Unseri erschti Destination in Laos isch die gmietlichi und schoeni Insle Don Khon ufem Mekong gsi. Die het sich quasi als unser Paradies usegstellt, denn mir haend grad zwei Bungalows (10 Dollar pro Nacht!!) naebenander verwuetscht mit Blick ufe Mekong und eignener Haengematte. Heeerrrllliiiiccchhh.... :) Doert haemmr eifach d Ziit gnosse und 2x Usflueg mit luschtige Mietvelos zumene kleine Beach mit Bucht unternoh.

S Karte-Spiele (Jasse, Arschloechle usw.) het sich zunere richtige Sucht entwicklet, wo uns waehrend de 10 Daag, wo mr zaemme am umereise gsi sind, staendig begleitet het. Ah und dr Wurst-Kaes-Salat haemmer uns in jedem Restaurant gegesitig unter d Nase ghalte (dae isch natuerlich uf dr Menukarte immer grad unterem Fondue und em Stuck Brot mit Schinke und Kaes gstande...) he,he. So gemein :)

Irgendwenn het dae Daag jo muesse ko wo mr uns haen muesse vo dr Isabelle und em Jerome verabschiede :( Aber warde uns hoffentlich nomol in Luang Prabang traeffe, bevor sie sich denn endgueltig ufe Waeg nach Thailand mache und mir hingege no in Laos bliebe warde. Isch e cooli Zit gsi mit ihne und mir haends sehr gnosse.

Am nexte Daag haen dr Arno und ich, ganz elleige..., no e Usflug miteme Boot ufem Mekong gmacht, wo mr sogar ganz vieli vo de saeltene Fluss-Delphine gseh haend. Isch total spannend gsi zum die Tierli beobachte. An daem Obe sind mr denn no go Fische: Nicole 3 Fisch, Arno 1 Fisch... Seit alles oder? he,he. Mir haend die Ziit uf dr Insle wahnsinnig gnosse und es het uns wieder Energie geh fuer die witere Abentuer...

Ufem Waeg nach Pakxe haemmer e Uebernachtig in Champasak iglegt, um e alte Khmer-Taempel a zluege. Leider haemmer bitz mehr vo daem Tempel erwartet, aber schlussaendlich isches e interessante Umwaeg gsi und mir haend tolli Luut kenne glernt. Spoetischtens wo mr Zobe im Restaurant vom Hotel Znacht gaesse haned, haemmer gwuesst, dass dae Usflug nit Verschwaendig gsi isch: mir haend soooo tolli fried Noodles mit Gmies und Nuessli gaesse, eifach hammer gsi.

D Fahrt nach Pakxe isch au no e Story fuer sich: Imene bitz bessere Tuk Tuk (e Art Pickup) mit oebbe 10 Iheimische zaemme und de Hollaender (vom Vorobe) sind mr ueber Schotterstrosse gfahre und bi jedem Loch hets uns oebbe 20 Zentimenter Richtig Decki ufe katapultiert. S luschtigste dra isch aber gsi, dass s ganze Dach voll gackerndi Huehner gsi isch, wo sich glaub immer wieder luuthals ueber dr schlaechti Komfort beklagt haend... jedefalls haemmer sie staendig ghoert und d Situation isch eifach zu luschtig gsi...

Do in Pakse verbringe mr bitz Ziit im Internet und waerde spoeter no oebbis go aesse, bevor mr an Flughafe use fahre. Unser nexts Ziel isch Luang Prabang, wo anschienend sehr haerzig soell si und doert waerde mr hoffentlich d Isabelle und dr Jerome nomol traeffe... Mir sind gspannt :)

Generell bruchts wahnsinnig Ziit in Laos ume z reise. Es git kei Zugverbindig und d Strosse do sind extrem schlaecht. Fuer 200 km haen die do zwuesche 7-8 Stund... hiilllffeeee.... Dorum sind mr momentan no bitz am waer weise, wo mr alles no warde ane reise, will halt ebe alles so lang bruucht...

D Luuet do in Laos sind sehr naett, wenn au e bitz zruck haltend und fascht bitz schuech... Wenn me sich aber d Woerter wie HALLO, TSCHUESS UND DANGGE uf laotisch aeignet, duen sie eim immer zruck griesse und haend Freud dass mir laotisch koenne... he,he.