Hallo mitenandr

Am 7. Dezaember haen mer Laos in Richtig Thailand vrloh. Obwohl mer eigentlich plant haen laenger zLaos blybe, haen mer uns kurzfrischtig umentschiede, do mir so odr so wenig Zyt gha haette. Mir haen urspruenglich "dEbeni vo de Tonkrieg" welle go bsueche. Die isch grad mol 231km oestlich vo Luang Prabang, aber per Bus duurt die Streggi um die 9 (!) Stund, d.h. es waere elai fuer dr Hi- und Ruggwaeg je e Daag floete gange, dos au kaini Nachtbuess gha haetti. Alles waeri kai Problem gsi, wenn mer doert ane haette koenne fliege. Mir haen ys abr uf dr Stephan Loose - das isch e zimlig vrsch... duetsche Reisefiehrer - vrloh, dass me vo Luang Prabang doert ueberefliege koennti, aber nix da. Z'Laos isch so odr so nid alles so beschtens gloffe. Mir haen u.a. dr Flug nach Luang Prabang umbuecht. Wo mir abr uf dr Flugplatz zPakse (im Suede unde) ko sin, haen die uns nid im System gha, sodass uns nued anders blybe isch als neui Tickets zkaufe. Kai Angscht, mir waerde das no vrfolge und dae Batze zruggfordere.... Generell hets uns (d.h. v.a. mi, Arno) sehr gstoerrt, dass vieli Luet in Laos sich nid an Veribarige ghalte haen und me sich nid uf Abmachige het koenne vrloh. Uf dr ganze Reis durch Suedostasie isch das nie dr Fall gsi (nid mol zMyanmar). Me het zwor immer schwer miesse vrhandle, het villicht au gwuesst, dass me vrhaeltnismaessig zviel zahlt het, abr, au wenn me oebbis sehr tief abeghandlet het, hets immer klappt und me het sich uf dLuet koenne vrloh. Tja, so haen mer halt no Luang Prabang zu viert gnosse... u.a. simmer amene Obe, nacheme sehr fiecht-froehliche Apero und Kartespieli, imene supr-stylishe Restaurant go Sindat aesse. Sindat isch quasi die laotischi Form vo Fondue odr eher Tartarehuet. Mir sin drbi am Bode uf Kuessi ume sone Haertli, wo imene Tisch ygloh gsi isch, ghoegglet odr glaege und haens uns richtig guet ergoh loh - e Troepfli Wyy het notuerlich nid doerfe faehle ;) E herrliche Obe isch das gsi!!

In Chiang Mai ako, haen mer uns denne grad e Hotel gsuecht und sin zObe ufe Night Market gange - doert isch dr einti odr dr anderi vo uns kli em Shoppingwahn vrfalle. Am Morge druf simmr denne vonere Kochschuel, wo raecht usserhalb vo Chiang Mai (voll im Griene) stationiert isch, abgholt worde. Dr Max, e witzige junge Typ, het uns denne in die thailaendischi Kochkunst ygfiehrt. Vom sticky rice ueber Friehligsrolle und Noodle Soups bis zum hart erkaempfte (isch e raecht aastraengendi Sach gsi) Rote Curry haen mer alles kocht und denne gmeinsam vrschlunge. Jede het fuenf Spiese doerfe uswaehle, wonr denn untr Aaleitig vom Max, saelber het doerfe zuebereite - und jede het denn au seigene Gekoech doerfe aesse. E richtige Feschtschmaus!!! Dange fuer dTipps, Noelle und Luki!!! :)

Am neggschte Morge simmer denne mit zwei manuell-gschaltene 125cc-Scooter um die 100km in Richtig Doi Inthanon, das isch e Nationalpark suedweschtlich vo Chiang Mai gfahre. Kurz bevor mir vor dr Tor vom NP ako sin, het dr Jerome doch tatsaechlich si Scooter - in Thailand isch uebrigens immer vo "Moto-bike" dRed - zu Schrott gfahre.... okok, aer het e Platte im Hinterrad gha. Gluegglichrwies isch nur e baar hundert Meter entfaernt e glaini Waergstatt (e Holzhuettli miteme Reife, zur Erkennig) am Strosserand gsi. Doert haen mer das Malheur innert kuerzischtr Frischt und fuer 100 Baht - rund CHF 3.- - koenne besitige und witer isch dReis gange. Dr Doi Inthanon isch au dBezeichnig fuer dr hoeggschti Baerg vo Thailand. Genau dae haen mer per Moto-Bike erklumme. Uf sagehafte 2500 Meter haen mer denne unseri Goebble stoh gloh und haenis denne doert no kli zFuess ummebewegt... d.h. mir haen uns imene Radius vo ca. 50m bewegt.... viel isch leidr nid zgseh gsi, dos raecht bewoelgt gsi isch und jo, shetys alli kli gfroeschteled... sin glaub scho um die 10-15 Grad doert obe gsi! Dr Obe haen mer denne bi Kartespiel vor unserem haimelige Bungalow uf oebbe halbr Hoechi vom Baerg vrbrocht. Doert haen mer denne au e daengwuerdigs zNacht gha - irgendwelchi Chipps, Crackers, komisch sunschtigs Zueg... naja, sichrlich isch das dr kulinarischi Tiefpungt vo de letschte vier Moenet gsi. Am neggschte Daag haen mer uns denne via divaerse Wasserfaell und em hailigschte Taempel vo Thailand, Wat Doi, uf e Ruggwaeg in unser Hotel in Chiang Mai gmacht. Doert simmer denne in e glains italiaenischs estaurant go herrlich zNachtaesse, nomol uf e Nightmarket und in e Irish Pub, wo mer denne zum Gluegg still und heimlich uf my Geburtsdaag aagstosse haen. I ha die ganzi Zyt befuerchtet, dass die drei irgend e Affetheater mit mir in daem Pub plant haen - isch zum Gluegg (au dangg dr Nici) denne aber nued derartigs passiert... ufff!! Abr sisch herrlich gsi!! Gmietliche Sound vonere glaine irische Band und kiehli Bierli...

Am Morge vom 11. het mi denne dNici miteme Toertli und Kerzli ueberrascht - doddal haerzig gsi!! Und nacheme gmietliche zMorge zu zweit und im Verlauf vom Vormittag hets denne ploetzlich gheisse Pagge, hesch no 15 Minute Zyt.... i ha immer gmeint, dass me so alti Segg nid sotti umestresse hihi. Tja, denne simmer vors Hotel und uf dMinute genau kunnt e Tuktuk vorgfahre und mir zwei brause mit daem los. DNici het mi miteme Wellness-Hotel ueberrascht... haen e wundrbars Zimmer gha, woni mi kuum ha getraut oebbis azlaenge. Sin denne kli an Pool glaege und haen kli relaxt. Bade haen mer au welle, abr, wo mr denne beidi e Zechespitz im Wasser gha haen, haen mer uns nur aagluegt und sin widr zu de Liigestiehl zrugg - sWasser isch so oebbis vo ARSCHKALT gsi!!! Jaenu - i ha mi denne minere mit Abstand beste Thai-Massage doerfe widme... herrlich!!! Und zObe haen mer denne dIsabelle und dr Jerome imene doddal coole Restaurant zumene supr-feine zNachtaesse droffe. E supr Daag und heimlich voll duurenorganisiert by Nici - DANGE! :)

Zu viert haen mer denne no dRuine vo Sukothai - die ehemoligi Hauptstadt vom Sukothai-Koenigrich im 13./14. Johrhundert bsuecht - haenis doert gmietlich mit Velos zwuesche de diverse Daengmoeler/Ruine/Buddhas bewegt und uns zObe bimene wunderbare zNachtaesse, wo uns dr Jerome und dIsabelle yglade haen, verabschiedet. Si zwei haen sich am ueberneggschte Daag uf e Waeg nach Bangkok gmacht, mir sin bereits am neggschte Morge in Richtig Ayutthaya ufbroche. Ayutthaya isch ebefalls e Hauptstadt gsi, abr erscht im 18. Johrhundert... bereits am neggschte Daag sin mer scho zBangkok ako, wo mer imene doddal coole, an e Piratestadt erinnernds, Backpackers logiert haen. Bangkok haen mer eigentlich nur waegem Schnieder nomol bsuecht - mir haen unseri masgschniderte Sache nomol miesse go aapasse, dass si gnueg Zyt haen zum Aenderige vorznaeh, bevor mer Aendi Joor die fertige Sache haen welle abhole. Wiederum haen mer miesse Feschtstelle, wie miehsam die maischte Tuktuk-Fahrer sin. Mittlerwiele schiint ihres Hauptbusiness gar nuemme sUmmefahre vo Gaescht zsi, sondern vielmehr sKundevermittle. Si waen eim jewils ufschwaetze vorem Zielort zerscht e glaine Abstaecher zumene Schnieder (odr sunschtwelchi Laede) zmache. Drbi waen si zum Teil nid mol meh Gaeld odr sunscht ganz wenig (40 Baht odr so)... die mien zimlig gaili Provisione vo daene Gschaefter kassiere. Tja.... mir sin fascht nur no mit Skytrains und Taxis ummegfahre....

Am 7i am Morge vom 16. Dezaembr haen dNici und ich dr Skytrain zum Siam@Siam Hotel gno, wo mir Aendi Dezaember nomol logiere wuerde, und haen doert eine vo de grosse Ruggsegg abgaeh. Drnoch sin mer widerum mitem Skytrain in dNoechi vo dr Wongwianyai Station (Bahnhof) gfahre. Am Bahnhof ako (am 8i am Morge), haen ploetzlich alli Passante sich nuemme beweggt gha - me het sGfuehl gha, dass me sich in Mitte vomene Flashmob befunde het... abr tatsaechlich haen mer grad no im Hintergrund sAendi vo dr Thai-Hymne (zumindischt glaube mir, dasses die gsi isch) ghoert. Uf jede Fall, haen sich wie uf Kommando (Aendi vo dr Musig) alli widr normal witerbewegt. Isch aecht speziell gsi!! Fuer alli, wo nid wuesse was e Flashmob isch: Das isch e Phaenomen wo scho die ganzi Waelt erobered het, au zBasel in dr Freie haen mer das scho mol doerfe erlaebe - do e Link zumene Youtube-Filmli: http://www.youtube.com/watch?v=LheZ7_4CqJY

Am Bahnhof ako (Bahnhof = ei Gleis und rundum Maert und Huesli....) haen mer uns fuer je 10 Baht e Ticket kauft und sin mit daere doch sehr holprige und wacklige Bahn gmietlich in Richtig Maha Chai gfahre. Scho gly sin mer us Bangkok dusse gsi und zmitzt in Faelder und Banane-Plantagene... notuerlich sin mer die einzige Touriste gsi (bis uf ei Asiatin). In Maha Chai (ebefalls ei Glais) haen mer ca. 30 Minute Zyt gha zum umstiege. Doert haen mer dr "Bahnhof" vrloh und haenys sofort in Mitte vomene Maert widrgfunde. Mir haen gwuesst gha, dass mer per Faehri nach Banlaeng ueberesetze mien, so sin mer halt eifach mol in e Richtig gloffe, wo mer sGfuehl gha haen, dass doert sich e Fluss befinde koennti - Peng, volltraeffer. Jetzt haen mer uns widr nur mit Haend und Fiess koenne verstaendige und haen e Ticket uebere gloest - und prompt haen mer sfalsche Boot bestiege... Zum Gluegg haen mer abr vorsichtshalbr dr Captain nomol probiert zfroge - dae het uns denne abr widr vom Boot (wo mit Scooter, Iheimische und Waare gfuellt gsi isch) gschiggt. Ploetzlich isch uns e aelteri Dame behilflich gsi und het gmeint (in Zeichesproch), dass si an glyche Ort muess goh und dass mer eifach ihre folge solle bzw. mit ihre uf srichtige Boot warte solle. Doert sin denne einigi Boot aakoh und haen au widr abgleggt - mir zwei Touriste haen e glaineri Sensation dargstellt und dLuet haenis bestuunt - wohrschinlich koemme nid grad so oft Touriste doert duure. Kaini 10 Minute bevor uf dr andere Site vom Fluss neume unsere Zug haet sotte abfahre und mir au scho kli nervoes worde sin, isch denne mol e Schiffli mit uns und notuerlich dr aeltere Dame und ihrne Ikaeuf an Board losgfahre. Daene aako sin mer die 50 Meter zum Bahnhof d.h. wieder zum einzelne Glais gseggled, dass mer denne im Zug oebbe 15 Minute haen uf dAbfahrt koenne warte - e Ticket (wiederum fuer 10 Baht, 30 Rabbe) haen mer notuerlich in aller Hektik au no gloest hehe... Eifach gail, wie do aene dr Puls anderscht isch!! Und wiidr isches fuer e Stund miteme Zug durch schoeni Landschafte gange. Kurz vor Aakunft isch unsere Schaffner ufgwache und ich hanen schuech koenne (mit Haend und Fiess) koenne froge, ob ich fuere in dFiehrerkabine doerf hoeggle und aer het ohni Zoegere ygwilligt, zum Gluegg!! Denne jetzt het sHauptspeggtaggl (und au dr Hauptgrund) vo daere Zugfahrerei ueberhaupt agfange - kurz vor Aakunft sin mer mitem Zug diraeggt dure Maert vo Maeklong gfahre. Kurz bevor sich dr Zug quer durch dae Maert gwaelzt het, haen dMaertluet ihri Staend uf dSitegschobe und dStandtaecher zrugggno, sodass dr Zug freyi Fahrt gha het. Faszninierend!!! Dr Zug het denne au unmittelbar hinterem Maert ghalte und mir haen nach kurzer aber erfolgloser Suechi nach irgendere Unterkunft das ganze Speggtaggel nomol doerfe aaluege, das Mol aber als Fuessgaenger und vo dr andere Site. Ueber dAakunft haen mer e Filmli dreit, aber leidr im Hochformat, sodasses ufem Compi liegenderwies zbetrachte waeri, wenn mes nid vorhaer irgendwie bearbeite tuet. Haen Euch do drfuer jetzt e Link vomene Youtube-Filmli, wo usem hinderschte Faensterli vom Zug dreiht worde isch - nid usem vorderschte wie mirs erlaebt haen, aber trotzdem cool: http://www.youtube.com/watch?v=2ShmXmvNKWk

Nach zwei Uebernachtige in Hua Hin (suedlich vo Bangkok) und spoeter no zwei Naecht uf dr zimlig belaebte Insle Koh Tao (Ostkueste), woni nomol zwei Tauchgaeng ha koenne mache, sin mir denne uf Koh Phayam gange - das isch e glaini, abr no zimligi urspruenglichi und sehr ruhigi Insle an dr Westkueste vo Thailand, uf dr Hoechi vo Ranong. Mir haen doerte waehrend drei Naecht imene doddal haerzige Bungalow uebernachtet und aaschliessend drei witeri Naecht imene sau coole Zaelt (dass Ihr Euch das vorstellekoenned, waerde mir no Foeteli uffelade). E baar Daeg bevor mer uf Koh Phayam ko sin, haen mer vo dr Isabelle und em Jerome per SMS erfahre, dass si waehrend dr glyche Zyt uf dr Insle si waerde - zwor imene andere Hotel, aber wie sich denne spoeter usegstellt het, isch das au nur e ca. 10-minuetige Spaziergang entlang em Strand entfaernt gsi... und so haen mer zu viert die erschte drei Daeg mit Suennele, Muschle sueche, Kartespiel und wundrbarem Aesse in unserem Resort vrbrocht. Um sich das Resort vorzstelle: shet zwei Bungalows, ca. acht Zaelt und denne no e ueberdeggti Terrasse gaeh, wo sRestaurant dargstellt het. Sisch sehr eifach ghalte sganze, aber so oebbis vo dermasse gmietlich, familiaer und die fuenf Aagstellte (e Thai, e Oesterrichin und zwei Burmesinne und ei Burmes) sin so haerzlich gsi. SAesse isch fantastisch gsi, sodass mer jede Daag mindischtens zwei Mol doert gaesse haen... Und dInsle saelber: e Traum!! shet nur e baar wenigi ca. knapp zwei Meter breiti Strossene gaeh, kaini Autos, drfuer isch ab und zue mol e Scooter vrbigfahre... DStraend sin doddal schoen gsi und shet kuum Luet gha - mr sin ys maengmol ganz elai vorkoh! Und shet au tatsaechlich glaini doddal vrlasseni Buchtene zendegge gaeh. Leidr het me abr an zahlryche Baustelle koenne dr Umbruch, wo au die Insle erfasst het, spuere - dr Tourismus entdeggt die Insle langsam abr sichr.

Am 25.12. isch denne au dAntonietta und dr Ignacio uf dr Insle ako. Im Gepaegg haen sin feini Wiehnachtsguzzeli vom Mami drbi ka - so haen mir nacheme gmietliche (thailaendische) Wiehnachtsaesse am Strand denne no die feine Guzzeli zum Dessert doerfe ha - herrlich gsi!!! :) Am zweitletschte Obe haen mer denne nomol zwei Scooter gmietet und sin an dr supr-schoeni Buffalo Beach gfahre, wo mir dr ganz Daag uf dr fuule Hut ummeglaege sin - wo mer haen welle zruggfahre, het dr Jerome si Scooter abermals miesse zSchrott fahre (miehsame Kaerli) hehe... nai, au das Mol ischr unschuldig gsi - dScooter-Vermieterin hetem e Scooter miteme quasi leere Tangg gaeh - so hets offebar grad no bis an Beach glaengt, aber nochhaer hetr nuemme welle aaspringe.... e Flaesche mit Benzin het denne das Problem abr gloest. An daem Obe hets denne abr definitiv ByeBye Isabelle und Jerome gheisse. Sisch e wundrbari Zyt gsi, wo mir mit daene beidne haen doerfe verbringe. Sisch au unerwartet lang gsi - ueber e Monet (mit zwei glainere Unterbruech) haen mer zu viert vrbrocht!! Mir haenys serschte Mol in Phnom Penh droffe und shet sich so ergaeh, dass mer bis zum Abschluss vo unserer Reis fascht die identischi Reiseroute gha haen. Umso emotionaler isch denne au sAdieu gsi! Die beide haen jetzt no nuen witeri Moened vor sich - HEBEDS GUET IHR BEIDE!!!! Vergaessed nie an dr Wurscht-Kaes-Salat und sSchiss-Spiel zdaengge hihi... und Jerome - kaini witere Vrschrottigsaggtione, gaell!! ;)

Au dr Anietta und em Ignacio haen mer am neggschte Morge miesse Byebye sage - si haen ys bis ufs Pier, wo uns sSchnaellboot fuer ufs Feschtland abgholt het, begleitet und uns denne no e Ewigkeit zuegwungge. Si duerfte mittlerwiele ufere andere Insle inere Wellness-Oase stegge - au Ihr, GNIESSED EURI FERIE!!! - sisch wundrbar gsi, die baar Daeg mit Euch in daem glaine Paradies zgniesse!! :)

Jo, so schnaell isch die Zyt uf daere glaine Trauminsle vrbi gange und mittlerwiele sinn mer zBangkok ako, wo mer dr zwei Daeg gnosse haen und jetzt in unserem schoene Hotel no dr Raescht vo dr Zyt bis zu unserem Abflug am 00.45 vrbringe waerde. Bangkok haen mer abr au nomol richtig gnosse. Naebem Abhole vo unserne massgschniderte Kleider haen mer gescht zobe no sberiehmte Patpong - sRotliechtmilieu vo Bangkok - bsuecht und doert suprgaili Sushis zum zNacht gha. Au e Coiffeur-Bsuech isch fuer mi no ufem Programm gstande... ojeeeeeee! Die het dr Rasierer uf Null gsetzt und mir eifach mol e Kotlette abghaue und gfrogt "okay so??" ehm... "NOOOOoooooo...!!!!!!" naja, am neggschte Morge bini zumene andere Coiffeur im MBK-Shopping Centre gange und ha sbeschte no drus mache loh - ha jetzt e zimlig kurzi Fritte, was aber fuer mi bevorstehende Militaerdienst jo nid mol so stoerrend isch... hehe.. sone Tortuelle die Coiffeuse!!! Und huet haen mer no im Royal Dragon Restaurant - sgroeschte Restaurant vo dr Waelt (5000 Gaescht haen Platz, 1200 Mitarbeiter) - zMittaggaesse. Mir haen doert e Dim Sum-Menue bstellt. Die haens kli uebertriebe und insgesammt je 25 verschiedeni Bambus-Koerbli mit verschiedenschte Dim Sums uns anegstellt hehe... fein isches jo gsi, abr ganz e bitzeli uebertriebe!! Abr was ganz speziell in daem Restaurant isch: dKaellner flitze uf dr Rollschueh durch dGegend und waehrend em Aesse isch ploetzlich e Kaellner anmene Kabel quer durchs ganze Restaurant (ca. 150m wit) gfloge - die spinne doch =) Au e Bsuech vom Jim Thompson House haen mer uf Rotschlag vo mym Papi no gmacht - doddal speziell. Dae Amerikaner isch massgaeblich drfuer vrantwortlich, dass dThai-Side das guete Renome uf dr Waelt gniesst. Abr speziell an ihm isch syni eigeni Gschicht: Aer isch im 2. Waeltkrieg im Ghaimdienscht vo de Amis gsi und spoeter nach Asie gschiggt worde, wo aer sich denne au in Bangkok vrliebt het und sich dr Side gwidmet het. 1967 isch aer denne spurlos vrschwunde. Gruechterhalbr ischr vomene Ghaimdienst odr vo Igebohrene entfiehrt worde, sogar vomene Tigr sollr gfraesse worde si odr gar no lang witerglaebt ha.... me weisses nid. Abr sisch schoen gsi in Mitte vo daere riisige Stadtt e glaini ruhigi Oase mit schoene alte Hueser und wundrbare griene Gaerte zfinde.

Sodeli, das wars mit dr Brichterstattig us Australie und Suedostasie - gly gits Live-Brichterstattig zBasel! Mir freuenys Euch bald widr zseh und hoffe, dass mer puenggtlich am Mittag vom 31.12. zBasel lande waerde.

Bis gly, haerzliggi Griess us Bangkok
Nici & Arno

Do no e glains Zitat us mym Buech "Mr Nice" wo mr doddal gfallt: "Dementsprechend muss ich mir Grundnahrungsmittel wie Foie Gras und Kaviar auf eigenen Wegen beschaffen." =)