So, itz hei mr mittlerwile scho afa chli meh gseh u nis langsam chli versöhnt mit däm Australie. D Lüt, vorauem die jüngere, si üs zwar no nid würklech sympatischer worde u vor auem isch das Land soumässig tüür. Da chönnt me öppe gradsoguet ir Schwyz Ferie mache. Aber d Natur isch hie scho dr Hammer. We's nid grad schiffet, so wie itz. Aber das isch bis itz eher säute gsi.

Auso, vö mr mau vo vore ah, das heisst am 12.11, wo mr üs am Morge früeh ufe Wäg hei gmacht zum üses Büsli sueche. Mir hei üs ja entschiede mit em Bus zgah. Het o ganz guet klappet, ds Hostel het es gratis Chäri wo au Stung zur Bushautsteu fahrt u so si mr zum Glück meh aus gnue früeh dert gsi. Dr Bus isch nämlech promt z frühe cho. Drfür ändlos lang gfahre bis mr hei müesse umstige. U dr nächst Bus isch drfür viu zspät acho, so dass mr scho hei dänkt mir si gar nid am richtige Ort. U am Schluss si mr fasch e Stung Bus gfahre u irgendwie no überhoupt nid wyt wäg gsi vom Stadtzentrum. Aber dr Camperman hei mr drfür grad sofort gfunge. Da wärs auso gsi üses Büsli. Auso mau aus irgendwie verstoue u ab geits! D Frag isch nume wo häre. Eigentlech hätt me ja itz scho chli Zyt gha üs das z überlege, aber äbe... Auso mau ab i Norde, dr Role het ghört ds Hervey Bay sigs cool u usserdäm isch das ir zmingst ir Nöchi vo Fraser Island, we mr de dert scho nid häre gö. U wo mr üs mau für nes Ziel fürs Navi hei entschiede u nach de erste paar Schaut- u Stüürversüech isches ändlech so wyt gsi - mir si on the road u ungerwäx ad Sunshine Coast...

Zersch hei mr aber mau no chli Proviant müesse ha. Auso mau ds Navi Frage wos es Ichoufszänter het u promt het üs dä Cheib irgendwo i Bitz use gfüehrt. Irgendwo ir Nöchi hei mr aber när glich e Spar gfunge, dr Ichouf isch aber überhoupt nid sparsam gsi. Wie gseit, Australie chostet es paar Batzeli. Aber immerhin hei mr itz mau die wichtigste Sache gha für die nächsti Zyt. Sogar meh aus gnue, d Bolognaise wo mr am Abe hei gmacht hätt locker no für fasch zwe Wuche glängt. Es het de när o no vier Mau Bolo gäh...

Aber no si mr ja ungerwäx gsi, u zwar mau Richtig Meer. Ds Coloundra hei mrs zerscht mau gseh u si grad chli enttüüscht gsi. Küste wär zwar schön, mit hübsche Stränd u ab und zue mau roti Feuse, aber es hett doch grad chli gar viu Lüt. U dass sie die i dene Touri-Dörfer ir Nöchi vor Stadt au chöi ungerbringe hets meistens o jede Menge Hotelblöck. Trotzdäm hei mr jitz mau Hunger gha u üsse erscht Picnic-Stop gmacht u bi dere Glägeheit no üses Büsli uf e Name Eddy touft.

No chli witer dür Touri-Bunker u Highways u när hei mr afa mau es Plätzli fürd Nach wöue sueche und üs de für ne Campingplatz ds Maroochydore entschiede. U äbe när mau tüchtig köcherlet, ändlech mau wieder säuber gmachti Teigaffe gnosse u nachem ne chline Spaziergängli dürs scho schlafige Kaff säuber o mau ga liege.

As schlaft sech auso no gäbig im Eddy. U nachem ne gmuetleche Zmorge hei mr usegfunge, dass me o ds Gepäck u aus ganz praktisch cha verstoue. Auso los uf die zwöiti Etappe. U nach längerer Ratlosigkeit hei mr üs de mau für Hervey Bay aus Tagesziel entschiede. Für was mr aber no dert ufe hei wöue wüsse mr immer no nid so genau. U vilech isch o das dr Grund, warum mr o nüm so genau wüsse, was mr zwüsche Maroochydore u Hervey Bay so aus gmacht oder gseh hei. Wahrschiinlech nid viu Gschiids, Fötteli hei mr ömu o kes einzigs gmacht. Aber mir so ziemlech wyt gfahre a däm Tag u meistens ungerwäx gsi. Dr Küste nah ufe bis uf Noosa (o so nes hässlechs Hotelbunker-Kaff) u när wieder ufe Bruce Highway dür Maryborough bis uf Hervey Bay. U wo mr dert si acho isch scho fasch sächsi gsi, das heisst ds Queensland um die Jahreszyt scho bau Sunneungergang. U prompt hei o die erste zwe Campingplätz wo mr hei gfunge scho zue gha. Bim dritte hets när klappet, u dä isch drfür o grad direkt am Meer u zmitts im Städtli gsi.

Wo mr dert bim Chöcherle are Riesehorde Flughüng hei chönne zueluege, gäbig hei gspachtlet u bimene ne Verdouigsspaziergang ar gmüetleche „Strandpromenade" no es Possum hei atroffe, hei mr üs doch so langsam chli mit Australie versöhnt gha.

Am nächste Tag si mr när mau wieder nidsi, schliesslech si mr ja ganz i die fauschi Richtig ungerwäx gsi. Auso zrügg uf Maryborough, wo mr es Tüürli dür d Autstadt hei gmacht. Vo dert us hei mr dänkt, gö mr itz mau dr Fraser Coast entlang bis uf Tin Can Bay ga chehre. Aber statt Küste hei mr nume ändlosi Wäuder gseh, aus züchtet für Houz. So sehr het sich dä Umwäg nid glohnt. Auso mau zrügg ufe Bruce Highway. U nachdäm mr vorher scho zersch mit em ne offnige Schäftli u när mit em offnige Chüeuschrank si umgegfahre, hani zmitts ufem Highway per Zufau mau i Rückspiugu gluegt u gmerkt, dass üsi Schiebetüre uf dr Site vom Chare offe isch! Kene vo üs hets gmerkt gha u mir si scho paar Minute mit öppe 100 dürs Züg gfreeset... Verlore hei mr aber gloub nüt.

Ja u när hei mr scho bau wieder müesse pressiere, dass mr no e Campingplatz hei gfunge. Dasmau isches chli e weniger windige gsi, schliesslech nüm am Strand sondern irgendwo bim ne Kaff namens Nambour am Rand vom Waud, Rainforest hei sis gnennt. Isch auso ganz gmüetlech gsi, mit em ne lustige australische Ätti u Müeti aus Nachbare. U wüu mr am Nami ungerwäx ändlech ä aständegi Lampe für vorem Eddy hei gfunge, hei mr chönne dusse hocke u dr ganz Abe SkipBo spiele. U so isch o dr dritt Tag vo dere Tour schnäu verbi.

Tag 4 si mr aus erschts d Glasshouse Mountains ga aluege. Das si so komisch gformti vulkanischi Überblibsu u es git e herrleche Ussichtspunkt zmitts drinne. Vo dert hei mr mau wieder Richtig Brisbane müesse, wüu mr am Abe ar Gold Coast hei wöue si. Si aber nid direkt dert häre, sondern zmitts dür Pampa u när zwe riesegrosse Stousee entlang, wo anschiinend ganz Brisbane mit Wasser versorge. Rund ume isch zwar aus vertrochnet gsi aber het ganz hübsch usgseh.

Irgendwie hei mrs när o dür Brisbane düre gschafft u bis uf Surfers Paradise, wo dr Role het gmeit das müess me doch o mau gseh ha. Naja... no viu strüber aus ar Sunshine Coast si hie d Hotelblöck mächtegi Hochhüser u zwar Kilometer um Kilometer dr Küste na. U entsprächend si natürlech o d Campingplätz nid grad dr Hammer. U usgrächnet hie isch üs ds XXXX usgange u mir hei müesse uf üsi letschte Biji Fitter zrügg griife, wo mr für nes bsunders schöns Örtli hei wöue spare. Statt desse zmitts ar Houptstrass zwüsche au dene Hüttene.

U am Morge chunnt die angeri cho mäude, me müess de itz auso sofort abfahre, schliesslech sig haubi 11i u Checkout wär am 10i gsi. Jaja, no schnäu fertig abwäsche u när no so gärn wäg vo hie.

Aus erschts no mau es paar Kilometer dür d Hochhüser am Strand entlang. Mit chli Fantasie, we me sichs die viele Lüt u Hüttene wäg dänkt, wär dä äuä würklech paradiesisch, ersch rächt für d Surfer, Wäue hets nämlech gloub o nid schlächti. Da mir aber ja nid surfe, hei mr hie ds Paradies definitiv nid gfunge u üs für dä Tag Byron Bay zum Zieu gmacht, dert sigs schiins viu gmüetlecher.

Vo dr Goldcoast hei mr aber gnue gseh gha u drum si mr mau ids Hingerland abboge, Richtig Nimbim, em wahrschiinlech bekifftischte Städtli uf däm Kontinänt (gäu Nici ;-)) Isch härzig, bunt u würklech vou Hippies, aber o paar ganz kapputti Cheibe. Mir si nume mau düre gspaziert u när witer gfahre dür die hübsche Hügeli wieder Richtig Küste.

Ah und ihr Zwüschezyt hei mr übrigens Staat gwächslet, Queensland verlah u ds New South Wales acho. U de o scho gli mau ds Byron Bay. Tatsächlech isch das viu es gmüetlechers Käffli, d Hüser höchstens zwöistöckig u no grad e gäbegi Dosis Hippie-Groof. Dr Campingplatz isch zwar gäbig tüür, aber drfür fasch zmitts im Städtli gsi u so hei mr a däm Abe mau wieder chli i Usgang chönne. Vor am Strand hets e riese Bar gha mit Terasse u wo mrs üs dert gmüetlech hei gmacht, het sogar no e Band afa spiele. U när sogar no e zwöiti. Hei nis nume chli gfragt, warum di zwöiti scho am 9i het gspiut, we denn doch ersch die ersti hätt söue afa. Bis mr uf em Heiwäg när mau ere Uhr si verbi cho, wo scho e Stung später het gha aus üsi. Drum het mi mir Nadel a däm Tag ou gfragt gha, obs Zyt söu apasse. Das het gwüsst, dass si i däm Staat e Stung früecher si, mir heis mau wieder verpasst.

Für am nächste Tag wärs eigentlech no ganz guet gsi we mrs nid hätte gmerkt. De wär mr am 9i scho los wüu mr hätte gmeint es sig 10i, auso Checkout Time. Aber mir si o so scho rächt früeh ungerwäx gsi u hei üs aus erschts mau ufe Wäg zum Lüchtturm ufem Cape Byron gmacht. Obe acho het üs tatsächlech eini wöue 7 Stutz füre Parkplatz abchnöpfe. Da chere mr doch lieber um u loufe när no es Stück dr Hoger uf! U glohnt het sichs. Vo dert obe gseht me mau, wie ändlos die Stränd hie si. Nume d Bugguwale wo si au drvo hei gredt hei mr nid gseh. Drfür si bim Zmittags-Stop am ne Strand witer unge plötzlech e Horde Delfine düre gschwumme. Zmitts id Surfer ine. U mir heine sogar vom Chare us chönne zueluege.

Nach es paar hübsche Stränd u härzige Käffli hei mr aber när mau chli Gas gä, dass mr müglechst nöch zum Waterfall Way chöme, wo mr am nächste Tag hei wöue ga aluege. U so si mr am Abe ds Urunga acho, am ne Örtli zwüsche mehrere Flüss und am Meer. Grad bim Campingplatz isch e Stäg überne Kilometer am Fluss entlang bis zum Strand füre bout. U ufem Campingplatz hets mau nid nume die übleche Ibisse u Trutte gha, sondern no e Horde Chüngeli am umegumpe. Isch richtig schön gmüetlech gsi, bis es het afa schiffe. Aber ds Timing isch ganz guet gsi, es het no grad glängt für ga z zähnputze u is Bett schlüüfe bevors so richtig het losgleit. Es schlaft sech im Eddy auso o bi Räge guet.

Leider isch ds Wätter aber am nächste Tag no nid viu besser gsi, o wes grad nüm het grägnet. U mir hei ja äbe id Hügle wöue, ga Wasserfäu u Ussicht luege. Hei üs haut trotzdäm mau ufe Wäg gmacht u dr Wäg bis zum Dorigo Nationalpark, wo si e Skywalk hei, isch für sich allei scho schön gsi. Wo mr bim Park si acho hets aber prompt grad afa rägne. Hei mr üs entschiede, mau zum nächste Wasserfau zfahre u när wieder dr glich Wäg zrügg gäg d Küste. Bi däm Wätter hei mr ke Lust ka, no 100km witer däm Waterfall Was entlang ga chere.

Dr nächscht Wasserfau isch no hübsch gsi u es het sogar ufghört rägne. Auso si mr wieder zrügg zum Park es Stück am Pfad entlang i Rägewaud ine. Dr Rundgang wär auerdings grad chli läng gsi, auso hei mr mau wieder umkehrt. U plötzlech hüpfts üs doch e so nes Minikänguru vor dr Nase düre. Gits die Cheibe auso doch! Leider isches chli schnäu wieder im Busch verschwunde, aber immerhin chöi mr itz säge mir heige eis gseh...

Wieder zrügg bim Park Center si mr no mau ufe Skywalk u hei d Ussicht gsuecht. E chli hets trotz em Räge gä, isch ja ou veiechli höch dert.

När aber mau wieder zrügg gäg Küste, schliesslech hei mr mau langsam chli id Nächi vo Sydney wöue cho. Am Schluss si mr ufemne Campingplatz bim Booti Booti Natialpark glandet. Dä het zwar scho wieder zue gha, aber ire Box uf dr Site vom Office hets es Couvert mit em ne Schlüssu fürd WC-Hüsli gha. Auso si mr üs mau es Plätzli ga sueche. Dr Park dert isch ufemne Streife Land zwüschem Meer um ne grosse See u zmitts düre geit d Strass, o düre Campingplatz. Mir hei üs e Platz uf dr Seesite gschnappet, dert hets usser üs nume ei Camper u ne Chare gha. Es paar Schritt dürs Gebüsch u scho si mr am Seven Mile Beach gsi, ändlose Strand u usser üs ke Mönscheseele! Da müesse mr de uf au Fäu ga dr Sunneufgang luege!

Zersch isch aber no Zyt gsi für e Sunneungergang u dä hets uf dr angere Site vom Campingplatz gä, überem See. U mir hei nä zäme mit ere Kookaburra-Familie gluegt, ou ganz lustig gsi. När mau Znacht chöcherle, ömu das Süppli u das Toast wo mr vorher im Lädeli churz vorem Fürabe no hei gfunge, am Possum zueluege wo die ganz Zyt um üs ume isch turnet u när mau bezyte ga liege, wei ja früeh uf.

Und wie früeh! Wo ni am 20 ab 5i mau ha use gluegt hani gseh, dass es scho bau häu isch. Auso mau ab a Strand. U bis mr däne si gsi isch tatsächlech die grossi roti Chugle scho bau hingerem Meer füre cho. Herrlech ischs gsi! Am einte Ändi vom Strand hei no 2 pennet u süsch hei mr di ganze 7 Meile für üs alleini gha u öppe es stündigs Strandspaziergängli gmacht. Het sich auso glohnt ufzstah.

U so hei mr drfür när o Zyt gha für nes gmüetlechs Zmorge, schliesslech hei mr no müesse dr Platz ga zahle u ds Büro hei mr dänkt, tuet öppe de am 8i mau uf. Wo mr aber när mau übere si isch geng no niemer ume gsi. Auso hei mr dr Schlüssu mau wieder i di Box ta u si vorem abfahre no mau mit em Chare häre ga luege. U churz vor 9i isch doch de no eini cho uftue u het üs no 28 Dollar abknöpft. Die hätte mr üs eigentlech chönne spare, aber mir si haut eifach z erlech...

Ursprünglech hei mr a däm Tag bis uf Sydney abe wöue, oder ömu müglescht nöch dra häre. Ungerwäx gits Port Stephens, so öppis wie ne grosse See wo vom Meer ids Land ine geit u obe u unger so Haubinsle het. Dr Plan wär gsi, uf Tea Gardens uf dr obere Haubinsle u vo dert mit dr Fähri uf Nelson Bay uf dr ungere, wüu dert no dr Tomaree Nationalpark isch, wo me schiins Koalas gseht, es paar schöni Stränd u die gröschti Wanderdüne vo i weiss o nid wo. Nachdäm mr aber ds Tea Gardens mau vorsorglech üsi Ichöuf hei erledigt, hei mr müesse usefinge, dass die Fähri gar nid für Outo isch. Wüu mr aber glich i dä Nationalpark hei wöue, hei mr üs entschiede, ufem Landwäg dert häre u öppe zwe Stung Umwäg uf üs znäh, o wes haut de nümme längt bis uf Sydney.

Es het sich auso no glohnt. Zersch si mr ga Düne aluege u när mau chli umegfreeset zum luege obs e hübsche Campingplatz het. U dr eint het schöni Plätz im Waud vom Nationalpark hingerem Strand gha, auso hei mr üs für dä entschiede, o wes dasmau nume dr One Mile Beach isch gsi u me dütlech witer dür d Büsch het müesse für häre. Drfür si grad uf de Böum öppe 20m vom Eddy wäg zwe Koalas am penne gsi! Dr eint chli wyt obe, aber dr anger het me gäbig gseh, so lang bis er isch erwachet, mau öppis het umegmötzlet u sich es a nes ruhigers Plätzli het ufgmacht.

Nach däm mr üs dert hei igrichtet u mau dr Strand si ga beguetachte, hei mr eigentlech mau Znacht wöue obtue. Schliesslech hei mr Härdöpfeli u Kanguru-Filet kouft. Hie hets uf de meiste Campingplätz so Camp Kitchens mit BBQ-Steue u die hei mr mau wöue usprobiere. Dummerwis isch aber Samsti gsi, dr ganz Campingplatz u am Schluss o d Chuchi vou lärmegi Lüt. Am Schluss hei mrs haut bim ne Salat, es paar Bier u mene Pack Onionrings la bewände. Mi Chopf isch mr nid so dankbar gsi am nächste Tag...

Drfür het am nächste Morge öpper angers Fröid gha a mim Chopf. Wo mi mau so hingerem Ohr ha kratzet hani plötzlech gmerkt, dass sech dert ä Zägg het adocket! Das A...!!! Dr Role het ziemlech schnäu chönne usemeche aber dr Blätz hockt grad genau dert, wo d Sunnebrüue druf drückt. Zum Glück schiint itz d Sunne nümme...

Gester am Morge, auso nach dr Zägg-Entfernig, het si aber no gschune, u de wie. Wo mr am 10i si losgfahre het scho 33 Grad azeigt. Kaputt u überhitzt wie mr si gsi, hei mr üs für dä Tag nüm meh vorgno, aus er Küste entland bis uf Sydney ine, uf ne Campingplatz im ne Nationalpark öppe 25km vom Zäntrum entfärnt. Ungerwäx ischs geng fisterer u schattiger worde u churz nach däm mr ufem Camping si acho hets scho afa schiffe. He nu, hani mau Zyt gha für e Blog. Viu hei mr süsch nüm gmacht. Üses Kanguru hei mr no obta uf eim vo dene komische BBQs. Öppe e haub Stung hets brucht für chli Fleisch u Härdöpfeli u no mau so lang, zum das Ding wieder putze. Uds Fleisch isch nid mau fein gsi. Keh Ahnig obs am Kanguru oder ar Marinade isch gläge, uf au Fäu süess, bäh!

U nach däm mr o no d Wösch hei erledigt u im Internet hei usegfunge, dass mr äuä würklech gschider nid mit em Chare id Stadt ine gö, hei mr üs entschiede, hüt de mau dr Zug znäh u no e Nächt meh uf däm Campingplatz z blibe. U itz wär äbe de mau Zyt für dä Zug znäh, mau ga luege ob das Sydney chli meh cha aus Brisbane...