So mau wieder Internet u itz hani sogar mini Logindate wieder. Auso mau aus inekopiere, woni i de letschte Tage ha gschriebe..

Ja u da wäre mr wieder, scho ufem nächste Inseli. Obschon das ungertribe isch, schliesslech isch Vanua Levu die zwöit gröschti Insle vo Fiji u Savusavu chöntsch sogar Städtli nenne. Aber äbe, bi ja gester no z Levuka verblibe.

Sehr viu gits nid z verzeue, mir heis seeehr gmüetlech gno derte. Viu meh gits o nid z mache... Aber gfaue hets is grad vo Afang a. I üsem Hüsli hei mr üs mau richtig chönne irichte u üs grad gfüeut wie deheim. U ds Städtli isch würklech härzig mit sine aute Hüsli u Lädeli. Chasch praktisch unger de Loube e Schoufänsterbummu mache u uf dr angere Strassesite hesch herrlechi Ussicht übers Meer. Dr Bummu isch zwar nach ungfähr 20 Schoufänster fertig aber ds Meer no lang nid! U überau wo düreloufsch grüesse di d Lüt mit emne nätte Bula! u we si grad Lust u Zyt hei (u vorauem Zyt hei si gloub jede Menge) de tüe si o no grad gärn e chli mit dr Plöiderle. Isch gloub eh ihres Lieblingshobby hie.

Ja u de si mr dert aube chli ga schöpperle, mängisch uswärts ga Znacht nä u mängisch säuber köcherlet (obschon mr nachem dritte Mau Thon-Pasta ire Wuche nüm rächt hei gwüsst was...), es Spaziergängli gmacht oder e Schwumm im Pool gno u ganz viu gmüetlech uf üsere Terasse ghöcklet, es Bula für d Lüt wo vrbi glüffe si u ne bim Plöiderle zuegluegt.

U am Friti Abe si mr i Usgang. Hinger em Restaurant wo mr hei gässe hei mr per Zuefau e Bar entdeckt. U scho dr erscht wo mr hei troffe het is unbedingt dert häre wöue mitschleipfe. Er sig nid vo hie, chunt nume ab und zue vrbi wüu er ufere Insle ir Nöchi schaffet, het 7 Jahr ds Paris gläbt u würd gärn chli französisch mit üs brichte (…!) damit er's nid verlehrt u het itz eh no grad 2 Itritte kouft woner nid brucht. Auso los! U chum simer dinne steit o scho ds erste Bier ufem Tisch. Zwe Kollege het er üs no vorgsteut, dr eint isch sit 15 Jahr Dorfpolizist z Levuka u het üs garantiert, dass mr i sim Town very save sige. Obschon i nid gloube dass er i sim Zuestand no sehr viu dr zue hätt chönne bitrage, o wenn er e idrückleche Biz Ma isch gsi...

Ja u so ischs när witergange. Dr „Franzos" het eis Bier nam angere bsteut u mir hei üs sehr viu Müeh müesse gä, o mau eis uf üsi rächne härezsteue. Anschiinend isch dert so Bruch, dass me nume ganz chlini Gläsli bechunt u grossi Fläsche bschteut u när wird eifach jedem rund ume ständig nache gfüllt. U so ändlos Bier u 1dl-Gläsli isch auso no verheerend!

U mit dr Zyt het sich sogar Tanzflächi gfüllt u es isch fei abgange i däm Club. Zum Glück hei si sich nach es paar Versüech vo üs uf em Dancefloor la überzüge, dass das nid unbedingt üsi Sterchi isch... U wos langsam heiss isch worde u mr mau a di früschi Luft si hei mr no mit em Club-Bsitzer müesse Kava trinke. Isch e lustigi Sach gsi aber o we üs es paar no mit zu ihne is Dorf oder wo o immer häre hei wöue hets när mau glängt u mir si mit em Franzos u sim Frölein mau zrügg zum Hotel.

Gschlafe hei mr ömu guet, ds Erwache isch auerdings weniger toll gsi, wie ms haut so kennt nach somne Fest... Mache mr e gmüetleche Tag im Bett u vorem Fernseh, dusse rägnets eh - übrigens ds einzige Mau bis mr wieder uf Suva zrüg si. Nume chunt üs plötzlech i Sinn, dass üs ja gester no eine het zum ne Lovo-Ässe wöue ilade, wo si dr Food im ne Loch im Bode choche. Isch öppis sehr leckers u er heit gmeint, er chäm is de mau am Namitag cho abhole. U promt rüeft plötzlech eine vor Strass us. U dr Role isch mit ihm bi üs uf ds Terässli ghocket.

Was mr äuä am Abe vorher nid ganz hei mitbecho, er het gmeint, mir söue de d Hühner fürs Lovo mitbringe. U so hei di zwe när irgendwie verhandlet, ds Lovo het me ufe nächst Tag gschobe u irgendwenn hett ihm dr Role no chli Gäud id Finger drückt dass er die Hühner cha go choufe. E chli viu zwar für nes paar Poulet... Er chöm de später am Abe wieder dass mr chöi abmache für am nächste Tag. U promt rüefts öppe am Abe am nüni wieder vor Strass.

Im erste u äutischte Club vom Südpazifik isch Party gsi a däm Abe u er hät gärn dert häre wöue. Ob mr nid mitchöme? Er het drum ke Gäud für Itritt... Dr Role het ne nume mit nom ne Batzeli chöne loswärde u drfür het er versproche, er chöm de morn mit em Lovo bi üs verbi. Haut nüt mit Dorfbsüechli, macht me nid am ne Sunnti. U drfür, wo er ändlech isch gange u dr Role dr Fium het zrügggspuelet, het das cheibe Biud nüm mit em Ton wöue zämepasse...

Aber vrbi cho ischer würklech u ds Ässe isch o Fein gsi, eifach schlussendlech e chli tüür. Da er si chli Neffe drbi het gha isch er gli wieder gschobe u am Abe wieder cho für mit üs i Usgang - Haubfinau vor Rugby WM, Australie gäg Neuseeland. Schlussändlech isch er nid mit bis i Club cho, het ungerwäx es Päckli Sigis becho u no chli Kava wöue ga trinke. U mir hei drfür e zfridni Abe gha bim Match luege u dänkt, morn chunt er ömu de nüm, muess ja schaffe am Mänti.

Het er o müesse, aber äbe nume düre Tag u am Abe, wo mir no mau dä aut Club hei wöue ga aluege isch er mit eme Kolleg mitcho u beidi hei weder Gäud no Sigis gha. Mir haut zwöi Bier u paar Gläsli bsteut, aber när hei mir würklech hei müesse u gar nüm möge - schliesslech hei mr no 2 Bierli für üs im Chüeschrank gha...

Abgseh vo däm ufdringleche Gast isch Levuka aber würklech süpi düpi gsi u mir hättes gloub o no chli länger dert usghaute. Aber es git no viu zgseh, vorauem die lengendäre Stränd u Insli u drum hei mir üs mau ufgmacht uf Leleuvia, eh chlini Insle wos nüt git aus eis Resort u ne Cannibal Pot, wo schiins früecher mau heilig sig gsi u scho diversi ufgässe si worde.

Mir hei mit dene abgmacht, dass mr am Pier ds Levuka warte u sogar pünktlech isch eso nes Nussschäli itroffe. Dr Sarro het sich üs vorgsteut u nach däm au no schnäu chli si ga ichoufe isches losgange. Auerdings söu mr de nid z viu erwarte uf dr Insle, die vorletschte zwe Gescht hei si grad äbe abglade u übrig isch nume no eine. Chönt si dass es o e Schwyzer isch aber vielech o Schwed.

U tatsächlech, d Insle fasch usgstorbe ussert es paar Agsteuti u dr Chris, e Zürcher... Auso, mau chli bädele, sünnele u em Strand entlang spaziere u am Abe ganz es lustigs festli mit Sarro u Chris. Schad isch er am nächste Tag scho wieder gange.

Aber so hei mr no ganzi 2 Nächt di Insle aus einzegi Gescht erläbt. Am zwöite Abe hei si üs fürs Znacht (Härdöpfustock - uh dr Role het Freud gha!) e Tisch am Strand deckt, mit Cherzli u Fackele u emene Lagerfüür drumume. U nachem Ässe hets näbe dran uf em ne Mätteli mit zwe vo ihne, ere Gitarre u ere Fläsche Rum aus Washdown e bündigi Kava Session gä. So steut me sich dr Südseetroum vor... Ja Chris, wärsch no e Tag lenger blibe!

Aber am dritte Tag hei mr när scho bau nüm so gwüsst was mache. Drum si mr o grad nachem Zmorge nomau ga liege u wo mr si erwachet hets scho zum Zmittag tuutet. Am Nami no chli ga kayake, sünnele, bädele, zum Cannibal Pot im Dschungu u um die ganzi Insle ume loufe u itz hei mr würklech aus gseh vo dere Insle, Zyt zum ga, o wes no so schön isch!

U so schön isches när am nächste Tag gar nüm gsi, sondern vou Wueche u ziemlech windig. Isch e lustigi Überfahrt worde mit dere Nussschale. Aber dr Godi het das guet im Griff gha, het di Wäue gsurfet wiene Grosse, o wesi öppe drü mau so höch si gsi wie mir. Eifach nass worde si mr chli. Aber was söus, mir si ja fasch wieder ds Suva u es faht sicher eh gli afa schiffe...

U när simer äbe i dere Raintree Lodge acho, würklech schön gläge zmitts im Rägewaud am ne See, aber äbe, Raintree u Rägewaud. Guet, mir si eh vorauem der häre zum mau wösche u luege, wie mr uf Savusavu chöme. Da d Fähri aber ersch morn wär gange u mir gester würklech nüm hei gwüsst was dert no mache, hei mr is entschiede, für hüt e Flug zbueche. U zwar nid direkt uf Savusavu, sondern as angere Ändi vor Insle uf Labasa, damit mr när mit em Bus chöi abefahre u no chli öppis gseh. Flugi geit 7.30, Flughafe isch ganz ir Nöchi u es isch ja de chli bi Suva wo obe scho beschriebe. Taxi am 6.15 längt auso.

U de mau früeh is Bett u Wecker steue uf 5.30. Aus tiptop bis es plötzlech a üsere Türe chlopfet. Üses Taxi wartet, es isch scho 6i gsi, si hei ir Nacht Zyt um ne Stung füregsteut!!! Wär no nätt gsi we üs das sie vor Rezeption hät gseit wo mr ds Taxi hei bsteut. He nu, dämfau usem Bett gumpe u innert 7 Minute agleit u aus packt bim Taxi stah! Immerhin hei mr so när nüme lang müesse warte bis zum Boarding u e Stung nachem Ufstah si mr tatsächlech scho im Flugi ghocket, zwe Stung später scho wieder glandet u churz druf abe im Bus für da häre.

U itz hanis tatsächlech gschafft! I bi bi itze aglangt. U Role isch o wieder wach, auso mache mir üs äuä mau ufe Wäg ga luege, was das Savusavu so zbiete het.