Bula, Bula
Nur mal so zur Vorinformation: Fiji isch de HAMMER!!
Nach vier Wuche Insellebe wie bi Cast Away simmer wieder zrugg i de Zivilisation und jend wieder fluessen Wasser, 24h Strom, Internet und Autos. Mir hend ues scho ganz de Fijianer apasst, alles isch Fiji TIME, ohni Uhre und ohni zwuesse welle Wuchetag das es sich, sich s'Lebe eifach relaxter (De Ruego het keis graus Haar meeh uebercho). Mer hend ned vill Ziit uf de Hauptinsle (Nadi) verbracht und sind de gli scho zu de Trauminsle mit wisse Sandstraend ufbroche. Eigentlich hend mer welle zwei Wuche Inselhopping mache, doch ues hets so guet gfalle, dass mer grad vier Wuche uf de Inslene verbracht hend. Eigentlich hend mer scho Angst gha, dass vier Wuche Fiji zlang isch. Uf Rat vo andere (Martina :)) hend mer ues mit Buecher ideckt. Jedoch sind mer irgendwie nie wuerklich zum lese cho. Meistens sind mer im oder uf em Wasser gsi und hend Tagesusflueg zu Hoelene, Insle wo Film treit worde sind wie Cast Away und Blue Lagoon. Definitiv s'groeschte Hihglight isch gsi, wo mer en Wuche uf ere chline Insle binere Fijianische Familie gwohnt hend. Sie hend ues so herzlich ufgno und mit ues mega vill Sache unternoh. De Ruego het di meisti Ziit mit Speerfische verbracht, aber leider nie en Fisch heibracht :), Obwohl Tobi (Sohn der Familie) meistens nach zwei Minute scho en grosse Fisch gfange het. Au d'Schnorcheltour mit de Lo (Dame vom Teahouse) isch en riese Spass gsi. Doch nach giftige Sting Rays und Giftige Wasserschlange isch d'Manu schnell wieder am Beach gsi. Doch de Ruego und d'Lo hend fuer s'Abigesse en Oktopus gfange. Hed aber ned so guet gschmoeckt. Es anders Highlight isch au s'Schnorchle mit Riffhaie gsi. S'Herz schlat also scho gad einiges schneller, wenn fuef so 2-3metrigi Haie ihri Runde under eim dreiet. Aber s'Erlebnis isch de Hammer gsi und mer hend no alli Bei und Arme :) Zum Abschluss hend mer ues no Chli-Insle-Feeling gleistet und en Nacht uf Bounty Island verbracht. Eifach ein Traum mit schneewissem Sand und kristallklarem Wasser. Vo de Haengematte us het mer sogar choenne Baby Riffhaie beobachte und s'Riff zum schnorchle isch au gad vor de Huustuere gsi.
Jetzt gnuessed mer no uesi letschte heisse Taeg uf de Insle Mana bevor's am Dunnstig denn Wiiter nach Buenos Aires gaht. Denn isch nuemme Fiji Time, sondern Tango agseit :)
Moce und bis in Argentinie
Manu & Ruego