Ja has ja no fasch dänkt, das chönnt de so ne sach si mit däm blog. Ständig ungerwägs u we mau zyt hätsch hesch kes internet. He nu, de chani haut itz d Erinnerige vo de letschte zwe Wuche no mau ufwärme...

Auso, si mer am Mäntig Morge mau im Eichhouz uszoge u hei üse Räscht no deheim im Chäuer deponiert. Chli komisch gsi, üsi Wohnig vo usse z gseh u eigentlech isches gar nüm würklech üsi.

D Reis isch ja när ke längi gsi, London isch ja grad ume Egge. Per Express id Stadt u ir Rushhour ar Victoria Station acho, wo is grad mit em ne heftige Räge het empfange. Fat ja scho mau guet a. Aber mir müesse ja no nid hie use, sondern üs mit auem Gepäck i di überfüllti U-Bahn quetsche bis nach Kings Cross. U wo mer dert per Zufau o no dr richtig Usgang für zu üsem Hotel hei gfunge hets no nid mau meh gschiffet.

Auso hei mr mau üses Chäuerzimmer bezoge u nis ufe Wäg gmacht zum d Nachbarschaft erkunde. Isch no gäbige Egge dert zum öppis Znacht u es Fürabebierli nä. U när simer scho wieder einisch früeh is Bett, heis ja am nächste Tag zum Zmorge wöue schaffe.

Zmorge isch o wichtig gsi, hei nämlech e mega Marathon gmacht a däm Tag. U vom Mittag a het o tatsächlech d Sunne gschune, bis am Schluss hei mr 26 Grad gha u das End September ds London...

Auso mir si mau losgschuenet bis mr irgendwenn bim London Eye si acho, dert hei mr e Tour mit em Rädli u eini mit em Boot gno, si när no witer Richtig Big Ben, Buckingham Palace u wie das dert aus heisst, bis mr ganz entchräftet ds Soho si ine Beiz ghocket u de Lüt zuegluegt hei. Lustigs Vöukli dert! U schlussändlech si mr wieder zrügg zum Hotel gloffe, kes einzigs mau gfahre u das aus mit de neue Schueh...

Am nächste Tag hei mr is drum für e Bus entschiede, dä het is zur Tower Bridge bracht. Tower hei mr o no wöue ga aluege, bis mr hei gseh dass das es haubs Vermöge chochstet. Auso hei mr üs nume es Softice gönnt u nis när mau ufe Wäg zum Flughafe gmacht. Hei dänkt cha nüt schade bezyte dert z si. Aber mache mr z nächst mau o nüm so, Heathrow het im Fau ussert Duty Free Shops fasch grad gaaaar nüt...

Ja u när simer ufem Wäg uf London gsi. U promt scho vorem Znacht ipennet. Zum Glück, süsch wärs e längi Nacht worde, ds Inflight Entertainment System isch usgfaue u was macht me da süsch 12 Stund lang? Drbi het sich dr Role scho so gfreut u au die Fiume...

Drfür isch aber när d Landig spannend worde. Bim Aflug uf HongKong hets geng wie meh afa rütle u paar Lüt ir Umgäbig hei scho ds Tütli afa füre sueche. U wo mr öppis unger 1000m si gsi het er tatsächlech no mau müesse dürestarte. Irgendwenn het dr Pilot düregä, das sig geng so e Sach mit HongKong, er probierts itz no mau u süsch flüge mr haut de uf TaiPei, da is süsch dr Most usgieng... Zum Glück het dr 2. Versuech när klappet, o wenns dasmau no me grucklet het u di Tütli geng wie vouer si worde...

Wo mr när ändlech im Hotel si gsi hei mr erfahre, dass grad ir Nacht vorher e Taifun düre isch. Het HongKong zwar nume gstreift u es isch nüt schlimmers passiert aber kes wunger het das e chli gwaggelet i däm Flugi!

Ja u när hei mr üsi Tägli ds HongKong gnosse. Isch e Hammer Stadt! O we sis wättermässig gar nid guet mit üs het gmeint. Es het zwar nid immer grägnet u wenn denn meistens nume chli, aber bi mr nüm sicher ob mr überhoupt mau e Sunnestrau hei gseh...

Auso glich mau los: Düre botanisch Garte bim Penntierli düre zum Midlevel Escalator (das isch ds einzige ÖV wome zaut wird we ms brucht. E Routräppe wo vo de Wohngebiet am Hoger id Stadt abe füehrt u ir Mitti chami sini Octopuscard für d Verchehrsmittu uflade). Abe zu de Pier u mit dr Fähri übere ufs Festland. Tour dür KowLoon und am Abe si mr rächtzytig wieder vor am Pier gsi für d Lasershow. Es git dert e Uferpromenade wo jede Abe für öppe 20 Minute d Musig losgeit u när uf HongKong Island vis-a-vis d Hochhüser im Takt derzue lüchte. Irri Sach! Gseht aber würklech no guet us. Uf au Fäu hei mr när Hunger gha u si o hie im Soho glandet, wo mr prompt si blibe hange...

Nid schlimm, am nächste Tag hets e grägnet u nüt usgmacht we mr chli länger hei gschlafe. Am Tag hät dr Peak äuä eh nid bsunders gueti Ussicht zeigt. Drum simer zersch no chli id Stadt wo i jedem Egge südostasiatischi Froue am Bode si ghocket. Schiins demonstriere di so wüu si Angst hei, si verlüre iri schlächt zaute Jobs. Schliesslech het China gnue Biugigarbeiterinne, da bruche si nüm die vo Thailand und Philippine. Ja u dert si si när zwe Täg ghocket, hei gamet u gässe u was weiss i. U es het vili vo dene!

Aber ufe Peak simer när trotzdem no, isch nämlech chinesische Nationalfiirtag gsi u sie hei es Fürwärch agseit gha. Auso si mr mit em Bus ufe, dobe gässe, chli im Wind gstange, ds härzige Fürwärch wyt unger am Meer agluegt u när mit em Tram wieder abegfahre. Isch no lustig gsi.

U när hei no meh Lust becho uf ÖV u si am nächste Tag mau mit dene lustige zwöistöckige Tram vom einte Ändi zum angere gfahre, hei mau d Metro usprobiert u si när mit Bus uf die ängeri Site vo Hongkong Island uf Aberdeen. Dert hei mr sones auts Houzböötli gno u si dr Hafe mit de Husboot ga aluege. D Stadt u dr Hafe si nüt schöns aber ds Böötli u dr Fahrer si lustig gsi.

När no eis witer uf Stanley, dert isches e chli ruhiger u het o fasch gar keni Hochhüser, wüu vorauem nid asiatischi Lüt dert wohne. Het sich ömu glohnt das Usflügli. U wüus grad ufem Wäg vom Bus zu üsem Hotel isch, simer natürlech nomau im Soho vrbi, isch ja scho üse letscht Abe gsi. Dismau aber chli weniger lang blibe hange...

Ja u zum Abschluss hätte mr eigentlech üses Gepäck wöue ir Stadt ichecke u när no chli ga umeluege. Nach langem Sueche u studiere hei mr aber när usegfunge, dass me nume denn cha ir Stadt ichecke, we me dr Airport Express nimmt u dass e mit Pacific Air sowieso gar nid geit... Isch üs nid viu angers übrig blibe aus mau Richtig Flughafe. Immerhin gits dert e chli meh aus z London. U när hei mr so lang müesse astah am Check In dass mr eh nüm viu Zyt hei gha bis zum Flug.

U 10 Stung Air Pacific fägt nid!!!

Immerhin si mr när mau uf üsere Insle acho, wo mr o ganz interessanti Sache hei gseh... Vo däm de später, bim nächste verrägnete Tag mit Internet Zuegang... Itz si mr z Suva, ir Houptstadt vo Fiji u hei Hunger, mach üs auso mau ufe Wäg id Stadt. Bis dann dann!