Hüt simer mau i Forest go ume tschauppe!!
Hie ir Nechi gits usgschiuderiti Wägli....immer öpe e längi Route u de no e Churzi!
U ja mir gäbes zue, mir hei d'warmduscher Rundi gnoh! Öpis über 3 Kilometer düre Waud gstogglet!! Isch aber e tolli Rundi gsi.....die Wäuder hie chame so grad garnid mit üsne vergliche! Gseh viu Tropischer us, u bim loufe hesch schneu mau heiss!

Mir si aschliessend no go ne stiugleiti GOUD Miene luege! Obwou, viu gseh het me nid!
Inne heimr scho grad garnid chöne! Geschwiege Goud gseh! ��

Ufem Rückwäg heimr bire Farm aghaute wo üs dr Guesthouse Patron e Tipp het gäh!
Leidr isch aber hüt Sunnti u de chame nume Buffet ha! U da mir ja nid z'Mittag ässe hets nume es pseudo Toast gäh Take away!! Aber egau, drfür heimr grad hinger derä Farm no chöne amene Kricketspieu zueluege...ou wemr d'Regle nid verstange hei....isch luschtig gsi zum zueluege! ��

De simr zum Sundowner no füre zu de Knysna Heads! Das isch dr Igang vom Meer id Knysna Bucht! Dr Hammer dert Obe & Unger!

Zrügg vom Usflug u bevor mr si go ässe no hurti 2 Telefon per Face Time id Schwiz!
Het guet ta die liebe gseh u z'ghöre �� Knuddler

Morn wöi mr witer...wöi e Abstächer mache iz Landesinnere...mitem Ziel e Strussefarm go z'bsueche!