmte Touri-Insle vor dr Westküste ga aluege. Dert sig schiins ds Klima trochniger, aber das hani o scho vo hie ghört...

Auerdings müesse mr de zersch no mit dr Chefin vo hie uf d Bank ga luege, ob dä Check deckt isch. Wär weiss, vielech isch üses schöne gäub-blaue Hüsli de doch chli tüürer aus mr hei gmeint. Mir wärde üs ömu gloub nid auzu viu Müeh gäh, die Angeri ds Nadi wieder z träffe. Dert wett si üs nämlech no dr Räscht vor Reis verchoufe. He ja, mau luege...

7.11.11 - Nadi

Üse auer letscht Tag ds Fiji :-( Si scho wieder zrügg in Nadi nachdäm mr 5 Tag uf de Mamanucas hei verbracht u morn am Morge früeh geits ab uf Brisbane. Aber mau schön aues dr Reihe nah...

Heis ja de doch no gschafft vo Nananu-i-ra wägzcho u die ganzi Sach mit em zahle chönne regle, isch aber e mega Sach gsi. Si auso am Morge mau uf u hei die einzigi sunnige Stung uf dere Insle gnosse. Wär auso scho no schön gsi mit chli schönem Wätter. Wo d Chefin mau isch cho simer mit em Böötli übere u mit em Taxi is nächste Städtli mau uf d Bank, wo si öppe e haub Stung hei brucht, dass dä Cheque nid cha iglöst wärde. No es hinuhär mit Telefon ad Fily, sie wo üs das verchouft het, u weiss nid was u am Schluss hei mir haut dr Cheque mitgnoh u ihre ds Gäud gä. Mit dr Fily hei mir üs ja sowieso am Namitag in Nadi wöue träffe.

U tatsächlech, nach ere witere schweisstribende Busfahrt, am ne Abstächer a Flughafe u em Pickup vo dert ines Hostel am New Town Beach isch d Fily tatsächlech derhär cho u het üs die Chole id Finger drückt. Gemäss ihre sig das ke Barcheque sondern das Gäud wärdi de ufs Konto vom Hotel überwiese, das göngi haut eifach geng es paar Tag u we sie hät vorher gwüsst, dass die Angeri das nid wott akzeptiere, de wär si de höchstpersönlech dert häre gfahre u hätt das greglet. Was o immer, mir hei ömu nüt verlore ussert e haub Stung ir Bank...

Ja u när wär mr da gsi, wieder mau e Ort mit durchgehend Strom u so öppis ähnlechs wie Internet. Dringend mau Zyt zum Wösche u vorauem paar Buechige mache u so. Aber a däm Tag hei mr nümme angers möge aus es paar Bierli trinke. Auso hei mr üs entschiede, no e Tag länger z blibe u am Mittwuch när mau Richtig Mamanucas ufzbräche, first stop Mana Island.

Ja u e Tag hetts när o locker brucht. Dr Campervan in Australie hei mr no relativ guet chönne bueche aber mir hei ja o no e Flug Richtig Asie müesse ha, dass mr ds Australie überhoupt ine chöme. Ha äuä öppe drü Stung gha zum dä Cheib bueche! Nach langem Hinuhär zum öppis zaubars finge hei mir üs für eine vo Melbourne uf Kuala Lumpur mit Emirates entschiede, grad es paar Tägli nach däm mir ds Melbourne müesse ds Outo abgäh. U woni ändlech aues hätt igäh gha isch er eifach bim auerletschte Schritt, er Bestätigung vor Kreditcharte, blibe hange, Buchung abgebrochen...

Auso, no mau aus vo vore, aber itz gits dä Flug plötzlech nümme, nume no Business Class. U so d*** hei mirs itz auso würklech nid! No mau aui Tage düresueche u irgendwenn usefinge, dass es nume no eine git wo ir Nacht vo Samsti uf Sunnti flügt, auso grad direkt nachdäm mr dr Camper müesse abgäh. Dämfau mau mit Air Asia probiere. U da hesch no viu länger aus bi Emirates, muesch ja no hundert Sache drzue zahle u so. Has aber o hie gschafft bis zur Kreditcharte - u o hie nid witer!!! Ja so Ferie si astränged u närveufribend...

Nachdäm o dr zwöit versuech bi Air Asia nid het klappet hei mir üs haut doch für Emirates entschiede u Flüge itz am 4. Dezember am Morge früeh uf KL. Das isch nämlech no dr einzig Flug gsi, wo's zum däm Pris het gä ud Buechig het när o tatsächlech funktioniert! Isch gloub öppe Abe am Zähni gsi u i ha nüm würklech dra gloubt...

Jitz isch aber dringend wieder mau chli Erhohlig nache gsi. Auso ab uf d Insle am nächste Tag. Wo mr z Mana si acho hets aber no grad nid so e erhousame Idruck gmacht. Di haubi Insle isch vomene japanische Nobelresort bsetzt u mit emne Zuun vor angere Häufti abtrennt. U die angeri Häufti besteut drfür i erster Linie us Baraggene, es paar dervo ghöre zu vier chlinere „Resorts" u dr Räscht zum Dörfli. U im hingerste Egge vo sore Baragge hei sie üs wöue es Zimmer gä, mit schönster Ussicht uf ne auti Muur e Meter vorem Fänster. Het ziemlech ane Knast erinneret u jede RTL-Urlaubstester hät wahrschiinlech e Härzbaragge gmacht.

Mir heinis när entschiede, e chli meh z zahle u drfür hei mr im ne angere Hus es Zimmer mit eigetem Bad u Baukönli becho. E chli luftiger zwar aber o dert hei mr fasch e Lachchrampf übercho wo mr üs hei vorgsteut, wie dr Urlaubstester mit em wisse Händschli irgendöppis alängt...

Trotzdäm hei mr die drü Tag uf Mana gnosse. Leider hets grad chli viu Seegras am Strand gha aber trotzdem het sichs herrlech la bädele i däre lauwarme Badwanne. U ds „Resort" säuber isch chli u gmüetlech gsi u es het u gueti Lüt umegha, die Agsteute u d Touris.

Am Abe hets e Cross Dressing Contest gä. Es paar vom Staff u öppe 6 Giele vo Dütschland u Frankrich hei sich i knappi Röckli quetscht u es paar agsteuti Froue si mit Bärtli u Gravatte cho u hei übere Catwalk müesse. Dr Role u i u zwo Finnine si d Jüri gsi u hei fasch id Hose gmacht vor lache!

Nachdäm hets Bula Dance gä, ou ganz lustig, vorauem we d Häufti vo de Lüt nid schnaut wies geit. Zu welere Häufti i ha ghört, chöi mr ja hie mau offe la... Da gäbs sicher o es paar lustegi Szene bi Youtube we me nach Bula Dance suecht.

U am Schluss natürlech die obligatorischi Kava Session. Isch eh immer gmüetlech, we au so im Kreisli um d Kava Schüssle hocke, mit dr Gitarre drbi, fasch wie ir Pfadi. Nume das hie äbe e Kokosschale mit „Bula Juice" dür d Rundi geit.

Uf au Fäu isch mächtig spät worde u trotz Dampfbad im Zimmer hei mir am nächste Tag no fasch zMittag verschlafe. Aber ussert umehange, bädele u am Abe chli Kava trinke chasch dert ja eh nid viu mache. U a däm Tag hei mr o überhoupt nüt meh gmacht.

Am nächste Tag isch dr Role ga touche. Müesst er jitz natürlech säuber verzeue wies gsi isch, macht er ja de vielech o mau. Uf au Fäu het dr zwe Touchgäng gha, bim erste schiins grad direkt ara Wang vom ne Riff ds Loch ab u när Wasser ir Brüue, Naseblüete u nach öppere haub Stung ke Luft meh. Dr zwöit drfür herrlech u drüviurtu Stung mit haub so viu Luftverbruch. Drfür het er sider e Druck uf de Ohre. Närvt ne zwar, isch aber uf dr nächste Insle ab und zue no vo Vorteil gsi. Aber das de später...

Zersch hei mir üs überhoupt mau no müesse entscheide, wo mr de am nächste Tag überhoupt häre wei. Dr Ravi, dr fiji-indisch Chefchoch, het üs öppis wöue bueche (würd i o wöue, wenn i 20% drvo chönt istecke u das, obschon er's eigentlech gar nid dörft, das Gschäftli möcht ja schliesslech si Chef säuber mache...) u mau es paar Prise abchegget. Leider aus e chli über üsem Budget. Aber mir hei säuber o no chli umegluegt u müesse merke, dass mr äuä nid biuiger wäg chöme. Vorauem we mr no uf nes würklech chlises Inseli wei u lieber ke so Baragge wie z Mana meh.

Auso hei mr üs für Beachcomber entschiede, obschon mr eigentlech mau hei gfunge, dass mr da äuä scho bau chli ds aut si drfür. Beachcomber isch nämlech bekannt aus Party Insle, auso Disco Feaver u bsoffnegi Teens und Twens. U äbe dr Priis. 200 Fränkli für ne Nacht im Doppuzimmer hani ja no nie nöime zaut. U nes wahnsinns Zimmer hei mr drfür nid unbedingt dörfe erwarte. Drfür isch aber drü mau Buffet am Tag u Morge- u Namitagskafi inbegriffe, ud Buffet söu schiins würklech guet si.

Auso, ab uf Beachcomber am nächste Tag. Das heisst, we de das Böötli mau chunt. Sött ja am 11i fahre. Aber hie im Ligistueu umehänge si mr is ja scho gwöhnt u uf ne Stung meh oder weniger chunts da o nüm drufah. U tatsächlech isches du öppe am haubi Eis mau losgange, so dass mr grad genau rächtzytig zum Lunch däne si acho.

U scho vo witem hei mr dr Manu u dr Andi gseh, zwe vo de Dütsche Crossdresser vo Mana wo scho ihri ersti strängi Nacht uf Beachcomber hei hinger sich gha. Am nächste Tag si o no di zwe Finnine acho, so trifft me sich wieder...

Ja u när chunt o hie wieder d Frag, wie das me dr Tag uf sore Insle vrbringt. Einisch rund um bisch ihre Viurtustung, no chli bädele, ga tüschele, Sunneungergang luege u zNacht abwarte. När faht ds Ungerhautigsprogramm a, am erste Abe mit Firedanceshow, Limbowettbewärb, o hie no mau e Bula Dance u süsch no so komischi Spieli. Bis es Zyt wird für d Disco. U hie isch när dr Punkt cho wo am Role sini verstopfte Ohre si hiufrich gsi. D Lutstärchi wär ja no gange, we di Alag nid so gschärbelet hätt. U da üs ds Bier grad nüm so het gschmeckt hei mr üs entschiede, dass me das mit em ne Bounty Rum besser cha ushaute. Oder mit zwe. Oder drei... Oder vielech doch de besser mau is Bett, das Züg isch nämlech mächtig starch!

Ömu hei mr am nächste Tag o nüm lang uf zMittag müesse warte wo mr uf si. U dr Räscht vom Tag isch düre wie gewohnt. Am Abe hets das Mau Crab Race gä. 20 Krabbe si versteigeret u när ids Renne gschickt worde. Dä wo d Siegerkrabbe het gsteigeret, het dr Erlös vor ganze Versteigerig gwunne. Mindestgebot immer 10$ u die hei zum Teu tatsächlech e Füfzger häregleit für die Fichli, je nach Name u Land wo me ne het gä. Sie wo het gwunne het für ihre gloub 11$ zaut gha.

U da mr hüt am 10i hei müesse usdschegge hets für üs de när o gli mau glängt. Gschlafe hani trotzdäm nid viu aber drfür när mau zMorgebuffet nid verpasst. U när wieder chli umehange u ufs Böötli warte. Dasmau nid ganz so lang. U ja, itz simer hie, letscht Tag in Fiji u morn Morge am 8i geits ab nach Australie...

11.11.11 - Brisbane

Auso äbe, ab nach Australie u zwar am Morge am 8i ufe Flüger. Das het gheisse bau am 5i zum Näscht us u nüm viu vo letschte Abe in Fiji gniesse. Aber mir si sowieso no gnue erholigsbedrürftig gsi vo üsne Insutrips. Isch haut o cheibe asträngend geng so nüt mache...

Dasmau hei sie zum Glück nid wieder Zyt umgsteut oder so öppis u dr Taxifahrer het gloub no nid lang gwartet wo mr si abe cho. Ja dä Taxifahrer isch ha härzig gsi. Er het eigentlech chli mit üs wöue brichte aber vor jedem Satz hets zersch mau es Zytli so chli zischet. „ffffffffffff-fff-first time in Fiji?" Arme Tropf, aber mir si eh no nid grad so gsprächig gsi.

Drfür dasmau würklech gäbig früeh gnue am Flughafe, dass mr sogar no Zyt für nes erschts Zmorge hei gha. U när hei mr mau no müesse ga poste, auso ab i Zoufreizone. Die hei üs nämlech verzeut, ds Australie chönn me Bier u Sigis nid zahle. Drum natürlech mau no so viu wie müglech mitnäh, ir Zoufreizone hei sie ja o aus grad schön i dere Grössi, dass es no ine passt. Heisst 2 250-er Stange Sigis, 2 grossi Fläsche Bounty u es Gascho Fiji-Bitter (hei dänkt das sig besser - oder ömu gschider - aus no meh Bounty...). U när mau ab i Flüger!

Dasmau hets klappet mit em Fänsterplatz u vor auem uf Neukaledonie (nime ömu ah dass es das isch gsi) hei mr feiechli hübschi Ussicht gha. Vo obe gseh si ja o cool us die Inseli. Aber süsch hei mr vier Stung lang nume Wasser gseh.

Wo mr när ds Australie si acho isch dert ersch 9i gsi. Ja genau, itz simer er Schwyz nume no 9 Stung vorus. Aber no gäbig, schliesslech hei mr no ke Ahnig gha wo mir itz da häre wei. Het am Tag vorher haut mit em Internet wieder nid so süpi funktioniert. Aber so hei mr ja no dr ganz Tag Zyt gha. We mr de überhoupt mau übere Zou chöme. Dr Role het nämlech zersch no e Fragerundi müesse über sich la erga. Anschiinend glicht er sim Passfötteli nüme so oder was. Ömu het si schiins müesse teste, ober würklech dä Zwahle sig wo nim dä Pass ghört. Er het se ömu chönne überzüge... U dr Räscht isch när gäbig gange, obschon mr no chli hei bibberet wäge de agfnange Tabakpäckli wo mr zu de neu erworbne Stange no hätte zviu gha.

U nachem dritte Zmorge im Flughafe (ds zwöite hets im Flugi gä) hei mr üs när mau für d Roma Street Station entschiede, dert hets jede Menge Backpackers rundume u mr hei o gli mau es Rümli für üs gfunge. U mit däm när o scho fasch üses ganze Tagesbudget usgäh! Läck isch das Australie teuer!!! Drum hei mir när mau no es Zmittägli gno u Znacht isch de schlussendlech nume no flüssig zue üs cho. Isch no fein das Bier hie. Aber es richtigs Znacht wär vielech doch chli günstiger gsi - u gsünger...

Eigentlech hätt mr ja no uf d Fraser Island wöue. Aber das hätt üs für 1 Nacht u zwe Täg grad locker 700 Stutz kostet. Drum hei mr üs entschiede, no e Tag länger i däm City Backpackers zblibe u mau ds Jetlag u dr Ruusch vom erste Tag uszschlafe. Mir hei ghoffet, das mr dr Camper vielech scho früecher chönnte ha u üse Ufenthaut i tüüre Zimmer z Brisbane chli chönnte verchürze. Het leider nid klappet u für no nöime angers häre am Donschti hets när o nüm würklech räntiert we mr Samschti Morge wieder müesse hie si zum dr Camper hole.

Auso hei mr wieder mau ds Internet wöue um Rat frage. U Rächnige zahle u ändlech dr Blog ufelade wär ja o scho lang Zyt. U hie gits ja gratis WLAN - theoretisch... Ds Netz chunt zwar wunderbar ine, sogar bis i üses Zimmer, nume si da ständig öppe 30 Lüt dran am suge u überhoupt mau zu re Site verbunge zwärde isch reini Glückssach. Irgendwenn isch töife Namitag gsi u mir hei geng no nüt vo dere Stadt gseh. U nid würklech öppis im Internet erledigt, abet itze...

Auso mau ab id Stadt u luege, ob me nöume öppis zaubaurs Znacht bechunt. Hei mr du o gfunge, u zwar bi irgend ere australische Burgerchetti. U süsch het di Stadt o nid würklech viu z biete. Es hübsches Spaziergängli über d Hängebrügg u när mau hei. Es längt für hüt. U wüe itz aui vom Hostel scho im Pub si gsi (het Karaokeabe gä direkt näm üsem Fänster), hani tatsächlech no es Hostel chönne bueche für am nächste Tag, am angere Ändi vor Stadt u für 20 Fränkli meh, drfür es letschts mau no mit eigetem Bad, bevor mr när 3 Wuche lang nume no üses Büsli hei u Klso u Duschine geng müesse ga sueche.

Auso simer geschter wieder mau bezyte uf, no zfriede zmörgelet u ab zum Busbahnhof. Dert chunt nämlech au Stung e Gratisbus zum Brisbane Backpacker Resort, wo mr reserviert hei. Dr jung Dütsch Fahrer vom Bus het gmeint, das sig doch ds Paradies hie u mir hei nume dänkt, dä isch sicher no nid z Fiji gsi... Aber bis itz hei mr auso no nid bereut dass mr Hostel gwächslet hei, obschon mr fasch 2 Stung hei müesse warte bis mr ändlech is Zimmer hei chönne, ds Internet hie gloub no überlaschteter isch aus däne u d Bar am 10i scho zue het. Aber ds Zimmer u dr Chueuschrank si grüümig u d Duschi herrlech!

Nachdäm mir üs hie när mau hei chönne irichte si mr mau losglüffe Richtig Innestadt. Öppe e Kilometer vo hie faht South Bank a, e riese Alag am Fluss, unger angerem mit em ere öffentleche Badi mit emne künstleche Sandstrand. Hätt üs o fasch greitz dert ine zhüpfe. Aber mir si när mau uf die angeri Site vom Fluss, wieder zmitts i Chueche, wüu dr Role het gfunge, er möcht itz mau sini Ohre la usspüele. Die si immer no zue. U ufere Gratis-Stadtcharte hei mr es Inserat vom ne Travel Medical Service gseh u hei üs mau ufe Wäg dert häre gmacht.

Nach paarmau hinuhär hei mr dä när o gfunge o scho e haub Stung später e Termin becho. Irgenwenn isch so e uraute Döktu cho, dr Role mitgno, ihm hurti id Ohre gluegt, es Rezept usgsteut u 70 Stutz ghöusche. Ja u itz het er zwöi Päckli Medis, ds erste längt für 5 Täg, das söu er uf jede Fau näh u wes denn no nid besser isch mau hinger ds nächste. Aber was das isch u wieso u warum - ke Ahnig. Het nid mau e Packigsbiilag...

He ja, mir hei üs ömu när mau langsam wieder ufe Rückwäg gmacht, dasmau di angeri Strass gno u usegfunge, dass das West End wo mr hie si no ganz es gmüetlechs Quartier isch, mit viune Beizli vo aune mügleche Nationalitäte u so. Auso si mr hurti hei ga tüschele u d Füess chli ufeha nach au dene Kilometer i de Flipflops u när mau ga luege, wo das mir üs es Znacht chöi leiste. Nid ganz eifach, hätte üs fasch füre zwöit Döner vo däm Tag entschiede u när aber ganz e gmüetleche „Healthy Burger"-Lade gfunge. U di cheibe si würklech guet gsi.

När no ine Bar wos e unfründliche Barfrou aber es gmüetlechs Plätzli im Innehof u Livemusig het gä u eigentlech hei mr am Schluss no wöue es Fürabebierli bi üsem Hostel nä. Aber äbe, no nid 10i u d Bar scho zue. Macht ja nüt, hei ja TV i üsem Zimmer u dr Role het sich när no dr ganz Alien 3 inezoge. Mi hets vorher scho verchröset u ha ändlech mau wieder herrlech pennet.

Fazit über das Australie nachem em ne guet Schlaf u em dritte Kafi: Heiss isches hie o aber süsch het mindestens Brisbane nid grad au zu viu zbiete. Jede Menge hässig dri luegendi Göre, europäischi Working Travellers grad früsch us Mamis Schos u säute mau es haub so schöns Lächle wie ds Fiji. We me üs gester hätt gfragt, ob mir itz bir nächste Glägeheit die grossi Reis dür Australie wette nachehole, hätte mir üs grad sofort statt desse für ne Südpazifikrundreis entschiede. Aber lö mir itz mau la überrasche, wo nis üses Büsli no so überau härefüehrt. Uf au Fäu freue mir üs, mau 3 Wuche nüm müesse z packe u keni Transportmittu sueche. U dr Räscht wird sich zeige...