Profile
Blog
Photos
Videos
Mine Reisegspänli allne ciao xeit…ischs wiiter gange noch Koh Phi Phi. D insle isch im verglich zu Koh Lanta extrem touristisch und wieder meh party orientiert. Kum acho hani mir grad no s letschte bett imne 16 bett dorm gsicheret.. was äs stuck günstiger isch (wenn mer ällei reist) als alli hotels um mi ume und mer lernt schnell viili lüt kenne. So sind mir denn am obig au z zwölfte höch go indisch znacht esse.. viil meh hani a dem tag nöd gmacht, do mir s erscht mol chli komisch xi isch idä magegegend. Drum früeh go pfuse.
leider hät öpert idä nacht d klimaalag ufe unmenschlich chalti temperatur abegstellt und mis bett isch ca. 1m dävo entfernt.. min schlof isch somit nöd so erholend xi und min rugge am nögste morge total verspannt vom früüre. Do i mi aber ine schnorcheltour igschriibe han, bini trotzdem am achti gstärkt mitmne blaubeer-smoothie vor ort gstande.
erste halt isch dä Monkey-Beach xi. än chline strand, nur per boot zerreiche, wo d affe dä ton agebed. Wenn sie sich igengt gfühlt hend, zum bispiil dur eine us minere gruppe (er isch znöch higange zum fotos mache), sinds recht agressiv worde und sind eim nohgrennt und as bei gsprunge J i han sicheri distanz ghalte! Wiiter ischs denn an berüehmte strand gange wo dä film ‚the beach' mitm leonardo di caprio treit worde isch.. was mer xeh hät ischn hufe tourischte.. än wahrschinli zu ruhigere ziite wunderschöne strand.. voll gfüllt mit mensche. Do i eh än filmbanause bin und mi so knapp chan an film erinnere isch da nöd mis tageshighlight xi ;). Noch dä sightseeing tour ischs denn zum wesentliche part gange zum schnorchle.. än traum! Üns guide hät üs zwei spots zeiget bim einte het mer chöne mit schildchrote abtauche und bim zweite chlineri mini hai vo obe beobachte.
zrugg am festland bini direkt is hostel fürn powernap do i mit zwei franzose vo miner schnorchelgruppe abgmacht han zum ViewPoint ufe zwandere für dä Suneundergang.
Do i am nögste tag immer nonig zwäg xi bin hani kein sinn xeh länger uf dä partyinsle z blibe. D Ruth isch zu därä ziit grad imne zwei wüchige thai-box trainigscamp uf phuket xi und hät mir offeriert i chöni zu ihre cho und bi ihre im bungalow wohne.. segi ruhig und chli ab vom schuss und mer chöni sich guet erhole. Das hani denn au dankend agno.
Dur da dassi am reisetag sozsäge nix gesse han und mi chli gschohnt han idä vorige täg ischs denn am obig scho erstunlich viil besser gange. Drum natürli au wieder voll dri und han mi fü dä nögsti tag i d yoga klass und ine thai boxing stund igschriibe J was sich mitmne zweitägige muskelkater uszeichnet hät!
Noch dem regenerations und fitness stopp hani mir denn än flug in norde thailands gönnt (anstatt 15h bus plus 18h zug).. Chiang Mai!
dä Matthew än australier woni in Koh Phangan kenne glernt han hät mi denn vom flughafe abgholt und mir au grad än super drü tages trip präsentiert wo mer vo do us chönti mache. Do er scho zuexeit hat fü dä nögsti tag, hani mi spontan agschlosse.
somit ischs noch paar stund schlof au grad wiiter gange. Erste stopp isch ‚Tiger Kingdom' xi.. mer hät chöne ganz nöch anen tiger anä und au streichle. Zerst zimli nervös, aber irgendwie machets jo alli.. naja.. d tiger hend zimli usxeh als hegeds schlofmittel oder sus öpis wo si ruhig stellt, drum weiss nöd öbis nomol wör understütze idem i än itritt lös. Aschlüssend ischs inere 1.5stündige wanderig zumne einsame wasserfall gange wo mer sich im chalte nass hät chöne abechüehle. Üsn tourguide isch super xi und ebefalls sis englisch. Dos bald obig worde isch hend mir üs ufgmacht mitere wiitere 2stündige wanderig zumne hill tribe.. äs git in thailand sibe verschiedeni tirbes, wo alli chli än andere dialekt spreched. Im dunkle hani mir denn ä duschi undermne leitigsrohr gönnt bevor mir alli zämä znacht kochet hend idä familiäre chuchi.. mit topf und füür.. i allne gricht chunt ä gueti priise glutamat ine J.. sit d sune undergange isch, ischs denn au zimli schnell recht chalt worde und mitmne grosse lagerfüür hend mir üs ufgwärmt für d nacht imne grosse bettschlag.
morgenstund hat.. toast mit ei und glutamat im mund!! Üsn zmorge plus rührei mit extrem viil zwieble. Gstärkt ischs mitere wiitere wanderig damol füf stund zumne elefante camp gange wo mir si hend chöne füettere und au ufm nacke sitze währedmne spaziergang dur dä jungle.. eis vo mine bisjetzige highlights xi!! unbeschriiblich! Und elefantehuut isch zimli borschtig ;)
Am dritte und letschte tag ischs fluss abwärts gange mitmne bambusfloss.. üsi füfer gruppe plus guide hends denn knapp underwasser gsetzt. Mir drü fraue hend chöne gmüetlich im nass sitze während d männer s ränkle und stüüre übernoh hend. Eimol häts üs so fescht kehrt dassi denkt han i muess gli afange schwimme, aber irgendwie hends mir doch no chöne verhindere nur üses gepäck isch s meiste nass worde.
müed aber mit viilne neue erlebnis isch ä nacht imne normale hotel genau s richtige xi bevors am nögste tag mitm bus wiiter goht noch Pai.. wiiter im norde obe.
Do dävo verzelli denn zämä mit mine letschte asie-täg woni no han bevors ab noch australie goht. X liv
- comments