Hallo family und Fruende

Nacheme luxurioese Flug vo Singapore nach Sydney, sind mer erholt in Australie acho. Mir hend ues ja scho uf en Flug mit em A-380 gfreut, aber dass de Flueger denn au no gad zimli leer gsi isch und mer zwei Sitzreihe fuer ues elei gha hend isch natuerlich de hammer gsi. So erholsam und gmuetlich sing mer no nie gfloge :) (ussert natuerlich dank em Joni mit Air Canada :).
Mir wohned jetzt denn scho bald ei Wuche wie richtige Backpackers und fuehled ues under de Teenies immer wohler...!! Da Sydney ues mit de Priise gad mal zerst hinne use ghaue het, choend mer leider nuemme so luxurioes wohne (ned wuerklich Flitterwuche Feeling, wenn mer imene Kajuettebett und Gemeinschaftsbad fuer fast 100CHF muen schlafe). Naja, aber wie gseit mer hend ues au scho dra gwoehnt. Ich glaub mer hend in ganz Indie ned soviel Geld usgeh wie innere Wuche Sydney!! Danke Flu, d'Studentecharte het ues scho vill Rabatt ibracht :)
Aber mer gnuessed s'Stadtlebe und sind immer de ganz Tag unterwegs. D'Stadt het eifach mega vill z'biete und dezue choemed au no die schoene Straend. Aber bis jetzt hend mer d'Paerk und d'Straend ned mega choenne gnuesse, da s'Wetter ned mitspielt. Bis uf de ersti Tag regnets immer und sogar zimli heftig. Au zieht de Herbst langsam in Sydney i und mer hend sit langem wieder emal Turnschueh und langi Hose a...uesi Fuess freued sich gar ned drueber, wieder so ipfercht zsi.
Uf em Programm staht morn no Manley Beach, bevors denn au scho wieder richtig Flughafe gaht. Ab in die pazifische Suedsee!!! Mer freued ues scho uf d'Feejee.

Liebi Gruessli us em Backpacker
Manu & Ruego