Ja, u itz simer wieder ds Suva, ömu ganz ir Nöchi drvo u wieder schiffets. Auso wieder mau chli Zyt füre Blog, o we ds Internet hie fäut, schribe chame ja glich afa chli.

Auso äbe, vo mittlerwile zwöiehaub Wuche simer ds Fiji acho, nachdem mr e Nacht i däm Flüger überstande hei. D Lüt hie si di meiste sehr gross u vili o ziemlech breit. U genau so e angerhaub mau Fiji-Ma isch näbem Role im Sitz ghocket. O wenn er sich no so dünn het gmacht ischer geng uf Roles Sitz gsi. U Role für uf mim. Gschlafe hei mr ömu so guet wi nüt u sit denn tuet mr dr Äcke weh. Um so froher simer gsi, wo mr ändlech si glandet. O we zersch no mau au hei müesse abhocke wüu si no es zwöits mau mit ere Dosis Desinfektionsspray dürs Flugi hei müesse bevor mr hei use dörfe. U bim Ireise bechunsch när no lustigi Frageböge. Anschinend wei si verhindere, dass öppis igschleipft wird. U drum hei mr o üsi witgreisti Thommy-Mayo müesse am Zou la :-(

När het aber aus gäbig klappet, dr Fahrer het scho gwartet u üs irgendwo zmitts ir Pampa am ne Stäg abgsetzt. Chli spöter isch o scho es Schiffli cho u immer wie meh Usflügler wo e „Boarding Card" hei übercho u si igstige. U wo mir när o ändlech hei chönne isch es losgange: „BULA EVERYBODY!" het dä gschreit u aui zrügg „BULA" u mir so „was geit de da itz ab???". Wo mr id Nöchi vor Insle si cho gumpet plötzlech e wiud gwordni Horde i Strohröckli usem Busch - Kannibaleagriff... Zur Versöhnig hei mr aber när am Strand es Willkommensliedli gsunge becho.

Auso, ändlech mau acho, es riese Affetheater uf dr Insu für die Tagestouris u mir dämfau mau ab ids Bett, di verlorni Nacht ga nachehole. U trotz em Meiss rund um üses Hüttli het sechs sogar so guet gschlafe, dass mr scho mau ds erste Zmittag hei verpasst. Hätt e mer gwüsst dass si am nächste Tag dr Räge uselöh, hätt mr üs äuä meh Müeh gä, das Tägli no chli z gniesse...

Abgseh vom Räge u dr Animation für d Tagestouris (z.B. Crab Race) isch d Insle aber no zfriede u ganz hübsch gsi. O we mr üs mit dr Zyt fasch chli gfange si vorcho u hei gwartet u gwartet, bis di 6 reservierte u scho zaute Nächt ändlech si düre gsi u mr hei chönne ga. Aber im grosse u ganze hei mr üs guet amüsiert u vom stränge Flug erhout. Het paar ganz witzige u interessanti Lüt gha, dass ömu d Äbe nie längwilig si worde. Es het dert anschiinend geng öppe Sägu-Yachte wo vordranne ankere u denn hets paar ka, wo scho lenger dert si gsi. E kanadischi Familie wo sit 4 u es holländisches Päärli wo sit 7 Jahr ungerwäx isch zum Bispiu. U nätürlech d Marta, üsi spanischi Trinkkumpanin für die erste zwe u dr Oskar, die spanischi Ungerhautig für die rästleche Nächt. Maria, d Mamma vor Insle het sich geng guet um üs kümmeret. U ab und zue hets no Fire Dancing gä, ou ganz nätt zum gugge...

Ja u denn isch ändlech Mänti worde u mir ab uf Suva. Das isch d Houptstadt vo Fiji u mit sine 350'000 Iwohner die Metropole vom Südpazifik. Nach dem mr mit em Böötli si a Land acho u vom ne Minibus vor dr Polizeistation si abgsetzt worde, het is dr Porzilischt dr Bus aghautet u mir si zfride i öppe 4 Stung düre ganz Süde uf Suva zucklet. U natürlech hets dr ganz Tag gschiffet...

Aber mir hei ganz es gmüetlechs Guesthouse gfunge us gnosse, mau wieder festi u vor auem trochnigi Wäng für üs z ha. U drum si mr o grad e Tag lenger blibe aus mr hei vorgha, trotz em schlächte Wätter. Das heisst, am zwöite Tag ischs fasch dr ganz Tag troche blibe! Auso hei mr üs d Stadt agluegt u si ids Museum, wo si so Sache hei wie d Schüssle u d Gable, wo e bekannte Missionar drmit ufgässe isch worde, irgend es Stück (sig schins ds letschte wos git) vor Bounty u was weiss i no aus. U am dritte Tag e Compi Tag igleit (dr letscht Blogitrag...) u üsi Witerreis buechet: next stop Levuka.

U d Areis allei isch es öppe scho Wärt gsi. Mau es Flugi wo nid muesch Angst ha, dass de ke Fänsterplatz bechunsch, es hei nämlech nume grad mau 8 Passagiere Platz u Gang gits gar kene. Scho dr Flughafe ds Suva het drna usgseh, aus gäng da nid grad die gröbste Flüger los. Je e Tür für Dosmetic (2 Schauter) u International (öppe 4) u es chlises Beizli. Dr Role het sich entschiede, nid ufs Klo zga wüu ds Männdli wär im International gsi...

U när hei mir mau gwartet bis bi däm Northern Air Schauter mau eine chunt, irgendwenn ischer cho, het üses Gepäck uf die auti Waag gsteut u när no üs beidi mitsamt em Handgepäck. Wahrschiinlech hei mr beidi seeeehr schwärs Handgepäck gha... Irgendwenn hei mr när o ufs Gate chönne, auso das wo si dert so nenne, zäme mit de beide angere Passagiere u schlussändlech i das Flügerli istige. U herrlech isches gsi, mau ändlech schöns Wätter, nume leider nach 12 Minute scho vrbi.

Glandet si mr bire Baragge, es het eine gha wo ds Gepäck u d Post het uf nes Chäreli glade, eine wo wichtig het drigluegt u 2 Outo hinger dr Baragge. Vore isch si agschribe gsi mit Arrival u we me düreglüffe isch hets vor angere Site när Departure gheisse. Ds Gepäck hei mr säuber vom Chäreli ghout u zum Glück isch ds einte vo dene Outo es Taxi gsi, wo üs mit uf Levuka het gno. Wit u breit hets nämle nüt gah ussert so öppis wie e Strass, e Bousteu, Böim u ds Meer.

Ja u da wär mr när gsi, ir ehemalige Houptstadt vo Fiji, mit de Hüser entlang dr Beachstreet wo zu Zyte vom Wiude Weste si bout worde u o so usgseh. Itschegget hei mr im eutischte Hotel vom Südpazifik, 1880 oder so, u zwar nid im Hotel säuber sondern im ne chline Cottage mit Schlaf- u Wohnzimmer, em ne Chucheli u Terasse mit Sicht ufs Meer u aui Lüt wo ar Beachstreet entlang loufe. Herrlech! U aui angere Gschichtli vo Levuka de bim nächste Stop, jetzt isch Zyt für is Bett...